Rugurura mo pokunkondopeka magano

KURONGA nawa kwa kwatera mo kurugurura mo. Apa egano lyomulyo ava li tumbura kupitakana pwarumwe, vapurakeni kuvhura va li diworoke. Nsene no rugurura egano mononkango dapeke, kuvhura va li kwate nawa egano.

Nsene vapurakeni woge va dira kudiworoka eyi ono kuuyunga, nonkango doge kapi ngadi kundama eyi va pura ndi mparukiso zawo. Awo ngava twikira kugazadara magano aga ono nkondopeke unene.

Jehova, Murongi gwetu Gomunene, ga tu pa sihonena serugururomo. Age kwa geve Yipango Murongo komuhoko goVaisraeli. Kupitira momuengeli, Jehova kwa ninkisire muhoko goVaisraeli gu zuvhe yipango oyo koNdundu zaSinayi. Konyima age kwa ya yi geve kwaMosesa morupe rokutjanga. (Ex. 20:1-17; 31:18; Deut. 5:22) Mepitisiro lyaJehova, Mosesa kwa rugurukire yipango oyo komuhoko komeho zokuhwilira moSirongo sEtumbwidiro, ntani nevatero lyompepo zokupongoka, Mosesa kwa yi tjenge, ngomu ya kara mwaDeuteronomium 5:6-21. Moyipango oyo ga geve koVaisraeli kwa kwaterere mo asi va hepere kuhara nokukarera Jehova nomutjima nomwenyo ntani nononkondo dawo nadinye. Esi naso kwa si rugurukire kusitumbura. (Deut. 6:5; 10:12; 11:13; 30:6) Morwasinke? Ngamoomu ga yi uyungire Jesus, morwa yiso “sipango po sosinene sokuhova.” (Mat. 22:34-38) Kupitira momuporofete Jeremiya, Jehova kwa diworokesere vantu womoJuda kupitakana poyikando 20 kuhamena mulyo gokulimburukwa yininke nayinye eyi ga va pangerere. (Jer. 7:23; 11:4; 12:17; 19:15) Ntani kupitira mwaHesekiyeli, Karunga kwa uyungire kupitakana yikando 60 asi nomuhoko ‘ngadi diva asi ame nyame Jehova.’—Hes. 6:10; 38:23, NW.

Momatjango gosirugana saJesus sokuzuvhisa kwa kara mo eruganeso lyerugururomo. Pasihonena, pwa kara Mavangeli gane, nkenye eli kwa simwitira yihorokwa yomulyo eyi va simwitira mwa limwe ndi moMavangeli gapeke nye monkedi zokulisiga kanunu. Merongo lyendi, Jesus kwa tumbwire sitwa sokulifana somapukururo moyihorokwa yoyinzi nye mononkedi dokulisiga-siga. (Mar. 9:34-37; 10:35-45; Joh. 13:2-17) Ntani apa ga kere poNdundu zoMauzwe mazuva gongandi komeho zonomfa dendi, Jesus ga rugurukire kunkondopeka mapukururo aga gomulyo: “Rungarareni, yeeyi kapi mwa diva asi Hompa gweni ezuvake nga wiza.”—Mat. 24:42; 25:13.

Moyirugana yokuzuvhisa. Nsene to zuvhisire vantu, ove kuna va harere va diworoke eyi ono kuuyunga. Kuruganesa nawa nkedi zokurugurura mo kuvhura kuvatera mokusikisa mo sitambo oso.

Kurugurura mo posiruwo apa ono kuuyunga yuma ngayi vatera muntu mokuyidiworoka. Konyima zokuresa etjangwa, kuvhura o li nkondopeke pokutumbura ruha romulyo nokumupura asi: “Ono dimburura omu va ruganesa nonkango demetjangwa olyo ndi?”

Nontanto dokuhulilira monzogera nado kuvhura kudiruganesa nawa. Pasihonena, kuvhura o uyunge asi: “Egano lyomulyo eli nina hara no ka diworoka monzogera zetu kuna kara . . . ” Makura li rugurura pausupi. Ntanto kuvhura zi kare ngwendi ngesi: “Sitambo saKarunga kuna kara asi evhu ngava li ninka li kare paradisa. Sitambo oso sili ngasi ka sika mo.” Ndi nampo asi: “Bibeli kwa likida nawa-nawa asi ose kuna kuparuka momazuva gopouhura wouzuni ou. Nsene tuna hara kuparuka pezonaguro lyawo, twa hepa kulironga eyi ana hepa ko Karunga kwetu.” Ndi kuvhura zi kare ngesi: “Ngomu tuna yi mono, Bibeli kugava mapukururo goparugano omu natu lididimikira maudigu gemepata.” Momaukaro gamwe kuvhura o rugurure etemwinino lyomoBibeli ngegano lyokuvhura kudiworoka. Yimo, kurugana eyi monkedi zongwa kwa hepa asi o gazadare ko komeho zosiruwo.

Pokukarugana matengwiropo, kukwatera mo malirongo goBibeli, nkedi zoge zokurugurura mo kuvhura mu hamene mapuro gerugururo.

Nsene muntu tayi mu digopere kukwata egano ndi kuruganesa mapukururo gomoBibeli, kuvhura o hepe kurugurura sirongwa yikando yokulisiga-siga. Kondjera mokuyirugana mononkedi dokulisiga-siga. Nzogera kapisi hepero zi kare zonde nye zokukorangeda murongwa a twikire kugazadara ko kuhamena yuma oyo. Diworoka, Jesus kwa ruganesere erugururomo lyangesi mokuvatera varongwa vendi mokunyokera po nkedi zokuhara kukara muhowo.—Mat. 18:1-6; 20:20-28; Ruk. 22:24-27.

Nsene kuna kugava yiuyungwa. Nsene kuna kugava siuyungwa kositantara, sitambo soge kapisi sokugava tupu nombudi. Ono hara vapurakeni va yi kwate egano nokuyidiworoka ntani nokuyiruganesa momaparu gawo. Mokuyisikisa mo, ruganesa nawa nkedi zokurugurura mo.

Nampili ngoso, nsene o rugurura unene magano gomulyo, kuvhura o zumbanese elituromo lyovapurakeni woge. Horowora nawa magano aga gana hepa enkondopeko lyokulikarera. Aga kuna kara magano gomulyo aga gana tungu po etateko lyosiuyungwa soge, nye kuvhura hena mu kwatere magano gamwe aga naga vhura kukara gomulyo kovapurakeni woge.

Mokuruganesa nawa erugururomo, pomuhowo kuvhura o didilike magano goge gomulyo metwaromo. Yi rugana monontanto dononsupi edi nadi ka likida eyi no ka zogera, ndi pokuruganesa mapuro ndi yihonena yoyisupi eyi ayi likida maudigu aga gana hepa kugakohonona po. Kuvhura o tumbure asi magano gomulyo gangapi gana kara, ntani o ga tumbure kononomora. Makura tunga nkenye egano mosiuyungwa soge. Enkondopeko kuvhura kulirugana mosiuyungwa pokurugurura nkenye egano lyomulyo komeho zokurundurukira kegano lyokukwama ko. Ndi kuvhura kuyisikisa mo pokuruganesa sihonena omu mwa hamena kuruganesa egano lyomulyo. Enkondopeko lyokugwederera ko kuvhura kulirugana komagano gomulyo pokuruganesa ehageso eli nali ga rugurura, ndi pokuruganesa malisigo, ndi kulimburura mapuro aga ko pura, ndi kugava makohononopo komaudigu aga ko pura.

Mokugwederera ko koyo, muuyungi gokuwapera kunomena nawa ava vana kara movapurakeni. Nsene vamwe yi va digopera kukwata egano yuma yongandi, muuyungi nga yi dimburura. Nsene egano lyomulyo, age ta li ruguruka hena. Nampili ngoso, kurugurura nonkango dokulifana kuvhura yi dire kusikisa mo sitambo sendi. Yinzi ya hamena mo mokuronga kupitakana poyo. Ga hepa kukara nevhuliko lyokurundurura. Kuvhura a hepe kugwederera ko magano gamwe gokulikarera kosiuyungwa sendi. Kulironga kusikisa mo yihepwa yovapurakeni monkedi zangesi ngayi likida asi ove murongi gomuwa.