Lachiwili, Julayi 29
Unondisangalasa vinjinji. — Luka 3:22.
Pivyolimbikisa iziwa ira Yehova unosangalala na athwae etene monga gulu. Baibulo linaonga ira: “Yehova unosangalala na athwae etene.” (Sal. 149:4) Komave thawi dimo-i athu amo-i kanokoza kaikelanga koma teto vifukanga ira, ‘Kodi Yehova unosangalala na miyo vameka?’ Anjinji mwa atumiki ororomeleya a Yehova awale thawi dimo-i koovuteya na maganizo ngati anala. (1 Sam. 1:6-10; Yob. 29:2, 4; Sal. 51:11) Baibulo linotonyi-eda ira athu anayo kai angwilo kanokoza sangalasa Yehova. Kodi ninapange avi vyevi? Ninafuneya roromela Yesu Kiristu koma teto badiziwa. (Yoh. 3:16) Nera eno ninotonyi-eda vowela ira nilapa machimwi-u ndipo nilonjeza ira ninoza nipangenga vyevyo Mulungu unafuna liye. (Vyo. 2:38; 3:19) Yehova unosangalala aona nipanganga vyevi nayolinga yoi nikalenae vausamwali. Liye unosangalala na iyo ndipo unoniona ngati afwae avamurima napitilizanga panga vyevyo ninawande iyo vokwakwaneli-eda vyevyo nalonjezile iyo vovipeleka. — Sal. 25:14. w24.03 26 ¶1-2
Lachitatu, Julayi 30
Kanina-iye onga vya vyongo vyevyo navionile iyo novivwa. — Vyo. 4:20.
Ninokoza asazi-eda ofunjeda a Yesu vopitilizave laleela ngakhale vevo andimuwa a boma karuni-ileathu chitwi-u yolaleela. Ninokoza kala osimikiza ira Yehova unoza anitandize kwakwaneli-eda utumiki-u. Eno mupempelenga ira mukale olimba murima koma teto azelu. Vepa Yehova ira anikami-e vilela mavuto. Anjinji a iyo ninogumana na mavuto okuza thanzi kapena maganizo, khwa wa athu anayo ninaawomeliwana iyo, mavuto a m’banja, zuzumi-iwa kapena teto mavuto amo-i. Teto vyongo monga mulili koma teto khondo vipangi-a ira vikale vyorucha vinjinji limbana na mavuto anala. Eno mupepelenga wa Yehova mokumela vati va murima. Mumuwandelenga vyevyo vinaireya va moywinyu ngati mwemo munairele nyo na fwinyu wavamurima. Muroromelenga ira Yehova “unoza airevo yongo.” — (Sal. 37:3, 5) Limbi-eda pepela unokoza nikami-a ‘vilela chisauso.’ (Arom. 12:12) Yehova unoiziwa vyevyo vinaireela atumikae moi unovwa “kuwa uwa wovepa likami-edo.”— Sal. 145:18, 19. w23.05 5-6 ¶12-15
Lachinayi, Julayi 31
Thawi detene musimikizelenga ira yosomedeleya wa Mbwiye chiivi. — Aife. 5:10.
Nafuna sakula vyoira vakhani dilukuludilukulu, ninafuneya “zindikila chifunilo ya Yehova” koma teto panga vyongo mogwilizana na vyevyo. (Aife. 5:17) Nafwanya makundo a m’Baibulo ogwilizana na mwemo vyongo vililiathu wa iyo ninakalecha ira nifwanya maganizo a Yehova vakhaniyo. Ndiye na-indi-edanga chito makundwayo, ninosakula vyongo mwazelu. Satana unoyo uli mdani-u “otakaloyo,” unafuna ira nitanganisiwenga na vyongo vyamuilambwela nayolinga yoi kanikaena thawi yotumikela Mulungu. Kai vyorucha ira Mkiristu a-elenga vasogolo chuma, maphuzilo kapena chito m’malo motumikela Yehova. (1 Yoh. 5:19) Vyera eno, muthuyo unakalecha ira uwambeela ganiza ngati athu amuilambwela. Pivyoona ira vyongo vyevi vaekiwa kai vyolakweya koma kavinafuneya kala vamalo owambeela. w24.03 24 ¶16-17