Febuluwale

Vevo Mwene Hezekiya abulele liye vinjinji oovepa Yehova ira amuchili-e ndipo Yehova oomuchili-a. (2 Mam. 20:1-6) Koma mtumwi Paulo oovepa Yehova ira amuchosele minga muthuthu, koma Yehova kaachosile vuto laelo. (2 Akor. 12:7-9) Mtumwi Petulo na Yakobo, kaembekezela phiwa na Mwene Herode. Yakobo oophiwa pomwe Petulo oomasuliwa mundila yodabwi-a. (Vyo. 12:1-11) Ndiye ninokoza dabwanga ira, ‘Chifukwa n’ni Yehova avulumuchile Petulo koma Yakobo mu-iya ira aphiwe?’ Baibulo kalinafotokoza chifukwa iwa. Koma ineyo ninaiziwa iyo choi thawi detene Yehova unopanga vyongo mwachilungamo. (Doto. 32:4) Thawi dimo-i vyongo vyevyo kaninaviembekezela pivyevyo vinaireecha. Koma voi ninororomela ira thawi detene Yehova unosomeda mapempelo a athu mwachikondi koma teto mwachilungamo, kaninakaikela ndila dedo unasakula liye vosomeda mapempelwi-u.— Yob. 33:13. w23.11 21 ¶6

Yakobo oosogoleliwa lemba ira athu azelu kanokala ‘okozeya vwela.’ Kodi vyevi vinatapulela n’ni? Ninafuneya kala ofunechecha koma teto okozeya vwela athu anayo Yehova uwava-ile liye udindo. Komave, Yehova kanaembekezela ira nivwelenga athu anayo kananivepa ira nipange vyongo vyosemphana na malamulwae. (Vyo. 4:18-20) Thawi dimo-i ninokoza onanga ira pivyo-orucha muvwela Yehova iyana novwela muthu. Moi Yehova thawi detene unoniva-a malangizo apama. (Sal. 19:7) Vyevi pivyo-iyana vinjinji na athu anayo kan’na udindo. Ngakale vili eno, Babi-u waudimu oopeleka udindo wa makolo, andimuwa andimuwa aboma koma teto andimuwa mupingo. (Miya. 6:20; 1 Ates. 5:12; 1 Pe. 2:13, 14) Naavwelanga athu anala ninakala nivwelanga Yehova. w23.10 6 ¶2-3

Ndila imo-iwa eneyo ninalimbi-ele iyo iroromelo yi-u kuganizela kopolo da Yehova. Liye ukaana kopolo dokwakwaneli-eda iliyetene eneyo ulonjezile liye. Liye ngu Mulungu Wakopolo detene. (Yob. 42:2; Maliko 10:27; Aife. 3:20) Liye oomusimikizela Aburahamu na Sara ira kanoza kakaena mwana masiki ira kali ouluula. (Gen. 17:15-17) Oomuwandela teto Aburahamu ira a-imaye kanoza kava-iwe ilambo ya Kanani. Muchaka dinjinji dedo a-ima a Aburahamu, Aizarayeli, kaliathu akapolo wu Iguputo, podi ira vyawoneya ira lonjezoli kalinaza likwakwaneli-ediwa. Koma lookwakwaneli-ediwa. Liye oomuwandela teto Mariya onoyo ali namwali ira unoza abale Mwanaye wamulombwana. Yehova ali angalonjezile vyoza wa Mwanayela chaka masauzande mundulimu m’munda wa Edeni moi ookwakwaneli-eda lonjezoli. (Gen. 3:15) Naganizelanga vyevyo Yehova airilevo liye mundulimu volonjeza koma teto kwakwaneli-eda malonjezwayo, ninororomela vinjinji ira ukaana kopolo dozi-a ilambo isha. — Yos. 23:14; Yes. 55:10, 11. w23.04 28 ¶10-12

Yehova oosomeda mapempelo a Davide ovepa tandizo. (1 Sam. 19:10, 18-20; 2 Sam. 5:17-25) Na-iyene ninokoza kala osimikiza ira Yehova unosomeda mapempelwi-u. (Sal. 145:18) Thawi dimo-i Yehova kanasomede mapepelwi-u mundila ineyo nadedi-edela iyo. Paulo oovepa Mulungu ira amuchosele “mwinga muthuthu.” Maulendo mararu oopepelela vuto leli. Kodi Yehova oosomeda mapepelo anala? Ee, koma ookala mundila ineyo Paulo aidedi-edela liye. M’malo mochosa vutolo, Yehova oomuva-a kopolo dedo afuneela liye ira apitilize mutumikela mororomeleya. (2 Akor. 12:7-10) Thawi dimo-i na-iyene ninokoza somediwa mapepelwi-u mundila yoi kanaidedi-edela. Koma ninokoza kala osimikiza ira Yehova unoiziwa ndila yapama vinjinji yonikami-edela. Liye “unokoza panga vilukulu vinjinji kwaranya vyetene vyevyo ninavepa iyo kapena ganiza.” (Aife. 3:20) Vachifukwa inela, liye unokoza someda mapepelwi-u va thawi koma teto mundila yoi kanaidedi-edela. w23.05 8-9 ¶4-6

Ninoira pama ira thawi na thawi niganizelenga lonjezo la m’Baibulo loi okhwa kanoza kavenyi-iwe. Chifukwa n’ni? Chifukwa kaninaiziwa thawi eneyo ninabulele iyo marenda alukulu kapena morurumucha muthu onoyo ninamuwomeliwana iyo unokoza tatiya. (Nam. 9:11; Yak. 4:13, 14) Roromela ira okhwa kanoza kavenyi-iwe unokoza nikami-eda ira nivilelenga mavuto n’nga anala. (1 Ates. 4:13) Malemba kanonisimikizela ira Babi-u waudimu unoniiziwa pama teto unoniwomeliwana vinjinji. (Luka 12:7) Kakedani ganizela mwemo Yehova Mulungu munaniiziwela liye pama ira aze awande nivenyi-a na makalelo anayo nan’na iyo koma teto niwandanga umbuwela iliyetene. Yehova ootonyi-eda ira unoniwomeliwana vinjinji voniva-a mwayi woi nize nikaena moyo o-omala koma teto nivenyi-a akala ninatatiye. Koma chifukwa n’ni ninafuneya roromela lonjezo loi okhwa kanoza kavenye? Chifukwa nili osimikiza ira Opeleka lonjezoyo ngofunechecha koma teto ukaana kopolo dokwakwaneli-edela lonjezoli. w23.04 8-9 ¶2-4

Yosefe na Mariya kairela limo-i vyongo ira usamwaliwa na Yehova ukaleve wolimba. Aliwa koovwechecha funeya wolambelela limo-i Yehova monga banja. (Luka 2:22-24; 4:16) Inela chi isazo yapama vinjinji wa athu otelana malambwano. Akala mun’na a-ima ngati mwemo vyaliliathu na Yosefe na Mariya, thawi dimo-i vinokoza kala vyorucha fwanyeya vamisonkano kapena fwanya thawi yopanga Lambela wa Vabanja. Vinokoza kala teto vyorucha ira mufwanyenga thawi yofunjeda kapena pepela limo-i monga banja. Komave muumbuwelenga ira mwalambelanga limo-i Yehova, munokala nae va usamwali wolimba koma teto nyo munogwilizana vinjinji. Eno lambela ukalenga vamalo owambeela m’banja mwinyu. Ngati banja linyu kalinaenda pama, vyevi vinokoza pangi-a ira pangela limo-i Lambela wa Vabanja kusangalasenga. Akala chi eno, munokoza ambeela nokambirana ira mupangenga vyongo vimo-iviwa vyoi kavinalanda thawi indendai, koma teto vyevyo etene munasangalalena nyo. Panga vyevi unokoza kami-a ira muwomeliwanenga vinjinji koma teto mufunechechenga pangela limo-i vyongo vyokuza lambela. w23.05 22 ¶7-8

Kodi mantha ofwanelela kamukami-ile avi Obadiya? Koomukami-a ira akale oona murima koma teto ororomeleya, vyevyo vyapangi-ile ira mwene amu-ele kala woing’anela nyumbae. (Fwanafwani-edani na Nehemiya 7:2.) Ova Mulungu woomukami-a Obadiya kala olimba murima vinjinji, moi liye afuneela kaana ikalelo inela. Liye ookaana moyo va thawi ya ulamulilo wa Mwene Ahabu. (1 Mam. 16:30) Koma teto, Yezebeli mu-iyana wa Ahabu, unoyo alambela Baala, ooidana vinjinji na Yehova, moi ooshisha mali-a lambela oona mu umwene wa umpoto. Liye oopha anamaongela anjinji a Mulungu. (1 Mam. 18:4) Yezebeli angaamben’le saelasaela anamaongela a Mulungu ira aaphe, Obadiya oobisa anamaongela 100 ‘m’magulu ambin’li a anamaongela 50 gulu lililetene, teto oowava-a nkate na ma-inje.’ (1 Mam. 18:13, 14) Ngati vyevi vyaaiziweye, kai vyokaiki-a ira muthu olimba murimola oophiwa. Pivyoona ira Obadiya ali muthu ngati iyene teto kaafuna khwa. Koma liye oomuomeliwana vinjinji Yehova koma teto atumikae kwaranya mwemo aomeliwana liye moywae. w23.06 16 ¶9-10

Yehova unopitiliza sogolela athwae malambwano ngati mwemo apangela liye wale. Liye unopanga vyevi vo-indi-eda chito Mawae, unoyo uli muru wa pingo. Kodi vikala umboni wotonyi-eda ira malambwano, Yehova uno-indi-eda chito athu omuimelela? Inde. Mwaisazo, kaganizelani vyevyo vyaireile muchaka dam’ma 1800. Charles Taze Russell na afwae koowambeela zindikila ira chaka ya 1914 inaza ikala yofuneya chifukwa chithawi ineyo Umwene wa Mulungu unazeathu ugarati-iwe. (Dan. 4:25, 26) Maulosi a m’Baibulo mbanayo kaatandizile iziwa vyevi. Kodi Yehova oowasogolela vevo aliwa kafufuzaathu m’Baibulo? Mookaikela oowatandiza. Vyevyo vyaireile mu 1914, vyoosimikizela ira Umwene wa Mulungu wali ungaambeele lamulela. Muchaka inela, Kondo Yowambeela Yavailambo Yetene yoowambeela, koma teto wookala mulili wa marenda o-iyana-iyana, vivomelezi koma teto ndala. (Luka 21:10, 11) Yehova oo-indi-eda chito alombwana a murima wapama anala ira kasogolelenga athwae. w24.02 22 ¶11

Monga athu a Yehova, ninoiziwa ira liye unoniwomeliwana moi unafuna ira nisangalalenga na moyo wapama vinjinji vathawiila. (Arom. 8:35-39) Kaninakaikela ira thawi detene na-arelanga makundo a m’Baibulo vyongo vinongoniyendela pama. (Yes. 48:17, 18) Koma bwanji akala nigumanilena mavuto oyi kanaayembekezela? Mofwanafwani-a, bali-u unokoza nikumudwi-a, ninokoza bulela marenda alukulu anayo kanairi-e ira kaniirenga vinjinji votumikela Yehova, kapena teto ninokoza gumanana mavuto oza chifukwa ya ngozi damuchilengedwe. Ninokoza teto zuzumi-iwa chifukwa ya vyevyo ninaroromela iyo. Nagumanana mavuto n’nga anala ninokoza vifukanga ira: ‘Chifukwa n’ni vyevi vinandiireela? Kodi ndilakwi-a yongo? Kodi vyevi vinatapulela ira Yehova kanandidalisa?’ Kodi moowambeelavo vwa eni? Akala chi eno kamutatile murima. Atumiki anjinji ororomeleya a Yehova koovwavo teto eno.— Sal. 22:1, 2; Hab. 1:2, 3. w23.04 14 ¶1-2

Nagumana na vyoshisha, thawi ineyo ninopewa ganizela kapena panga vyongo vyevyo vinaononge usamwali-u na Mulungu. Yehova unoembekezela ira ‘nimuvwelenga mokumela vati vamurima.’ (Arom. 6:17) Malangizwae kanonikami-a iyo moi thawi detene ninafuneela avwela. (Yes. 48:17, 18; 1 Akor. 6:9, 10) Mdyerekezi unonizuzumi-a vofuna sokoneza yolinga yi-u yoi nikale o-otekenyeya. Yolingae ‘kuni-olocha,’ kapena ira ononga usamwali-u na Yehova. (1 Pe. 5:8) Akiristu owambeela koowopopi-iwa, vaziwa koma teto phiwa chifukwa yoi kali kangasimikizile murima kalave olimba. (Vyo. 5:27, 28, 40; 7:54-60) Satana unopitilizave panga vyevi malambwano. Ninoona umboni wa vyevi, naona mwemo abali na arongoli-u kanazuzumi-iwelaathu wu Russia na vilambo vimo-iviwa koma teto ukeliwa na athu oruni-a. Satana uno-indi-eda teto chito ‘vyoira vyachinyengo’ vofuna ukela atumiki a Yehova.— Aife. 6:11. w23.07 15-16 ¶6-9

Vevo mwafunjeda nyo vinjinji Mawu a Mulungu, pavevo teto mwaamben’le nyo muwomeliwana vinjinji Yehova. Chikondiyo yooulimbikisani ira mu-arelenga vyevyo mwafunjeda nyo. Moosakula vyoira mwazelu mogwilizana na makundo a m’Baibulo. Moochenja mwemo mwaonela nyo vyongo koma teto ikalelo inyu chifukwa moofuna musangalasa Mulungu. Mofwanafwana na mwana unoyo unasazi-eda likolo lachikondi, nanyen’ne moomusazi-eda Babinyu waudimu. (Aife. 5:1, 2) Mwina ninokoza vifuka ira: ‘Kodi vano ndinomuwomeliwana vinjinji Yehova kwaranya mwemo ndamuwomeliwana miyo ndangakede kala wene Mkiristu? Keda kumela vevo ndabadiziwe miyo, kodi ndinoganizela kapena panga vyongo ngati Yehova simbwasimbwa votonyi-eda chikondi wa abali na arongola?’ Akala chikondi ineyo mwan’na nyo vowambeela iambeele yeva, kamufooke. Vyevi vyoowaireelavo teto Akiristu amuthawi ya anamarumiwa. Yesu kaa-iile awomeliwana, moi na-iyene teto kana-iye niwomeliwana. (Chiv. 2:4, 7) Liye unoiziwa ira ninokoza ambeela nawili kaana chikondi ngati ineyo nan’na iyo nangakede iziwa wene imbarimbari. w23.07 8 ¶2-3

Mtumwi Petulo oolakwi-a vyongo vingasi vyene. Yowambeela, Petulo ootonyi-eda vidalila voonga movitama ira unoza akaleve ororomeleya ngakale atumwi amo-iwayo kangamu-iile Yesu. (Maliko 14:27-29) Yanambili, Petulo oolepela kala maso. (Maliko 14:32, 37-41) Vanduli viwa ootawa gulu la athu langazile za mu-inda Yesu. (Maliko 14:50) Vogomi-eda viwa, Petulo ookoonda ndila taaru ira kanamuiziwa Yesu, mpakana oofiya volumbela vyonamavi. (Maliko 14:66-71) Kodi Petulo apangile avi angaiziwile ira ulakwi-a vinjinji vyongo? Liye ootweya murima ndipo ooula vinjinji. (Maliko 14:72) M’malo momukalipela Petulo chifukwa ya vyevyo alakwi-ile liye, Yesu oomuwandela fwaela ira unoza awachele maudindo alukulualukulu. (Yoh. 21:15-17 Petulo ooiziwa ira ulakwi-a vinjinji koma kaatatilile murima. Chin’ni yamutandizile? Liye ooiziwa ira Mbwiyae Yesu kana-iye mukonda. Kodi ninafunjedavo n’ni? Yolinga ya Yehova choi unafuna ira niroromelenga ira unonikonda koma teto nikululukela. — Arom. 8:38, 39. w24.03 18-19 ¶13-15

Ikalelo yachiwelewele inokoza pangi-a ira muthu anyaswenga, avionenga ira ngo-ofuneya, alande vambani vo-oembekezeleya koma teto asokoneze banja lae. Onga vyoona, chizelu koonda dowa dja “waniwa.” Enjedela voononga usamwaliwa na Yehova, anjinji anayo kanapanga chiwelewele kanolanda marenda, vyevyo vinapangi-a ira kakhwe mombaraanya. (Miya. 7:23) Vesi 18 la chaputala 9 ya Miyambo, linamari-a na mawu oyi: “Anayo kanaitaniwa na mu-iyanola kali umalo otita a wu Manda.” Ndiye chifukwa n’ni athu anjinji kanasomedela itaniwa na iyanola ngakale ira kanogumana na mavuto? (Miya. 9:13-18) Msampha ofala vinjinji kuwonela vyolava. Amo-iwa kanoona ira onela vyolava kun’na vuto lililetene. Koma vyoona viwa pivyoi onela vyolava koophi-a, unomuchosela muthu ulemu koma teto vinomurucha ira a-iye. Vithuzithuzi vyolava vinogarateya m’maganizo teto vinakala vyorucha vidiwala. Onela vyolava kunamukami-e muthu ira amali-e chilakolako yogonana, koma unakedecha iwenjedela. (Akol. 3:5; Yak. 1:14, 15) Athu anjinji anayo kanaonela vyolava kanofiya mpakana vopanga vyachiwelewele. w23.06 23 ¶10-11

Ngakale ira thawi dimo-i vilambo vimo-i vinokoza limbananga na ulamulilo wa Britain na America, kavinaza viuvolowa m’malo. Ninoiziwa vyevi chifukwa “libwe” lelo linaimelela Umwene wa Mulungu linoza liwononge manyalo achifaniziro, anayo kanaimelela ulamulilo wa Britain na America. (Dan. 2:34, 35, 44, 45) Kodi munororomela ira ulosi wa Danieli wokuza manyalo aisulo yotangani-eya na ulongo ngoona? Akala chi eno, vyevi vinokoza kuza mwemo munairela nyo vyongo vamoywinyu. Kamunasaelesaele chuma muilambo ineyo inaonongiwe chineneveva. (Luka 12:16-21; 1 Yoh. 2:15-17) Vwechecha ulosila unokoza ukami-ani ira muonenga funeya wa chito yolaleela nofunji-a athu. (Mat. 6:33; 28:18-20) Vanduli vofunjeda ulosila, munokoza panga pama vifuka ira, ‘Kodi vyevyo ndinasakula miyo vinotonyi-eda ira ndinororomela ira Umwene wa Mulungu unomali-a maboma etene chineneeva?’ w23.08 11 ¶13-14

Moviyevi-a, musomedelenga ira kamunakwakwani-e panga vyongo vimo-i vathawiila chifukwa ya usinkhwinyu, thanzi linyu koma teto mwemo vyongo vililiathu vamoywinyu. Mofwanafwana na Barizilai, mukalenga okozeya koonda mautumiki amo-iwa ngati thanzi linyu kalili pama. (2 Sam. 19:35, 36) Mofwanafwana na Mose, musomedelenga kami-iwa koma teto muwava-enga amo-iwa vyoira ngati vanafuneela panga eno. (Ekis. 18:21, 22) Viyevi-a wewu unokoza ukami-ani ira kamupangenga vyongo vyo-owandeya vyoi vinokoza unyemelani. Kaninaasakulele amo-iwa vyoira koma teto kai thawi detene vevo ninaateteze iyo ira katigumane na mavuto oza chifukwa yoi koosakula vyongo molakweya. Mwaisazo, mwana unokoza sakula iya tumikela Yehova. Vyevi vinokoza pangi-a ira makolwae kavwe chisoni vinjinji. Komave makolo kaviimbanga mulandu chifukwa yoi mwaniwa usakula vyongo molakweya, kanakalecha katukulanga katundu onyemela. Unola kai katundu unoyo Yehova unafuna liye ira aliwa katukule. w23.08 29 ¶11-12

Mofwanafwana na iyo, naliyene Samisoni kaali wangwilo, eno thawi dimo-i oosakula vyongo molakweya. Va thawi imo-iwa, liye oosakula vyongo vyevyo vyaambeeli-ile mavuto alukulu. Angatumikele wa thawi yoyeva monga oweluza, Samisoni “oowambeela muomeliwana mu-iyana m’mo-iwa wa wu Chigwa ya Soreki, unoyo zina lae ali Delila.” Mundulimu liye oofuna mutela mu-iyana m’mo-iwa wa Chifilisiti, koma Yehova ‘ngunoyo apangi-ile vyevi,’ chifukwa “asaelasaela mpata woi awane na Afilisiti.” Vanduli viwa Samisoni oodowa dowa kala unyumba ya hule limo-iliwa wu mzinda wa Afilisiti wu Gaza. Vathawila Mulungu oomuva-a kopolo Samisoni dogonji-a mzindoyo. (Owel. 14:1-4; 16:1-3) Koma khani ya Delila yali yo-iyana chifukwa yoi liye mwina ali Muizarayeli, moi Yehova kai unoyo apangi-ile ira usamwaliwa ukalevo. Delila oowachela ndalama dinjinji wa Afilisiti chifukwa yomupeleka Samisoni. w23.09 5 ¶12-13

Zindikila unokoza nikami-a kala ofaasa. Muthu ozindikila unoviruni-a athu amo-iwa karuni-anga vyevyo unaroromela liye. Vyofuka vimo-i ninokoza vierekezela na matakuru a kolowa. Kolowiwa kinaoneya chifukwa inakalecha muteya. Mofwanafwana na vyevi, muthu unokoza fuka yofuka kapena unokoza fotokoza nkhawa imo-iwene koma kaninazindikile yolinga yae. Eno na-anasomede ninokoza panga pama zindikila ira thawi dimo-i kaninaiziwe ineyo imupangi-ile muthu fuka yofuka ineyo. (Miya. 16:23) Kaganizelani mwemo Gidiyoni aasomedele liye athu a wu Efuraimu. Aliwa kooza zamufuka molunduwa chifukwa iwa kaaitanile ira kaze kamukami-e vakondo yolimbana na adani a Izarayeli. Kodi chifukwa n’ni aliwa kafuna kangana nae? Kaya aliwa kapangile vyevi vachifukwa iivi, Gidiyoni oopanga vyongo mwazelu, oovwechecha chifukwa ineyo yaapangi-ile ira kalunduwe koma teto oowasomeda mofaasa. Vyo-arelavo viwa vyali vyoi aliwa katawanile nae moi “lunduwauwa woomala.”— Owel. 8:1-3. w23.09 16 ¶8-9

Yehova na Yesu kanokondana vinjinji ngati mwemo vinakalelaathu vaari va baba na mwanae. (Miya. 8:30) Mookaikela Yehova vyoomuvoreya vinjinji ona Mwanae apangeliwanga nkhanza, koondiwa koma teto shishiwa. Likolo lililetene lelo mwanae utatiile, linoiziwa pama chisoni ineyo inakalechavo chifukwa yokhweliwa. Ninororomela vinjinji ira okhwa kanoza kavenyi-iwe, koma vyevi kavinamali-a ululu unoyo ninakaana iyo muthu unoyo namukonda iyo atatiya. Isazo inela inonitandiza vwechecha mwemo Yehova avwele liye vomuona Mwanae avuteyanga koma teto khwa vadambo lelo mu 33 C.E. (Mat. 3:17) Dambo la Chikumbuso la-anafiye, bwanji mupange vyoi mufunjede vaekinyu kapena Volambela Wavabanja khani dokuza dipo? Koma teto vadambo la Chikumbuso, kamuze mudiwale onela porogaramu yavadela Yolambela wa Mamawa. Ngati ninakozeeli-ede murimi-u vadambo la Chikumbuso, ninoza nitandize teto athu amo-iwa ira kapindule na mwambola.— Ezara 7:10. w24.01 11 ¶10-12

Ndila imo-i ineyo ninafwanyele iyo kopolo kumela wa Yehova kupempela. Vosomeda mapempelwi-u, Yehova unokoza niva-a “kopolo yokwaranya yobaliwana.” (2 Akor. 4:7) Ninokoza limbikisiwa nawelenganga Mawae koma teto aganizela. (Sal. 86:11) Vale Mawu a Yehova ofwanyeya m’Baibulo “mbakopolo.” (Aheb. 4:12) Mwapempelanga wa Yehova koma teto welenga Mawae, munoza mufwanye kopolo doukami-ani vilela, kalave osangalala koma teto panga pamapama utumiki worucha. Yona oothawa utumiki worucha unoyo Yehova amuva-ile liye. Chifukwa ya vyevi, vanyanja vooambeela lipevo lakopolo ndipo liye koma teto athu anayo agwelilena liye mungalaweyo ka-alile vang’ono khwa. Angavochediwe munyanja, mo-oembekezeleya afwanyeile angali m’mbani mwa somba ilukulu. Kodi Yona apangile n’ni ira afwanye kopolo? Liye oopempela. — Yona 2:1, 2, 7. w23.10 13 ¶4-6

Ngakale ira mtumwi Petulo alembele Akiristu amuthawae, Yehova oopangi-a ira makalatayo kakale mbali ya Baibulo. Eno, na-iyene makalata anala kanokoza nikami-a. (Arom. 15:4) Ninakala vaari va athu oyi katinaroromela maulosi a m’Baibulo. Athu oruni-a kanokoza ninyozanga chifukwa yoi nikala niembekezelanga mapeto wa chaka dinjinji. Athu amo-iwa kanaonga ira mapeto katinaza kafiya. (2 Pe. 3:3, 4) Akala ninavwe mwinyailo wa nyumba, fwi-u wauchito kapena bali-u aonganga vyevi, iroromelo yi-u inokoza fooka. Ndiye Petulo oofotokoza vyevyo vinanikami-e vakhani inela. Athu amo-iwa kanokoza onanga ngati Yehova unochedwa ononga ilambo yotakalela. Mawu a Petulo kanokoza nikami-a ira nikaena maganizo ofwanelela moi, kanoniumbucha ira Yehova unoona thawi mo-iyana vinjinji na mwemo iyo athu ninaionela iyo. (2 Pe. 3:8, 9) Wa Yehova, chaka 1 000 dili ngati dambo limo-i. Liye ngoleza murima moi kanafuna ira uliwetene aze aonongiwe. Komave dambo lae laza lifiya, unoza aononge ilambo yotakalela. w23.09 26-27 ¶2-5

Chifukwa n’ni mtumwi Paulo alembele kalata Akiristu a Chiheberi anayo kakala wu Yudeya? Mwina apangile vyevi va vifukwa vin’li. Yowambeela, ira aalimbikise. Anjinji mwa Ayuda anala kaulukulele mu chipembezo ya Chiyuda, eno asogoleli a chipembezo iwa yawale mwina koowanyoza chifukwa yokala Akiristu. Chifukwa n’ni kaanyoza? Chifukwa yoi Akiristwayo katan’na kachisi opangi-a chidwi oyi kadowengawo dowa lambela. Katan’na guwa la sembe looneya loi kapelekelengavo sembe koma teto katan’na wasembe oyi aatumikelenga. Vyevi vyookoza afooki-a ofunjeda a Kiristu koma teto pangi-a ira iroromelo iwa iambeele yeva. (Aheb. 3:12, 14) Mwina amo-iwa kookoza kopeya ira kawelele nawili wu Chiyuda. Yanambili, Paulo aongile ira Akiristu a Chiheberi anala katapanga tindi ira kavwechechenga makundo asha kapena makundo odii-a a choonadi, anayo kali “yodja yotakuna” yofwanyeya m’Mawu a Mulungu. (Aheb. 5:11-14) Vinaoneya ira Akiristu amo-iwa koo-arelave Chilamulo ya Mose. w23.10 24-25 ¶3-4

Arongola amo-iwa kanosakula ira katitheliwe. (Mat. 19:10-12) Iziwani ira Yehova na Yesu katinaona ira Akiristu anayo katili vabanja kai ofuneya. Arongola anjinji o-otheliwa kanopanga vinjinji m’mipingo vailambo yetene. Chikondiwa, koma teto murima oganizela athu amo-iwa unowalimbikisa ira kakale arongola kapena am’ma auzimu wa athu anjinji. (Maliko 10:29, 30) Amo-iwa kowambeela utumiki wathawi detene. A-iyana Achikiristu kanopanga vinjinji vachito yolaleela vailambo yetene. (Sal. 68:11) Kodi nyo munokoza panga vyoi muwambeele utumiki wathawi detene? Munokoza panga upainiya, indana chito domangamanga kapena tumikela va Beteli. Mupepelelenga vyolinga vyevyo mun’na nyo. Mukambilanenga na athu anayo kakwakwaneli-ede vyolinga vyokala ngati vyevyo noona vyevyo munapange nyo ira nanyen’ne mufwanelele. Mwera eno mupangenga vyongo vyevyo vinautandizeni ira mukwakwaneli-ede vyolingavyo. Mwaambeela utumiki wathawi detene, vinoutandizani ira mupange vinjinji votumikela Yehova. w23.12 22 ¶16-17

Vevo chisauso ilukulu inaandamelaathu, pivyofuneya vinjinji ira nivwelenga lamulo loi nilaleelenga. Koma ninokoza vuteya ira ni-elenga maganizwi-u etene vachito yolaleela ngati athu kananiruni-a kapena ngati ninagumana na mavuto avyachuma. Ndiye kodi chin’ni inanikami-e ira ni-elenga vyongo vyokuza Umwene vamalo owambeela? Kanikaikelenga ira “Yehova wa magulu akondo audimu” uli umbali-u. Liye unoza anikami-e napitiliza ela vyongo vyokuza Umwene vamalo owambeela. Eno kavali chifukwa yoi niovelenga. (Hag. 2:4) Yehova unafuna ira ni-elenga maganizwi-u etene vachito yolaleela, ineyo ili yovulumucha moyo. Hagai oolimbikisa athu a Mulungu ira kaambeele nawili chito yomanga kachisi ngati kanaayala wene maziko. Ndipo Yehova oowalonjeza ira kapanga eno unoza ‘aadalise.’ (Hag. 2:18, 19) Na-iyene Yehova unoza anidalise na-elanga vamalo owambeela chito ineyo univa-ile liye. w23.11 16 ¶8; 17 ¶11

Kalata ineyo alembele liye Akiristu a wu Roma, mtumwi Paulo aongile ira athu etene mbochimwa. Ndiye kodi muthu unapange avi ira Mulungu asangalalenga na liye koma teto amuonenga ira ngolungama? Vofuna akami-a Akiristu fwanya yankho la fuso leli, Paulo oofotokoza isazo ya Aburahamu. Aburahamu akala wu Kanani vevo Yehova amuromolile liye ira ali olungama. Chifukwa n’ni liye aongile ira Aburahamu ali olungama? Kodi yali chifukwa yoi liye oo-arela malamulo anayo kali mu Chilamulo ya Mose? Iyayi. (Arom. 4:13) Vale Yehova apelekile Chilamulo wa Aizarayeli vangamalile chaka dokwaranya 400 kumela vevo aongile liye ira Aburahamu ali olungama. Ndiye kodi chin’ni yapangi-ile ira Yehova amuonenga monga olungama? Chifukwa yooma murima wae ulukulu, Yehova aongile ira Aburahamu ali olungama chifukwa ya iroromelo yae. — Arom. 4:2-4. w23.12 3 ¶4-5

Ma-iyu anayo Yehova oomuwandela namaongela Natani ira Mwene Davide, kai onoyo unaze amange kachisi. (1 Lim. 17:3, 4, 11, 12) Kodi Davide airile n’ni angavwile uthengola? Oowambeela sonkani-a chuma koma teto vyongo vyevyo mwanaye Solomo afuneela liye ira amange kachisiyo. (1 Lim. 29:1-5) Davide angakede wandeliwa wene ira kai liye onoyo unaze amange kachisi, Yehova ooiranaye pangano. Liye oomulonjeza Davide ira m’mo-i wa a-ima obaluwela muzelaye unoza alamulele mpakana walewale. (2 Sam. 7:16) Kaganizelani mwemo Davide unaze liye asangalalele muilambo isha voiziwa ira unasangalala na moyo mu Ulamulilo wa Chaka 1000 wa Yesu, Mwene okumela m’banja laye. Khanila inonikami-a ona vyoi masiki ira kaninakwakwani-e ira vyetene vyevyo ninafuna iyo votumikela Yehova, Mulungwi-u unonisungela madaliso amo-iwa anayo kanaayembekezela. w23.04 16 ¶8-10

Munoza muone ira malemba amo-i a m’Baibulo kanonilimbikisa simbwasimbwa nakaana mantha. Mwaisazo, munokoza fwanya mawu olimbikisa m’mabuku a Yobu, Masalimo, Miyambo koma teto mawu a Yesu ofwanyeya muchaputala 6 ya buku la Mateyu. Mwapempelanga wa Yehova koma teto welenga Mawae, liye unoza autothozeni. Kanikaikelenga ira Yehova unoza anitandize va thawi ineyo nigumanile iyo na mavuto alukulu. Kanaza ani-iya eki-u. (Sal. 23:4; 94:14) Yehova unolonjeza ira unoza aniteteze, nitandiza ira kanigwedezeye, nilimbikisa, koma teto nitothoza. Voonga vya Yehova lemba la Yesaya 26:3 linaonga ira: “Athu anayo kanauroromelani na murima wetene munoza muwateteze. Munoza muwava-e murendele wo-omala, chifukwa kanaroromela nyo.” Eno muroromelenga Yehova ndipo mulolenga ira autandizeni vo-indi-eda chito ndila do-iyana iyana. Mwera eno munoza mufwanye kopolo ngakale va thawi ineyo munagumana nyo na mavuto alukulu. w24.01 25 ¶16-17

Mawu owandeliwa avalembali kanokwakwaneli-ediwa malambwano. Mawu olimbikisa o-arelala, kanofotokoza teto vya thawila ira: “A-imawo etene kanaza kafunji-iwanga na Yehova, ndipo murendele wa a-imawo unaza ukala oinjiva. Unoza ugarateye molimba muchilungamo. . . . Kunaza uova yongo ndipo kilivo iliyetene ineyo inaupangi-e mantha, chifukwa kilivo iliyetene yoopi-a ineyo inaze iuwandamele.” (Yes. 54:13, 14) Ngakale Satana, unoyo ngu “mulungu wa thawi ila,” kan’na kopolo doi alepeli-e chito yofunji-a amo-iwa ineyo athu a Yehova kana-indaathu. (2 Akor. 4:4) Lambela oona ooweli-ediwa ndipo kunaza usokoneziwa, unoza ukalevo mpakana walewale. Kilivo ida iliyetene ineyo inapangiwe ineyo inaze ikwaranye. w24.02 4 ¶10

Monga Akiristu kaninaona movevuwa lonjezo li-u lovipeleka wa Yehova. Vyevi vinokuza vyosakula koma teto vyoira vi-u va khani dokuza abali-u. Ninoesaesa kwakwaneli-eda mosamala udindwi-u wa m’Malemba osamalela abali-u, koma kaninalola ira vyofuna vya abali-u vinilepeli-e panga vyevyo Yehova unafuna liye. (Mat. 10:35, 36; 1 Tim. 5:8) Thawi dimo-i vyevi vinokoza pangi-a ira nisakule vyongo vyevyo kavinasangalasa abali-u, koma vinosangalasa Yehova. Liye ngunoyo aambeeli-ile Banja ndipo unafuna ira nikalenga na Banja losangalala (Aife. 3:14, 15) Ngati ninafuna ira nisangalalenga m’Banja li-u ninafuneya panga vyevyo Yehova unafuna liye. Kamukaikelenga ira Yehova unosangalala na kama lelo munapanga nyo vomulambela koma teto samalela athu a Banja linyu mwachikondi na mwaulemu.— Arom. 12:10. w24.02 18 ¶11, 13