KHANI YOFUNJEDA 23
NYIMBO 2 Dzina Lanu Ndi Yehova
Zina la Yehova Tilofuneya Vinjinji wa Iyo
“‘Nyo muli mboni danga,” uongile eno Yehova.” — YES. 43:10.
VYEVYO NINAFUNJEDE IYO
Mukhanila ninoona vyevyo ninapange iyo votonyi-eda ira Yehova ngowela koma teto ninoona ira vyetene vyevyo Satana ukalile liye amuongelanga Yehova pivyonama.
1-2. Kodi ninaiziwa avi ira zina la Yehova tilofuneya vinjinji wa Yesu?
ZINA la Yehova tilofuneya vinjinji wa Yesu. Kavili muthu unoyo aakami-ile athu muiziwa Yehova kwaranya Yesu. Mukhani ivirilele noona ira Yesu ali wokozeya khwa votonyi-eda ira Yehova ngowela koma teto ndila dae detene tidolungama. (Maliko 14:36; Aheb. 10:7-9) Moi vanduli va Ulamulilo wa Chaka 1000, Yesu unoza aweli-ede kopolo detene wa Babae ira zina la Yehova liweli-iwe. (1 Akor. 15:26-28) Kodi vyetene vyevyo Yesu upangile liye voweli-a zina la Mulungu vinanifunji-a n’ni? Vinatonyi-eda ira liye unomuomeliwana vinjinji Babae Yehova.
2 Yesu ooza vailambo yavati muzina la Babae. (Yoh. 5:43; 12:13) Liye oowakami-a o-arelae iziwa zina la Babae. (Yoh. 17:6, 26) Liye afunji-anga koma teto panga vyodabwi-a, oowakami-a athu iziwa ira Yehova ngunoyo amuva-a zelu koma teto kopolo. (Yoh. 10:25) Moi Yesu oomuvepa Yehova ira aing’anele ofunjedae “chifukwa ya zina [la Yehovoyo]” (Yoh. 17:11) Eno akala Yesu aona eni zina la Babae, kai vyovweya ira muthu aonge ira ngo-arela wa Kristu koma ooiziwa kapena li-indi-eda chito zinali.
3. Kodi ninakambilana n’ni mukhanila?
3 Iyo Akristu ninomusazi-eda Yesu moi ninoomeliwa nolemekeza zina la Yehova. (1 Pe. 2:21) Mukhanila ninoona chifukwa iwa Yehova upelekile zina lae wa athu anayo kanalaleela ‘uthenga wapama wa Umwene.’ (Mat. 24:14) Ninokambilana teto funeya wa zina la Yehova wa uliwetene vaeka.
“ATHU OIZIWEYA NA ZINA LAE”
4. (a) Kodi Yesu aanadowe udimu alamulile ofunjedae ira kapange n’ni? (b) Kodi lamulo leli linanipangi-a fuka yofuka iivi?
4 Anga-alile vang’ono welela udimu, Yesu oowawandela ofunjedae ira: “Mwaza muwachela zimu owela, munoza mukale akopolo. Moi munoza mukale mboni danga mu Yelusalemu, wu Yudeya wetene na wu Samariya, mpakana umagomelo a ilambo yavati.” (Vyo. 1:8) Eno uthenga wapama wafuneela laleeliwa uliwetene ookala wu Isaraeli ba-i. Athu a mitundu detene kafuneya va-iwa mwai wokala wo-arela a Yesu. (Mat. 28:19, 20) Koma Yesu oonga ira: “munoza mukale mboni danga.” Kodi ofunjeda ashala kafuneela iziwa zina la Yehova kapena keda kala mboni da Yesu? Khani ya va Vyoira chaputala 15 inonikami-a fwanya yosomeda ya yofuka inela.
5. Kodi anamarumiwa na andimuwa a wu Yelusalemu katonyi-edile avi ira athu etene kafuneya iziwa zina la Yehova? (Onani teto ithuzithuzi.)
5 Mu 49 C.E., anamarumiwa na andimuwa a wu Yelusalemu koogumana ira kakambilane vyevyo athu ooduliwa a mitundu dimo-i kafuneyathu panga ira kakale Akristu. Umapeto wa vyokambilanavyo, Yakobo, unoyo ali mchimwenae wa Yesu oonga ira: “[Petulo] ufotokoza pama mwemo Mulungu mwatembenuwele liye athu a mitundu dimo-i wa thawi yowambeela, ira vaari viwa alandevo athu oiziweya na zina lae.” Kodi veva Yakobo aonga vya zina la mbaani? Mogwilizana na vyevyo namaongela Amosi alembile liye, Yakobo aongile ira: “Ndinoza ndipange vyevi ira athu o-alayo kamusaele saele Yehova na murima wetene. Kamusaele saele vamo-i na mitundu detene da athu, athu oromoliwa na zina langa uongile Yehova.” (Vyo. 15:14-18) Ofunjeda ashala kafuneela funjeda vya Yehova koma teto ‘iziweya na zina lae.’ Vyevi vinatapulela ira aluwa kafuneela awandela amo-iwa vyokuza zina la Mulungu, moi athwayo kaaiziwenga monga oimelela zinalo.
Vasonkano wa bungwe lolamulela mu thawi ya anamarumiwa, alombwana ororomeleyala koozindikila ira Akristu kafuneya kala athu oiziweya na zina la Mulungu (Onani ndima 5)
6-7. (a) Chifukwa n’ni Yesu azile vailambo yavati? (b) Kodi chifukwa imo-iwa ilukulu ineyo Yesu azele liye chin’ni?
6 Zina loi Yesu linatapulela ira “Yehova chi ipulumuso” moi Yesu ngu ndila ineyo Yehova a-indi-edile liye chito vovulumucha athu anayo katonyi-edile iroromelo. Yesu ooza vailambwela za peleka moywae ira avulumuche athu. (Mat. 20:28) Dipo lelo apelekile liye loo-ula mwai ira athu kavulumuwe noza fwanya moyo oomala. — Yoh. 3:16.
7 Koma chifukwa n’ni athu kafuneya vulumuchiwa? Kafuneya vulumuchiwa chifukwa ya vyevyo vyaireile m’munda wa Edeni. Mukhani ivirilele, noona ira makolwi-u Adamu na Hava, katamuvwele Yehova moi vyevi vyoopangi-a ira katatile mwai wokaana moyo oomala. (Gen. 3:6, 24) Koma vookala khani imo-iwa teto ineyo yaambeeli-iwe, khaniwa chi ilukulu kwaranya vulumuchiwa wa athu. Satana oonga vyonama vyotakala vinjinji vyokuza Yehova. (Gen. 3:4, 5) Eno vulumuchiwa wa m’badwa da Adamu na Hava unogwilizana na khani ilukulu ineyo kuweli-iwa wa zina la Yehova. Chifukwa yoi Yesu amuimelela Yehova koma teto ooiziweya na zina lae, liye ookami-a vinjinji voweli-a zinali.
Kai vyovweya ira muthu aonge ira ngo-arela wa Kristu koma ooliiziwa kapena ooli-indi-eda chito zina la Babae.
8. Kodi athu etene anayo kanamuroromela Yesu kanafuneya zindikila n’ni?
8 O-arela etene a Yesu, kaya mba Ayuda kapena a mitundu dimo-i, kafuneela iziwa ira unoyo unaavulumucha ngu Yehova Mulungu, unoyo ngu Babae wa Yesu. (Yoh. 17:3) Moi mofwanafwana na Yesu, naaluwene kafuneya iziweya na zina la Yehova. Kafuneela teto zindikila ira weli-iwa wa zinali kofuneya vinjinji. Iziwa vyevi kuwewo waakami-e ira kaze kavulumuwe. (Vyo. 2:21, 22) O-arela etene ororomeleya a Yesu kafuneya funjeda vya Yehova koma teto vya Yesu. Chichifukwa iwa Yesu amari-ile pempelo lae la va Yohani chaputala 17 na mawu oyi: “Miyo ndipangi-a ira aluwa kaiziwe zina linyu moi ndinoza ndipitilize aiziwi-a zinalo ira naaluwene teto katonyi-edenga chikondi ngati ineyo mwanditonyi-edile nyo, ira miyo ndikale teto ogwilizana na aluwa” — Yoh. 17:26.
“NYO MULI MBONI DANGA”
9. Kodi ninatonyi-ede avi ira zina la Yehova tilofuneya vinjinji wa iyo?
9 Pivyovaela oneya ira o-arela etene a Yesu kanafuneya esaesa weli-a zina la Yehova. (Mat. 6:9, 10) Kanafuneya ona ira zina la Yehova tilofuneya vinjinji kwaranya iliyetene. Moi vyevi vioneelenga muvyoira viwa. Koma kodi ninakami-e avi voweli-a zina la Yehova kapena runi-a vyonama vyevyo Satana unamuongela liye?
10. Kodi va Yesaya chaputala 42 dowa 44 vanafotokoza vya mulandu uuvi? (Yesaya 43:9; 44:7-9) (Onani teto ithuzithuzi.)
10 Buku la Yesaya chaputala 42-44 linotonyi-eda udindo unoyo nin’na iyo voweli-a zina la Yehova. Machaputala anala kanofotokoza mopipilisa vya mulandu wokuza milungu unoyo uli wu khoti. Yehova unowandela uliwetene unoyo unaviromola ira ngu mulungu ira apeleke umboni wotonyi-eda ira liye ngu mulungu weniweni. Liye unovepa teto mboni ira dize ira disimikizele akala dedo dili milungu doona. Koma kavili unoyo unapeleke umbonila. — Welengani Yesaya 43:9; 44:7-9.
Ninosomeda mundila dinjinji va mulandu unoyo unanikuza (Onani ndima 10-11)
11. Mogwilizana na Yesaya 43:10-12, kodi Yehova aawandelile n’ni athwae?
11 Welengani Yesaya 43:10-12. Voonga vya athwae Yehova eere: “Nyo muli mboni danga, . . . Moi miyo ndili Mulungu.” Vanduli viwa Yehova oowafuka ira: “Kodi vikala teto Mulungu m’mo-iwa patulavo miyo? (Yes. 44:8) Eno iyo nikaana mwai wosomeda yofuka inela. Vyoonga koma teto vyoira vi-u vinafuneya simikizela ira Yehova ngu Mulungu oona. Zina lae tilavadimu vinjinji kwaranya zina lililetene. Vyoira vi-u vinafuneya tonyi-eda ira ninomuomeliwana vinjinji Yehova moi ninoza nipitilizeve kala ororomeleya wa liye ngakale Satana anipanikize vinjinji. Nera eno ninoza nikami-e voweli-a zina lae.
12. Kodi ulosi wa va Yesaya 40:3, 5 wakwakwaneli-ediwe avi?
12 Nakami-anga voweli-a zina la Yehova kapena mbilae, ninakala nimusazi-edanga Yesu Kristu. Yesaya oolosela ira muthu m’mo-iwa unoza ‘asakaede ndila ya Yehova.’ (Yes. 40:3) Kodi mawu anala kakwakwaneli-ediwe avi? Yohani M’batizi oosakaeda ndila ya Yesu unoyo aza muzina la Yehova koma teto onga muzina la Yehova. (Mat. 3:3; Maliko 1:2-4; Luka 3:3-6) Ulosi unoyo oonga teto ira: “Ulemelelo wa Yehova unoza uoneele.” (Yes. 40:5) Kodi ulemeleloyo waoneele avi? Yesu angazile vailambwela oopanga vyongo ndendende ngati Yehova, moi vyali ngati Yehova mwinyailo ngunoyo uzile vailambwela.— Yoh. 12:45.
13. Kodi ninamusazi-ede avi Yesu?
13 Mofwanafwana na Yesu, iyo nili Mboni da Yehova. Ninoiziweya na zina la Yehova moi ninowawandela athu amo-iwa vya chito dae dodabwi-a. Koma teto, ninafuneya akami-a athu amo-iwa iziwa udindo wa Yesu voweli-a zina la Mulungu. (Vyo. 1:8) Yesu ngu mboni yororomeleya ya Yehova moi iyo noolandela isazo yae. (Chiv. 1:5) Kodi ninatonyi-ede teto avi ira zina la Yehova tilofuneya vinjinji wa iyo?
MWEMO NINATONYI-EDELE IYO IRA ZINA LA YEHOVA TILOFUNEYA VINJINJI
14. Mogwilizana na Salimo 105:3, kodi ninavwa avi naganizela vya zina la Yehova?
14 Ninonyadela iziweya na zina la Yehova. (Welengani Salimo 105:3.) Yehova unosangalala vinjinji nanyadelanga zina lae. (Yer. 9:23, 24; 1 Akor. 1:31; 2 Akor. 10:17) “Vitama mwa Yehova” unatapulela nyadela ira Yehova ngu Mulungwi-u. Ninoona ira unola ngu mwai wolemekeza zina lae koma teto woweli-a mbilae. Kaninafuneya nyaswa awandela afwi-u awu chito, wu sukulu, manebi-u kapena athu amo-iwa ira iyovano nili Mboni da Yehova. Mdyerekezi unafuna ira ni-iye awandela athu amo-iwa vyokuza zina la Yehova. (Yer. 11:21; Chiv. 12:17) Moi Satana na anamaongelae onama kanafuna ira athu kadiwale zina la Yehova. (Yer. 23:26, 27) Koma omeliwana zina la Yehova unopangi-a ira nisangalalenga “dambo letene”. — Sal. 5:11; 89:16.
15. Kodi itana va zina la Yehova unatapulela n’ni?
15 Ninopitiliza itana va zina la Yehova. (Yow. 2:32; Arom. 10:13, 14) Itana va zina la Yehova kunakeda tapulela iziwa zinalo noli-indi-edanga chito. Unatapulela iziwa vyoi Mulungu ukalawo, muroromela koma teto roromela ira unerenga nikami-a koma teto nisogolela. (Sal. 20:7; 99:6; 116:4; 145:18) Ninowakami-a athu amo-iwa iziwa zina la Mulungu koma teto makalelwae apama. Ninowalimbikisa teto ira kalape nopanganga vyongo vyevyo vinaakami-e athwayo ira Yehova asangalalenga na aluwa. — Yes. 12:4; Vyo. 2:21, 38.
16. Kodi ninatonyi-ede avi ira Satana ngonama?
16 Ninololela vuteya chifukwa ya zina la Yehova. (Yak. 5:10, 11) Nakalave ororomeya vevo ninagumana iyo na mavuto ninotonyi-eda ira Satana ngonama. Muthawi ya Yobu, Satana oowaongela athu etene anayo kanamutumikela Yehova ira: “Muthu unokoza peleka iliyetene ineyo un’na liye ira avulumuche moywae” Yobu 2:4) Satana oonga ira athu kanomutumikela Yehova vyongo vyaaendelanga pama. Koma kagumana na mavuto, kanokoza iya mutumikela. Yobu ookala wororomeleya moi ootonyi-eda ira vyevi pivyonama. Na-iyene teto nikaana mwai wotonyi-eda ira kaya Satana unanipangela vyoi avi, kanina-iye mutumikela Yehova. Kanikaikelenga ngakale vang’ono ira Yehova unerenga niing’anela chifukwa ya zina lae. — Yoh. 17:11.
17. Mogwilizana na 1 Petulo 2:12, kodi ninalemekeze avi zina la Yehova?
17 Ninolemekeza zina la Yehova. (Miya. 30:9; Yer. 7:8-11) Voi ninoimelela Yehova koma teto iziweya na zina lae, ninokoza tamanda zinalo kapena linyozi-a. (Welengani 1 Petulo 2:12.) Eno ninafuneya esaesa ira vyoonga koma teto vyoira vi-u vitamandenga Yehova. Napanganga vyevi ngakale ira iyo kanili angwilo, ninokoza lemekeza zina la Yehova.
18. Kodi ninatonyi-ede teto avi ira zina la Yehova tilofuneya vinjinji wa iyo? (Onani teto mawu a m’pedi.)
18 Ninoona ira zina la Yehova tilofuneya vinjinji kwaranya mwemo athu kanaonelaathu mbili-u. (Sal. 138:2) Chifukwa n’ni kala na maganizo anala kofuneya vinjinji? Athu amo-iwa kanokoza ninyozanga chifukwa yoi ninoomeliwana zina la Yehova.a Yesu oololela khwa mundila yonyaswi-a ngati igawenga chifukwa yofuna lemekeza zina la Yehova. “Liye kaatamaalile ira vyonyaswi-a vinomuireela,” tapulela ira kaakumbanyela vinjinji vya mwemo athu amo-iwa kanamuonelengaathu. (Aheb. 12:2-4) Liye oofunechecha panga ifunelo ya Mulungu. — Mat. 26:39.
19. Kodi nyo munavwa avi mwaganizela vya zina la Yehova? Pelekani chifukwa?
19 Ninonyadela zina la Yehova moi ninoona ira ngu mwai ulukulu iziweya ira nili Mboni da Yehova. Chifukwa ya vyevi ninokala ofunechecha pitiliza tamanda zina la Yehova ngakale athu amo-iwa kaninyozenga. Zina la Yehova tilofuneya vinjinji wa iyo kwaranya mwemo athu amo-iwa kananionelaathu. Eno kaya Satana anipangele vyoi avi, tiyemoni nipitilize tamanda zina la Yehova. Nera eno ninoza nitonyi-ede ira zina la Yehova tilofuneya vinjinji wa iyo ngati mwemo Yesu Kristu mwalionela liye.
NYIMBO 10 Tamandani Yehova Mulungu Wathu
a Ngakale Yobu, unoyo ali wororomeleya, oosokonezeya angaganizele mwemo afwae aralu kamuonelaathu. Vowambeela, a-imae etene kangakhwile koma teto katundwae wetene angaonongeile, “Yobu kaachimwile kapena muimba Mulungu mulandu oyi upanga vyongo vyotakala.” (Yobu 1:22; 2:10) Koma vanduli viwa, afwae kangamuongele ira upangile vimo-iviwa vyene vyotakala, liye oowambeela ‘onga mooganiza pama.’, Liye oona ira yofuneya vinjinji kuteteza mbilae kwaranya weli-a zina la Mulungu. — Yobu 6:3; 13:4, 5; 32:2; 34:5.