Kuresa matjangwa nenkondopeko lyouhunga

NSENE kuna kuuyunga nava wopeke kuhamena sitambo saKarunga, yi kare asi kevango lyapeke ndi kositantara, nzogera zoge za hepa kudemenena moNonkango daKarunga. Eyi kwa kwatera mo kuresa matjangwa moBibeli, ntani ya hepa kuyirugana nawa.

Enkondopeko lyouhunga kwa hamena mo malizuvho. Matjangwa ga hepa kugaresa nomalizuvho. Konakona yihonena yimwe. Nsene to resa Episarome 37:11 kuziguruka, ezwi lyoge lya hepa kupwagesa ruhafo kuhamena mbili ezi va tumbwidira mo. Ano nsene to resa Ehororo 21:4 kuhamena kuhagesa po ruhepo nonomfa, ezwi lyoge lya hepa kulikida malizuvho gorupandu kuhamena ezoworo eli lina kara komeho. Ehororo 18:2, 4, 5 eli lya uyunga kuhamena kutunda mo ‘moBabironi zonene,’ lya wapera kuliresa nezwi lyetumangedo. Yimo, malizuvho aga no pwagesa ga hepa kutundilira komutjima nye kapisi gokulininkisa. Malizuvho gouhunga kugalikida etjangwa lyene ntani nomonkedi omu ono kuliruganesa.

Nkondopeka nonkango douhunga. Nsene ekumbururo lyoge kuna demenene kokaruha kongandi movelise, wa hepa kudidilika nonkango odo apa no resa etjangwa olyo. Pasihonena, nsene to resa Mateusa 6:33 nositambo sokukonakona eyi ayi tanta “kupapara Untungi waKarunga,” kapi ngo nkondopeka nonkango “neyi ga hepa ko kweni” ndi asi “ano yininke eyi nayinye.”

Mosiuyungwa sEpongo lyoYirugana, kuvhura o rese Mateusa 28:19. Nonkango musinke no hepa kunkondopeka? Nsene ono hara kukorangeda vanavazinyetu mokutameka malirongo goBibeli, nkondopeka nonkango “mu ka di ninke di kare varongwa vange.” Ano nsene ono hara kuzogera situmbukira soMukriste mokuligawinina usili womoBibeli novanayirongo ndi ono hara kukorangeda vazuvhisi vamwe mokukakarera oku kuna kara hepero zonene, kuvhura o nkondopeke nonkango “konomuhoko nadinye.”

Poyiruwo yoyinzi, ose kuruganesa etjangwa mokulimburura epuro ndi mokukwatesa ko egano eli vana kupatanesa wopeke. Nsene magano nagenye aga va gava metjangwa no ga nkondopeka monkedi zokulifana, vapurakeni woge kuvhura va dire kumona egano lyomulyo eli ono hara kunkondopeka.

Pasihonena, nsene kuna kuresa Johanesa 17:3 nositambo sokulikida mwenya embo eyi ga hepa kurugana mokukagwana mwenyo gwanarunye, wa hepa kunkondopeka nonkango ‘va ku dive asi nyovelike Karunga gosili, ntani naJesus Kristusa.’ Nye, nsene kuna kuruganesa etjangwa olyo mokulikida asi mwenyo gwanarunye usili, wa hepa kunkondopeka unene nonkango “mwenyo gwanarunye.” Mokulifana, nsene kuna kuruganesa Jakopo 2:24 mokulikida mulyo gokutura epuro pasirugana, kunkondopeka nkango “kumuhungamekesera” mevango lyokunkondopeka nkango ‘yirugana’ kuvhura yi ninkise vapurakeni woge va zumbanese egano eli ono hara kupwagesa.

Sihonena simwe kusigwana moVaroma 15:7-13. Oru kuna kara ruha rombilive ezi ga tjangerere mupositoli Paurusa kombungakriste omu mwa kere Vapagani noVajuda. Mupositoli Paurusa kwa korangedere asi sirugana sokuzuvhisa kapi sa reterere tupu mauwa Vajuda ava va rugene yovamba nye hena novantu wonomuhoko dapeke yipo asi ‘vapagani nawo ngava fumadekere po Karunga morwa ufenkenda wendi.’ Makura Paurusa kwa temwininine matjangwa gane, mokulikida asi nomuhoko nadinye da kara nompito ozo. Ngapi omu no resa matemwinino ogo yipo o nkondopeke egano eli ga kere nalyo Paurusa? Nsene kuna kudidilika nonkango edi no hepa kunkondopeka, kuvhura o didilike “kovapagani” zina kara movelise zo-9, ntani movelise zo-10 “one vapagani” ntani “one vapagani namuvenye” ntani “nomuhoko nadinye” movelise zo-11, ntani “nomuhoko” movelise zo-12. Heteka kuresa Varoma 15: 7-13 nenkondopeko lyangoso. Ngomu ono kuyirugana ngoso, ngayi ku zerera ntani ngo kwata egano nokonda edi ga geve Paurusa.

Nonkedi omu no vhura kunkondopeka nonkango. Nonkango edi ono hara di zuvhike kuvhura kudinkondopeka mononkedi dokulisiga-siga. Nkedi ezi ono kuruganesa za hepa kuliza netjangwa noukaro wosiuyungwa. Magano gongandi gana kukwama ko.

Meruganeso ezwi. Eyi kwa kwatera mo nkenye elitjindjo mezwi mokunkonopeka nonkango dokukwatesa ko eyi ono kuzogera. Enkondopeko kuvhura kulirugana pokuziguruka ndi pokugomona ezwi lyoge. Momaraka gomanzi, kuzerura nokugoromona ezwi kugwederera kenkondopeko. Nampili ngoso, momaraka gamwe, yangoso kuvhura kutjindja etanto lyontanto nazinye. Nsene to uyunga kuliwora pokutumbura nonkango domulyo, eyi kugwederera komulyo gwado. Momaraka omu ava dili kuruganesa enkondopeko lyezwi mokunkondopeka nonkango dongandi, ya wapa mokurugana eyi va pulisira meraka olyo yipo yi rete yitundwamo yoyiwa.

Kupwizumuka. Ako kuvhura kukurugana komeho ndi konyima zokuresa ruha romulyo rwetjangwa. Kupwizumuka komeho zokuresa egano lyomulyo kuninkisa vapurakeni va kare nendindiro; ano kupwizumuka konyima zokuresa kuninkisa yi va kundame unene. Nampili ngoso, nsene no pwizumuka unene, kwato magano gomulyo aga naga zuvhika mo.

Kurugurura mo. Kuvhura kunkondopeka egano lyongandi pokulidonganesa nyamoge ntani nokurugurura kuresa nonkango odo. Nkedi zongwa po kuna kara pokuresa etjangwa nalinye ntani nokurugurura nonkango domulyo.

Maligumaguro gorutu nokosipara. Maligumaguro gorutu nokosipara kuvhura kugwederera malizuvho kononkango.

Muhagaro gezwi. Momaraka gamwe, nonkango kuvhura kudiresa nomuhagaro ogu nagu vhura kukundama etanto lyado ntani nokudihangura kononkwawo. Apa napo wa hepa kuyirugana nonondunge, unene po nsene kuna kuresa nonkango dokusengerekeda.

Nsene vapeke tava resa Matjangwa. Nsene mwenya embo kuna kuresa etjangwa, age kuvhura a nkondopeke nonkango depuko ndi kwato ezi na nkondopeka mo. Yisinke no vhura kurugana? Ya wapa kuzeresa eyi ali tanta etjangwa kuliza nomu ono kuliruganesa. Konyima zokulizeresa, kuvhura o demenene kononkango dokukwatesa ko eyi ono kuuyunga metjangwa olyo.