Марк
6 Ал жактан чыгып, Иса шакирттери менен өз жерине келди.+ 2 Анан дем алыш күнү сыйынуу жайында элди окута баштады. Аны уккандардын көпчүлүгү таң калып: «Мунун баарын бул кайдан билет?+ Мындай акылмандыкты кайдан алган? Мындай кереметтерди кантип жасап жатат?+ 3 Бул жыгач уста эмеспи?+ Мариямдын уулу эмеспи?+ Жакып, Жусуп, Жүйүт, Симондордун бир тууганы да.+ Карындаштары деле арабызда жүрбөйбү»,— деп жатышты. Ошентип, алардын Исага ишенгиси келген жок. 4 Ал болсо: «Пайгамбар бардык жерде урматталат. Аны өз жеринде, туугандарынын арасында, үйүндө гана урматташпайт»,— деп айтты.+ 5 Иса ал жерде бир нече оорулуунун үстүнө колун коюп, аларды айыктыргандан башка эч кандай керемет жасаган жок. 6 Ал жердештеринин ишенбегенине таң калды. Анан тегеректеги айыл-кыштактарды кыдырып, элди окутту.+
7 Иса 12 элчисин чакырып, жакшы кабар айтканга эки-экиден жөнөтө баштады.+ Ошондой эле аларга жиндерди кууп чыгарганга бийлик берди.+ 8 Ал жолго таяктан башка эч нерсе: нан да, азык салынган баштык да, акча* да албагыла деп буйруду.+ 9 Анан сандалдарын кийиши керектигин, бирок кошумча кийим албашы керектигин айтты. 10 Андан кийин: «Кайсы үйгө кирбегиле, кеткениңерче ошол жерде болгула.+ 11 Кайсы жерде силерди кабыл алышпаса же угушпаса, ал жактан чыгып баратканыңарда бутуңардагы чаңды күбүп салгыла*. Аларга эскерткениңерди ошентип көрсөткөн болосуңар*»,— деп айтты.+ 12 Анан шакирттер жолго чыгып, элге өкүнүшү керектигин жарыялай башташты.+ 13 Алар көптөрдүн ичинен жиндерди кууп чыгарып,+ көп сандаган оорулууларды май менен майлап айыктырышты.
14 Исанын аты баарына белгилүү болуп калгандыктан, ал тууралуу Ирод падыша да укту. Кээ бирөөлөр: «Чөмүлдүрүүчү Жакан тирилиптир, ошон үчүн ушундай кереметтерди жасап жатат»,— деп айтып жатышты.+ 15 Башкалары: «Бул — Илияс пайгамбар»,— десе, дагы бирөөлөрү: «Бул — байыркы пайгамбарларга окшогон эле пайгамбар»,— деп жатышты.+ 16 Буларды уккан Ирод болсо: «Мен башын алдырган Жакан тирилиптир»,— деди. 17 Анткени мурун Жаканды кармап келгенге кишилерин жиберип, аны чынжыр менен байлатып, түрмөгө камап койгон болчу. Муну ал агасы Филиптин аялы Иродия үчүн кылган эле. Себеби Ирод ага үйлөнүп алганда,+ 18 Жакан: «Бир тууганыңдын аялын алганың Мусанын Мыйзамына каршы келет»,— деп бир канча жолу айткан болчу.+ 19 Иродия болсо Жаканга кек сактап, аны өлтүргүсү келип жүргөн, бирок оюн ишке ашыра албай жүргөн эле. 20 Себеби Ирод Жакандын адил, ыйык киши экенин билгендиктен андан коркчу,+ ошондуктан аны коргоп жүрчү. Ал Жакандын сөзүн укканды жакшы көрөр эле, ошон үчүн айткандарын уккан сайын аны эмне кылышты билбей калчу.
21 Ирод туулган күнүн белгилеп, төрөлөрү менен миң башыларын,+ Галилеядагы аттуу-баштуу кишилерди чакырып той өткөргөндө, Иродия үчүн ыңгайлуу учур келди.+ 22 Анын кызы ортого чыгып, бийлеп берди. Кыздын бийлегени Иродго да, конокторуна да жагып калды. Ошондо падыша ага: «Каалаганыңды сура, баарын берем»,— деди. 23 Анан: «Сураганыңдын баарын, атүгүл падышалыгымдын жарымын да берем»,— деп ант берди. 24 Кыз энесине барып: «Эмне сурайын?» — деди. Энеси: «Чөмүлдүрүүчү Жакандын башын сура»,— деп айтты. 25 Кыз дароо падышанын алдына барып: «Чөмүлдүрүүчү Жакандын башын табакка салып, мага азыр алып келишсин»,— деди.+ 26 Падыша буга аябай капаланды. Бирок берген антынан жана коноктордон улам кыздын өтүнүчүн четке кага алган жок. 27 Ошон үчүн ал дароо жан сакчысына Жакандын башын алып келгенге буйрук берип, түрмөгө жиберди. Тиги барып, анын башын алды да, 28 табакка салып, кызга алып келди. Кыз болсо энесине берди. 29 Муну укканда Жакандын шакирттери келип, сөөгүн алып кетип, мүрзөгө коюшту.
30 Исанын элчилери ага барып, баарын: эмне кылышканын, элди эмне деп окутушканын айтып беришти.+ 31 Иса: «Жүргүлө, ээн жерге барып, бир аз эс алып алгыла»,— деди.+ Анткени келген-кеткендер көп болгондуктан, алардын тамак ичкенге да убактысы болгон жок. 32 Ошондуктан алар өздөрүнчө болуш үчүн кайыкка түшүп, ээн жерге кетишти.+ 33 Бирок эл алардын кетип баратканын көрүп калгандыктан, муну көптөр билип калды. Ошон үчүн ал жакка бардык шаарлардын тургундары алардан мурун чуркап барышты. 34 Иса кайыктан түшкөндө көп элди көрүп, боору ачыды.+ Анткени алар койчусу жок койлордой эле.+ Анан аларга көп нерсени окута баштады.+
35 Кеч кирип бараткандыктан, шакирттери Исанын жанына келип: «Бул жер ээн экен, анын үстүнө, кеч да болуп калды.+ 36 Элди тарат, тегеректеги айыл-кыштактарга барып, жегенге бир нерсе сатып алышсын»,+— дешти. 37 Иса: «Буларга тамак-ашты силер бергиле»,— деди. Шакирттери болсо: «200 динарга* нан сатып келип, элге берелиби?»+ — деп сурашты. 38 Иса: «Канча наныңар бар? Барып, карап келгилечи»,— деди. Алар карап келип: «Беш нан, эки балык бар экен»,— дешти.+ 39 Анан Иса элге топ-топ болуп көк чөпкө отургула деп буйруду.+ 40 Алар 100дөн, 50дөн болуп отурушту. 41 Иса беш нан менен эки балыкты алды да, асманды карап, Кудайдан тиленди*.+ Анан нандарды сындырып, элге таратыш үчүн, шакирттерине бере баштады. Эки балыкты да бардыгына бөлүп берди. 42 Ошентип, бардыгы тоё жешти. 43 Балыктарды кошпогондо, жегенден калган нанды чогултканда, 12 себет толду.+ 44 Нан жеген эркектердин саны болсо 5 000 эле.
45 Ошондон кийин эле Иса шакирттерине кайыкка түшүп, аркы өйүздөгү Бетсаида тарапка баргыла деди. Өзү болсо калып, элди таратты.+ 46 Бирок алар менен коштошкондон кийин Кудайдан тилениш үчүн тоого чыкты.+ 47 Кеч киргенде, кайык деңиздин ортосуна жетип калган эле. Иса болсо дагы деле тигил жакта жалгыз болчу.+ 48 Ал шакирттеринин каршы тараптан соккон шамалдан улам калактарын араң шилеп баратышканын көрдү. Анан таңга жуук* деңиздин үстү менен басып, аларды көздөй жөнөдү, бирок жанынан кыя өтүп кетмекчи болду. 49 Анын деңиздин үстү менен басып келатканын көргөндө шакирттери көздөрүнө бир нерсе көрүнүп жатат деп ойлоп, катуу кыйкырып жиберишти. 50 Анткени аны көрүп, баары коркуп кетти. Бирок Иса ошол замат аларга: «Чочубагыла!* Бул менмин. Коркпогула»,— деди.+ 51 Анан алар отурган кайыкка түштү, ошондо шамал басылып калды. Шакирттер буга аябай таң калып жатышты. 52 Себеби анын элди нан менен тойгузганда жасаган кереметинин маанисин дагы деле түшүнө элек эле. Аларга муну түшүнүш кыйын болчу.
53 Аркы өйүздөгү Генисаретке жетип, шакирттер кайыгын жээкке жакын токтотушту.+ 54 Алар кайыктан түшөрү менен, ал жердегилер Исаны тааныды. 55 Анан ошол аймакты аралап чуркап, элге кабарлап чыгышты. Ошондо эл оорулууларын замбилге салып, Иса каякта жүрөт деп угушса, ошол жакка алып бара баштады. 56 Ал кайсы айыл-кыштакка же шаарга кирбесин, эл оорулууларын базар аянттарына алып келип, андан, жок дегенде, сырт кийиминин этегиндеги чачыларга колун тийгизгенге уруксат сурап, жалбарып жатышты.+ Колун тийгизгендердин баары айыгып жатты.