Morwasinke ya karera epuko kuruganesa umpure?

Kutunda unona wendi, Barbaraa nga mono mamoneko nokuzuvha mazwi ntani ga pulire asi nga uyunga novanekoro vendi wokufa. Age namugara gwendi Joachim ngava resa nobuke doumpure ntani kwa divire kuresa nawa yikarata youmpure. Ayo kwa va likidire asi ngava gwana yimaliwa yoyinzi ano konyima yosili va ya gwene yimaliwa mongesefa zawo. Ezuva limwe yikarata yawo kwa va rondwere asi vantu wosiponga ngava wiza kembo lyawo ntani kwa va tanterere eyi nava rugana mokulipopera vene.

NAMPILI NGOMU kupura moumpure kumoneka ngwendi yininke yanare nye simpe kuna divikwa mouzuni mudima. Vantu wovanzi kuruganesa yikatemba nononzimbu nonontarero mokuzanekeda va dive yokomeho.

Wa yi diva asi Bibeli za uyunga kuhamena umpure ndi? Eyi za uyunga ko kuvhura yi ku tetukise.

Eyi azi uyunga ko Bibeli kuhamena umpure

Veta ezi ga pere Karunga vantu vendi moIsraeli zanare kwa tente asi: ‘Mwa ha sigilira vantu veni va hame koyininke eyi yoyirogesa neyi yomaunganga neyi yomazanekedo ndi youmpure. Walye omu va tarerere va pure kovadimu. HOMPA Karunga gweni kwa nyenga vantu navenye ava ava rugana yininke yoyidona ngesi.’ (Deuteronomium 18:10-12) Morwasinke Jehova ga nyengera eruganeso lyoumpure?

Ngomu sihorokwa sokuhova sina yi tumbura, wovanzi kwa pura asi vanamwenyo kuvhura kuuyunga novafe ntani nombudi edi ava gwana nado kutunda kovafe. Mapuliro gangoso kutunda kweyi aga rongo maukerelikarunga goyimpempa gomanzi asi muntu apa a fu kukaparuka hena. Nye mokulisiga, Bibeli kwa tanta asi: “Vafe kutupu eyi va diva.” (Muudisi 9:5) Azo kwa faturura asi vafe kwa fana ngwendi kuna kara monompofu dononene, va hana kudiva eyi yina kuhoroka.b (Mateusa 9:18, 24; Johanesa 11:11-14) Nsene asi yimo ngoso, kuvhura o lipure asi, ngapi natu faturura nye yihorokwa eyi vantu ava ligwanekere nayo kuhamena yindumbandumba? Wolye nawa-nawa ava uyungisa vantu?

Kuuyunga nonompepo donondona

Mavangeli kwa tanta asi apa Jesus ga kere pevhu age kwa uyungire nonompepo donondona. Marukusa 1:23, 24 kwa uyunga asi: “mpepo zondona” kwa tantererere Jesus asi: “Ame na ku diva asi nyove yilye.” Nompepo donondona nove da ku diva. Nye ove wa di diva ndi?

Komeho a site vantu, Karunga kwa sitire vana vendi wopampepo ndi vaengeli. (Joba 38:4-7) Vaengeli nonkondo kupitakana vantu. (Vahebeli 2:6, 7) Awo nonkondo nonondunge unene ntani kwa va sitire va rugane mpango zaKarunga. Muepisarome kwa dimbire asi: “Tangeni HOMPA, one vaengeli mapenda gononkondo, ava omu limburukwa koyipango yendi, tomu purakene eyi a tanta!”—Episarome 103:20.

Bibeli kwa horora asi mwa za siruwo muengeli gumwe kwa uyungire naAdamu naEva. Nositambo musinke? Kwa va kumbagerere va sige Karunga, Musiti gwawo. Pokurugana ngoso, age kwa ya kere Satana Muzonaguli, munayimpempa ntani murwanesi gwaKarunga.—Genesis 3:1-6.

Konyima zosiruwo, vaengeli vamwe kwa ‘zumbire uhingiro wawo’ meguru tava gusa marutu gopanyama nokuyakwara vakadi wovawa pevhu. (Juda 6; Genesis 6:1, 2) Vaengeli ava wokurwanesa novana vawo kwa ya zonagwire vantu, morwa ‘nyanya zawo kwa lihanenene napenye.’ Nampo wa diva sihorokwa somoBibeli omu Karunga ga hagekesere po nyanya novadinikarunga moruhanzo rwaNowa.—Genesis 6:3, 4, 11-13.

Mema goruhanzo kwa ninkisire vaengeli owo wovadona va sige marutu gawo gopanyama nokutengura meguru. Nye Musiti kapi ga va pulisilire va tengure ‘kouhingiro wawo’ oku va hovere kukara. Kwa kara ngwendi kwa va tura “moyipandeko.” (2 Peturusa 2:4, 5) Bibeli kutumbura vaengeli ava wokurwanesa asi “nompepo donondona.” (Jakopo 2:19) Ado yido adi gava nonkondo dokurugana umpure.

Eyi da hara nompepo donondona

Sitambo sonompepo donondona seyi adi uyungire novantu kuna kara sokuninka vantu va dire kukarera Karunga Jehova. Nonkondo edi adi ruganesa nompure kudigwana konompepo donondona, ano eyi kuninka vantu va dire kukara nediwo lyousili kuhamena Karunga nokutulisa po elikwatakano nendi.

Sitambo sauvali sonompepo donondona kusimonena momupitisili gwado Satana, ogu ga hetekere Jesus. Satana kwa here kupa Jesus “mauntungi gouzuni nomaufuuli gamo.” Sitambo sendi musinke sa kere? Kwa here Jesus ‘a twe nongoro pevhu a mu tongamene.’ Yimo, Satana nonompepo dendi kwa hara kuvakarera. Jesus ga nyokerere po magano gokuzumba Karunga noukareli wendi wousili.—Mateusa 4:8-10.

Mevango lyokuuyunga novantu naina, nompepo donondona kukambadara kupukisa vantu mononkedi edi adi dili kumoneka ngwendi nondona kukwatera mo eruganeso lyokatemba ndi nonzimbu ndi nontarero mokuzanekeda nokuzagura nonzodi. Da ha ku pukisa nompepo donondona! Ado kuruganesa yininke oyo di pukise vantu yipo va dire kukarera Jehova. Nsene kapi dina kusikisa mo sitambo sado, ado kuhepeka nokukoresa vantu. Nsene asi yimo ayi ku horokere ngoso, yisinke eyi no rugana yipo di dire kukupukisa?

Omu no nyokera po umpure

Takamesa, nompepo donondona edi adi uyunga novantu ado nonkore daKarunga, ezonauko lina kudindindira. (Juda 6) Ado vanayimpempa ava ava lininkisa ngwendi vafe. Ngapi no lizuvha nsene no dimburura asi mukweni ogu wa hara kwa lininkisire nositambo sokukugusa ko koyininke eyi wa hara? Ngapi omu no lizuvha nsene ngo ya nongonona asi ove kwa likwatakana nomuntu goruhonda koInterneta wa hana kuyidivira? Kulikwatakana kumwe nonompepo donondona siponga unene. Wa hepa kurugana paapa wa hulira mokudinyokera po. Yisinke wa hepa kurugana?

Konyima zokulironga eyi Matjangwa ga uyunga ko kuhamena umpure, wovanzi ava va tungire moEfeso kwa hwikire nobuke dawo doumpure, nampili ngomu da kere dondiro. Awo kwa ‘di hwikire komeho zovantu.’ (Yirugana 19:19, 20) Naina yininke ya likwatakana noumpure kapisi yikatemba tupu nononzimbu ndi nontarero nye hena kupitira kotivi nokoInterneta. Nyokera po nayinye eyi ayi twaredesa kokulikwatakana kumwe noumpure.

Diworoka valikwali vana tumbura ketamekero lyosirongwa esi. Yikarata yawo kwa va tanterere asi vantu wosiponga ngava wiza kembo lyawo nye kapisi ngava va purakene ndi va tambure nkenye eyi ngava va pa. Nampili ngoso, apa Connie naGudrun woNombangi daJehova va wizire pembo lyoJoachim naBarbara nokuvatantera asi vana va retere ko mbudi zongwa zokuhamena kwaKarunga, awo va tokwere kupurakena. Nzogera zawo kwa twaredesere dogoro kosirongwa soumpure, Connie naGudrun kwa geve mauzera gouhunga gomoMatjangwa kuhamena umpure. Konyima yipo va tamekere kulironga Bibeli.

Joachim naBarbara kwa ya hagekere kulikwatakana kumwe nonompepo donondona. Nombangi yipo da va tanterere asi nompepo donondona kapi ngadi yi hafera kweyi vana kulironga Bibeli. Eyi yiyo ya ya horokere, Joachim naBarbara kwa ligwanekerere nomaudigu morwa nompepo donondona ngadi va homokere. Pokaruwogona, ngava kara nowoma nkenye masiku dogoro kooku va dirukilire monzugo zapeke ntani va dilire kuligwanekera noudigu. Mosiruwo nasinye soudigu, valikwali ava kwa tulire epuro mononkango domoVafilipi 4:13 edi asi: “Ame kuvhura nayinye nononkondo dogu a pameke nge.” Jehova ga tungikire etokomeno lyawo, ano konyima nompepo tadi ya va sigi. Naina, Joachim naBarbara kuna kara vakareli woruhafo vaJehova Karunga.

Matjangwa kukorangeda navenye ava vana hara Jehova a va tungike asi: “Ligaveni nye kwaKarunga, mu nyokere Muzonaguli, makura age ta mu suwurukwa. Hedeni Karunga pepi, nage a mu hede pepi.” (Jakopo 4:7, 8) Jehova Karunga nga ku vatera o manguruke ko konompepo donondona nsene ono hara. Joachim naBarbara pokudiworoka omu va va mangurura ko konompepo donondona awo kukwatesa ko nomutjima nagunye nonkango demEpisarome 121:2: “Ekwafo lyange kutunda kwaHOMPA.”

[Nonkango dokonhi]

[Nonkango pepenuno 11]

Umpure kukondera vantu va dire kukara nelikwatakano naKarunga

[Nonkango pepenuno 12]

“Hedeni Karunga pepi, nage a mu hede pepi.”—JAKOPO 4:8