Olembiwa na Luka

3 Muchaka ya 15 ya ulamulilo wa Kaisara Tiberiyo, Pontiyo Pilato ali bwanamkubwa wa Yudeya. Herodi* ali olamulela igawo ya Galileya.* Filipo balae wa Herodi ali olamulela igawo ya madela a Itureya na Tirakoniti. Moi Lusaniyo ali olamulela igawo ya Abilene. 2 M’malambo anayo Anasi ali wasembe mulukulu moi Kayafa ali ndimuwa wa asembe. Vathawi ineyo mawu a Mulungu koofiya wa Yohani mwana wa Zekariya muipululu.

3 Eno liye oodowa m’mavande etene avakwikwi na Yorodano moi oolaleela wa athu ira kanafuneya batiziwa monga izindikilo yotonyi-eda lapa ira machimwiwa kakululukiwe. 4 Oopanga vyevi mogwilizana na vyevyo vyalembiwe m’buku la mawu a namaongela Yesaya ira: “Muthu m’mo-iwene unaakuwa muipululu ira: ‘Sakaedani ndila ya Yehova!* Muongole misewu dae. 5 Ipedipedi iliyetene ivu-eleliwe, teto mwango uliwetene na khuma visakaediwe. Misewu dokotakota diwongoliwe teto malo otimbeya kavu-eleliwe pama. 6 Athu etene kanoza kaone ndila ya Mulungu yovulumuchela athu.’”

7 Eno Yohani oowambeela wandela gulu la athu anayo kazide wa liye za batiziwa ira: “A-ima anyowanyo, mbaani uuchenjezileni ira muthawe dambo la uwali wa Mulungu? 8 Eno pangani vyongo vyotonyi-eda ira mulapa. Moi kamuvinami-enga ira, ‘Nikaana babi-u Aburahamu.’ Voi ndinouwandelani ira Mulungu unokoza tanducha mabwe anayo kali vevala ira kakale a-ima a Aburahamu. 9 Ndithu, mbazo i-eliwa wale va michichi da mitengo. Eno tengo uliwetene o-obala vipaso vyapama unokakatiwa no-eliwa vako.”

10 Ndiye gulu la athu loomufuka ira: “Nanga nipange n’ni?” 11 Liye oowasomeda ira: “Muthu unoyo un’na vyowara vin’li amuva-e imo-i muthu unoyo kan’na vyowara moi unoyo un’na yodja apange teto chimozimozi.” 12 Okomi-a misonkho naaluwene teto kooza za batiziwa moi koomufuka ira: “Mphunzisi, nipange n’ni?” 13 Liye ooawandela ira: “Kamuliveli-enga athu* vyongo vinjinji kwaranya mtengo wa sonkho.” 14 Naaluwene teto asilikali koomufuka ira: “Kodi nipange n’ni?” Koma liye oowasomeda ira: “Kamuvuti-enga athu* kapena muimba muthu uliwetene mulandu onama, koma mukutilenga na vyevyo munawachela nyo.”*

15 Sopano athu kadedi-edela Kristu moi etene kaganiza m’murimani mwiwa vya Yohani ira, “Kodi Kristule ngunola?” 16 Yohani oowasomeda athu etene anayo ira: “Miyo ndinaubatizani na ma-inje. Koma muthu m’mo-iwa wa kopolo ndikwaranya miyo unaaza, unoyo miyo kandili ofwanelela masula migo-i da sapato dae. Muthu unola unoza aubatizeni na zimu owela koma teto mulo. 17 Fosholwae yopurumuchelana makata ili m’mandani mwae, moi malwae obubudelavo mbewu unoza aaweli-e pama! Tirigu unoza amu-ele vasanja, koma makata unoza aatumeye na mulo unoyo kunatimi-iwe.”

18 Yohani oopeleka malangizo amo-iwa anjinji moi oopitiliza lengeza uthenga wapama wa athu. 19 Teto liye oomusumulula Herodi olamulela igawo vakhani yokuza Herodiya, iyana wa balae wa Herodiyo, koma teto chifukwa ya vyotakala vyetene vyevyo Herodiyo apangile liye. 20 Ndiye chifukwa ya vyevi Herodi oomu-eela Yohani mundende.

21 Vevo athu etene kabatiziwaathu, Yesu naliyene oobatiziwa. Ndiye vevo apempela liye udimu oo-uleya, 22 moi zimu owela ooneya ngati kangaiwa ootita za muputela. Ndiye voovweya mawu okumela udimu ira: “Weyo uli Mwananga unoyo ndinamuomeliwana miyo, moi unondisangalasa vinjinji.”