Ove kulikida rupandu kouhwi wakarunga wononkwara ndi?

“HOMPA ngano ta yi gendesa, namuvenye ngomu kware hena, ngomu kare nomapata.”—RUTU 1:9.

PAPARA MALIMBURURURO:

Morwasinke natu tantera asi vakareli vanare vaKarunga kwa likidire rupandu kouhwi wendi wononkwara?

Ngapi omu twa yi diva asi Jehova ga kara nosinka ketokoro lyetu lyogu tuna kukwara?

Mapukururo musinke gomoBibeli kuhamena nonkwara ono hara kutura pasirugana meparu lyoge?

1. Singonona omu ga lizuvhire Adamu apa va mu reterere mukadi.

“HAWE ogu ntaantani damu-damu nyame nye, sisupa somoyisupa yange, nonyama zomonyama zange. ‘Mukadigara’ yilyo edina lyendi, yeeyi age kuna mu gusa momugara.” (Gen. 2:23) Ee, omu tupu ga hefe Adamu pokugwana mukadi! Eyi yiyo ga uyungilire nonkango odo! Apa Jehova ga ponyokesere Adamu monompofu dokufa nokutara, age kwa mu gusire rupatji rumwe nokururugana mukadi gomuwa. Adamu makura ta mu ruku Eva. Karunga kwa va gwanekedesere mononkwara doruhafo. Mokumona asi Jehova kwa ruganesere rupatji rwaAdamu mokurugana Eva, awo kwa likwatakanene unene kupitakana valikwali vantaantani.

2. Yisinke ayi kokere kumwe mugara nomukadi?

² Jehova kwa ungire vantu neharo lyokuligwanekera panyama, sikara esi asi kokere kumwe mugara nomukadi. Sinzi sovalikwali kuhuguvara asi eharo lyawo ngali karerera.

KWA HAFERERE UHWI WONONKWARA

3. Ngapi omu Isaka ga gwene mukadi?

³ Abirahamu gomulimburukwi kwa tere nonkwara asi mulyo unene. Yipo nye ga tumine mukareli gwendi koMesopotamiya a ka paparere Isaka mukadi. Ekanderero lyomukareli ogo kwa retere yitundwamo yoyiwa. Rebeka kwa ya kere mukadaIsaka nokuhamena mo mewapaiko lyaJehova lyoruvharo rwaAbirahamu. (Gen. 22:18; 24:12-14, 67) Nye eyi kapi yina kutanta asi tu paparere muntu mulikwali, age ga hana kutupura ekwafo. Naina, vantu wovanzi kuhorowora vene muntu ogu na kara mulikwali gwawo. Karunga nage kapi a horowere muntu mulikwali, nye age kuvatera Vakriste moyuma eyi nayimwe hena nsene va hundira evyukiso lyompepo zendi kupitira mekanderero.—Gar. 5:18, 25.

4, 5. Yisinke yina kulikida asi mukadona gomoSuramu nomusita kwa lihere unene?

⁴ Mukadona gomuwa gomoSuramu moIsraeli zanare kapi ga pulisilire vakwawo va mu sininike mokukara gumwe govakadi vahompa Saromo. Age kwa tente asi: “Tumbwidireni nge, one vakadi vaJerusarema, asi kapi ngomu tanganesa eharo lyetu.” (Rus. 8:4) Mukadona kwa here gumwe gwapeke, musita. Nelinunupiko, age kwa mu tanterere asi: “Ame mbya zomowiza tupu waSaroni, karugotogoto momuramba gomomburundu.” Nye musita kwa limbwilire asi: “Moomu azi fana mbya zakarugotogoto mokatji komega, yimo ga kara muholi zange mokatji kovakadi.” (Rus. 2:1, 2) Awo sili kwa lihere unene.

⁵ Morwa mukadona ogo nomusita kwa kere neharo lyenene lyokuhara Karunga, yipo elikwatakano lyawo lyomononkwara lya nkondoparere unene. Mukadona kwa tanterere muholi zendi gomusita asi: “Wa ha hamesera mutjima goge kwankenye eharo, nye kwange; nokukwaterera si nagepeke, nye nyame. Eharo kwa kara nononkondo ngwendi nomfa; uradi weharo nomfa dene-dene da lipwira. Alyo kuhwama tali twera ngwendi mundiro. Mema nokuvhura si kulidimisa; ru kare ruhanzo nokulidivida si. Nsene kweli ogu ana kuranda eharo nemona lyendi, tali swawisa tupu mwene.” (Rus. 8:6, 7) Valikwali woVakriste ngano va kare neharo lyokulifana mononkwara dawo.

ETOKORO LYOGE MULYO KWAKARUNGA

6, 7. Ngapi omu twa yi diva asi Jehova ga kara nosinka ketokoro lyetu lyogu tuna kukwara?

⁶ Etokoro lyoge lyogu ono kukwara mulyo kwaJehova. Karunga kwa rondwere Vaisraeli kombinga zoVakanani asi: “One novana veni nokulikwarera-kwarera si nawo, neisi ngava pukisa vana veni va va guse kwaHOMPA, ngava tongamene vakarunga nawopeke, makura HOMPA nga handuke a va haraganese po mosikando.” (Deut. 7:3, 4) Konyima zonomvhura dononzi, mupristeli Esira kwa tente asi: “One kapi mwa limburukwa, yiyo mwa retera Israeli unzoni pokukwara vakadi wovanayirongo.” (Esir. 10:10) Ntani mupositoli Paurusa kwa tanterere Vakriste vakwawo asi: ‘Mukadi moveta ga kara nsene yendi nomwenyo. Nye nsene asi yendi ana fu, makura ana manguruka a kware nkenye ogu ana hara, nye di kare nonkwara dosikriste ntani.’—1 Kol. 7:39.

⁷ Nsene mukareli gwaJehova gokuligava a kwara muhapuli, ngoso kapi ana kulimburukwa kwaKarunga. Vaisraeli womomazuva gaEsira kapi va limburukwire pokukwara “vakadi wovanayirongo.” Ayo epuko kwetu mokuncenuna marondoro gokuvyukilira gomoMatjangwa. (Esir. 10:10; 2 Kol. 6:14, 15) Mukriste ogu a kwara muhapuli kapi a likida rupandu kouhwi waKarunga wononkwara ntani kuvhura a zumbanese yitumbukira mombunga zaKarunga. Kapi tayi wapa pokuhundira Jehova a ku tungike pokukanderera asi: ‘Jehova, ame kapi ani ku limburukwa, nye tungika nge tupu.’

GUHYETU GEMEGURU GA TU DIVA UNENE

8. Faturura eyi twa hepera kukwama mapukururo gaKarunga kuhamena nonkwara.

⁸ Muntu ogu ga tota po ehina ga li diva unene omu ali rugana. Age kuvhura kugava mapukururo omu nava li ruganesa. Nsene tu ncenuna mapukururo ogo yisinke nayi horoka? Ehina kapi ngali rugana nawa. Nsene tuna hara kukara noruhafo mononkwara, twa hepa kukwama mapukururo aga a tu pe Jehova, Mutoti gononkwara.

9. Morwasinke Jehova ga gavera uhwi wononkwara?

⁹ Jehova ga diva nkenye eyi kuhamena vantu nononkwara. Age yige ga tura movantu malizuvho gokuligwanekera panyama yipo va ‘livhare.’ (Gen. 1:28) Karunga ga diva hena malizuvho getu gomukuma, morwa komeho a unge mukadi gokuhova, age kwa tente asi: “Kapisi nawa asi muntu a kare gelike. Tani mu ruganene ko gokumuhamena, mukwafi gwendi.” (Gen. 2:18) Jehova ana hara valikwali va gwane ruhafo mononkwara.—Resa Yisewe 5:15-18.

10. Ngapi omu nava vhura valikwali kuhafesa Jehova nampili peligwanekero panyama?

¹⁰ Morwa nzo nokudira kusikilira mo eyi twa pinga kwaAdamu, naina kwato nonkwara dokusikilira mo. Nye vakareli vaJehova, kuvhura kugwana ruhafo rousili mononkwara nsene va kwama Nonkango daKarunga. Pasihonena, Paurusa kwa geve mapukururo gokuvyukilira kuhamena eligwanekero panyama mononkwara. (Resa 1 Vakolinte 7:1-5.) Kuhara kureta vanona kapisi yizo konda zelike zokuligwanekera panyama. Eligwanekero panyama kuhafesa hena malizuvho govalikwali. Nye kuligwanekera panyama nomulikwali goge monkedi zondona kapi ayi hafesa Karunga. Valikwali woVakriste va hepa kuyirugana monkedi zongwa zeharo, yipo navenye va gwanene mo ruhafo.

11. Ngapi omu va mu tungikire Rutu morwa kurugana yininke monkedi zaJehova?

¹¹ Nonkwara da hepa kukara doruhafo kapisi deguwo. Embo lyoMukriste lya hepa kukara evango lyombili. Koneka eyi ya horokere nomvhura 3 000 da ka pita apa mufisayendi gomukurupe Naomi novangumweyi zendi Orupa naRutu va tundire moMowaba va ze koJuda. Naomi kwa korangedere vangumweyi zendi va tengure komuhoko gwawo. Rutu goMumowaba ogu ga kwama-kwamene ngorooro Naomi, kwa limburukwire kwaKarunga gousili, ano kwa mu huguvaresere ‘mokugwana mfuto zokuzulilira kwaHOMPA Karunga, ogu ga wizilire a ya mu gamene.’ (Rutu 1:9; 2:12) Rutu kwa likidire rupandu kouhwi waKarunga wononkwara nokuyakwara Bowasa, mukareli gwaJehova. Apa ngava ka mu vhumbwira mouzuni woupe waKarunga, nga ka hafa mokulironga asi age kwa ya kere zinyakurwaJesus Kristusa. (Mat. 1:1, 5, 6; Ruk. 3:23, 32) Ee, matungiko musi ga gwene mokurugana yininke monkedi zaJehova!

MAPUKURURO GOMAWA KONONKWARA DOKUWAPERA

12. Kupi oku no gwana mapukururo gomawa kuhamena nonkwara?

¹² Mutoti gononkwara kututantera eyi twa hepa kudiva mokukara nononkwara dokuwapera. Kwato muntu ga diva yoyinzi kuhamena nonkwara kupitakana Karunga. Bibeli yizo zelike za kara nomapukururo gomawa kuhamena nonkwara, ano nkenye ogu ana hara kugava mapukururo ga hepa kugagusa moBibeli. Pasihonena, mupositoli Paurusa kwa tjenge asi: “Nkenye mugara a hare mukadendi moomu ga lihara mwene, ano mukadi hena a fumadeke yendi.” (Efe. 5:33) Ureru koVakriste kukwata egano mapukururo ogo. Nye ngava ga tura pasirugana ndi? Ngava yi rugana nsene va kara norupandu kouhwi wendi wononkwara.a

13. Yitundwamo musinke ngayi kara nsene mugara kapi ana kukwama epukururo lyomwa-1 Peturusa 3:7?

¹³ Mugara goMukriste ga hepa kutekura mukadendi neharo. Mupositoli Peturusa kwa tjenge asi: “None si vagara, omu kare nonondunge novakadi veni, mu dive asi awo vantu va pira nonkondo, mu va fumadeke. Yeeyi nawo si ngava ka tambura kumwe neni uhwi waKarunga womwenyo. Omu yi rugane eyi, neisi ngayi limba makanderero geni.” (1 Pet. 3:7) Makanderero gomugara kuvhura a dire kugapurakena Jehova nsene kapi ana kukwama mapukururo gendi. Elikwatakano lyovalikwali naJehova kuvhura li kare mosiponga nokutwaredesa kosinka sosinene nokonomutangu nonyanya.

14. Ngapi omu mukadi gounongo a kundama epata?

¹⁴ Mugolikadi ogu adi pitisire Nonkango daJehova nompepo zendi zokupongoka kuvhura kurugana unene mokuninka embo lyendi li kare evango lyombili noruhafo. Yimo ya kara asi nturagumbo goMukriste ga hepa kuhara mukadendi nokumupopera parutu nopampepo. Mukadi ga hepa eharo lyamugara gwendi, yiyo ga hepera kutunga po yikara eyi nayi vatera mugara gwendi a mu hare. Yisewe 14:1 kutanta asi: “Mambo kwa ga tunga nounongo wovakadi, nye vagova vana ga haraganesa po.” Mukadi gounongo geharo kugwederera koruhafo rwemepata. Ntani age kulikida rupandu kouhwi waKarunga wononkwara.

15. Mapukururo musinke ga kara moVaefeso 5:22-25?

¹⁵ Valikwali kulikida rupandu kouhwi waKarunga wononkwara apa ava kwama sihonena saJesus omu ga tekwire mbungakriste. (Resa Vaefeso 5:22-25.) Valikwali ava va lihara-hara kulinunupika nokunyokera po nkareso zokudira kuuyunga kumwe nomulikwali gwawo ntani kapi ava pulisire yikara yoyidona yi zonagwise po nonkwara dawo. Jehova kutungika valikwali vangoso.

MUNTU WALYE A VA GAUNUNA

16. Morwasinke Vakriste vamwe ava karere ngorooro vadike?

¹⁶ Nampili ngomu sinzi sovantu ava tokora asi vana hara kukwara, vakareli vamwe vaJehova kukara ngorooro vadike morwa kapi ava gwana mulikwali gokuwapera. Vamwe kukara ngorooro vadike yipo va rugane unene mosirugana saJehova pwa hana madonganeso aga ga kara mononkwara. Yimo, udike kuvhura kureta ruhafo nsene o u ruganesa kuliza nonompango daJehova.—Mat. 19:10-12; 1 Kol. 7:1, 6, 7, 17.

17. (a) Nonkango musinke daJesus twa hepa kudiworoka kuhamena nonkwara? (b) Yisinke ga hepa kurugana Mukriste nsene kuna kutameka kudovaukira mulikwali gwamukwawo?

¹⁷ O kare asi mudike ndi wa kwara, natuvenye twa hepa kudiworoka nonkango daJesus edi asi: “Kapi mwa resa asi, ‘Ogu ga ungire muntu petameko, kwa va rugene va kare mugara nomukadi,’ yiyo ga tente asi, ‘Yipo nye na sigira mugara oguhwe nozina, a hamene mukadendi, ano mouvali wawo makura va kare nye rutu rumwe tupu.’ Awo kapisi vavali hena, hawe, awo rutu rumwe tupu. Eyi ga gwanekedesa Karunga, muntu walye a yi gaununa.” (Mat. 19:4-6) Kudovaukira mulikwali gwamukweni nzo. (Deut. 5:21) Nsene Mukriste kuna kutameka kutunga po edowo lyangoso, usimbu-simbu ga hepa kurugana ko yuma mokugusa mo edowo olyo, nampili yi mu retere kukora kokunene. (Mat. 5:27-30) Ayo ya kara nomulyo mokuvyukisa magazaro gangoso morwa mutjima gwa vera unene kwa tjinda kuveruka.—Jer. 17:9.

18. Ngapi omu o tara uhwi waKarunga wononkwara?

¹⁸ Nampili vantu ava va dira kudiva yoyinzi kuhamena Jehova Karunga nouhwi wendi wononkwara nawo kulikida rupandu kononkwara. Ose ngapi? Ngovantu ava va ligava kwaJehova Karunga goruhafo, ose kuyihafera pokulikida rupandu kouhwi waKarunga wononkwara momparukiso zetu.

[Nonkango dokonhi]

[Nonkango pepenuno 6]

Nonkwara donongwa kufumadeka Jehova nokuretera ruhafo navenye vemepata

[Efano pepenuno 5]

Rutu kwa likidire rupandu kouhwi waKarunga wononkwara

[Efano pepenuno 7]

Nove kulikida rupandu kouhwi waJehova wononkwara ndi?