Kareni ‘mupampi mokurugana yoyiwa’!
“[Jesus] kwa ligava morwetu, a tu parure mo mouturanzo wetu, a tu kuhwe tu kare muhoko gwamwene, gomupampi mokurugana yoyiwa.”—TIT. 2:14.
1. Apa ga ka sikire Jesus montembeli momazuva 10 gokwedi kwaNisani momvhura 33 S.N., yisinke ya horokere?
AKO kwa kere kwedi kwaNisani mazuva 10 momvhura 33 S.N., mazuva gongandi ko tupu va rugane Paska. Vantu wovanzi ava va wizire koJerusarema mokuyakanderera kwa kere montembeli nokundindira nononkondo sipito oso. Yisinke ya horokere apa Jesus ga ka sikire? Navenye vatjangi vatatu woMavangeli oMateusa naMarukusa naRukasa, kwa yi kwatesa ko asi sikando sauvali Jesus kwa tjidire mo varandesi novarandi montembeli. Makura ta gandanga yitafura yovatjindji woyimaliwa noyipundi yovarandesi wononkutji. (Mat. 21:12; Mar. 11:15; Ruk. 19:45) Upampi waJesus kapi wa hege apa ga yi rugene sikando sokuhova.—Joh. 2:13-17.
2, 3. Ngapi omu twa yi diva asi upampi waJesus kapi wa hege tupu pokuzeresa ntembeli?
2 Etjango lyaMateusa kwa likida asi upampi waJesus kapi wa hege tupu pokuzeresa ntembeli. Nye hena nga verura vatwiku noyirema ava ngava mu wizire. (Mat. 21:14) Etjango lyaRukasa kwa tumbwire yirugana yapeke eyi ga sikisire mo Jesus. “Jesus nga rongo nkenye ezuva montembeli.” (Ruk. 19:47; 20:1) Upampi waJesus kwa u likidire hena unene moyirugana yendi yokuzuvhisa.
3 Konyima, mupositoli Paurusa kwa tjangerere Titusa nokufaturura asi Jesus “kwa ligava morwetu, a tu parure mo mouturanzo wetu, a tu kuhwe tu kare muhoko gwamwene, gomupampi mokurugana yoyiwa.” (Tit. 2:14) Monkedi musinke natu vhura kukara ‘mupampi mokurugana yoyiwa’ naina? Ntani ngapi omu yihonena yovahompa wovawa womoJuda nayi tu korangeda?
Kukara umpapi mokuzuvhisa nomokuronga
4, 5. Mononkedi musinke va likidire vahompa vane womoJuda mupampi mokurugana yoyiwa?
4 Asa naJehosafata naHisikiya naJosiya navenye kwa rugene ko yuma mokugusa mo yikarunga yoyimpempa moJuda. Asa “ta zungurura yizambero yokoyirongo nomavega govapagani gokutongamena, ta bamagura mamungundi gokupongoka gomamanya, ta komangere nombundi dahompa gomukadi Asera.” (2 Hist. 14:3) Morwa upampi wendi koukareli waJehova, Jehosafata “ta hanagura mavega nagenye gokutongamenena govapagani nonombundi dakarunga gomukadi Asera gwaJuda.”—2 Hist. 17:6; 19:3.a
5 Kwa kweme ko sipito soPaska somazuva gatano-nagavali esi ga wapaikire Hisikiya moJerusarema, “mbunga nazinye zaIsraeli tazi zi kwankenye sitata somoJuda, makura tava bamagura po nongundi domamanya nokutetagura mafano aga va pongwera karunga gomukadi Asera nokuzungurura po yizambero nomavega aga ava tongamenene vapagani. Eyi kwa yi ruganene mosirongo nasinye saJuda esi sa hupire ko nomoyirongo yoMbenyameni naEfurayimi naManase.” (2 Hist. 31:1) Josiya kwa tamekere kupangera nonomvhura ntantatu. Etjangwa kwa uyunga asi: ‘Momumvho gwautano-nautatu ogu ga zire Josiya mouhompa, age simpe mudinkantu-dinkantu, age kwa varekere kukerera Karunga gozinakuru, hompa Ndafita. Ano nomvhura ne eyi da pita po, makura ta haraganesa po mavega aga ngava kanderere vapagani mafano gakarunga gomukadi Asera noyikarunga nayinye yapeke yoyimpempa.’ (2 Hist. 34:3) Yipo nye, vahompa navenye owo vane kwa kere nomupampi mokurugana yoyiwa.
6. Morwasinke yirugana yetu yokuzuvhisa natu yi hetakanesera noyirugana yovahompa womoVajuda wovalimburukwi?
6 Nose naina kulihameka mosirugana sokulifana mokuvatera vantu va manguruke komarongo gomaukerelikarunga goyimpempa, kukwatera mo kukarera yikarunga yoyimpempa. Yirugana yetu yokuzuvhisa ya tunda embo zende embo kutuninkisa tu ligwanekere novantu womarudi nagenye. (1 Tim. 2:4) Mudinkantukadona gumwe goMuasia kwa diworokere omu ozina ngava tongamene mafano gokulisiga-siga membo lyawo. Pokukonakona asi mafano nagenye kapi ga karera po Karunga gosili, mukadona kwa kandererere asi ngano a dive asi yilye Karunga gosili. Apa Nombangi daJehova mbali da ya morwere membo lyawo, ta pwaga ko, ano ado da liwapaikilire mokumuvatera a dive edina lyokulikarera lyaKarunga gosili, Jehova. Ee, omu tupu ga hefe mokulironga usili kuhamena yikarunga yoyimpempa! Ngesi age kuna kulikida mupampi gomunene pokulihameka unene moyirugana yomomapya, nokuvatera vantu vapeke pampepo.—Epis. 83:18, BR; 115:4-8; 1 Joh. 5:21.
7. Yisinke twa hepa kurugana mokuhonena varongi ava va tumine mosirongo nasinye momazuva gaJehosafata?
7 Apa atu lihameke moyirugana yokuzuvhisa ya tunda embo zende embo, kokuhura kupi atu rugana mukunda ogu va tu pa? Momvhura zautatu zepangero lyendi, Jehosafata kwa tumine vakurona vatano noVarevhi vatano-navane ntani novapristeli vavali. Age kwa va tumine moyitata nayinye va ronge vantu noveta daJehova. Awo kwa rugene nawa sirugana esi mosirongo nasinye yipo vantu wonomuhoko edi dava kundurukidire va tamekere kutjira Jehova. (Resa 2 Histoli 17:9, 10.) Pokuza momambo poyiruwo nomomazuva gokulisiga-siga, ose kuvhura ngano tu uyunge novantu wongandi membo limwe.
8. Ngapi omu natu vhura kutamununa sirugana setu sokuzuvhisa?
8 Vakareli vaKarunga wovanzi moyiruwo yantani kulizambera mokusiga mambo gawo nokudirukira oku kuna kara hepero zonene zovazuvhisi womupampi. Nove kuvhura o yi rugane oyo ndi? Vamwe vetu nokuvhura si kudiruka, nye kuvhura kuhetekera ko kugava umbangi kovantu ava va kara momukunda gwetu ava ava uyunga eraka lyapeke. Morwa kuligwanekera nomarudi gokulisiga-siga momukunda gwawo, apa ga kere nonomvhura 81, Ron ga lirongere kumorora momaraka gokusika po-32! Age kwa ligwanekerere mositarata novalikwali womoAfrika makura ta va morora meraka lyawo, Ruyoruba. Awo kwa pulire Ron nsene ga ka dingura rumwe Afrika. Apa ga uyungire asi hawe, awo kwa mu pulire omu ga diva eraka lyawo. Age ga vhulire kuvazuvhisira. Awo va tambwire noruhafo yifo nokumupa aderesi zawo, ezi ga geve kombungakriste zomomukunda yipo asi valikwali va vhure kulironga Bibeli.
9. Morwasinke ya karera nomulyo kuresa moBibeli moyirugana yetu yokuzuvhisa? Gava sihonena.
9 Varongi ava va zire mosirongo kompangera zaJehosafata kwa “gusire buke zoVeta zaHOMPA,” va ze nazo. Mouzuni mudima ose kukondjera mokuronga vantu moBibeli, morwa azo Nonkango daKarunga. Ose kulikida mulyo goBibeli moyirugana yetu yokuzuvhisa pokuhetekera ko kuzivaresera, yipo va vhure kumona mulyo gononkango damo. Mwenya embo gumwe kwa tanterere munazinyetu Linda asi mugara gwendi kwa kere nourema ntani ga hepere epakerombili. Mwenya embo kwa lilire asi: “Kapi nina diva asi yinke na rugana yipo Karunga a pulisire eyi yi horokere nge.” Linda kwa limbwilire asi: “Kuvhura ni ku tumbwidire sininke simwe ndi?” Makura age ta resa nonkango domwaJakopo 1:13 ntani ta gwederere ko asi: “Ruhepo narunye oru tuna kuligwanekera naro kumwe novahali vetu kapisi etengeko lyokutunda kwaKarunga.” Konyima zoyo, mukadi ta lidingire Linda mokumulikida rupandu kweyi ga uyungire. Linda kwa tente asi: “Ame na vhulire kugava ehengagwido pokuruganesa Bibeli. Poyiruwo yimwe novelise edi atu resa moBibeli kapi ga di zuvha rumwe mwenya embo.” Nzogera zina kwa twaredesere kelirongo lyoBibeli lyekembo nomukadi gwina.
Vadinkantu ava ava likida mupampi
10. Ngapi omu Josiya ga tulisire po sihonena sosiwa kovadinkantu woVakriste naina?
10 Pokutengura kosihonena saJosiya, tuna koneke asi age kwa kondjerere ukareli wousili ngomudinkantu, ano apa ga kere nonomvhura 20 yipo ga tamekere nosirugana sendi sosinene sokuhanagura po yikarunga yoyimpempa. (Resa 2 Histoli 34:1-3.) Vadinkantu wovanzi naina kuna kulikida upampi wokulifana moyirugana yawo yokuzuvhisa.
11-13. Yirongwa musinke natu lirongera ko kovadinkantu vanaina ava vana kukarera Jehova nomupampi?
11 Hannah, ogu ga tunga moIngiranda, apa ga kere nonomvhura 13 kwa tamekere kulironga eraka lyoRufransa kosure apa ga zuvhire asi mbunga zoRufransa vana zi tulisa po modoropa ezi za kara pepi nawo. Oguhwe va yi tambwire mokuza nendi kombunga ozo. Hannah ngesi nomvhura dendi 18, kuna kuzuvhisa nomupampi moRufransa ngomupioniri gokukarerera. Nove kuvhura o lironge eraka lyapeke mokuvatera nawopeke va dive kuhamena Jehova.
12 Rachel kwa haferere unene mokutarera vidiyo Pursue Goals That Honor God. Pokukumburura ko konkedi omu nga gazara apa ga tamekere kukarera Jehova momvhura 1995, age kwa tente asi: “Ame kwa gazarere asi kuna kurugana nawa mousili.” Makura ta gwederere ko asi: “Konyima zokutarera vidiyo, ame ngesi nina nongonona asi nomvhura dononzi da ka pita kapi na litulire mo unene. Ame na hepa kukondjera usili nokugazadara ko nokulitura mo unene moyirugana yokuzuvhisa ntani nemelirongo lyanyamwange.” Ngesi Rachel kuna kumoneka asi age kuna kukarera Jehova nomupampi. Yitundwamo musinke ga limonena? “Elikwatakano lyange naJehova kwa kunkondopara. Ano makanderero gange kuna kutanta yuma, elirongo lyange kuna kupama unene nokuhafesa, ntani yihorokwa yoBibeli kuna kukara nomulyo kwange. Ngoyitundwamo, ame kuna kuhafera unene yirugana yokuzuvhisa nokugwana ruhafo rosili pokumona asi nonkango daJehova kuna kuhengagwida nawopeke.”
13 Luke kuna kara mudinkantu ogu za korangedere vidiyo zimwe, Young People Ask—What Will I Do With My Life? Konyima zokutarera vidiyo ezi, Luke kwa tjenge asi: “Na gazadarere ko kuhamena eyi ngani rugana neparu lyange.” Age ta gwederere ko asi: “Ame kwa kondjesere nge mokukondjera muhowo yimaliwa kupitira melirongo lyokuzeruka, konyima ntani nani ya demenena koyitambo yopampepo. Makondjeso gangoso kapi aga vatere mokutunga po elikwatakano lyenene naJehova, nye kukuninkisa o fe pampepo.” Vadinkantu, ruganeseni eyi mwa lironga kosure mokutamununa yirugana yeni yokuzuvhisa ngwendi Hannah. Temwinineni sihonena saRachel, pokukondjera nomupampi yitambo eyi ayi yererepeke Karunga. Kwameni sihonena saLuke, pokunyokera po yiponga eyi ya kara siraha kovadinkantu wovanzi.
Tambureni marondoro nomupampi
14. Ukareli musinke a tambura Jehova, ntani morwasinke ya karera udigu mokumukarera naina?
14 Vantu vaJehova va hepa kukuhuka ntani ukareli wawo nau tambura Jehova. Jesaya kwa rondwere asi: “Yi diveni asi tomu tundu mo moBabironiya, namuvenye ava omu simbi yipako yontembeli! Mwa ha guma kweyi yokunyata; likuhureni nyaamweni mu tunde mo.” (Jes. 52:11) Nomvhura dononzi da pitire po komeho Jesaya a ka tjange nonkango odo, hompa gomuwa Asa ga rugene nomupampi mokugusa mo yirugana yokunyata moJuda. (Resa 1 Vahompa 15:11-13.) Konyima zomauye gongandi, mupositoli Paurusa kwa tanterere Titusa asi Jesus kwa ligeve mwene mokukuhura vasikuli vendi va kare “muhoko gwamwene, gomupampi mokurugana yoyiwa.” (Tit. 2:14) Kuvhura yi kare udigu mokukara noukuhuki mouzuni ou wokunyata, unene po kovadinkantu. Pasihonena, vakareli navenye vaKarunga, va kare asi vadinkantu ndi vakurona, va hepa kukondja mokudira kulinyateka komafano goruhonda aga ava likida pomaborde nokomalikwamo gokotivi ntani nokoInterneta.
15. Yisinke nayi tu vatera mokunyenga yininke yoyidona?
15 Upampi wetu mokutambura marondoro gaKarunga kuvhura kutuvatera mokunyenga yininke yoyidona. (Epis. 97:10; Rom. 12:9) Ngamoomu ga yi tente Mukriste gumwe asi twa hepa kunyokera po mafano goruhonda yipo “tu manguruke ko kononkondo dago dokukoka.” Mokukakunyuna yivera yomangenete, muntu ga hepa kukara nononkondo dononene kupitakana nonkondo odo dina yi kwatakana. Mokulifana, pwa hepa upampi wounene mokunyokera po ezedo lyokutarera mafano goruhonda. Nye mokudiva omu mafano goruhonda ga kara nosiponga ngayi tu vatera mokugatonda. Munazinyetu gumwe kwa litulire mo unene mokumanguruka ko konkareso zendi zokutarera mafano goruhonda moInterneta. Age kwa tulire kompiuta poruzera yipo epata nalinye limone nkenye ogu ana kuziruganesa. Mokugwederera ko koyo, age ga tokomenene mokulizeresa mwene ntani nokukara mupampi mokurugana yoyiwa. Makura ta tura po erunduruko limwe hena. Morwa nga ruganesa kompiuta kongesefa zendi, yipo ga tokomenene asi tazi ruganesa tupu nsene namukadendi po.
Mulyo gonkareso zongwa
16, 17. Ngapi omu nkareso zetu zongwa nazi kundama ava vana kutumona? Gava sihonena.
16 Ee, nkareso musi kouwa ava likida vadinkantu moyirugana yaJehova, ntani nomu ayi tetukisa ava ava yi mono! (Resa 1 Peturusa 2:12.) Mugara gumwe ogu ga ka dingwire Beteli zaLondon kwa rundwilire mutaro gwendi koNombangi daJehova konyima zokukara mo ezuva nalinye mokukawapaika mahina gokunduruka. Mukadendi, ogu nga lirongo Bibeli noMbangi zomomukunda gwawo, kwa konekere omu nkareso zayendi za rundurukire. Nare, kapi nga pulisilire Nombangi di ze membo lyendi. Nye apa ga ka tengwire mokukarugana sirugana sina koBeteli kwa pandadekere unene nkedi ezi va mu tekwire. Age kwa tente asi kwato gumwe ogu ga ruganesere eraka lyedona. Navenye kwa likidire elididimikiro nonkareso zombili. Unene po eyi ya mu tetukisire, vadinkantu ava ava rugana nomupampi pwa hana mfuto, awo kuruganesa siruwo nononkondo dawo mokuvatera kunduruka mbudi zongwa.
17 Mokulifana, vanavazinyetu ava ava rugana mokufira sinka mapata gawo yirugana yawo kuyirugana nomutjima nagunye. (Koros. 3:23, 24) Eyi narunye kuninkisa vahona vawo va tare nkareso zawo zongwa ntani va dire kuhara kuvazumbanesa ngovarugani.
18. Ngapi omu natu vhura kukara ‘nomupampi mokurugana yoyiwa’?
18 Ehuguvaro lyetu mwaJehova noulimburukwi wetu komavyukiso gendi ntani nomu atu fire sinka mavango getu gokupongera, ayo kuna kara yimwe yononkedi omu atu likida upampi konzugo zaJehova. Mokugwederera ko, tuna hara kulihameka mo unene mosirugana sokuzuvhisa Uhompa nesi sokutura po varongwa. Tu kare asi vadinkantu ndi vakurona, nsene tu rugana paapa twa hulira mokuparuka kuliza nonompango dokukuhuka edi da likwatakana noukareli wetu, ose ngatu gwanena mo mauwa gomanzi. Ntani ngatu twikira ngorooro yipo tu divikwe asi ose vantu ‘womupampi mokurugana yoyiwa.’—Tit. 2:14.
[Nondanda dokonhi]
a Asa nampo kwa hanagwire po mavega nagenye gokutongamenena govapagani aga ga likwatakanene noukareli woyikarunga yoyimpempa nye kapisi aga ngava kerere vantu vaJehova. Ndi nampo mavega gokutongamenena aga kwa ya ga tungwilire kehagero lyepangero lyaAsa, ano kwa ya ga hanagwire po munwendi Jehosafata.—1 Vah. 15:14; 2 Hist. 15:17.
Kupitira moyihonena yomoBibeli neyi yantani, yisinke ono lirongere ko kuhamena
• omu no likida upampi woge pokuzuvhisa nopokuronga?
• omu vadinkantu woVakriste nava kara ‘nomupampi mokurugana yoyiwa’?
• omu no manguruka ko konkareso zondona?
[Efano pepenuno 18]
Ove kuruganesa nkenye apa Bibeli moyirugana yokuzuvhisa ndi?
[Efano pepenuno 20]
Pokulironga eraka lyapeke ove simpe kosure ngayi ku vatera mokutamununa yirugana yoge yokuzuvhisa