Egaununo 15

Sirongwa sokuhamena nkenda

WA DIVA eyi ayi tanta kukara nelitondororo ndi?— Elitondororo kutanta asi kudira kuhara muntu morwa age kwa lisiga nose ndi kuuyunga eraka lyapeke. Yipo nye, kukara nelitondororo kuna kutanta asi kukara nomalizuvho gomadona kuhamena gumwe komeho o ya mu dive.

Omu ono kugazara, ya hungama mokunyenga muntu komeho o ya mu dive nawa-nawa morwa age kwa lisiga nose ndi?— Hawe, elitondororo kapisi ewa ntani kapi ali likida nkenda. Kapisi tu nyenge muntu morwa yeeyi ga lisiga nose.

Wa diva ko muntu ogu ga kara nosipapa sa lisiga nesi soge ndi ogu a uyunga eraka eli lya lisiga neli lyoge ndi?— Nampo wa diva ko vantu ava va dira kulifana nove morwa va remana ndi kwa kara nouvera. Ove kulikida nkenda neharo kwava va lisiga nove ndi?—

Nsene tu purakena koMurongi goMunene, Jesus Kristusa, ngatu likida nkenda kwanavenye. Yi kare asi muntu kwa tunda kosirongo sapeke ndi sipapa sendi sa lisiga nesi setu, twa hepa kumulikida nkenda. Nampili ngomu kapisi yiyo va pura vantu navenye, aso kuna kara sirongwa esi ga rongere Jesus. Tu ze tu ka zogere kuhamena sirongwa esi.

Mujuda ogu ga kere nomalitondororo kwava wopeke kwa wizire kwaJesus nokumupura epuro asi: ‘Yinke nani rugana ni paruke narunye?’ Jesus ga yi divire asi mugara ogu kwa here kumuheteka a uyunge asi twa hepa kukara tupu nonkenda novantu worudi rwetu ndi womvharerwa zetu. Mevango lyokumulimburura kuvyukilira, Jesus kwa pulire mugara asi: ‘Yinke azi tanta Veta zaKarunga eyi twa hepa kurugana?’

Mugara ta limburura asi: ‘O hare Jehova Karunga goge nomutjima goge nagunye ntani o hare hena mukweni ngwendi moomu wa lihara nyamoge.’ Jesus ta tanta asi: ‘Ono hungike kulimburura! O yi rugane eyi, ngo gwane mwenyo gwanarunye.’

Nampili ngoso, mugara kapi ga here kulikida nkenda ndi eharo kovantu owo va lisigire nendi. Yipo nye ga hetekerere ko kuligusa-gusa mo. Ta pura Jesus asi: “Mwene ogu mukwetu yilye?” Age nampo kwa here Jesus a tante asi: “Vakweni kuna kara vakaume woge wovanene” ndi “vantu ava va lifana nove.” Mokulimburura epuro, Jesus kwa simwitilire kuhamena Mujuda noMusamaliya. Esimwititi kwa kere ngesi:

Mugara kwa gurumukire monzira zokutunda kositata saJerusarema a ze koJeliko. Mugara ogu kwa kere Mujuda. Ha ga za mokugenda, tava mu kwata vanamahaka. Tava mu toona ta ligandere pevhu makura tava gusa yimaliwa noyikoverero yendi. Vanamahaka kwa mu toonene dogoro kuhara kufa.

Karuwogona tupu, tapa ya piti mupristeli. Ta mono mugara ogu ga remanene unene. Ngano yinke wa rugene?— Mupristeli ta ka zapuka makura ta ka za. Age kapi ga sikamene. Kapi ga rugene ko yuma mokuvatera mugara gwina.

Mugara gumwe gomoukerelikarunga nage kwa gendere nzira zoozo. Age kwa kere Murevhi ogu nga rugana pontembeli moJerusarema. Age ga sikamene nokuvatera mugara gwina ndi?— Hawe. Age kwa rugene ngamoomu ga rugene mupristeli.

Moruhura, tapa wiza Musamaliya. To mu mono omu ana kukunkumuka monzira ndi?— Age ga mwene Mujuda ana remana unene. Koneka asi sinzi soVasamaliya ntani noVajuda kapi va lihere-here. (Johanesa 4:9) Musamaliya ga sigire mugara gwina ga hana kumuvatera ndi? Age ga tente nye asi: ‘Morwasinke nani vaterera Mujuda ogu? Ngano nyame nina remana, age ngano kapi ana vatere nge.’

Musamaliya ta tara mugara ogu ga rere konzira, makura ta mu fire nkenda. Age ga lizuvhire asi kapi tayi wapa mokusiga mugara gwina a fe. Makura ta humburuka kosindongili sendi, ta zi komugara, ta tameke kupakera mbili yironda yendi. Ta tjire po magadi novhinyu. Eyi ngano ya vaterere yironda yi veruke. Makura Musamaliya ta dingi yironda nosikehe.

Musamaliya ta rondeke nawa mugara posindongili sendi. Makura tava gendi kanunu-kanunu dogoro tava ka sika kohotera. Oko Musamaliya ta ka gwanena mugara gwina evango lyokukara, makura ta mu pakere nawa mbili.

Makura Jesus ta pura mugara gwina ga uyungisire asi: ‘Omu ono kugazara, pwava vagara vatatu, yilye ga kere po mukwawo gomuwa?’ Ngapi omu ono kugazara? Mupristeli ndi Murevhi ndi Musamaliya?—

Mugara ta limburura asi: ‘Googwina mugara ga sikamene nokupakera mbili mugara ogu ga remanene, yige mukwawo po gomuwa.’ Jesus ta tanta asi: ‘Ono hungike. Zende, nove o ka yi rugane.’—Rukasa 10:25-37.

Alyo kuna kara esimwititi lyewa! Alyo kulikida nawa-nawa asi wolye vakwetetu. Awo kapisi vakaume vetu wovanene tupu. Ntani awo kapisi vantu ava va kara nosipapa sokulifana nesi setu ndi ava ava uyunga eraka lyetu tupu. Jesus kwa tu rongere tu likide nkenda kovantu, yi kare asi kupi va tunda ndi ngapi omu va fana ndi eraka musinke ava uyunga.

Jehova Karunga kapi ga kara nomalitondororo. Jesus ga tente asi: ‘Guhyeni gemeguru kupumisira ezuva lyendi kovantu wovadona nava wovawa. Age hena kurokesera mvhura kovantu wovawa nava wovadona.’ Yipo nye, twa hepa kulikida nkenda kwanavenye, ngamoomu ga kara Karunga.—Mateusa 5:44-48.

Nsene o mona gumwe ana remana, yinke no rugana?— Ngapi nsene ogo muntu kwa tunda kosirongo sapeke ndi sipapa sendi sa lisiga nesi soge? Age simpe mukweni, ano wa hepa kumuvatera. Nsene asi ove o munona mokumuvatera, kuvhura o hundire mukurona mokuyirugana. Ndi kuvhura o ka zigide muporosi ndi murongi gokosure. Ngoso ove kuna kulikida nkenda, ngwendi mugara gwina goMusamaliya.

Murongi goMunene kuna tu harere tu likide nkenda. Age kuna hara tu vatere wopeke, yi kare asi yiwo wolye. Eyi yiyo ga simwitilire esimwititi lyokuhamena Musamaliya gonkenda.

Kosirongwa esi sokuhamena kulikida nkenda kovantu yi kare asi rudi ndi mvharerwa zawo musinke, resa Yisewe 19:22; Yirugana 10:34, 35; ntani 17:26.

[Mafano pepenuno 83]

Ngapi omu natu vhura kutekura owo va lisiga nose?

[Mafano pepenuno 84, 85]

Morwasinke ga karerere Musamaliya mukwawo gomuwa?

[Efano pepenuno 86]

Ngapi omu no vhura kukara mukwawo gomuwa?