Ove kuvhura kuwapukurura evhuliko lyoge lyokudiworoka

JEHOVA KARUNGA kwa ungire uruvi womuntu nevhuliko lyokudiworoka. Age kwa u wapaika u kare upungwiro woyininke yomulyo wa hana kuyizumbanesa. Awo kwa u wapaika kuliza nositambo sendi asi vantu va hepa kuparuka narunye.—Epis. 139:14; Joh. 17:3.

Nye ove kuvhura o lizuvhe asi sinzi soyininke eyi o tura mouruvi woge kuyidivara. Ayo kumoneka asi kapi ayi kara mo apa o yi hepa. Yisinke no vhura kurugana mokuwapukurura evhuliko lyoge lyokudiworoka?

Tunga po elituromo

Kutunga po elituromo kuna kara nkedi zokuwapukurura evhuliko lyoge lyokudiworoka. Nsene tu tulisa po nkareso zokunomena nokulikida elituromo movantu ntani neyi yina kuhoroka momukunda gwetu, ngayi pindura uruvi wetu. Ayo ngayi tu rerupira mokulikida elituromo lyokulifana apa ngatu resa ndi tu zuvhe yininke yomulyo.

Ayo yimo ya kara ngorooro asi pamwe muntu kuvhura kudivara madina govantu. Nye ngoVakriste, ose twa diva asi vantu mulyo, ngwendi Vakriste vakwetetu nava atu zuvhisire ntani wopeke ava atu ruganene nawo kumwe kombinga zoyininke yeparu. Yisinke eyi nayi vhura kutuvatera tu diworoke madina aga sili twa hepa kudiworoka? Mupositoli Paurusa kwa tumbwire madina gokusika po-26 gava womombungakriste ezi ga tjangerere. Elituromo lyendi mwawo kwa li likida usili ou asi age kapi tupu ga divire madina gawo nye ga tumbwire hena mauzera gongandi kuhamena sinzi sawo. (Rom. 16:3-16) Vatareli wokudingura nomukunda vamwe woNombangi daJehova kudiworoka nawa madina, nampili ngomu ava gendi tunda mbungakriste zende mbungakriste nkenye sivike. Yisinke ayi va vatere? Awo pamwe kuruganesa edina lyomuntu yikando yongandi posikando sokuhova esi vana kuuyunga kumwe nendi. Awo kuheteka kukwatakanesa edina lyendi kumwe nosipara sendi. Mokugwederera ko, awo kukara kumwe novazuvhisi wokulisiga-siga moyirugana yokuzuvhisa noponomuzuhwa. Nsene o gwanekera nomuntu, kuvhura ngo diworoke edina lyendi ndi? Tameka pokukara nokonda zongwa zokudiworoka edina lyendi makura heteka kuruganesa magano aga vana tumbura.

Kudiworoka eyi ono resa nayo kwa kara hena nomulyo. Yisinke nayi vhura kukuvatera o wapukurure moruha oru? Elituromo ntani nekwatogano kwa kara nomulyo. Wa hepa kulitura mo unene yipo magano goge ga demenene kweyi ono kuresa. Kapi no diworoka eyi ono kuresa nsene kuna kugazara yapeke. Ekwatogano lyoge kuvhura kuliwapukurura apa no hetakanesa nombudi donompe neyi wa diva nare. Lipura nyamoge asi: ‘Ngapi ntani moukaro musinke nani vhura kuruganesa mapukururo aga meparu lyange? Ngapi omu nani vhura kugaruganesa mokuvatera gwapeke?’ Mokukwata egano ereso, wa ha resa nkango tunda nkango, nye wa hepa kudiresa posiruwo simwe. Ngayi ku vatera mokukwata egano nokudimburura magano gomulyo, ano eyi ngayi ku rerupira mokuyidiworoka.

Litulira po siruwo o gazudurure ko

Vadivi yininke moruha rwelirongo kunkondopeka mulyo gwegazudururoko. Profesora gumwe kwa likidire asi minute gumwe ogu atu ruganesa mokugazudurura kuvhukisa pwaruvali nombudi edi atu diworoka. Konyima tupu zokumana kuresa karuhagona kereso, gazudurura ko magano gomulyo yipo ga kare monondunge doge. Gazara ko omu no vhura kufaturura mononkango danyamoge yininke yoyipe eyi ono lirongo. Pokulidiworokesa nyamoge kegano eli ono resa, ngayi ku vatera mokudira kuyidivara usimbu.

Makura momazuva gokukwama ko, papara mpito mokugazadara ko kweyi wa resere pokuyitantera muntu gwapeke. Kuvhura o yi simwitire kwagumwe gemepata lyeni ndi gomombungakriste ntani navamwe ngoso. Kambadara kuruguruka magano gomulyo kumwe noMatjangwa aga gana lizi nomagano ogo. Pokurugana eyi ngayi ku retera uwa, ngayi ku vatera o diworoke yininke yomulyo ntani ngayi retera hena uwa vantu wopeke.

Teda ko koyininke yomulyo po

Mokugwederera ko kokugazudurura kweyi ono resa ntani nokutantera ko wopeke, ngo ya yi dimburura hena asi kuteda ko kweyi ono lirongo ngayi ku retera uwa. Vatjangi woBibeli Ndafita naAsafa nawo kwa rugene yokulifana. Asafa kwa uyungire asi: “Ame kudiworoka yirugana yoge yoyinene, HOMPA; kuna hara ni gazare yitetu yoge yanare. Ame kugazara hena nayinye eyi wa rugana; kuna hara ni tede yirugana yoge nayinye.” (Epis. 77:11, 12). Ndafita nage kwa tjenge asi: “Apa ngani rara pouro wange kukudiworoka; masiku nagenye kukugazara,” ntani “Ame kuna kudiworoka mazuva aga ga ka pita; kuna kugazara nayinye eyi wa rugana.” (Epis. 63:6; 143:5) Nove kuyirugana oyo ndi?

Etedo lyangoso lyenene lyokugazadara ko kweyi a rugana Jehova noyikara yendi, ntani nomu a likida eharo lyendi, kuvatera unene mokudiworoka. Nsene o liyomberesa kugazadara ngoso, ngayi tura sili yininke yomulyo momutjima goge. Ayo ngayi rundurura ukaro woge. Magazaro goge ngaga horora asi ove muntu musinke.—Epis. 119:16.

Sirugana sompepo zokupongoka

Apa atu hara kudiworoka mausili kuhamena yirugana yaJehova noyininke eyi ga uyungire Jesus Kristusa, mpepo zokupongoka kutuvatera. Momasiku gokuhulilira komeho zonomfa dendi, Jesus kwa tanterere vasikuli vendi asi: “Eyi kuna yi mu tanterere siruwo esi nina kara simpe neni. Nye Mukwafi, Mpepo zoKupongoka, ezi nga tumina Tate medina lyange, yizo ngazi ya mu ronga nayinye, zi ya mu diworokese nayinye eyi na mu tantera.” (Joh. 14:25, 26) Mateusa naJohanesa nawo yipo va kere. Mpepo zokupongoka za va kwefe ndi? Nhi! Konyima zonomvhura ntantatu, Mateusa kwa manesere kutjanga mauzera geparu lyaJesus, kukwatera mo yininke yomulyo mokudiworoka ngwendi Eudiso lyopoNdundu nosidiviso sekaropo lyaKristusa nesi souhura wouzuni. Nomvhura norontazimwe nantano konyima zonomfa daJesus, mupositoli Johanesa kwa tjenge Evangeli lyendi, kukwatera mo eyi ga uyungire Jesus momasiku gokuhulilira apa ga kere novapositoli vendi komeho va ka mu dipage. Pwa hana esinganyeko, Mateusa naJohanesa kwa diworokere yininke eyi ga uyungire neyi ga rugene apa va kere kumwe nendi, nye mpepo zokupongoka yizo za va vaterere va dire kudivara mauzera gomulyo aga ga va harerere Jehova va tjange moNonkango dendi.

Mpepo zokupongoka kuna kurugana ngomukwafi kovakareli vaKarunga naina ndi? Nhi! Yimo, mpepo zokupongoka kapi azi tura monondunge detu yininke eyi twa dira kulironga, nye azo kurugana ngomukwafi mokutudiworokesa yininke yomulyo eyi twa lironga nare. (Ruk. 11:13; 1 Joh. 5:14) Nsene kuna hara kudiworoka, nondunge kudininkisa ‘di diworoke nonkango edi va uyungire nare-nare vaporofete wokupongoka, nosipango sakwaHompa Muzowoli.’—2 Pet. 3:1, 2.

‘Mwa ha yi divara’

Jehova kwa rugurukire kurondora Vaisraeli asi: ‘Mwa ha yi divara.’ Ayo kapi yina kutanta asi age kwa ndindire asi va diworoke nayinye. Nye awo ngano kapi va hepere kuhokwa kukondjera yitambo yavene nokudivara eyi ga va ruganena Jehova. Awo ngano va hepere kudiworoka omu ga va zowere Jehova apa muengeli gwendi ga dipagere nombeli nadinye doVaegipite ntani nomu Jehova ga panwine Efuta lyEgeha nokudipaga Farawo novakwayita vendi. Vaisraeli va hepere kudiworoka asi Karunga kwa va pere Veta zendi poNdundu zaSinayi ntani nokuvagendesa va pite momburundu dogoro koSirongo sEtumbwidiro. Awo ngano kapi va hepere kudivara yininke eyi nye va hepere kutwikira kuyidiworoka yipo yi kundame eparu lyawo nalinye.—Deut. 4:9, 10; 8:10-18; Ex. 12:24-27; Epis. 136:15.

Nose twa hepa kutakamesa asi kapisi tu divare. Ngomu tuna kulididimikira makondjeso geparu, twa hepa kudiworoka Jehova, nokukwata egano yikara yendi ntani eharo eli ga likidire mokugava Munwendi ngouhwi, ogu ga geve sizoweseso kononzo detu asi tu kare neparu lyanarunye lyokusikilira mo. (Epis. 103:2, 8; 106:7, 13; Joh. 3:16; Rom. 6:23) Kuresa Bibeli nkenye apa ntani nokulihameka momapongo goSikriste nomoyirugana yokuzuvhisa ngayi ninkisa mausili aga gomulyo ga kare mwetu.

Nsene kuna kutulisa po matokoro, ga kare asi gomanunu ndi gomanene, diworoka mausili aga gomulyo, ntani ga pulisira ga ku pitisire. Wa ha divara. Pulisira Jehova a ku pitisire. Mevango lyokutara yininke momutaro gosintu ndi tu huguvare mutjima gwetu gokudira kusikilira mo, lipura nyamoge asi: ‘Epukururo ndi nompango musinke domoNonkango daKarunga dina kundama etokoro lyange?’ (Yis. 3:5-7; 28:26) Kapi ngo vhura kudiworoka yininke eyi wa dira kuresa ndi kuzuvha rumwe. Moomu ngo kura meharo lyoge lyokuhara Jehova nokutura ediwo lyenzi momagano goge, yimo hena mpepo zokupongoka ngazi vhura kukuvatera mokudiworoka yoyinzi, ano eharo lyoge lyokuhara Jehova ngali ku tumangeda mokuparuka kuliza nalyo.