Egaununo lyoronantambali
Likida eligawo kwaKarunga membo
1. Ngapi kukwama mavyukiso gomoNonkango daKarunga ga kundama nonkwara?
JEHOVA yige Mutoti gononkwara, ano Nonkango dendi kugava mavyukiso gomawa unene komapata. Vantu wovanzi kwa tunga nonkwara derago morwa kuruganesa mavyukiso gena. Mokuyipandura hena, vamwe ava va tungire tupu kumwe kwa va ninkisa va tjangese nonkwara dawo paveta. Vamwe kwa hageka kuhondera ponze zononkwara. Vagara wonyanya ava ngava hepeke vakadi vawo novana vawo kwa lironga va likide epakerombili nomutjima gomuwa.
2. Yisinke ya kwatera mo meparu lyepata lyoSikriste?
2 Eparu lyepata lyoSikriste kwa kwatera mo yininke yoyinzi, ngwendi asi ngapi omu atu tara ekarereropo lyononkwara, ntani yinke tuna kurugana tu sikise mo yitumbukirwa yetu mepata, ntani ngapi omu atu tekura vemepata lyetu. (Vaefeso 5:33–6:4) Nampili tu vhure kudiva asi yisinke za tanta Bibeli kuhamena keparu lyepata, aso kwa kara sininke peke mokusikisa mo mapukururo gamo. Kwato gumwe gwetu ogu ana hara kukara ngwendi wovena ga pangwire Jesus morwa kupepura kwawo nompangera daKarunga. Awo kwa geve nokonda doyimpempa asi eligawo tupu lyoukerelikarunga yilyo lyelike va hepere. (Mateusa 15:4-9) Ose kapi tuna hara kumoneka ngwendi twa ligava kwaKarunga nye yi tu sumpire mokuyilikida momambo ganyamwetu. Montambo zeyi, ose kuna hara kulikida eligawo kwaKarunga lyosili, eli ali ‘gawopeke sili.’—1 Timoteusa 5:4; 6:6; 2 Timoteusa 3:5.
Siruwo sokuhura kupi ngadi kara nonkwara?
3. (a) Yisinke yina kuhorokera nonkwara dononzi, nye etokoro musinke natu kara nalyo? (b) Limburura mapuro ogo konhi zoparagarafu ezi meruganeso lyoBibeli zoge.
3 Meligwederero, malikwatakano gononkwara kuna kumoneka kuteka usimbu. Valikwali vamwe ava va likwara nomvhura dononzi kutokora va lizumbe nokukakwara ko gopeke. Ntani kapi hena yina kara sitetu mokuzuvha asi valikwali wovadinkantu vana ligaunuka konyima zokulikwara tupu siruwo sosisupi. Ose twa kona kuhara kuhafesa Jehova nampili wopeke va hare kurugana nayopeke. Tu tarurureni nye mapuro nomatjangwa aga gana kukwama ko, tu tare asi yisinke da tanta ko Nonkango daKarunga kuhamena kukarerera po kononkwara.
Nsene mugara nomukadi tava likwara, siruwo sokuhura kupi nava kara kumwe? (Marukusa 10:6-9; Varoma 7:2, 3)
Konda musinke zelike a pulisire Karunga elizumbo nompito zokukakwara hena? (Mateusa 5:31, 32; 19:3-9)
Ngapi omu a zuvhu Jehova kuhamena malizumbo aga da pira kupulisira Nonkango dendi? (Marakiya 2:13-16)
Bibeli za korangeda eligaunuko asi nkedi zokugusa po maudigu gomononkwara ndi? (1 Vakolinte 7:10-13)
Monomukaro musinke omu nali vhura kukara eligaunuko papulisiro? (Episarome 11:5; Rukasa 4:8; 1 Timoteusa 5:8)
4. Morwasinke nonkwara dimwe adi karerere?
4 Nonkwara dimwe kudiwapera ntani kukarerera. Morwasinke? Kundindilisa nonkwara dogoro vahameni navenye vana kuru kuna kara konda zimwe zomulyo, nye kugwana mulikwali ogu ga hara yininke yokulifana neyi yoge ntani kuzogera yininke nayinye noureru kwa kara nomulyo. Nampili ngoso, somulyo po unene kuna kara kugwana mulikwali ogu ga hara Jehova nokufumadeka Nonkango dendi asi yizo ntundiliro zokugusa po maudigu. (Episarome 119:97, 104; 2 Timoteusa 3:16, 17) Muntu gwangoso kapi na kara nononkedi asi nsene ta gwanekere nomaudigu, age kuvhura kuligaunuka ndi kulizumba. Age kapi na ruganesa mapuko gomulikwali gwendi asi egusopo lyokuhenduka yitumbukirwa yamwene. Montambo zeyi, age ta tarurura maudigu nokukagwana po makanduro po.
5. (a) Ngapi ulimburukwi kwaJehova wa kundama nonkwara? (b) Mauwa musinke gokuvhura kutunda mo mokukwaterera konompango daJehova nampili pa wize erwaneso?
5 Satana kukondjesa asi nsene tuna kara noudigu, tatu zumbu nonzira daJehova. (Joba 2:4, 5; Yisewe 27:11) Nye sinzi soNombangi daJehova ava ava mono udigu morwa kukara nomulikwali gokudira kupura kapi va huka mo monomugano dawo dononkwara. Awo kutwikira kulimburukwa kwaJehova ntani nokonompango dendi. (Mateusa 5:37) Vamwe ava va lididimika kwa hafera mokumona valikwali vawo tava lipakerere nawo mokukarera Jehova—nampili konyima zonomvhura dononzi derwaneso! (1 Peturusa 3:1, 2) Ano koVakriste ava wovalikwali vawo ava pili kurundurura ndi wovalikwali vawo ava ava va zumbu morwa awo kukerera Jehova, ava nawo va diva asi ngava va tungika morwa kulikida kwawo eligawo kwaKarunga membo.—Episarome 55:22; 145:16.
Nkenye gumwe ta rugana ruha rwendi
6. Ewapaiko musinke lya hepa kulifumadeka nsene tuna hara kukara nononkwara derago?
6 Yimo, kukara nononkwara derago kwa hepa kurugana yoyinzi kupitakana tupu kutunga kumwe. Sihepwa somulyo kovalikwali navenye kuna kara kufumadeka ewapaiko lyaJehova asi mugara yige nturagumbo. Eyi kutwaredera kewapaiko lyewa nelizuvho lyombili membo. Mo-1 Vakolinte 11:3 tatu resa mo asi: “Kristusa yige mupangeli gwankenye mugara, mugara mupangeli gomukadi, ano Karunga yige mupangeli gwaKristusa.”
7. Ngapi unturagumbo wemepata nava u ruganesa?
7 Ono dimburura po asi sininke musinke zina tumbura muhowo velise? Yimo, nkenye mugara kwa kara noMupangeli ogu na limburukwa, Kristusa. Eyi kutanta asi mugara ga kona kulikida yikara yaJesus mokurugana unturagumbo wendi. Kristusa kulimburukwa kwaJehova, hena kwa hara unene mbungakriste ntani kuzipakera mbili. (1 Timoteusa 3:15) Age ga “lizumbilira mwarwazo.” Jesus kapi a linenepeke a pire kupakera mbili, nye age “kwa gomoka, yiyo [ga] linunupika momutjima.” Owo ava kara mepangero lyendi ‘kugwana rufuwo monomwenyo dawo.’ Nsene mugara ta tekura vepata lyendi monkedi ezi, age ta likida asi age kuna kulimburukwa kwaKristusa. Mukadi goMukriste na vhura kugwana uwa nepwizumuko mokuruganena nokulimburukwa kounturagumbo wamugara gwendi.—Vaefeso 5:25-33; Mateusa 11:28, 29; Yisewe 31:10, 28.
8. (a) Morwasinke nayi vhulira kumoneka asi nonkedi doSikriste kapi dina kugwana yitundwamo yokuhafera momambo gamwe? (b) Yisinke natu rugana nsene tuna gwanekere noukaro wangoso?
8 Nampili ngoso, maudigu yipo ngaga wiza. Encenuno komavyukiso govantu wopeke nampo lya kulira nare mwagumwe gemepata komeho zetameko lyendi lyokuruganesa magano gomoBibeli. Mahundiro gopambili noponkedi zeharo kuvhura ga pire kureta yitundwamo. Ose twa diva asi Bibeli kwa tanta asi tu sige ‘ukenya nehandu lyenene nonomutangu nomatuka.’ (Vaefeso 4:31) Nye nsene vamwe vemepata kapi vana kuzuvha hena nayopeke, yisinke yokuvhura kurugana ko? Jesus kapi ga temwinine owo ngava mu hepeke nokumuswaura, nye age kwa yi sigilire nayinye Oguhye. (1 Peturusa 2:22, 23) Nsene pana wiza nomukaro donondigu membo, likida eligawo kwaKarunga mokukanderera kwaJehova kekwafo lyendi kapisi o kwame nonkedi douzuni.—Yisewe 3:5-7.
9. Mevango lyokupapara mausima, yisinke va lironga vagara woVakriste wovanzi eyi nava rugana?
9 Malisinto kapi aga wiza nkenye apa usimbu, nye magano goBibeli nawa-nawa kurugana nsene kuna kugaruganesa melididimiko nemekovekedo. Vagara wovanzi kwa mona asi nonkwara dawo kwa tameka kuwapa ko apa va tameka kuzuvha erugano lyaKristusa kombungakriste. Mbungakriste ozo kapisi zovantu wokusikilira mo. Nye nampili ngoso, Jesus kwa zi hara ntani kuzitulira po sihonena sokuvyuka nokuruganesa Matjangwa a zi vatere mokuziwapukurura. Age kwa geve eparu lyendi morwambungakriste. (1 Peturusa 2:21) Sihonena sendi kwa korangeda vagara woVakriste wovanzi va gave unturagumbo wouwa ntani nokugava ekwafo lyeharo mokuvatera ezokomeho lyomononkwara dawo. Eyi kureta po yitundwamo yoyiwa unene kupitakana kulipa mausima ndi kulimwenenena.
10. (a) Mononkedi musinke omu mugara ndi mukadi—nampili gogu a tanta asi Mukriste—na digopeka eparu kovakwawo membo? (b) Yisinke yokuvhura kurugana ko mokuwapukurura mukaro?
10 Ngapi nye nsene mugara kapi ana kudimburura yihepwa yopamalizuvho gepata lyendi ndi kapi ana kugusa situmbukiro sokuwapaika nzogera zepata zoBibeli ndi yirugana nayopeke? Ndi ngapi nye nsene mukadi kapi a ruganene kumwe nokulikida ulimburukwi wopaukarunga? Vamwe kugwana yitundwamo yoyiwa mokukara nononzogera depata dokufumadeka kuhamena koudigu. (Genesis 21:10-12; Yisewe 15:22) Nampili yitundwamo yi kare asi kapisi nayinye eyi tuna ndindire, nkenye gumwe gwetu kuvhura kukambeka ko kewapukururo lyomukaro gwemembo mokutura yiyimwa yompepo zaKarunga mwankenye nkedi zeparu lyendi, oku ta likida epakero mbili kwava vemepata. (Vagarata 5:22, 23) Ezokomeho nali wiza po nsene tu pira kundindira wopeke va rugane ko yuma, nye tu rugane ko ruha rwanyamwetu, yipo tu likide asi ose kuna kara neligawo kwaKarunga.—Vakorosi 3:18-21.
Kokugwana malimbururo
11, 12. Yisinke ga gava Jehova mokutuvatera yi tu wapere meparu lyepata?
11 Apo pwa kara nontundiliro dononzi oku ava zi vantu va ka gwane mapukururo koyininke yomapata gawo. Nye ose twa diva asi Nonkango daKarunga kwa kara nomapukururo gomawa unene, ntani ose tatu pandura asi kupitira melipakerero lyendi lyokumoneka, Karunga kutuvatera tu ga sikise mo. Ove nawa-nawa kuna kugwana mo uwa mevatero eli ndi?—Episarome 119:129, 130; Mika 4:2.
12 Megwederero ko lyokukara momapongo gombungakriste, ove wa tura po siruwo sankenye apa selirongo lyoBibeli lyepata ndi? Mapata aga aga rugana ngoso kuvhura kurugana kumwe mekuliko lyouumwe moukerelikarunga wawo. Eparu lyawo lyepata kulitungika ngomu vana kuruganesa Nonkango daKarunga momukaro gwavene.—Deuteronomium 11:18-21.
13. (a) Nsene tuna kara nomapuro komaudigu gemepata, kupi oku natu vhura kugwana evatero eli lina hepa po? (b) Yisinke twa hepa kulikida momatokoro nagenye aga natu tura po?
13 Kuvhura o kare nomapuro kuhamena maudigu gemepata. Ngosihonena, ngapi kuhamena yisilikisaruvharo? Kuvhura eliguso ezimo li kare pamwe mouhunga ndi? Nsene munona kuna kulikida ehafero lyesesu tupu koyininke yopampepo, dogoro pokusika kupi ga hepa kulihameka mo moukerelikarunga wemepata? Mapuro gomanzi gangoso kwa ga zogera monombapiratjangwa edi da gava Nombangi daJehova. Lironga kuruganesa yivatereso yokulirongesesa Bibeli, kutura ko nonoindekisi, yipo o gwane malimbururo. Nsene kapi ono kara noyifo oyo vana likida moindekisi, tara mobibiliyoteka moSinyanga soUhompa. Ndi kuvhura o tare yifo eyi pokompiuta zoge. Kuvhura hena o zogere mapuro goge noVakriste wovagara ndi wovakadi wovakurona. Nye wa ha ndindira nkenye apa va ku limburure asi yimo ndi hawe kwankenye epuro. Rorunzi ove nyove gokutokora pwanyovelike ndi ngovalikwali. Makura tura po nye etokoro eli ali likida asi ove kapi o rugana eligawo kwaKarunga komeho zovantu tupu nye nekembo hena.—Varoma 14:19; Vaefeso 5:10.
Erugururo nzogera
• Ngapi ulimburukwi kwaJehova wa hamena koulimburukwi komulikwali goge?
• Yisinke nayi tu vatera tu rugane yokuhafesa Karunga nsene tuna kara momaudigu gemepata?
• Yisinke natu rugana yipo tu wapukurure mukaro nampili wopeke mepata va ninke mapuko?
[Efano pepenuno 155]
Unturagumbo womugara wa kona kulikida yikara yaJesus
[Efano pepenuno 157]
Kukara nelirongo lyepata lyoBibeli lyankenye apa kuvatera mokutura epata mouumwe