Kutara kovapurakeni woge

MEHO getu kulikida nonkareso nomalizuvho getu. Ago kuvhura kulikida utjirwe ndi kuna tetuka. Ago hena kuvhura kulikida nkenda ndi eharo. Pamwe, ago kulikida masinganyeko ndi eguwo. Pokuuyunga kuhamena vantu womosirongo sawo, ava va hepere unene, mugara gumwe gokukurupa kwa tente asi: “Ose kuuyunga nomeho getu.”

Vapeke kuvhura va tu gazarere nombudi zetu kuliza noku tuna nwike meho getu. Monompo dononzi, vantu kuhuguvara muntu ogu a va tara momeho. Kuvhura va kare nomasinganyeko kuhamena elituromo lyomuntu ogu na tara-tara konompadi dendi ndi koyininke yapeke mevango lyokutara kogu ana kuzogera nendi. Ano monompo dapeke, kutara unene momeho kuvhura kuyitara ngwendi kudira efumadeko ndi kwa kara noukenya. Eyi usili unene po nsene kuna kuuyunga nomugara ndi nomukadi ndi nahompa ndi nagumwe gekuto. Ntani monomukunda dimwe, nsene munona a tarurura mukurona momeho pokuuyunga, ayo kuvhura kuyitara ngwendi kudira efumadeko.

Nampili ngoso, nsene kapisi epuko momukunda gweni, kutarurura muntu momeho pokutumbura egano lyomulyo kuvhura kunkondopeka eyi ono kuuyunga. Ayo kuvhura kulikida asi ove kuuyunga nomukumo. Koneka omu ga kumbwilire Jesus apa varongwa vendi va tetukire nokuuyunga asi: “Yilye nye ogu nga vhura kuparuka?” Bibeli kwa tanta asi: “Jesus ta va tarurura, makura ta va tantere asi: ‘Kovantu eyi udigu, nye kwaKarunga nayinye ureru.’” (Mat. 19:25, 26) Matjangwa nago kulikida asi mupositoli Paurusa kwa nomenene malizuvho govapurakeni vendi. Posikando simwe, mugara ogu va reta age sirema nage yipo ga kere apa ga uyungire Paurusa. Yirugana 14:9, 10 kwa tanta asi: ‘Age kwa purakenene omu ana kuudisa Paurusa, ano Paurusa age kuna kumutara tupu, ano eyi ga mu mona asi ana kara nehuguvaro lyokuveruka, ta zigire unene asi: ‘Katuka o vyukilire maguru goge.’”

Magano kuhamena kunwika vantu meho moyirugana yokuzuvhisa. Nsene kuna kulihameka moyirugana yokuzuvhisa, kara gokumenya-menya ntani nemanguruko pokuhedera vantu. Nsene ya wapa, ruganesa mapuro mokutameka nzogera kwankenye eyi nayi vhura kupindura elituromo. Ngomu ono kuyirugana eyi, kondjera kutara muntu momeho, ndi nampili kuhetekera ko kumutara kosipara monkedi zongwa zefumadeko. Emenya-menyo lyewa lyokosipara somuntu ogu ana kulikida ruhafo momeho gendi kukoka sili unene. Eyi kuvhura kulikida muntu malizuvho goge ntani ngayi mu vatera mokukara noumanguruki koge ngomu muna kuzogera.

Pokutara momeho gomuntu, nsene ya wapa, kuvhura yi ku divise eyi no hepa kurugana. Nsene muntu kuna handuka, ndi kapi ana yi hafere, ndi kapi ana kwata egano eyi ono uyunga, ndi kapi ana ku hafere ndi nsene ana yi hafere kuvhura o yi dimburure. Meho gendi kuvhura ga ku rondore o rundurure kuuyunga kugenderera ndi kuliwora, ndi o mu hamesere mo monzogera, ndi o hagekese po nzogera, ndi nampo o twikire kumulikida omu nomu rugana elirongo lyoBibeli.

Yi kare asi kuna kulihameka moyirugana yokuzuvhisa ndi kuna kupitisira elirongo lyoBibeli, kondjera mokutara momeho nefumadeko ogu ono kuuyunga nendi. Nampili ngoso, wa ha mu tarurura unene morwa nayi mu ninkisa a life nomuga. (2 Vah. 8:11) Nye monkedi zongwa zoundambo, tara nkenye apa muntu mosipara. Moyirongo yoyinzi, eyi kulikida elituromo lyosili momuntu. Yosili, nsene kuna kuresa moBibeli ndi moyimbapiratjangwa yapeke, meho goge ngo ga nwika pweyi ono kuresa. Nye pokunkondopeka egano, kuvhura o tare muntu momeho, nampili karuwogona tupu. Nsene o mu tara pokuresa, eyi ngayi ku vatera mokudimburura nkareso zendi kweyi ono kuresa.

Nsene nomuga kuna kukudigopekesera mokutara muntu, ya ha ku gusa mukumo. Ngamoomu ono kuliyomberesa, kutara kovapurakeni woge kapi ngayi ku karera udigu, ntani ngayi ku rerupira mokuzogera nava wopeke.

Kutara kovantu pokugava siuyungwa. Bibeli kututantera asi komeho Jesus a gave Eudiso lyendi lyopondundu, “makura ta tara varongwa vendi.” (Ruk. 6:20) Lirongera ko kosihonena sendi. Nsene to ka gava siuyunga komeho zombunga, va tara tanko nokupwizumuka nosekonda dongandi komeho zokutameka kuuyunga. Eyi kuvhura kukwatera mo kutara momeho govapurakeni woge wongandi. Kutara tanko vapurakeni woge ngesi kuvhura ngayi ku vatere mokugusa po woma. Ntani ngayi vatera hena vapurakeni woge mokukwata egano nkenye nkareso ndi malizuvho aga nasi likida sipara soge. Mokugwederera ko, pokurugana eyi ngayi ninkisa vapurakeni woge va liture nokuliwapaikira va purakene nawa.

Apa no gava siuyungwa soge, tara kovapurakeni woge. Wa ha tara tupu mbunga nazinye. Kondjera mokutara muntu pwagelike. Monompo dononzi, muuyungi ga hepa kutara kovapurakeni vendi.

Kutara kovapurakeni woge kapi tupu ya kwatera mo kugendagwisa meho goge komaruha gokulisiga-siga. Tara komuntu gongandi mombunga, ntani nsene kuvhura, uyunga ntanto nazinye ove kuna kumutara. Makura tara hena kwagumwe, nokuuyunga ntanto ndi mbali ove kuna kumutara. Wa ha tara muntu siruwo sosire dogoro a life nomuga, ntani wa ha tara tupu kovantu wongandi movapurakeni woge. Twikira kutara kovapurakeni woge monkedi zangesi, ngomu ono kuuyunga ove kuna tara muntu gongandi, mu tara dogoro o dimburure nkareso zendi komeho zokurundurukira kwagumwe gwapeke.

Madidiliko gosiuyungwa soge ga hepa kukara positantara, ndi mokuwoko ndi moBibeli zoge yipo yi ku rerupire mokutara kovapurakeni woge. Nsene no gendesa mutwe goge nagunye mokutara pomadidiliko goge, ngayi ku karera udigu mokutara vapurakeni woge. Wa hepa kutakamesa asi siruwo sokusika kupi o tara komadidiliko goge ntani siruwo musinke o yi rugana. Nsene ngo tara komadidiliko goge pokutumbura egano lyomulyo lyomosiuyungwa soge, ove kapi ngo vhura kudimburura nkareso zovapurakeni woge ntani siuyungwa soge ngasi zumbanesa mukumo gwaso. Mokulifana, nsene ngo tara nkenye apa komadidiliko goge, ngayi ku digopera unene mokutara kovapurakeni woge.

Apa o zugumine muntu mbara, ove kutara nsene ana zi kaura. Nkenye egano lyomosiuyungwa soge kuna kara ngwendi mbara ono “zugumine” movapurakeni woge. Ano ngo yi dimburura nsene vana zi “kaura” pokungumauka komutwe ndi pokumenya-menya. Nsene o tara nawa kovapurakeni woge, eyi ngayi ku vatera mokudivilisa asi magano goge vana ga kwata egano.

Nsene vana ku pe ruha mokukaresera mbungakriste, hepero o tare kovapurakeni woge siruwo esi ono kuresa ndi? Nsene vapurakeni kuna kukwama moNobibeli dawo, sinzi sawo kapi ngava yi dimburura nsene asi ove kuna kuvatara ndi hawe. Nye kutara kovapurakeni woge kuvhura ngayi ku vatere mokutovareka ereso lyoge morwa ngayi ku ninkisa o dimburure nkareso zawo kweyi ono kuresa. Ntani kwavamwe movapurakeni ava vana kudira kukwama moNobibeli dawo ntani ava vana kugazara nayopeke, nsene ngo tara kovapurakeni woge ngayi va vatera mokupurakena kweyi ono kuresa. Yosili, ove ngo vhura tupu kutara kovapurakeni woge pokaruwogona, ntani wa ha yi rugana monkedi ezi nazi ku ninkisa o lipuke kuresa. Morwa eyi, nayi ka wapa mokukakwaterera Bibeli zoge mokuwoko nokukankura mutwe ntani nosizumu soge.

Poyiruwo yimwe, vakuronambunga kuvahundira mokukagava siuyungwa sereso posigongi. Mokuyirugana eyi nawa pwa hepa udivi neliwapaikiro lyewa ntani neliyombereso lyenene. Yimo, kugava siuyungwa sereso kuvhura kusesupika kutara meho goge kovapurakeni. Nye nsene muuyungi ka liwapaikilire nawa, ngayi mu vatera mokutara kovapurakeni vendi poyiruwo noyiruwo ga hana kuzumbanesa apa ka hagere. Nsene nga yi rugana ngoso, age nga vatera vapurakeni vendi mokupurakena nawa ntani ngava gwanena mo uwa momapukururo gomulyo gopampepo aga nga gava.