Olembiwa na Yohani
3 Vookala Mfarisi m’mo-iwa zina lae Nikodemo, olamulela wa Ayuda. 2 Liye oodowa wa Yesu ma-iyu nomuwandela ira: “Rabi, ninoiziwa ira nyo muli mphunzisi okumela wa Mulungu, chifukwa kavali muthu unoyo unawande panga vyodabwi-a vyevyo munapanga nyo akala ira Mulungu kali na liye.” 3 Yesu oomusomeda ira: “Ndithu ndinaauwandela ira, muthu kanavolowe mu Umwene wa Mulungu akala kanabaliwe nawili.”* 4 Nikodemo oomufuka ira: “Muthu unabaliwe avi angali ndimuwa wale? Kodi unokoza volowa m’mbani mwa m’mae nobaliwa nawili?” 5 Yesu oosomeda ira: “Ndithu ndinaauwandela, muthu kanavolowe mu Umwene wa Mulungu akala kanabaliwe na ma-inje na zimu. 6 Unoyo ubaliwe na muthu ngu muthu, moi unoyo ubaliwe na zimu ngu zimu. 7 Kudabwe chifukwa ndiuwandela ira: Etene nyen’ne munafuneya baliwa nawili. 8 Lipevo linodowa wewo linafunaathu moi muthu unovwa phokoso liwa, koma kanaiziwa wewo linakumelaathu na wewo linadowaathu. Vyevi pivyofwanafwana na uliwetene unoyo ubaliwe kumela muzimu.”
9 Nikodemo oomufuka ira: “Kodi vyevi vinawandeye avi?” 10 Yesu oomusomeda ira: “Nyo muli mphunzisi wa Isaraeli, ndiye vinawandeya avi ira kamuiziwe vyongo vyevi? 11 Ndithu ndinaauwandela, iyo ninoonga vyevyo ninaiziwa iyo, moi ninopangela umboni vyevyo ninaona iyo. Koma nyo kamunawachela umboni unoyo ninapeleka iyo. 12 Miyo ndiuwandelani vyongo vya vailambo yavati vano koma nyo kamunaroromelave, ndiye akala ndinauwandeleni vyongo vya udimu munaviroromele avi? 13 Kavali muthu unoyo agwelilevo udimu koma Mwana wa muthu ekave, unoyo atitile kumela udimuwo. 14 Mofwanafwana na Mose unoyo agweli-ile nyowa mudimu muipululu, Mwana wa muthu teto unafuneya gweli-iwa mudimu 15 ira uliwetene omuroromela aze afwanye moyo oomala.
16 “Chifukwa Mulungu oowomeliwana vinjinji ilambo moi oomupeleka Mwanae obaliwa ekave, ira uliwetene omuroromela kaonongiwe koma aze afwanye moyo oomala. 17 Mulungu kaamutumizile Mwanae vailambo ira aze aweluze ilambo, koma ira ilambweyo ivulumuchiwe zela mwa liye. 18 Uliwetene unoyo unamuroromela kanaza aweluziwa. Koma uliwetene unoyo kanamuroromela uweluziwa wale, chifukwa karoromele zina la Mwana obaliwa ekave wa Mulungu. 19 Wala ufiya muilambo koma m’malo moomeliwana walawo athu kanoomeliwana dima voi chito diwa tidotakala. Chifukwa ya vyevi kanoza kaweluziwe. 20 Uliwetene unoyo unapanga vyongo vyotakala unoidana nowala moi kanafiya vevo vali wala, ira vyevyo unapanga liye kavioneele vowela. 21 Koma uliwetene unoyo unapanga vyongo vyapama unoza vevo vali wala, ira vyevyo unapanga liye vioneele ira oovipanga mogwilizana na ifunelo ya Mulungu.”
22 Vyevi vingamalile, Yesu na ofunjedae koodowa udela la umavande lawu Yudeya. Liye ookala wewo limo-i na aluwa wa malambo mangasene moi oobatiza athu. 23 Koma naliyene teto Yohani oobatiza athu wu Ainoni vakwikwi na Salimu, chifukwa yoi wewo ookala ma-inje anjinji moi athu koodowa wa liye ira kabatiziwe. 24 Vathawi inela Yohani ali aana-eliwe mundende.
25 Sopano ofunjeda a Yohani koowambeela kangana na Muyuda m’mo-iwa vakhani yokuza kala owela vamaso va Mulungu. 26 Vanduli viwa koodowa wa Yohani nomuwandela ira: “Rabi, muthu unoyo mwan’na nyo limo-i ukombela wa Yorodano, unoyo mwamupangela nyo umbonile, naliyene teto unobatiza athu moi athu etene kanadowa wa liye.” 27 Yohani oosomeda ira: “Muthu kanawachele yongo iliyetene aanava-iwe na Mulungu. 28 Nyo muli mboni va vyevyo ndaongile miyo ira, ‘Miyo kandili Kristu, koma ndootumiziwa monga osakaeda ndilae.’ 29 Muthu unoyo unatela iyana ngu mamunae wa iyanoyo. Koma fwae wa malimba teloyo, aimela novuruwana vyevyo unaonga liye, unosangalala vinjinji chifukwa ya mawu a malimba teloyo. Eno miyo ndinosangalala vinjinji. 30 Utumikae unafuneya pitiliza dowa vasogolo, koma utumikanga unafuneya pitiliza yeva.”
31 Okumela udimu unokwaranya athu etene. Okumela vailambo yavati ngwa vailambo yavati moi unoonga vya vailambo yavati. Koma okumela udimu unokwaranya athu etene. 32 Liye unopangela umboni vyongo vyevyo uvionile liye novivwa, koma kalivo muthu unoyo unaroromela vyevyo unaonga liye. 33 Unoyo uroromele vyevyo unaonga liye usimikizela ira Mulungu unoonga vyoona. 34 Unoyo arumiwe na Mulungu unoonga mawu a Mulungu, chifukwa liye unopeleka zimwae mofunechecha. 35 Baba unomuomeliwana Mwana moi oopeleka vyongo vyetene m’mandani mwae. 36 Unoyo unamuroromela Mwanoyo unoza awachele moyo oomala. Unoyo kanamuvwela Mwanoyo kanaza awachela moyola, koma uwali wa Mulungu unoza ukaleve va liye.