Eyi ga rongere Jesus kuhamena Uhompa waKarunga

“Jesus ta zi mwa za yitata a udise Mbudi zoUntungi waKarunga.”—RUKASA 8:1.

OSE kwa hara kuuyunga yininke eyi ya kara komutjima gwetu ntani neyi twa hara. Jesus mwene kwa tente asi “eyi ya zura mutjima, kana nako yiyo aka uyunga yooyo.” (Mateusa 12:34) Apa atu konakona yininke eyi ga uyungire Jesus apa nga zuvhisa, ose kuvhura tu tante asi Uhompa waKarunga kwa kere sirongwa somulyo kwendi.

Yisinke Uhompa waKarunga? Uhompa kuna kara epangero eli a pangere hompa. Yipo nye, Uhompa waKarunga kuna kara epangero eli ga tulisa po Karunga. Mbudi ezi nga uyunga po unene Jesus kuna kara Uhompa waKarunga. Uhompa owo kwa u tumbura moMavangeli gane kupitakana po-110. Jesus kapi nga uyunga tupu mononkango. Nye kupitira moyirugana yendi, Jesus nga rongo kuhamena Uhompa waKarunga ntani neyi ngau ka rugana.

Yilye Hompa? Hompa goUhompa waKarunga kapisi vantu va mu horowora. Nye, age Karunga mwene ga mu horowora. Merongo lyendi, Jesus ga yi likidire asi yige ga horowora Karunga a kare Hompa.

Jesus ga yi divire asi mauporofete gomoBibeli kwa pumba asi Mesiyasa getumbwidiro nga pangera moUhompa ou ngau karerera. (2 Samwere 7:12-14; Ndaniyera 7:13, 14; Mateusa 26:63, 64) Diworoka asi Jesus mwene ga yi divisire asi yige Mesiyasa getumbwidiro. Jesus ga yi divire asi age yige Hompa ogu ga tura po Karunga. (Johanesa 4:25, 26) Yosili yikando yoyinzi Jesus nga ruganesa ntanto “uhompa wange.”—Johanesa 18:36.

Jesus ga rongere hena asi poveli ava ngava ka pangera kumwe nendi moUhompa. (Rukasa 22:28-30) Age kwa tumbwire owo ngava ka pangera kumwe nendi asi “mbungagona,” yeeyi sivaro sawo kwa si yereka. Age kwa va tanterere asi: “Karunga kuna hara a mu pe Untungi wendi.” (Rukasa 12:32) Buke zokuhulilira moBibeli kulikida asi ava va kara nositumbukira sokukapangera naKristusa sivaro sawo kwa sika po-144 000.—Ehororo 5:9, 10; 14:1.

Kupi oku wa kara Uhompa? Jesus kwa tanterere mupangeli goVaroma Pontiusi Piratusa asi: “Uhompa wange kapisi wouzuni ou.” (Johanesa 18:36) Uhompa waKarunga mepitisiro lyaKristusa kapi ngau pangera kupitira movantu. Jesus kwa rugurwire kutumbura Uhompa waKarunga asi awo Uhompa ndi “Untungi weguru.”a (Mateusa 4:17; 5:3, 10, 19, 20) Yipo nye, Uhompa waKarunga kuna kara epangero lyemeguru.

Apa Jesus ga ya kere pevhu, ga yi divire asi nga tengura meguru. Age kwa uyungire asi age ta ka ‘wapaikira uturo,’ ava ngava ka pangera kumwe nendi yipo ngava gwane mpito zokukakara nage meguru.—Johanesa 14:2, 3.

Yisinke ngau ka sikisa mo Uhompa? Jesus kwa rongere vantu va kanderere kwaKarunga asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:9, 10) Mpango zaKarunga za sika mo nare meguru. Sitambo saKarunga apa pevhu ngasi ka sika mo kupitira moUhompa owo. Mokukasika mo oyo, Uhompa ngau ka reta po marunduruko gomanene apa pevhu.

Yisinke ngau ka rugana Uhompa pevhu? Jesus kwa rongere asi Uhompa waKarunga ngau ka gusa po udona pokukazonagura po ava ava tokomene kurugana yirugana yoyidona. (Mateusa 25:31-34, 46) Eyi kutanta asi ngau ka hagekesa po udinikarunga naunye. Jesus kwa rongere asi pevhu ngapa ka kara vantu ‘wokukuruka,’ wovahungami, wonkenda, “wonomutjima da kuhuka” ntani wombili.—Mateusa 5:5-9.

Vantu vangoso wovalimburukwi ngava ka tunga pevhu lyokunyata ndi? Hawe! Jesus kwa tumbwidilire asi moUhompa waKarunga ngapa ka kara marunduruko gokutetukisa pevhu. Mugara ogu va pamparere kumwe naJesus kwa tente asi: “Hompa, diworoka nge nsene no za moUntungi woge.” Makura Jesus ta mu limburura asi: “Yosili nina kukutantera [naina asi, ngo, NW] ka kara kumwe name moParadisa.” (Rukasa 23:42, 43) Yimo, Uhompa waKarunga ngau ka rundurura evhu eli li kare paradisa, ngwendi moomu ya kere mosikunino saEdeni.

Yisinke Uhompa ngau ka ruganena hena vantu? Jesus kapi tupu ga tumbwidilire eyi ngau ka rugana Uhompa waKarunga. Age ga likidire hena eyi ngau ka rugana. Jesus kwa rugene yitetu yoyinzi yokuverura, ano eyi kwa likidire eyi nga ka rugana momunene mepangero lyendi. Evangeli kwa uyunga kuhamena Jesus asi: “Ntani ana kugendagura Jesus moGalireya mudima, oku ta rongo monosinagoge dawo, ta zuvhisa Mbudi zoNgwa zoUntungi waKarunga, oku ta hakura nkenye uvera nokuyova nakunye kovantu.”—Mateusa 4:23.

Jesus kwa verwire wovanzi. Age kwa ‘mahwire meho gogu va reta age mutwiku.’ (Johanesa 9:1-7, 32, 33) Nonkenda, Jesus kwa verwire mugara ogu ga verere yingondwe. (Marukusa 1:40-42) Apa va mu reterere Jesus “muntu gosipuru-puru, ogu a uyunga kukokomena,” age kwa yi likidire asi age kuvhura kuninka ‘wokudira kuzuvha va zuvhe, ano wokudira kuuyunga va uyunge.’—Marukusa 7:31-37.

Hompa ogu ga horowora Karunga kwa kara nononkondo dokupindura vantu koufe. Moyihorokwa yitatu eyi va tjanga, Jesus kwa pindwire vantu koufe. Age ga pindwire koufe muna gomugara gomufisayendi, mukadona gonomvhura 12 ntani nakaume kendi gomunene Rasarusa.—Rukasa 7:11-15; 8:41-55; Johanesa 11:38-44.

Pokufaturura meho zositetu ezi zina kundindira ava ngau ka pangera Uhompa waKarunga, Jesus kwa pumbire kupitira momupositoli Johanesa asi: “Tara, nzugo zaKarunga pozili povantu. Age ta ya tungu pwawo, awo ngava kare muhoko gwendi. Karunga mwene nga kara pwawo, a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.” (Ehororo 1:1; 21:3, 4) Gazara tupu uzuni wokudira mahodi nokukora ntani nonomfa! Makura ekanderero lyokukasikisa mo mpango zaKarunga apa pevhu ngali ka sika mo ngwendi meguru.

Siruwoke ngau wiza Uhompa waKarunga? Jesus kwa rongere asi upangeli wendi ngau tameka nosidiviso sosiruwo esi ga tumbwire asi ‘ewizo’ ndi ekaropo lyendi. Age kwa geve mauzera gomauporofete mokulikida apa ngali tameka ekaropo lyendi mouhompa. Siruwo oso ngasi kara noyidiviso eyi, marumbu nomakankamo gevhu nehamba lyomukagu ntani nevhuko lyoudona. (Mateusa 24:3, 7-12; Rukasa 21:10, 11) Yidiviso eyi ntani nayimwe yapeke eyi ga pumbire Jesus kwa moneka kutundilira mo-1914, mvhura ezi ya tamekere Yita yoPomuhowo yoUzuni. Yipo nye, Jesus ngesi kuna kupangera ngaHompa. Ntaantani tupu ngau wize Uhompa waKarunga ntani nokuyasikisa mo mpango zaKarunga pevhu.b

Yisinke ngali tanta koge ewizo lyoUhompa waKarunga? Ayo kwa korera omu o tara mbudi zaJesus.

[Nondanda dokonhi]