Zina la Yehova Tilofuneya Vinjinji wa Yesu

1-2. (a) Kodi Yesu apangile n’ni anga-alile vang’ono phiwa? (b) Kodi ninakambilana vyofuka viivi mukhanila?

LALI Lachinayi mazulo va Nisani 14, mu 33 C.E., moi Yesu ali anga-alile vang’ono pelekiwa, weluziwa, pangeliwa nkhaza koma teto phiwa. Liye ali angakede mari-a wene dja yodja yavadela na ofunjedae ororomeleya musubi la mudimu. Angamari-ile yodjeyo, Yesu oowawandela ofunjedae mawu ogomi-eda olimbikisa. Aluwa kaanakumemo musubimo, Yesu ooimela moi oopempela naaluwa pempelo lofuneya vinjinji. Namarumiwa Yohani oolemba pempeloli, moi ninolifwanya va Yohani chaputala 17.

² Kodi pempelo la Yesuli linatonyi-eda ira liye akumbanyela vinjinji vya n’ni? Kodi pempeloli linatonyi-eda ira chin’ni ineyo yali yofuneya vinjinji wa liye vathawi yetene ya utumikae? Tiyemoni nikambilane vyosomeda vya vyofuka vyevi.

“NDIIPANGI-A IRA ALUWA KAIZIWE ZINA LINYU’’

3. Kodi Yesu aongile n’ni vyokuza zina la Yehova, nanga atapulela n’ni? (Yohani 17:6, 26)

³ M’pempelo lae, Yesu oonga ira: “Ndiipangi-a ira aluwa kaiziwe zina linyu.” (Yoh. 17:6, 26) Moi ndila mbiili liye oonga ira oowaiziwi-a ofunjedae vyokuza zina la Yehova. (Welengani Yohani 17:6, 26.) Kodi Yesu atapulela n’ni? Kodi atapulela ira oowaiziwi-a zina lelo aluwa kataliiziwa? Ofunjedae kali Ayuda, eno aluwa kooiziwa wale ira zina la Mulungu ngu Yehova. Zinali loofwanyeya maulendo anjinji m’Malemba a Iheberi. Eno Yesu kaatapulela aiziwi-a zina la Mulungu, m’malomwiwa aonga vya vyevyo zinalo linaimelelaathu. Yesu oowakami-a ofunjedae muiziwa pama Yehova, vyolinga vyae, vyoira vyae, koma teto makalelwae. Moi oopanga vyevi chifukwa liye eka ngunoyo unamuiziwa pama Yehova.

4-5. (a) Kodi iziwa zina la muthu unatapulela n’ni? Pelekani isazo. (b) Kodi ofunjeda a Yesu kaiziwile zina la Yehova mundila iivi?

⁴ Nierekezele ira m’mo-i mwa andimuwa a mupingwinyu ngu David. Nyo mukala mumuiziwanga m’baliyo wa chaka dinjinji. Koma dambo limo-i mubulela vinjinji moi kanaulandelani uchipatala wewo m’baliyo una-inda liye chito. M’baliyo una-indi-eda chito luso lae ira avulumuche moywinyu. Kumela dambo lelo, chin’ni inazenga m’maganizo mwinyu mwavwa vya m’baliyo? Munerenga ganiza ira David, kakede kala ndimuwa unoyo munamuiziwa nyo, koma munerenga ganizela ira ngu dokotala unoyo avulumuchile moywinyu.

⁵ Mofwanafwana na vyevi, ofunjeda a Yesu kooiziwa wale zina la Yehova. Koma zinali lookala lofuneya vinjinji wa aluwa chifukwa zela mwa Yesu, koofiya vomuiziwa pama Yehova. Chifukwa n’ni ninaonga eno? Chifukwa vyevyo Yesu aonga liye koma teto vyevyo vyapanga liye vyootonyi-eda pama makalelo Ababae. Eno ofunjedayo koomuiziwa pama Yehova voona mwemo Yesu mwafunji-ela liye koma teto voona mwemo mwapangela liye vyongo na athu. — Yoh. 14:9; 17:3.

“ZINA LINYU LELO MUNDIVA-ILE NYO”

6. Kodi Yehova apelekile zina lae wa Yesu mundila yoi avi? (Yohani 17:11, 12)

⁶ Yesu oowapempelela ofunjedae ira: “Aing’aneleni chifukwa ya zina lelo mundiva-ile nyo. (Welengani Yohani 17:11, 12.) Kodi vyevi vinatapulela ira sopano Yesu afuneela iziweya na zina loi Yehova? Naari. Onani ira m’pempeloli Yesu ooromola zina la Yehova ira “Zina linyu.” Eno Yesu kaalandile zina la Yehova kala zina lae. Ndiye kodi Yesu atapulela n’ni vevo aongile liye ira Mulungu umuva-a zina lae? Yowambeela, umbuwelani ira Yesu aimelela Yehova koma teto oonga m’malo mwae. Liye azile muzina la Babae moi oopanga vyongo vinjinji vyakopolo zela muzina leli. (Yoh. 5:43; 10:25) Enjedela vevo zina loi Yesu linatapulela ira “Yehova chi ipulumuso.” Eno zina la Mulungu tilogwilizana vinjinji na zina la Yesu.

7. Pelekani isazo yotonyi-eda ira Yesu oonga mu zina la Yehova.

⁷ Ninokoza erekezela vyevi na vyevyo vinapanga o-arela wa prezidenti, liye unomuimelela prezidenti. Vyevyo o-arela wa prezidentiyo vinaonge liye vinokaana kopolo yofwanafwana na vyevyo prezidenti vyaonge liye. Mofwanafwana na vyevi Yesu amuimelela Yehova moi oonga na athu muzina la Yehovoyo. — Mat. 21:9; Luka 13:35.

8. Kodi zina la Yehova lali “mwa” Yesu mundila yoi avi aanaze vailambwela? (Ekisodo 23:20, 21)

⁸ Va udindwae monga mawu, Yesu ukala amutumikelanga Yehova monga omuongela vopeleka mauthenga koma teto malangizo wa angelo na athu. (Yoh. 1:1-3) Vinaoneya ira Yesu ngu ngelo unoyo Yehova amutumizile liye ira asamalele Aisaraeli vaulendwiwa vevo kaliathu muipululu. Vowawandela Aisaraeli ira kavwelenga ngeloyo, Yehova aongile ira: “Chifukwa zina langa lili mwa liye.”a (Welengani Ekisodo 23:20, 21.) Zina la Yehova lali “mwa” Yesu chifukwa liye amuimelela Yehova koma teto ngu liye unoyo alemekeza vinjinji noweli-a zina la Babae.

“BABANI LEMEKEZANI ZINA LINYU”

9. Kodi zina la Yehova lali lofuneya moi avi wa Yesu? Fotokozani.

⁹ Monga mwemo nionele iyo, zina la Yehova lali lofuneya vinjinji wa Yesu. Ngakale vevo ali liye udimu oona ira zinali lali lofuneya vinjinji. Chichifukwa iwa angali vailambwela, vyetene vyevyo vyapanga liye vyootonyi-eda ira oona ira zinali lali lofuneya vinjinji. Umapeto wa utumikae, Yesu oopempela ira:“Babani lemekezani zina linyu.” Thawi ineyo Ababae koomusomeda na mawu akopolo okumela udimu oyi: “Ndililemekeza moi ndinoza ndililemekeze.” — Yoh. 12:28.

10-11. (a) Kodi Yesu alemekezile avi zina la Yehova? (Onani teto ithuzithuzi.) (b) Chifukwa n’ni zina la Yehova linafuneya weli-iwa?

¹⁰ Yesu oolemekeza teto zina la Babae. Kodi apangile avi vyevi? Ndila imo-i yali awandela amo-iwa vyokuza makalelo na vyoira vya Babae. Koma liye oopanga vinjinji volemekeza zinali. Zina la Yehova koma teto mbilae vyafuneela weli-iwa.b Yesu ootonyi-eda funeya opanga vyevi vevo afunji-ile liye ofunjedae ira kapempelenga ira: “Babi-u waudimu, zina linyu liweli-iwe.” — Mat. 6:9.

¹¹ Chifukwa n’ni zina la Yehova lafuneela weli-iwa? Chifukwa m’munda wa Edeni, Satana Mdyerekezi oonyoza koma teto oonga vyonama vyokuza Yehova Mulungu. Liye oonga ira Yehova ngonama koma teto ooimana Adamu na Hava vyongo vyapama. (Gen. 3:1-5) Voonga vyevi, Satana ootonyi-eda teto ira Yehova kanapanga vyongo mundila yofwanelela. Vyonama vya Satanavi vyootakali-a mbili ya Yehova, koma teto zina lae. Vanduli viwa muthawi ya Yobu, Satana oonga ira athu kanomutumikela Yehova chifukwa ya vyongo vyapama vyevyo Yehova uwapangele liye. Ngelo onamola oonga teto ira kavili muthu unoyo unamuomeliwana Yehova unoyo unamutumikelengave agumana na mavuto. (Yobu 1:9-11; 2:4) Eno vafuneela thawi yokwakwanela ira viiziweye ira onama ngu mbaani vaari va Satana na Yehova.

“NDINAPELEKA MOYWANGA”

12. Kodi Yesu ali wofunechecha panga n’ni chifukwa yoomeliwana zina la Yehova?

¹² Chifukwa yoi oomuomeliwana Yehova, Yesu oofunechecha panga vyetene vyevyo awande liye ira aweli-e zina la Babae. Liye aongile ira: “Ndinapeleka moywanga.” (Yoh. 10:17, 18) Vi vinatonyi-eda ira liye ali okozeya khwela zina la Yehova.c Adamu na Hava anayo kali angwilo, katamuvwele Yehova moi koosakula kala umbali ya Satana. Mo-iyana na athu ambiilala, Yesu ali ofunechecha za vailambo ya vati za tonyi-eda ira unomuomeliwana Yehova. Liye oopanga vyevi vomuvwela Yehova va vyongo vyetene. (Aheb. 4:15; 5:7-10) Liye oororomeleya wa moywae wetene mpakana vevo akhwile liye movoreya vinjinji vatengo ozuzumelavo. (Aheb. 12:2.) Vopanga vyevi, ootonyi-eda ira oomuomeliwana Yehova koma teto zina Lae

13. Chifukwa n’ni Yesu ali ofwanelela tonyi-eda ira Satana ngonama? (Onani teto ithuzithuzi.)

¹³ Muvyetene vyevyo Yesu apanga liye ootonyi-eda ira Satana ngonama, mo-iyana na Yehova. (Yoh. 8:44) Yesu oomuiziwa pama Yehova kwaranya muthu uliwetene. Vyaakale ira vyevyo Satana amuongela liye Yehova vyali vyoona, Yesu ooiziwa vyevyo. Koma Yesu oosimikiza ira unoweli-a zina la Yehova koma teto mbilae chifukwa ooiziwa ira vyevyo Satana aonga liye vyali vyonama. Ngakale vevo vyaoneyaathu ira Yehova oomu-iya, Yesu ali ofunechecha khwa angana iroromelo m’malo mo-iya muvwela Babae. — Mat. 27:46.d

“NDIMARI-A INDA CHITO INEYO MWANDIVA-ILE NYO”

14. Kodi Yehova amudalisile avi Yesu chifukwa yokalave ororomeleya?

¹⁴ Yesu oopeleka pempelo vadambo lelo a-alile liye vang’ono khwa, liye aongile ira: “Ndimari-a inda chito ineyo mwandiva-ile nyo.” Liye oororomela ira Yehova unomuva-a mphoto chifukwa yokalave ororomeleya. (Yoh. 17:4, 5) Moi Babae kamunami-ile. Yehova kaalolile ira liye akaleve m’manda. (Vyo. 2:23, 24) Oomuvenyi-a moi oomuva-a udindo ulukulu udimu. (Afil. 2:8, 9) Vogomi-eda viwa Yesu oowambeela lamulela monga Mwene wa Umwene wa Mulungu. Kodi Umwene unola unaza upanga n’ni? Mbali ya nambiili ya pempelo la isazo, Yesu oonga ira: “Umweninyu uze. Vyevyo munafuna nyo viireye vailambo yavati vano ngati mwemo vililiathu udimu.” — Mat. 6:10.

15. Kodi Yesu unaza apange vyongo viivi?

¹⁵ Vachineneveva Yesu unoza avaze kondo yolimbana na adani a Mulungu koma teto ononga etene otakala va kondo ya Arumagedo. (Chiv. 16:14, 16; 19:11-16) Vanduli viwa unoza avokede Satana “muzenje lodii-a vinjinji,” mwemo kanaza awanda panga iliyetene. (Chiv. 20:1-3) Vanduli viwa, Yesu unoza aweli-ede murendele koma teto kami-a athu ira kakale angwilo muulamulilo wa chaka 1000. Liye unoza avenyi-e okhwa koma teto unoza asakaede ilambwela ira ikale paradaizo. Va yolinga ya Yehova inaza ikala yangakwakwaneli-ediwe. — Chiv. 21:1-4.

16. Kodi chin‘ni ineyo inaze iireye umagomi-edo wa Ulamulilo wa chaka 1000?

¹⁶ Kodi vyongo vinaza vikala avi vofiya umagomi-edo wa Ulamulilo wa chaka 1000? Uchimo unaza ukala wangamalile. Athu katinaza kafuneela vepa ira Mulungu aakululukelenga machimwiwa zela mu sembe ya dipo. Katinaza kafuneela teto owawandani-a na Mulungu kapena wasembe. Khwa “[wewo unaza chifukwa ya Adamu],’’ unoyo ngu mdani ogomi-eda, unaza akala angaonongiwe. Vathawi ineyo okhwa kanaza kakala kangavenyi-iwe. Moi athu etene vailambwela kanaza kakala angwilo. — 1 Akor. 15:25, 26.

17-18. (a) Kodi chin’ni inaza iireya umagomi-edo wa chaka 1000?(b) Kodi Yesu unaza apanga n’ni thawae yolamulela yaza imala? (1 Akorinto 15:24, 28) (Onani teto ithuzithuzi.)

¹⁷ Chin’ni teto inaza iireye umagomi-edo wa ulamulilo wa chaka 1000? Va thawi ineyo vanoza vaireye yongo imo-iwa yavadela vinjinji. Khani yokuza weli-iwa wa zina la Yehova inaza ikala yangamalile. Chifukwa n’ni ninaonga eno? M’munda wa Edeni, Satana oonga ira Yehova ngonama moi kanalamulela athu mwachikondi. Kumela thawi ineyo, athu anayo kanamuomeliwana Yehova koma teto mulemekeza kookala kaweli-anga zina lae. Eno umagomi-edo wa chaka 1000, mbili ya Yehova inaza ikala yangaweli-iwe Yehova unaza akala angasimikizele ira liye ngu Baba wachikondi, Waudimu

¹⁸ Vogomi-eda viwa, vyongo vyetene vyevyo Satana unaonga liye vyokuza Yehova vinoza viiziweye ira vyali vyonama. Ndiye kodi Yesu unaza apanga n’ni thawae yolamulela yaza imala? Liye kanaza awukela ulamulilo wa Yehova ngati mwemo Satana mwapangile liye. (Welengani 1 Akorinto 15:24, 28.) Yesu unoza amuweli-ede Babae Umwenae. Liye unoza agonjele ulamulilo wa Yehova. Yesu, ngokozeya panga vyevi chifukwa unomuomeliwana vinjinji Babae. Moi vogomi-eda viwa Satana aza aonongiwa, zina la Yehova linoza liweli-iwe mpakana walewale.

19. Kodi zina la Yehova tilofuneya moi avi wa Yesu?

¹⁹ Chichifukwa iwa Yehova ali ofunechecha peleka zina lae wa Yesu. Yesu ootonyi-eda pama vinjinji mwemo Babae mwalili liye. Ndiye kodi zina la Yehova tilofuneya moi avi wa Yesu? Tilofuneya vinjinji kwaranya iliyetene. Liye ali ofunechecha chifukwa ya zinali moi ngokozeya za weli-eda iliyetene wa Yehova vanduli va chaka 1000. Ndiye kodi ninamusazi-ede avi Yesu? Ninoza nikambilane yosomeda ya yofuka inela mukhani yo-arela.