Kamukaikelenga Ira Yehova Unosangalala na Nyo

1. Kodi atumiki amo-iwa ororomeleya a Yehova kanavuteya na maganizo aavi?

PIVYOLIMBIKISA iziwa ira Yehova unosangalala na athwae etene monga gulu. Baibulo linaonga ira: “Yehova unosangalala na athwae etene.” (Sal. 149:4) Komave thawi dimo-i athu amo-i kanokoza kaikelanga koma teto vifukanga ira, ‘Kodi Yehova unosangalala na miyo vameka?’ Anjinji mwa atumiki ororomeleya a Yehova awale thawi dimo-i koovuteya na maganizo ngati anala. — 1 Sam. 1:6-10; Yob. 29:2, 4; Sal. 51:11.

2. Kodi mbaathu aavi anayo Yehova unaasangalalana liye?

² Baibulo linotonyi-eda ira athu anayo kai angwilo kanokoza sangalasa Yehova. Kodi ninapange avi vyevi? Ninafuneya roromela Yesu Kiristu koma teto badiziwa. (Yoh. 3:​16) Nera eno ninotonyi-eda vowela ira nilapa machimwi-u ndipo nilonjeza ira ninoza nipangenga vyevyo Mulungu unafuna liye. (Vyo. 2:38; 3:19) Yehova unosangalala aona nipanganga vyevi nayolinga yoi nikalenae vausamwali. Liye unosangalala na iyo ndipo unoniona ngati afwae avamurima napitilizanga panga vyevyo ninawande iyo vokwakwaneli-eda vyevyo nalonjezile iyo vovipeleka. — Sal. 25:14.

3. Kodi sopano ninakambirana n’ni?

³ Chifukwa n’ni thawi dimo-i athu amo-iwa kanavwa ngati Mulungu kanasangalala na aliwa? Kodi Yehova unatonyi-eda avi ira unosangalala na iyo? Nanga kodi Mkiristu unapange avi ira kakaikelenga ira Mulungu unosangalala na liye?

CHIFUKWA N’NI ATHU AMO-I KANAGANIZA IRA YEHOVA KANASANGALALA NA ALIWA?

4-5. Ngakale thawi dimo-i nivionanga ngati achabechabe, kodi ninakale osimikiza vya n’ni?

⁴ Anjinji a iyo nikala nivuteyanga na maganizo oviona ngati achabechabe ambeela ningali a-ima. (Sal. 88:15) M’bali m’mo-iwa zina lae Adrián aongile ira: “Thawi detene ndaviona ngati wachabechabe. Ndoopempela ira banja li-u lize livolowe muilambo isha gakale ira miyo kandaviona ira ndili ofwanelela volowa muilambweyo.” Tony, unoyo kaulukulele m’banja la Mboni, aongile ira: “Makolwanga katinandiwandelevo ira kanondikonda kapena kanondinyadela. Vyevi vyoondipangi-a ira ndivionenga ngati kavali iliyetene ineyo ndinapange miyo ira ndiasangalasenga.”

⁵ Ngati iyo teto thawi dimo-i ninavuteya na maganizo oviona ngati achabechabe, niumbuwelenga ira Yehova ngunoyo anikokile. (Yoh. 6:​44) Liye unoona vyapama mwa iyo vyevyo kaninavione ndipo unoiziwa murimi-u. (1 Sam. 16:7; 2 Lim. 6:​30) Eno kanikaikelenga aniwandelanga ira nili antengo wavadimu. — 1 Yoh. 3:​19, 20.

6. Kodi mtumwi Paulo avwa avi chifukwa ya machimo anayo apangile liye munduli?

⁶ Na-anafunjede choonadi, anjinji a iyo noopanga vyongo vyoi ninoviimbana mulandu mpakana vano. (1 Pe. 4:3) Ngakale Akiristu ororomeleya kanolimbanave na murima ofuna panga vyotakala. Kodi nyo munoviimbave mulandu? Ngati chi eno, iziwani ira atumiki anjinji ororomeleya a Yehova kookala kaviimbanga mulandu. Mwaisazo, mtumwi Paulo oovivwela chisoni aganizela vyevyo alakwi-ile liye. (Arom. 7:24) Pivyoona ira Paulo oolapa machimwae koma teto badiziwa. Komave liye ooviromola ira ngu “mung’onong’ono vinjinji va atumwi etene” koma teto ali “ochimwa vinjinji.” — 1 Akor. 15:9; 1 Tim. 1:15.

7. Kodi niumbuwelenga n’ni vakhani ya vyevyo nalakwi-ile iyo mundulimu?

⁷ Babi-u waudimu unonilonjeza ira unonikululukela nalapa. (Sal. 86:5) Eno navivwelanga chisoni chifukwa ya machimo anayo napangile iyo, kanikaikelenga vyevyo Yehova uongile liye ira unikululukela.​ — Akol. 2:​13.

8-9. Kodi ninamali-e avi maganizo oyi kavali ineyo ninapange iyo ira nisangalase Yehova?

⁸ Etene iyene ninafuneya tumikela Yehova mwemo ninawandele iyo. Komave, athu amo-iwa kanaonecha ira kavali iliyetene ineyo ninapange iyo ira Yehova asangalalenga na iyo. Murongola m’mo-iwa zina lae Amanda aongile ira: “Thawi dinjinji ndaganiza ira panga vyetene vyevyo ndinawande miyo votumikela Yehova unatantauza ira thawi detene nipangenga vinjinji. Eno ndooesaesa ira ndipangenga vinjinji kwaranya vyevyo ndinakwakwani-e miyo. Koma ndalepela ndookumudwa ndipo ndaganiza ira naliyene teto Yehova ukumudwa na miyo.”

⁹ Ndiye kodi ninapange avi ira nimali-e maganizo oona ira kavali iliyetene ineyo nipangile iyo ira nisangalase Yehova? Niumbuwelenga ira Yehova unonivwechecha ndipo ngololela. Liye kanaembekezela ira nipangenga vyongo vyoi kaninavikwakwani-e. Ndipo unoyamikela iliyetene ineyo ninaesaesa iyo panga. Koma teto muganizelenga visazo vya m’Baibulo vya athu anayo katumikele Yehova na murimiwa wetene. Mwaisazo, kaganizelani vya Paulo. Liye oo-inda chito mwatindi wachaka dinjinji, ooenda maulendo olapa koma teto ambeeli-a mipingo dinjinji. Koma vevo vyongo vyachenjileathu vamoywae nolepelanga panga vinjinji va chito yolaleela, kodi Mulungu kaasangalala na liye? Naari. Liye oopitiliza panga vyevyo akwakwani-a liye ndipo Mulungu oomudalisa. (Vyo. 28:​30, 31) Mofwanafwana na vyevi, thawi dimo-i vyevyo ninapanga iyo votumikela Yehova vinokoza chenja. Koma yofuneya vinjinji wa liye chi yolinga ineyo ninapangela iyo vyongovyo. Sopano tiyemoni nikambirane ndila dimo-i dedo Yehova unatonyi-edela liye ira unosangalala na iyo.

KODI YEHOVA UNATONYI-EDA AVI IRA UNOSANGALALA NA IYO?

10. Kodi ‘ninavwe’ avi Yehova aniwandelanga ira unosangalala na iyo? (Yohani 16:27)

¹⁰ Zela m’Baibulo. Yehova unofunechecha wandela athu anayo unaakonda liye ira unosangalala na aliwa. Malemba kanoromola thawi mbiili vevo liye amuwandelile liye Yesu ira ngu Mwanae unoyo unamukonda liye ndipo unosangalala na liye. (Mat. 3:​17; 17:5) Kodi munokoza funa vwa Yehova ausimikizelangani ira unosangalala na nyo? Liye kanaonga na iyo mwachindunji koma unaonga zela m’Mawae. Ninokoza “vwa” mawu a Yehova oonga ira unosangalala na iyo nawelenganga mawu a Yesu m’mabuku a Uthenga Wapama. (Welengani Yohani 16:27.) Yesu oosazi-eda ndendende Ababae. Eno nawelenganga ira Yesu oosangalala na o-arelae ororomeleya anayo katali angwilo, ninoiziwa ira Yehova unosangalala na iyo. — Yoh. 15:9, 15.

11. Kodi nagumana na mavuto ndiye kuti Yehova kanasangalala na iyo? (Yakobo 1:​12)

¹¹ Zela muvyoira vyae. Yehova unofunechecha nitandiza. Mwaisazo, unoniva-a vyevyo ninafuneya iyo. Thawi dimo-i unolola ira nigumane na mavuto ngati mwemo apangele liye na Yobu unoyo ali olungama. (Yobu 1:​8-​11) Nagumana na mavuto kavinatantauza ira Mulungu kanasangalala na iyo. M’malomwiwa, vyevi vinoniva-a mwai otonyi-eda ira ninomukonda vinjinji Mulungu ndipo ninomuroromela. (Welengani Yakobo 1:12.) Ninoona ira liye unonisamalela mwachikondi anitandiza vilela.

12. Kodi ninafunjeda n’ni va vyevyo vyamuireele Dmitrii?

¹² Kaganizelani vyevyo vyamuireele m’bali m’mo-i wau Asia zina lae Dmitrii. Chitwae yoomala ndipo ookala medi dinjinji a-anafwanye chito imo-i. Dmitrii ooganiza vyopanga vinjinji va chito yolaleela, vyevyo vinatonyi-eda ira oodalila Yehova. Voovira medi dinjinji koma kaafwanyile chito. Eno oowambeela bulela vinjinji moi akeda gonati. Liye oowambeela kaikela ngati ali mulombwana kapena baba wapama koma teto ngati Yehova unasangalalave na liye. Ndiye mazulo a dambo limo-i, mwanae wamu-iyana oolemba vapepala mawu ofwanyeya va Yesaya 30:15, oyi, “Munoza mukale akopolo mwakala odeka koma teto mwatonyi-eda ira munondidalila.” Oozana vevo agonatile liyevo noonga ira, “Babani, mwaambeela ona ira kamunavwa paama, muumbuwelenga lemba leli.” Dmitrii oozindikila ira Yehova ootandiza banja lae fwanya yodja, vyowara koma teto malo okala. Liye aongile ira: “Vyevyo ndafuneya miyo panga kukala odeka koma teto pitiliza dalila Mulungwanga.” Ngati nyo munagumana na maesero ngati anala kamukaikelenga ira Yehova unoukondani ndipo unoza autandizeni vilela.

13. Kodi Yehova unamu-indi-eda chito mbaani vofuna nitonyi-eda ira unosangalala na iyo, nanga unapanga avi vyevi?

¹³ Zela mwa Akiristu afwi-u. Yehova uno-indi-eda chito abali na arongoli-u vofuna nitonyi-eda ira unosangalala na iyo. Mwaisazo, unokoza pangi-a ira athu amo-iwa kaonge mawu olimbikisa va thawi yofwanelela. Vi pivyevyo vyamuireele murongola m’mo-iwa wau Asia unoyo an’na nkhawa vinjinji. Chito yali ingamumalele koma teto oowambeela bulela vinjinji. Vanduliviwa mamunae oopanga chimo lilukulu nochosiwa vaudindo monga ndimuwa. Murongolola aongile ira: “Kandavwechecha chifukwa iwa vyevi vyaireile. Ndaganiza ira mwina ndipanga yongo imo-iwene yolakweya ndipo Yehova kanasangalala na miyo.” Murongolola oomuvepa Yehova ira amusimikizele ira unosangalala naliye. Kodi Yehova amusimikizele avi? Liye aongile ira: “Andimuwa koondisimikizela ira Yehova unondikonda.” Vangavirile thawi yoyeva, oomuvepa teto Yehova ira amutandize. Murongolola aongile ira: “Dambo lelo ndoowachela kalata yokumela wa abali na arongola mupingo. Vevo ndawelenga miyo mawiwa olimbikisa, ndoowona ira Yehova usomeda pempelo langa.” Thawi detene Yehova unotonyi-eda ira unosangalala na iyo zela m’mawu anayo athu amo-i kananiwandeleathu. — Sal. 10:17.

14. Kodi ti ndila dimo-i diivi dedo Yehova unatonyi-edela liye ira unosangalala na iyo?

¹⁴ Yehova unotonyi-eda teto ira unosangalala na iyo vo-indi-eda chito Akiristu afwi-u ira kaniva-e malangizo akala vanafuneya panga eno. Mwaisazo, muthawi ya atumwi, liye oomu-indi-eda chito mtumwi Paulo ira alembele Akirisitu afwae makalata 14. M’makalatayo mookala malangizo akopolo koma achikondi. Chifukwa n’ni Yehova amuwandelile Paulo ira alembe malangizo anala? Yehova ngu Baba wachikondi ndipo unolangiza a-imae “anayo unaasangalalana liye.” (Miya. 3:​11, 12) Eno nawachela malangizo a m’Baibulo, nionenga ira unoyo ngu umboni otonyi-eda ira Yehova unosangalala na iyo. (Aheb. 12:6) Kodi pivyongo vimo-i viivi vyevyo vinatonyi-eda ira Yehova unosangalala na iyo?

UMBONI UMO-IWA OTONYI-EDA IRA MULUNGU UNOSANGALALA NA IYO

15. Kodi Yehova unapeleka zimwae wa mbaani, nanga chifukwa n’ni vyevi vili vyolimbikisa?

¹⁵ Yehova unopeleka zimu owela wa athu anayo unaasangalalana liye. (Mat. 12:18) Eno nivifukenga ira, ‘Kodi miyo ndikala nditonyi-edanga makalelo anayo zimu wa Mulungu unanitandizaathu ira nikaena?’ Kodi vano munoona ira nyo muli oleza murima vinjinji mwaerekezela na mwemo mwalilinyo mwa-anafunjede vya Yehova? Vyoona viwa pivyoi mwatonyi-edanga vinjinji makalelo anayo zimu owela unautandizaniathu ira mukaena, pavevo teto munaona nyo umboni ulukulu otonyi-eda ira Mulungu unosangalala na nyo. — Onani bokosi loi “Makalelo Anayo Athu Kanakaanaathu Motandiziwa na Zimu Owela.”

16. Kodi Yehova unamu-indi-eda chito mbaani ira alaleele uthenga wapama, nanga nyo munavwa avi chifukwa ya vyevi? (1 Atesalonika 2:4)

¹⁶ Yehova unopeleka chito yolaleela uthenga wapama wa athu anayo unaasangalalana liye. (Welengani 1 Atesalonika 2:4.) Kaonani mwemo murongola m’mo-wa zina laye Jocelyn apindulele liye chifukwa yolaleela uthenga wapama. Dambo limo-i, liye oovenya angan’na nkhawa. Jocelyn aongile ira: “Kandan’na kopolo ngakale vang’ono moi ndakeda viona ngati wachabechabe. Koma ndali ndipanganga upainiya ndipo dambo leli lali loi ndivolowe muutumiki. Eno ndoopempela ndipo ndoovolowa muutumiki.” Dambo lelo Jocelyn oogumana na muzimai unoyo ali ooma murima zina lae Mary, unoyo asomedile funjeda Baibulo. Vangavirile medi doyeva, Mary oomufotokozela Jocelyn ira vevo agogoda liye vaisewo, liye ali apempelanga wa Mulungu ira amutandize. Voganizela vyevyo vyaireilevi, Jocelyn aongile ira: “Ndoovivwa ngati Yehova unandiwandela ira, ‘Ndinosangalala na weyo.’” Pivyoona ira kai athu etene anayo kanavuruwane vevo ninalaleela iyo. Koma kanikaikelenga ira Yehova unosangalala naesaesanga awandela athu amo-iwa uthenga wapama.

17. Kodi ninafunjeda n’ni va vyevyo Vicky aongile liye vyokuza dipo? (Salimo 5:12)

¹⁷ Yehova uno-indi-eda chito dipo ira litandize athu anayo unaasangalalana liye. (1 Tim. 2:​5, 6) Koma bwanji ngati murimi-u unaruni-ave vyoi Yehova unosangalala na iyo ngakale ira ninororomela dipo koma teto noobadiziwa? Umbuwelani ira murimi-u kaninauroromele thawi detene koma ninokoza roromela Yehova. Liye unoona ira athu anayo kanaroromela dipo mbolungama ndipo unowalonjeza ira unoza aadalise. (Welengani Salimo 5:​12; Aroma 3:​26) Ganizela vinjinji vya dipo, oomutandiza Vicky. Dambo limo-i angaganizele vinjinji vya dipo, aongile ira: “Yehova ukala andilezelanga murima wathawi indendai, koma vyali ngati ndinamuwandela ira, ‘Nyo kamunamufune muthu ngati miyo. Sembe ya Mwaninyu kinapimbe machimwanga.’” Angaganizele vinjinji vya mphaso ya dipo, oowambeela vivwa ira Yehova unomukonda. Iyo teto naganizelanga vinjinji vya dipo ninoza niambeele vivwa ira Yehova unonikonda.

18. Ngati ninapitiliza mukonda Babi-u waudimu, kaninafuneya kaikela vya n’ni?

¹⁸ Ngakale ningaesaesile arela makundo anayo nikambiranile iyo, thawi dimo-i ninokoza kumudwa koma teto kaikelanga ngati Yehova unasangalala na iyo. Vyera eno muumbuwelenga ira liye unosangalala na athu anayo “kanapitiliza mukonda.” (Yak. 1:​12) Eno pitilizani kala vausamwali na Yehova koma teto ona ndila ineyo unatonyi-edela liye ira unosangalala na nyo. Thawi detene kamudiwalenga ira Yehova “kali undendai na iyo.” — Vyo. 17:27.