Ame kwa likwata ukaume novakurona wounongo

Eyi ga uyunga Elva Gjerde

Konyara nomvhura 70 da ka pita gumwe ga dingwire embo lyetu nokugava magano gamwe kotate aga ga rundwilire eparu lyange. Kutundilira ezuva olyo, vantu wovanzi vapeke nawo kwa kundama eparu lyange. Ngomu sa pitire siruwo, ame kwa gwene kaume gomuwa unene kupitakana nkenye kaume. Tanko ni simwitire.

AME kwa hampurukilire nge monkurusitata Sydney moAustralia momvhura 1932, ano vakurona vange kwa pulire mwaKarunga nye kapi ngava zi kongereka. Onane kwa rongere nge asi Karunga nkenye apa kunomena, ano nsene ni rugana udona age nga tengeka nge. Eyi kwa ninkisire nge ni tjire Karunga. Nye, ame kwa here Bibeli. Apa onanegona ngava ya tu dingura moyikondovike, ngava tantere nge masimwititi gomanzi gomawa gomoBibeli. Ame ngani hafere madinguro gawo.

Apa na kere munona, otate ngava resa nobuke edi ngava gwana onane komukadi gokukurupa goNombangi daJehova. Otate kwa va tetukisire eyi ngava resa moyimbapiratjangwa oyo, ano va tamekere kulironga Bibeli noNombangi. Esiku limwe apa va kere nelirongo lyawo lyoBibeli, otate kwa mwene nge asi ame kuna kupurakena mokahore-hore. Otate kwa here kutantera nge asi ni ze ni ka rare, nye mugenda ta pura otate nsene name kuvhura ni kare po pelirongo lyawo. Morwa oyo, yipo na tamekere kurundurura eparu lyange nokutura po ukaume naKarunga gosili, Jehova.

Otate name yipo twa tamekere kuza komapongo goSikriste. Eyi va lirongere kwa va tumangedere va rundurure eparu lyawo. Ntani va tamekere kupangera ehandu lyawo. Eyi ya ninkisire onane namukurwange Frank, va tameke kuza komapongo.a Moune wetu kwa tulire po ezokomeho ano moruhura twa gwene ekuho ngoNombangi daJehova. Kutundilira opo, vakurona wovanzi kwa kundama eparu lyange monaruwa.

SIRUGANA MUSINKE NANI HOROWORA?

Ngomudinkantu, ame kwa likwete ukaume novakurona womombungakriste. Gumwe gwawo kwa kere Alice Place, munazinyetukadi gokukurupa ogu ga wizire muhowo pembo lyetu. Age kwa ya kere ngwendi omama vange. Alice kwa dewire nge mosirugana sokuzuvhisa nokukorangeda nge ni gwane ekuho. Ponomvhura 15, yipo na gwene ekuho.

Ame hena kwa likwete ukaume novalikwali wokukurupa Percy naMadge [Margaret] Dunham. Kulikwatakana kumwe nawo kwa kundamene unene meho zange. Ame kwa here muvaru, ntani kwa tokomenene kukakara mitili gomuvaru. Percy naMadge kwa kere vatumwa moLatvia komeho yi ka tameke yita yauvali youzuni. Apa ya tamekere Yita oyo moEuropa, awo kwa va zigidire va ka karere koBeteli monkurusitata Sydney moAustralia. Percy naMadge kwa litulire mo unene mwange. Awo ngava simwitire yilimonena yoyinzi yokuhafesa eyi va haferere mosirugana soutumwa. Yipo na yi dimbwilire asi kuronga Bibeli kureta ruhafo kupitakana kuronga muvaru. Yipo na tokwere kukara mutumwa.

Valikwali owo kwa korangedere nge ni liwapaikire sirugana soutumwa pokurugana uzuvhisi wokukarerera. Momvhura 1948, apa na kere nonomvhura 16, yipo na tamekere kurugana uzuvhisi wokukarerera novadinkantu vakwetu murongo womombungakriste zetu ava ngava zuvhisa noruhafo modoropa zaHurstville moSydney.

Monomvhura ne, ame kwa rugene uzuvhisi wokukarerera monodoropa ne domoNew South Wales naQueensland. Murongwa gwange gokuhova goBibeli kwa kere Betty Law. Betty kwa pitire nge nonomvhura mbali, ntani age kwa kere muntu gombili. Konyima, twa ya rugene kumwe uzuvhisi wokukarerera modoropa Cowra, konyara nokirometa 230 koUtokero waSydney. Nampili ngomu twa rugene kumwe siruwogona tupu, name naBetty simpe ha twa kerera vakaume.

Konyima na ya kere muzuvhisi gokulikarera, makura yipo va tumine nge kodoropa zaNarrandera, konyara nokirometa 220 koMbindakanotokero zaCowra. Kaume kange gomupe ogu ngatu rugana nage uzuvhisi wokukarerera kwa kere Joy Lennox, nage kwa lisigire name nonomvhura mbali. Nyoselike twa kere Nombangi modoropa ozo. Name naJoy kwa tungire membo lyovalikwali Ray naEsther Irons ava va tu tambwire nawa. Awo kwa kere novana vawo vane gumwe gomugara ano vatatu wovakadi, navenye kwa here kudiva usili. Ray namunwendi gomugara ngava rugana kofarama zononzwi norukokotwa ponze zodoropa, posiruwo oso Esther novana vendi wovakadona ngava gendesa embo eli lya kere nononzugo edi ngava hehedesa. Nkenye Sondaha, name naJoy ngatu terekere vepata lyaRay nondya dokugwanena po ntani novagara 12 ava ngava heherere nonzugo odo, ano vagara owo ngazi va kwata nzara. Sirugana esi kwa tu vaterere tu futire nzugo ezi twa tungire. Konyima zokulya, tatu zeresa makura tatu tameke elirongo lyoRuhungu nepata lyaRay. Ray naEsther novana vawo vane kwa tambwire usili nokukara vamwe wokuhova mombungakriste zaNarrandera.

Momvhura 1951, ame kwa ka kere posigongi sosinene soNombangi daJehova moSydney. Oko yiko na ka zire kepongo lyokulikarera lyovazuvhisi wokukarerera ava va kere neharo lyosirugana soutumwa. Vakalimo va kere pepongo olyo kwa pitakanene 300 ano alyo kwa li ruganenene motenta zonene. Munazinyetu Nathan Knorr gomoBeteli zaBrooklyn kwa uyungisire mbunga ozo nokutumbura hepero zopangenderera zokutwikira kuzuvhisa mbudi zongwa mouzuni mudima. Ose kwa sakererere nkenye nkango ezi ga uyungire. Sinzi sovazuvhisi wokukarerera ava va kere pepongo olyo konyima kwa ka ruganene sirugana sawo sokuzuvhisa koSouth Pacific nokonomukunda dimwe hena. Ame kwa hefe pokukara gumwe goVaaustralia 17 ava va zigidire kombunga 19 zoSikora zaGiliyata mo-1952. Apa na kere nonomvhura 20 yipo za sikire mo nzodi zange zokukara mutumwa.

NA HEPERE KUTURA PO MARUNDURUKO

Sikora zaGiliyata kwa kulikire ediwo lyange lyoBibeli nokunkondopeka epuro lyange ntani hena kwa kundamene unene nkareso zange. Ame kwa kere simpe munona ntani kwa here asi nayinye eyi ngani rugana ngano yi sikilire mo, ano yiyo hena ngani ndindire ko kovakwetu. Poyiruwo yimwe ngani tara yininke monkedi zepuko. Pasihonena, apa na mwene munazinyetugara Knorr kuna kudana mbara kumwe nombunga zovadinkantu womoBeteli, ame kwa tukukire.

Varongi woSikora zaGiliyata va yi dimbwilire asi ame nina kara noudigu. Awo kwa litulire mo mwange nokuvatera nge ni rundurure magazaro gange. Kanunu-kanunu yipo na yi kwete egano asi Jehova age Karunga geharo ogu a hafere eyi atu rugana, ntani kapi ga kara nonyanya. Varongwa vakwetu nawo kwa vaterere nge. Tani diworoka gumwe gwawo ogu ga tente asi: “Elva, Jehova kapi a ruganesa sinyanyi mokuhetekera ko asi a tu pangere. Wa ha kara nomutaro gwepuko kuhamena nanyamoge!” Nonkango dendi kwa kundamene nge unene.

Apa twa mene Sikora zaGiliyata, moutano wetu kwa tu tumine kosirongo saNamibia moAfrika. Karuwogona tupu yipo twa kere novarongwa woBibeli wokusika po-80. Ame kwa here eparu lyoutumwa moNamibia, nye hena kwa livandekerere nomurongwa mukwetu gomugara gokoGiliyata ogu va tumine koSwisiranda. MoNamibia kwa kere mo tupu mvhura zimwe makura yipo na dirukilire kosirongo saSwisiranda tu ka lipakerere nage. Apa twa likwere makura yipo ngani zi kumwe namugara gwange mosirugana sendi ngomutareli goruhamukunda.

KWA LIGWANEKERERE NOUDIGU

Konyima zokuhafera sirugana sokudingura nomukunda nomvhura ntano, kwa tu zigidire tu ka karere koBeteli zaSwisiranda. Ame kwa hefe unene mokukara gumwe gepata lyoBeteli nokukara novanavazinyetu ava va kulire pampepo.

Konyima tupu zokuwiza koBeteli, ame kwa ligwanekerere noudigu. Na ya nongwenene asi mugara gwange ga honderere. Yipo ga zumbire nge. Ayo kwa guvisire nge sili unene. Kapi na divire eyi nkare ni rugane pwa hana eharo nevatero lyovakaume vemepata lyomoBeteli. Awo ngava purakene nge apa ngani hara kuuyunga, ano apa ngani hepa epwizumuko ngava sigi nge ni pwizumuke. Nonkango dawo dehengagwido noyirugana yawo yoyiwa kwa vaterere nge ni lididimikire kukora kokunene, ano elikwatakano lyange naJehova kwa ya nkondoparere.

Ame hena kwa diworokere eyi ngava uyunga nare vakaume vange wovakondi. Ayo kwa kwatererere mo eyi ga uyunga Madge Dunham. Sikando simwe age kwa tanterere nge asi: “Elva, meparu lyoge lyokukarera Jehova ngo ligwanekera nomaudigu gomanzi, nye maheteko goudigu po unene gokutundilira kovakaume wovanene. Mosiruwo somaudigu, hedera pepi naJehova. Diworoka asi ove kukarera Jehova nye kapisi vantu wokudira kusikilira mo!” Epukururo lyaMadge kwa vaterere nge ni lididimikire udigu wange. Ame kwa tokomenene asi kapi ngani pulisira mapuko gamugara gwange ga guse nge kwaJehova.

Konyima zosiruwo yipo na tokwere kutengura kosirongo saAustralia ni ka rugane uzuvhisi wokukarerera pepi nepata lyetu. Morugendo rwange rokutengura kembo, ame kwa zogerere Bibeli nombunga zovantu ava twa rondere nawo mosikepa. Mombunga ozo mwa kere mugara gokoNorway gedina Arne Gjerde. Age ga here eyi ga zuvhire. Konyima yipo ga ka dingwire epata lyetu monkurusitata saSydney. Age kwa tambwire usimbu-simbu yininke eyi ga lirongere nokugwana ekuho. Momvhura 1963, name naArne yipo twa likwere, ano konyima zonomvhura mbali yipo na hampurukire munwetu gomumati Gary.

UDIGU UMWE HENA OU NA LIDIDIMIKILILIRE

Name naArne naGary kwa haferere eparu mepata lyetu. Arne kwa gwederere ko nonzugo dimwe yipo tu ya tunge kumwe novakondi vange wokukurupa. Konyima zonomvhura ntazimwe mononkwara, vandokotora kwa tanterere Arne asi ana kara nokankera zomouruvi. Mbudi ozo kwa tu tukukisire ntani kwa tu koresere unene. Arne kwa mu konderere mosipangero siruwo sosire yipo a gwane uhaku, ano ame ngani mu dingura nkenye ezuva. Kwa monekere ngwendi kuna kulizuvha ko hansa, nye ukaro wendi yipo wa ya didire hena unene. Kwa tanterere nge asi yivike yongandi ko tupu Arne a fe. Nye, kapi ga fire. Konyima ta ya tengura kembo, oku ngani ka mu veda kanunu-kanunu. Mwa za siruwo, age ga tamekere hena kugenda ntani nokurugana sirugana sendi soukuronambunga. Age kwa kere muntu goruhafo gokuzoragana, ano eyi ya mu vaterere a kare ko hansa ntani ya rerupikire sirugana sange sokumupakera mbili.

Konyima zonomvhura dononzi, mo-1986 uvera waArne tau ya didi hena. Posiruwo oso awo vakurona vange va fa nare, yipo twa dirukilire komukunda gomuwa gonondundu ponze zonkurusitata Sydney, oku twa ka kere pepi novakaume vetu. Konyima, Gary kwa ya kwere mukadi ogu ga kura pampepo gedina Karin, makura yipo va tente asi moune wetu tu kare membo limwe tupu. Makura yipo twa dirukilire natuvenye monzugo zimwe ezi za kere pepi tupu noku twa tungire name naArne.

Momakwedi 18 gokuhulilira geparu lyendi, Arne kapi nga vhuru kutunda po pombete ano ga hepere epakerombili lyenene. Mokumona asi na hepere kukara membo nkenye siruwo, ngani ruganesa novili mbali nkenye ezuva mokulironga Bibeli noyimbapiratjangwa yetu yimwe. Melirongo lyange, na gwene mo mapukururo gomawa aga ga vaterere nge ni lididimikire ukaro wange. Ame hena kwa haferere madinguro gomawa govakurona womombungakriste, ano vamwe nawo kwa lididimikilire maukaro gokulifana. Madinguro gawo kwa korangedere nge unene. Arne kwa fire mwaKudumogona 2003, nehuguvaro lyokukagwana evhumbuko.

EVATERO LYENENE ELI NA GWENE

Apa na kere munona, ngani tara yininke monkedi zepuko. Ame na lirongere asi eparu kapi a likara ngwendi moomu atu li ndindire. Ame kwa hafera matungiko gomanzi nye kwa lididimikira hena maudigu gavali, mugara gwange gokuhova ga honderere nokuzumba nge, ano gwauvali kwa verere nokufa. Nampili ngoso, ame kwa gwene evyukiso nehengagwido mononkedi dokulisiga-siga. Nye evatero lyenene kwa tundililire kwaJehova Karunga, “ogu ga kererera po.” (Ndan. 7:9) Mapukururo gendi kwa rundurura nkareso zange morwa oyo ame kwa kara noyilimonena yoyinzi yokuhafesa mosirugana soutumwa. Apa na kere nomaudigu, ‘eharo lyanarunye lyaHOMPA kwa tendekere mutjima gwange.’ (Epis. 94:18, 19) Ame hena kwa hafera eharo nevatero lyepata lyetu ntani ‘vantu namukwawo kwa karera po, va likwafe moudigu.’ (Yis. 17:17) Sinzi sawo kwa kere vakurona ava va kura pampepo.

Joba kwa tente asi: “Vakurona kwa kara nounongo.” (Joba 12:12) Apa ani gazara kuhamena eparu lyange, ame kuvhura ni uyunge asi yimo. Mapukururo govakurona wounongo kwa vaterere nge, ano ehengagwido lyawo kwa nkondopeka nge, ntani ukaume wawo kwa wapukurura nkareso zange. Ame nina hafa morwa kulikwata ukaume nawo.

Ame ngesi kuna kara nonomvhura 80. Morwa eyi ya horokera nge, evatero lyovakurona wounongo mulyo unene kwange. Ame simpe kwa hara kuvadingura nokuvavatera. Nye ame hena kuhafera kulikwatakana novadinkantu. Ame kwa va hara morwa simpe ava karera nononkondo, ano upampi wawo kukorangeda nge. Apa vadinkantu ava pura nge mavyukiso ndi ekwafo, ame kuyihafera mokuvavatera.

[Nonkango dokonhi]

[Efano pepenuno 14]

Uzuvhisi wokukarerera kumwe naJoy Lennox modoropa zaNarrandera

[Efano pepenuno 15]

Elva nepata lyoBeteli zomoSwisiranda mo-1960

[Efano pepenuno 16]]

Kwa pakererere mbili Arne apa ga verere