Ruganena Jehova nomutjima nagunye
“Munwange, tani ku pangere o dive Karunga goguhwo, o mu ruganene nomutjima nagunye.”—1 HIST. 28:9.
PAPARA MALIMBURURO GOMAPURO AGA:
Yisinke agu tanta mutjima gopasifanekeso?
Nkedi musinke natu ruganesa mokukonakona mutjima gwetu?
Ngapi omu natu twikira kuruganena Jehova nomutjima nagunye?
1, 2. (a) Ruha musinke rorutu oru ava ruganesa unene pasifanekeso moNonkango daKarunga kupitakana maruha makwawo? (b) Morwasinke ya karera nomulyo tu kwate egano eyi agu tanta mutjima gopasifanekeso?
NONKANGO DAKARUNGA pamwe kutumbura maruha gorutu romuntu monkedi zopasifanekeso. Pasihonena, Joba kwa tente asi: ‘Matwi goge yimo ga hafera kuzuvha nonkango.’ Hompa Saromo kwa tente asi: ‘Kukara neguwo nkenye apa kukukutika yisupa.’ Jehova kwa tantererere Hesekiyeli asi: “Mutwe goge tani gu kukutike ngwendi kawe.”—Joba 12:11; Yis. 17:22; Hes. 3:9.
2 Ruha rumwe rorutu kururuganesa unene pasifanekeso moBibeli kupitakana maruha makwawo. Aro kwa ru tumbura mekanderero lyaHana gomulimburukwi asi: “HOMPA ana zwida mutjima gwange nehafo.” (1 Sam. 2:1) Vatjangi woBibeli kwa tumbura mutjima konyara yikando eyovi, unene po monkedi zopasifanekeso. Ayo ya kara nomulyo asi tu kwate egano eyi gwa fanekesa mutjima morwa Bibeli kututantera asi ago kwa vera gwa tjinda kuveruka, ano twa hepa kugutakamesa.—Resa Jeremiya 17:9.
YISINKE AGU TANTA MUTJIMA GOPASIFANEKESO?
3. Ngapi omu natu vhura kudiva ntanto zomutjima gopasifanekeso moBibeli? Gava sihonena.
3 Nampili ngomu Bibeli azi dili kutumbura eyi agu tanta mutjima gopasifanekeso, ose kuvhura simpe tu dive eyi agu tanta. Monkedi musinke? Pasihonena, gazadara kefano lyenene eli va ruganesa komamanyagona eyovi aga va tura kumwe. Mokumona nawa efano nalinye, wa hepa kuligora mo nakauke yipo o vhure kulimona nawa. Mokulifana, twa hepa kutarurura nkango “mutjima” ezi va ruganesa moBibeli momarupe gokulisiga-siga yipo tu kwate egano eyi azi tanta. Yisinke agu tanta mutjima gopasifanekeso?
4. (a) Yisinke azi tanta nkango “mutjima”? (b) Yisinke adi tanta nonkango daJesus domwaMateusa 22:37?
4 Vatjangi woBibeli kuruganesa nkango “mutjima” pokusingonona muntu gomonda. Ayo kwa kwatera mo eharo, nomagazaro noyikara nonkareso nevhuliko nomalizuvho noyitambo yetu. (Resa Deuteronomium 15:10; Yisewe 13:12; Yirugana 2:26.) Nye poyiruwo yimwe nkango “mutjima” kapi azi tamba koyininke oyo. Pasihonena, Jesus kwa tente asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye.” (Mat. 22:37) Apa nkango “mutjima” kwa tamba keharo nokomalizuvho gene-gene gomuntu. Jesus kwa tumbwire mutjima nomwenyo nonondunge nkenye esi pwaselike, morwa kwa here kunkondopekera asi twa hepa kulikida eharo lyetu kwaKarunga kupitira momalizuvho ntani hena nomomparukiso nomonondunge detu. (Joh. 17:3; Efe. 6:6) Nye apa nkango “mutjima” ava zi tumbura pwazelike, azo kutamba komuntu gomonda.
EYI WA HEPERA KUTAKAMESA MUTJIMA
5. Morwasinke natu ruganena unene mokukarera Jehova nomutjima nagunye?
5 Hompa Ndafita kwa diworokesere Saromo asi: “Munwange, tani ku pangere o dive Karunga goguhwo, o mu ruganene nomutjima nagunye neharo lyewa.” Ntani hena Ndafita kwa kandererere kwaJehova asi: “Ame na yi diva asi ove kukonakona mutjima gwankenye muntu.” (1 Hist. 28:9; 29:17) Jehova kukonakona nomutjima nadinye, kukwatera mo detu. (Yis. 17:3) Nsene Jehova a hafera eyi a mono monomutjima detu, ose kuvhura tu kare vakaume vendi nokukara nomeho zoruhafo. Yipo nye natu kwamena epukururo lyaNdafita lyokurugana unene mokukarera Jehova nomutjima nagunye.
6. Yisinke twa hepa kudimburura kuhamena etokomeno lyetu lyokuruganena Jehova?
6 Yirugana yetu youpampi ngovantu vaJehova kulikida asi twa kara neharo lyenene lyokuruganena Karunga nomutjima nagunye. Nye twa yi dimburura asi uzuni woudona waSatana nokudira kusikilira mo kwetu kwa kara nononkondo dokuvhura kusesupika etokomeno lyetu lyokuruganena Karunga nomutjima nagunye. (Jer. 17:9; Efe. 2:2) Mokuninka asi ya ha tu horokera oyo, twa hepa kukonakona nkenye apa mutjima gwetu. Ngapi omu natu vhura kuyirugana oyo?
7. Yisinke ayi likida omu gwa kara mutjima gwetu?
7 Kwato muntu gokuvhura kumona eyi ya kara momutjima gwetu, ngwendi moomu ya kara asi kwato ogu a mono ntjima-ntjima zositji. PEudiso lyopoNdundu Jesus kwa tente asi ngamoomu yiyimwa ayi likida nsene sitji siwa ndi sidona, yimo hena yirugana yetu ayi likida omu gwa kara mutjima gwetu. (Mat. 7:17-20) Tu zeni tu ka konakone simwe soyirugana oyo.
OMU NO KONAKONA MUTJIMA GOGE
8. Kuliza nononkango daJesus domwaMateusa 6:33, ngapi omu atu likida eyi ya kara momutjima gwetu?
8 PEudiso lyopoNdundu, Jesus kwa tantererere hena vapurakeni vendi eyi va hepere kurugana va likide eharo lyawo lyokuruganena Jehova nomutjima nagunye. Age kwa tente asi: ‘Yipo nye nomu hovera tanko kupapara Untungi waKarunga neyi ga hepa ko kweni, ano yininke eyi nayinye ngano ngava yi mu gwederera po.’ (Mat. 6:33) Yosili, eyi atu tura muhowo meparu lyetu kulikida eharo nomagazaro noyitambo yetu. Pokuteda kuhamena eyi atu tura muhowo meparu lyetu kuna kara nkedi zimwe omu natu diva nsene ose kuna kuruganena Karunga nomutjima nagunye.
9. Ezigido musinke ga geve Jesus kovagara vena, ntani ngapi omu va limbwilire?
9 Tu zeni tu konakone eyi ya horokere konyima tupu zapa Jesus ga tantererere vasikuli vendi va ture muhowo Uhompa. Sihorokwa esi kulikida asi kuvhura kudiva omu a lizuvhu muntu momutjima gwendi kweyi a tura muhowo meparu lyendi. Rukasa kututantera asi Jesus ‘ta tokora kuza koJerusarema,’ nampili ngomu ga divire asi tava ka mu hepeka. Jesus novapositoli vendi “hava hokwa monzira zawo” zokuza koJerusarema, ta ligwanekere novagara vamwe ava ga tanterere asi: ‘Kwameni nge.’ Vagara owo va kere neharo lyokutambura ezigido lyendi, nye kwa here kurugana yininke yapeke muhowo. Mugara gumwe kwa limbwilire asi: ‘Hompa, siga nge tanko ni ka vhumbike otate.’ Ano mukwawo kwa tente asi: “Ame kuna hara ni ku kwame, Hompa. Nye siga nge tanko ni ka rekere vembo lyetu.” (Ruk. 9:51, 57-61) Ose kuvhura tu mone elisigo ketokoro lyaJesus lyokurugana mpango zaKarunga nelimbururo eli va geve vagara vena. Awo kwa tulire muhowo eyi va here, ano eyi kwa likidire asi kapi va kere neharo lyokuruganena Karunga nomutjima nagunye.
10. (a) Ngapi omu twa limburura ezigido lyaJesus lyokukara vasikuli vendi? (b) Sifanekeso musinke ga geve Jesus?
10 Mokulisiga novagara vena, ose kwa tambura ezigido lyaJesus lyokukara vasikuli vendi, ano ngesi ose kuruganena Jehova nkenye ezuva. Monkedi zangesi, ose kulikida omu atu lizuvhu momutjima gwetu kuhamena Jehova. Nye nampili ngomu tuna litura mo unene mokuruganena Jehova, twa hepa kudiworoka asi mutjima gwetu kuvhura kukara mosiponga. Siponga musinke oso? Ose kuvhura kugwana elimbururo kweyi ga tanterere Jesus vagara vena ga zigidire va kare varongwa vendi, pokutanta asi: “Nkenye ogu ana vareke kupurura, nye a tare konyima, kapi ga wapera Untungi waKarunga.” (Ruk. 9:62) Sirongwa musinke natu lirongera ko kosifanekeso esi?
OVE KWA ‘HAMA KOUWA’ NDI?
11. Mosifanekeso saJesus, yisinke ya horokerere murugani ogu ana kupurura, ntani morwasinke?
11 Tu zeni tu ka konakone momunene sifanekeso saJesus yipo tu ka yi kwate nawa egano. Murugani kuna kupurura mepya. Ngomu ana kupurura ta gazadara yininke yembo lyendi, ngwendi epata novakaume nonondya nomusika noyizoresa nomundwire. Age makura ta yi hara unene. Ngomu ana kupurura eharo lyendi koyininke oyo tali kuru unene dorogo ta setukire mo a ‘tare konyima.’ Nampili ngomu ana kara simpe noyirugana yoyinzi dogoro a ka kune, yininke oyo nare yina mu donganesa mokurugana sirugana sendi moomu sa wapera. Morwa murugani kapi ana lididimikire dogoro kouhura makura tayi guvisa hekurwendi.
12. Ngapi omu Vakriste vamwe vana kara moukaro wokulifana nomurugani gomosifanekeso saJesus?
12 Ngesi tu zeni tu ka tarurure sihorokwa sokulifana esi nasi vhura kuhoroka momazuva getu. Murugani kuvhura kumufanekesa kwankenye Mukriste ogu a moneka ngwendi kuna kurugana nawa nye mutjima gwendi kuna kara mosiponga. Pasihonena, tu gazadareni munazinyetu ogu a zi komapongo nokulihameka mosirugana sokuzuvhisa. Nye posiruwo sooso, age kuna kugazadara yininke yimwe yomouzuni eyi ga hara unene, ano mutjima gwendi guna yi tokomene unene. Konyima zokuruganena Karunga nomvhura dongandi, eharo lyendi koyininke oyo tali kuru unene makura ta setuka a ‘tare konyima.’ Nampili ngomu pwa kara simpe yirugana yoyinzi yokuzuvhisa, makura yininke oyo tayi mu donganesa a dire kuruganena Karunga ngwendi mwanare. (Fil. 2:16) Jehova, “Hompa gomuzangu,” age kuguva nsene murugani gwendi gumwe ta hageke kulididimikira.—Ruk. 10:2.
13. Yisinke ya kwatera mo kuruganena Jehova nomutjima nagunye?
13 Sirongwa sina zere. Kuruganena Jehova nomutjima nagunye kwa kwatera mo yoyinzi kupitakana tupu kuza nkenye apa komapongo nomoyirugana yokuzuvhisa. (2 Hist. 25:1, 2, 27) Nsene mutjima goMukriste gu twikira kuhara ‘kutara konyima,’ kutanta asi kuhara mparukiso zomouzuni, elikwatakano lyendi naJehova ngali kara mosiponga. (Ruk. 17:32) Yipo nye, kuruganena Karunga nomutjima nagunye, twa hepa ‘kunyenga udona tu hame kouwa.’ (Rom. 12:9; Ruk. 9:62) Nampili ngomu yininke yomouzuni waSatana ayi moneka ngwendi yiwa, twa hepa kutakamesa asi kwato eyi nayi tu hagekesa kuruganena Karunga nomutjima nagunye.—2 Kol. 11:14; resa Vafilipi 3:13, 14.
VANGARARA!
14, 15. (a) Ngapi omu Satana ana kuhetekera ko kupukisa mutjima gwetu? (b) Yi fanekesa omu Satana a kambadara kusesupika upampi wetu.
14 Eharo lyokuhara Jehova kututumangeda tu ligave kwendi. Sinzi setu twa yi likida monomvhura dononzi asi twa tokomena kuruganena Jehova nomutjima nagunye. Nye Satana simpe kuna kuhetekera ko kutupukisa. Age kuhomokera mutjima gwetu. (Efe. 6:12) Ga yi diva asi kapi tatu hageke usimbu-simbu kukarera Jehova. Yipo nye, Satana kuna kuhetekera ko kutupukisa pokuruganesa ‘yininke’ yomouzuni yi sesupike kanunu-kanunu upampi wetu. (Resa Marukusa 4:18, 19.) Morwasinke ngendeseso ozo zaSatana zina kumutompokera?
15 Pokulimburura epuro olyo, gazara asi ono kara nosihete somahangu. Nkenye apa no hepa nondya to zi o ka guse mo. To li nokugwana hena nonkondo. Tu tante asi muwidi ta wiza masiku nokuyagusa mo dama zimwe zomahangu. No yi dimburura ndi? Hawe! Masiku gokukwama ko ta wiza a ya guse mo hena dama zimwe. Simpe kapi no yi dimburura. Morwasinke? Morwa mahangu kwa kusesupa kanunu-kanunu monkedi omu no dira kuyidimburura. Mokulifana makondjeso gouzuni waSatana kuvhura kusesupika kanunu-kanunu upampi wetu. Nsene tayi horoka oyo, kuna fana ngwendi Satana kuna kumutompoka mokusesupika kanunu-kanunu sihete setu soupampi wokukarera Jehova. Nsene Mukriste kapi ana kuvangarara, kapi ta yi dimburura.—Matt. 24:42; 1 Pet. 5:8.
KUKANDERERA MULYO
16. Ngapi omu natu vhura kulikunga komakoto gaSatana?
16 Ngapi omu natu vhura kulikunga kwaSatana yipo tu twikire kuruganena Jehova nomutjima nagunye? (2 Kol. 2:11) Twa hepa kukanderera. Paurusa kwa korangedere vapuli vakwawo va rwanese “makoto goumbudi goMuzonaguli.” Ntani hena kwa va tantererere asi: “Omu kanderere nkenye apa oku tomu hundire ekwafo kwaKarunga.”—Efe. 6:11, 18; 1 Pet. 4:7.
17. Yisinke natu lirongera ko komakanderero gaJesus?
17 Mokukara noulimburukwi, twa hepa kutemwinina Jesus neharo lyendi lyokuruganena Jehova nomutjima nagunye. Rukasa kwa tjenge kuhamena omu ga kandererere Jesus komeho a ka fe asi: “Age makura tau mu gwana udigu wounene, makura ta kanderere unene.” (Ruk. 22:44) Esi kapisi siruwo sokuhova Jesus ga kandererere unene, nye posiruwo esi age kwa kere pepi nokulididimikira eheteko lyenene unene meparu lyendi apa pevhu, makura yipo ga ‘kandererere unene’ ano ekanderero lyendi va li limbwilire. Sihonena saJesus kulikida asi pamwe kuvhura tu kanderere unene kupitakana poyiruwo yimwe. Yipo nye moomu tuna kuligwanekera nomaudigu gomanene yimo gana kuvhuka mapukiso gaSatana ntani yimo hena twa hepa ‘kukanderera unene’ yipo Jehova a tu popere.
18. (a) Epuro musinke twa hepa kulipura kuhamena ekanderero, ntani morwasinke? (b) Yininke musinke ayi kundama mutjima gwetu, ntani monkedi musinke? (Tara kakende pepenuno 16.)
18 Ngapi omu makanderero gangoso naga tu kundama? Paurusa kwa tente asi: ‘Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu. Ano mbili zaKarunga, ezi za pitakana unene nondunge nadinye, ngazi kungira nomutjima deni.’ (Fil. 4:6, 7, NW) Nsene tuna hara kuruganena Jehova nomutjima nagunye, twa hepa kukanderera nononkondo ntani nkenye apa. (Ruk. 6:12) Lipura nyamoge asi: ‘Ame kukanderera unene ntani nkenye apa ndi?’ (Mat. 7:7; Rom. 12:12) Elimbururo lyoge kepuro olyo kulikida omu lya nkondopara eharo lyoge lyokuruganena Karunga.
19. Yisinke twa hepa kurugana mokuruganena Jehova nomutjima nagunye?
19 Ngomu tuna yi zogere nare, yininke eyi atu tura muhowo meparu lyetu kuhorora eyi ya kara komutjima gwetu. Twa hepa kutakamesa asi yininke yokonyima ndi makoto gaSatana ga ha sesupika etokomeno lyetu lyokuruganena Jehova nomutjima nagunye. (Resa Rukasa 21:19, 34-36.) Ngwedi muEpisarome, twa hepa kutwikira kulikwambera Jehova yipo tu limburukwe noveta dendi “nomutjima nagunye.”—Epis. 119:34.
[Kakende kepepenuno 16]
NONTAMBO NTATU EDI ADI KUNDAMA MUTJIMA GWETU
Ngwendi moomu atu gwanene mo mauwa apa agu rugana mutjima gwetu, nose kuvhura tu ture po nontambo dimwe dokuwapukurura ukanguki womutjima gwetu gopasifanekeso. Tarurura nontambo ntatu domulyo:
1 Nondya: Mutjima gwetu gwa hepa kugwana nondya dokugwanena po doukanguki. Mokulifana, twa hepa kudivilisa asi tuna gwana nondya dopampepo dokugwanena po kupitira melirongo lyanyamwetu nokuteda ko ntani nokuza komapongo.—Epis. 1:1, 2; Yis. 15:28; Heb. 10:24, 25.
2 Eliyombereso: Mokukara ono kanguka, mutjima gwetu gwene-gwene poyiruwo yimwe gwa hepa kupomba nononkondo. Mokulifana, kukara nomupampi moyirugana yokuzuvhisa nkenye apa kuninkisa mutjima gwetu gopasifanekeso gu kare guna kanguka. —Ruk. 13:24; Fil. 3:12.
3 Nkarapamwe: Mouzuni ou woudinikarunga twa hepa kurugana yipo tu paruke eyi ayi ninkisa mutjima gwetu gopasifanekeso gu kare nosinka. Nye, kuvhura tu sesupike sinka sangoso pokuponga kumwe novapuli vakwetu, ava va kara neharo lyokutupakera mbili ntani ava ava limburukwa Karunga nonomutjima dawo nadinye.—Epis. 119:63; Yis. 13:20.