Va gwene Mesiyasa!

“Ose tuna gwana Mesiyasa.”—JOH 1:41.

1. Yisinke ya ninkisire Andiliyasa a tante asi: “Ose tuna gwana Mesiyasa”?

JOHANESA MUKUHWI ta zi novarongwa vendi vavali. Eyi vana hedere pepi naJesus, Johanesa ta tanta asi: “Tareni, Nzwigona zaKarunga ozo!” Andiliyasa nomurongwa mukwawo tava genderere kukwama Jesus nokukara ezuva nalinye kumwe nendi. Konyima, Andiliyasa ta ka gwana mukurwendi Simoni Peturusa, ta mu twara kwaJesus konyima tupu zokumutantera asi: “Ose tuna gwana Mesiyasa.”—Joh. 1:35-41.

2. Ngapi omu ngatu gwanena mo uwa mokukonakona mauporofete goUmesiyasa?

² Ngomu sa pitire siruwo, Andiliyasa naPeturusa novakwawo kwa konakonene nawa Matjangwa eyi yiyo va uyungilire asi Jesus yige Mesiyasa getumbwidiro. Epuro lyetu moNonkango daKarunga nomoMugwavekwa gwendi ngali nkondopara nsene tu twikira kukonakona mauporofete goUmesiyasa.

“Tara Hompa goge kuna kuwiza!”

3. Mauporofete musinke ga sikilire mo apa Jesus ga hwilire moJerusarema?

³ Mesiyasa nga hwilira moJerusarema ngaHompa. Uporofete waSakaliya kwa tanta asi: ‘Hafeni unene, vantu one womoSiyoni! Lilikideni morwaehafo, vantu one womoJerusarema! Tara Hompa goge kuna kuwiza koge! Age kuna kuwiza koge mouhungami nemefundo. Kwa linunupika, age kuna rondo kosindongili – komutanda gosindongili sosikadi.’ (Sak. 9:9) Muepisarome kwa tjenge asi: “Karunga a tungike ogu ana kuwizira medina lyaHOMPA!” (Epis. 118:26) Jesus kapi ga tanterere mbunga eyi nazi rugana. Nye mbunga kwa zigilire noruhafo rorunene, ngomu va yi pumbire. Ngomu ono kuresa sihorokwa, mona momagano nokuzuvha mazwi goruhafo.—Resa Mateusa 21:4-9.

4. Ngapi omu lya sikilire mo Episarome 118:22, 23?

⁴ Nampili ngomu ngava dira kutambura Jesus vantu wovanzi ngaMesiyasa, age muwa kwaKarunga. Ngomu va yi pumbire, Jesus ‘kwa mu swawire, kapi va mu tere eho’ vantu ava va dilire kupura momaumbangi. (Jes. 53:3; Mar. 9:12) Nampili ngoso, Karunga kwa gendesere muepisarome a tjange asi: “Emanya eli va zumbire vatungi asi edona, yilyo nye lina kara lyene po lyemekovhu. Eyi HOMPA ga yi rugana.” (Epis. 118:22, 23) Jesus kwa uyungire uporofete ou apa ga uyungire nononkore dendi ano Peturusa kwa uyungire asi uporofete ou wa ya sikilire mo mwaKristusa. (Mar. 12:10, 11; Yirug. 4:8-11) Jesus kwa kere sili “emanya lyemekovhu” lyombungakriste. Emanya eli va nyokere vantu va hana epuro, nye “Karunga kwa li horowora asi alyo ewa unene.”—1 Pet. 2:4-6.

Kwa mu horwere nokumuzumba!

5, 6. Yisinke va pumbire kuhamena muhoroli gwaMesiyasa, ntani ngapi eyi ya sikilire mo?

⁵ Ogu nga li nendi yige nga mu horora. Ndafita kwa porofetere asi: “Namukwetu si goponyonga, ogu na huguvara po unene, ogu a li yange, nage nyame ana kudivyuka.” (Epis. 41:9) Mosiruwo sanare, vantu ava ngava li kumwe ngava va tara asi vakaume. (Gen. 31:54) Uporofete kwa tanta asi ogu ga kere kaume kaMesiyasa yige nga mu horora. Jesus kwa uyungire kuhamena muntu ogo apa ga tanterere vapositoli vendi asi: “Kapi nina kuuyunga yokuhamena one namuvenye, na diva ava na horowora. Nye etjangwa li sike mo eli ali tanta asi, ‘Ogu ani li nendi nondya, yige a tu nge murungu.’”—Joh. 13:18.

⁶ Ogu nga horora Mesiyasa ngava mu futa yimaliva 30 yosisiliveli, eyi ngava randa mukareli! Kuliza nouporofete waSakaliya 11:12, 13, Mateusa kwa likidire asi Jesus kwa mu horwere noyimaliwa oyo. Morwasinke Mateusa ga uyungilire asi eyi kwa yi pumbire ‘muporofete Jeremiya’? Nampo buke zaJeremiya kwa kere zokuhova monobuke domoBibeli, omu mwa hamenene buke zaSakaliya. (Hetakanesa Rukasa 24:44.) Judasa kapi ga ruganesere yimaliva oyo, nye kwa yi zuguminine montembeli makura ta ka lidipaga mwene.—Mat. 26:14-16;27:3-10.

7. Ngapi omu uporofete waSakaliya 13:7 wa ya sikilire mo?

⁷ Varongwa vaMesiyasa ngava mu zumba. Sakaliya kwa tjenge asi: ‘Dipaga musita, makura nonzwi ngadi liharagane.’ (Sak. 13:7) Momvhura 33 Nisani 14, Jesus kwa tanterere varongwa vendi asi: “Masiku ganaina one namuvenye tomu ka limbilirwa mwarwange, yeeyi kwa tjanga asi, ‘ngani dipaga musita, makura siunda sononzwi ngasi lihane.’” Oyo yiyo ya horokere, morwa Mateusa kwa tente hena asi: “Varongwa vendi tava mu zumbu, tava ka tjira.”—Mat. 26:31, 56.

Kwa mu rundilire nokumutoona

8. Ngapi omu uporofete waJesaya 53:8 wa ya sikilire mo?

⁸ Mesiyasa ngava mu pangwira konomfa. (Resa Jesaya 53:8.) MoNisani 14 kongurangura zonene, Jesus kwa mu twere kosigongi somasimbi, age vana mu manga makura tava mu gava komupangeli goVaroma Pontius Piratusa. Age kwa pulire Jesus nye kapi ga mu gwene usima. Apa Piratusa ga here kumangurura Jesus, mbunga tazi zogomoka asi: “Mu pampara!” makura o mangurure Barabasa, munamahaka. Morwa kuhara kuhafesa mbunga, Piratusa ta mangurura Barabasa nokugava mpangera va sopore Jesus nokukamupampara.—Mar. 15:1-15.

9. Ngapi omu Episarome 35:11 lya ya sikilire mo?

⁹ Ngapa kara nombangi doyimpempa dokurwanesa Mesiyasa. Ndafita kwa tente asi: “Nondipo doyimpempa dina vyuka nge; eyi na dira kudiva, yiyo vana kupera nge nzo.” (Epis. 35:11) Kwa liza nouporofete ou “vapristeli wovanene nosigongi mudima somasimbi tava paparere Jesus umbangi woyimpempa, asi va mu twaredesere konomfa.” (Mat. 26:59) Yosili, ‘sinzi sawo yimpempa va uyungire, morwa maumbangi gawo kapi ga lizire.’ (Mar. 14:56) Nonkore daJesus kapi da kere nosinka asi nombangi yimpempa dina kuuyunga, awo kwa harerere Jesus a fe.

10. Ngapi omu etjangwa lyaJesaya 53:7 lya ya sikilire mo?

¹⁰ Mesiyasa nga mwena komeho zononkore dendi. Jesaya kwa pumbire asi: “Age kwa mu hepeka, nye ta ligava, age kapi ga zahwire kana kendi, moomu azi kara nzwi vana kutwara kosidipagero ndi ngwendi nzwi zina mwena pomukuruli gwazo, nhi, nage kapi ga zahwire kana kendi.” (Jes. 53:7) ‘Peheto lyovapristeli wovanene nomasimbi goVajuda, Jesus nakumbutu si.’ Yipo ga mu pulire Piratusa asi: “Kapi ono kuzuvha ou usima wounene ngesi vana kukupa?” Nampili ngoso, “Jesus nepuro limwe si ga mu limbwilire, dogoro mupangeli gosirongo tayi mu tetura unene.” (Mat. 27:12-14) Jesus kapi ga swawire nonkore dendi.—Rom. 12:17-21; 1 Pet. 2:23.

11. Ngapi omu uporofete waJesaya 50:6 nou waMika 5:1 wa ya sikilire mo?

¹¹ Jesaya kwa pumbire asi Mesiyasa ngava mu toona. Age kwa tjenge asi: “Ame kwa gava mugongo gwange kwava ava toona nge. Ame kapi na va silika apa va zuvhisa nge yoyidona pokudura nohuki dononzwedu dange nokufizira nge mazeze kosipara.” (Jes. 50:6) Mika kwa pumbire asi: “Awo kuna kurwisa mugendesi gwaIsraeli.” (Mika 5:1) Marukusa kwa likidire asi mauporofete ogo kwa hamenene kwaJesus, pokutjanga asi: “Vamwe po nare vana tameke kumufizira oku tava mu kudumike komeho, tava mu toona nononyongo. Ntani vana kumutantera asi: ‘Tanta ogu ana kutoona asi yige yilye.’ Makura vakareli nawo tava mu toona momudona.” Marukusa kwa tente asi vakwayita “ntani vana mu toona noruu komutwe oku tava mu fizire oku tava tu nongoro, va mu fumadeke.” (Mar. 14:65; 15:19) Yosili, kapi pwa kere konda zokutekura Jesus momudona.

Kwa limburukwire dogoro konomfa

12. Ngapi omu etjangwa lyEpisarome 22:16 neli lyaJesaya 53:12 ga ya sikilire mo?

¹² Mesiyasa ngava mu pampara kositji. Ndafita kwa tente asi: ‘Mbunga zovakorokotji kuna kundurukida nge; awo kuna kulipapagwira mawoko nonompadi dange.’ (Epis. 22:16) Sihorokwa kwa divikwa kovaresi woBibeli ngwendi moomu ga uyunga Marukusa asi: ‘Vili kwa kere zautatu [koyiha yovili 9 kongurangura], apa va mu pamparere.’ (Mar. 15:25) Kwa yi pumbire hena asi Mesiyasa nga fa kumwe novanzoni. Jesaya kwa tjenge asi: “Age kwa gava mwenyo gwendi, tava mu varwilire kosigwana sovanzoni.” (Jes. 53:12) Eyi kwa ya sikilire mo apa va “mu pamparere kumwe novamahaka vavali, gumwe korulyo, ogu mukwawo korumoho rwendi.”—Mat. 27:38.

13. Monkedi musinke Episarome 22:7, 8 lya sikilire mo mwaJesus?

¹³ Ndafita kwa pumbire asi Mesiyasa ngava mu swaura. (Resa Episarome 22:7, 8.) Jesus kwa mu swawire apa va mu zenzeresere kositji. Mateusa kwa tanta asi: ‘Varupitanzira kwa mu swawire oku tava puku nomutwe dawo, tava tanta asi: “Nyove asi wa here kuzungurura ntembeli, makura o zi tungurure momazuva gatatu. Lipopera nyamoge nye no! Nsenesi o MunwaKarunga, liturura ko nyamoge!” Vapristeli wovanene novalirongi womatjangwa nomasimbi nawo kwa mu zorere asi: ‘Age nga popere vakwawo, ngapi omu yina kumuvhura yokulipopera mwene. Nsenesi sili age hompa goVaisraeli, a tunde ko ntaantani [kositji, NW] no, makura ngano nose natu mu pura! Age kwa huguvara Karunga. Karunga a mu popere nye ntaantani, nsenesi sili ga mu hara no. Yeeyi age no kwa tente asi, ‘Ame ni MunwaKarunga.’” (Mat. 27:39-43) Nye, Jesus kwa lididimikilire nayinye eyi va mu rugene. Ee, sihonena musi sosiwa kwetu!

14, 15. Ngapi omu mauporofete ga ya sikilire mo aga ga uyunga kuhamena yikoverero yaMesiyasa novhinyu zoururu ezi va mu pere?

¹⁴ Mudwaro gwaMesiyasa ngava gu ninkira fungu-fungu. Ndafita kwa tjenge asi: “Awo kuna kuligavera yikoverero yange, ano mudwaro gwange yiyo vana kuguninkira fungu-fungu.” (Epis. 22:18) Oyo yiyo ya horokere, morwa apa vakwayita woVaroma va ‘mene kumupampara, yikoverero yaJesus makura tava yi ligavere pokuyininkira fungu-fungu.’—Mat. 27:35; resa Johanesa 19:23, 24.

¹⁵ Mesiyasa ngava mu pa vhinyu zoururu. Muepisarome kwa tente asi: “Nzara zina kwata nge, tava pe nge uhungu; nsene enota lina kwata nge, tava pe nge vhinyu zoururu.” (Epis. 69:21) Mateusa ta tu tantere asi: “Tava mu pe vhinyu zokuvhonga nonyangwe asi a nwe. Eyi ga zi makera, ururu, ta nyoka kuzinwa. Naruvali si gumwe pena nare ana nyoroka, ta gusa sisampo, ta si zaveke si nane vhinyu zoururu, ta si tura koruu, makura ta si mu kandwisire, a si mu nwise.”—Mat. 27:34, 48.

16. Faturura omu nonkango douporofete demEpisarome 22:1 da ya sikilire mo.

¹⁶ Mesiyasa nga moneka ngwendi Karunga kuna mu sigilire. (Resa Episarome 22:1.) Kuliza nouporofete asi: ‘Koyiha yovili zautatu, Jesus makura ta zigire nezwi lyenene asi: “Eli, Eli, lama sabaktani?”, kuninka asi, ‘Karunga gwange,’ Karunga gwange, yisinke yokusigilira nge?’ (Mar. 15:34) Jesus kapi ga zumbanesere epuro moGuhwe vemeguru. Jesus ga yi divire asi Karunga kapi ta mu popere kononkore dendi, ayo kwa pere mpito Jesus mokulikida ulimburukwi kwaKarunga. Apa ga zigilire unene age kwa sikisire mo Episarome 22:1.

17. Ngapi omu Sakaliya 12:10 nEpisarome 34:20 ga ya sikilire mo?

¹⁷ Mesiyasa ngava mu twa egonga, nye nosisupa si ngava mu teza. Vantu womoJerusarema “ngava tara ogu va digapa negonga.” (Sak. 12:10) Ntani Episarome 34:20 kwa tanta asi: ‘Karunga nga mu popera nawa-nawa, yisupa yendi nasimwe si sokuteka po.’ Mokupameka nonkango odo, mupositoli Johanesa kwa tjenge asi: ‘Nye mukwayita gumwe kwa mu twa tupu egonga poruvhe, makura tamu zoza honde nomema. Nye ogu ga yi mwene Johanesa ta gava undipo wayo, ano undipo wendi wosili. . . . Eyi kwa horokerere asi, etjangwa li sike mo lyokutanta asi, “Nosisupa si nampili simwe ngava mu teza.” Ano etjangwa ekwawo kutanta hena asi, “Awo ngava tara ogu ngava twa.”’—Joh. 19:33-37.

18. Ngapi omu uporofete wokuvhumbika Jesus mokatji konongawo wa ya sikilire mo?

¹⁸ Mesiyasa ngava mu vhumbika mokatji konongawo. (Resa Jesaya 53:5, 8, 9.) Momazuva 14 gokwedi kwaNisani kongurova, “mugara gongawo gomoAremateya, edina lyendi Josefa,” kwa zire a ka hundire simpu saJesus kwaPiratusa, makura ta mu pulisire. Mateusa ta tanta hena asi: “Josefa ta gusa simpu, ta si dingire mekehe lyepe lyezera, ta si tura montoko zendi zompe, ezi ga litjokwerere mwene memumanya. Makura ta sindumwine ko emumanya lyenene kevero lyontoko, ta ka za.”—Mat. 27:57-60.

Hamberereni Hompa goUmesiyasa!

19. Ngapi omu nonkango douporofete wemEpisarome 16:10 da ya sikilire mo?

¹⁹ Mesiyasa ngava mu vhumbura. Ndafita kwa tjenge asi: “Mwenyo gwange kapi ngo gu sigilira mosirongo sovafe.” (Epis. 16:10) Gazara tupu omu ya tetukisire vakadi vena va zire kontoko ezi va horekere Jesus! Oko kwa ka gwene muengeli ana hingire ogu ga va tanterere asi: “Neisi nagu mu pwagera. One kuna kupapara Jesus Munasareta, ogu kava vamberere. Ana vhumbuka, mutupu omu. Tareni si, evega eli kava mu tulire, lyolyo.” (Mar. 16:6) Konyima, mupositoli Peturusa kwa ya uyungisire mbunga zonene moJerusarema poPentekoste 33, pokutanta asi: “Ndafita kwa mwene yokomeho yaKarunga, yiyo nye ga uyungilire yepinduro koufe lyaKristusa asi: ‘Mwenyo gwendi kapi ngava gu sigilira mosirongo sovafe, ano rutu rwendi kapi ngaru wora.’” (Yirug. 2:29-31) Karunga kapi ga sigililire rutu rwaMunwendi gokuhara ru wore. Ntani hena, Jesus kwa mu vhumbwilire keparu lyopampepo.—1 Pet. 3:18.

20. Yisinke ga uyunga ko mauporofete kuhamena Uhompa woUmesiyasa?

²⁰ Karunga nga divisa asi Jesus Munwendi. (Resa Episarome 2:7; Mateusa 3:17.) Mbunga kwa hambererere Jesus ngaHompa, naina ose kuhamberera Jesus apa atu tantere ko vantu kuhamena Uhompa wendi. (Mar. 11:7-10) Kristusa ntaantani nga ya zonagure po nonkore dendi apa nga ‘ronda rukara royita, a ya popere usili nouhungami!’ (Epis. 2:8, 9; 45:1-6) Uhompa wendi ngau reta mpora nombili zanarunye pevhu mudima. (Epis. 72:1, 3, 12, 16; Jes. 9:6, 7) Azo kuna kara mfumwa koNombangi daJehova mokudivisa nokutantera ko vantu usili ou asi Jesus kuna kupangera ngaHompa goUmesiyasa meguru.

Ngapi omu no limburura?

• Ngapi omu Jesus va mu horwere nokumuzumba?

• Ngapi omu mauporofete kuhamena nomfa daJesus ga ya sikilire mo?

• Morwasinke ono karere nehuguvaro asi Jesus yige Mesiyasa?

[Efano lyepepenuno 13]

Mauporofete musinke ga sikilire mo apa ga hwilire Jesus moJerusarema ngaHompa?

[Mafano gepepenuno 15]

Jesus kwa fira vananzo, nye ngesi kuna kupangera ngaHompa goUmesiyasa