Bwe tulendi tatamana mu bâ na luzolo lwa ngolo beto na beto

1-2. a) Mu bungu dia nti Paulo katêla ti tifu ‘tiyôkele, ni luzolo’? b) Ntia biyuvu tuzonzela?

NTUMWA PAULO bu kazonzela timinu, tivuvu na luzolo, wamanisina ebu: ‘Mu bia bitatu, tiyôkele, ni luzolo.’ (1 Kor. 13:13) Mu bungu dia nti Paulo katêla bo? Mu bilumbu bita kwiza, ka tuvutu’â bâ na nsatu ko ya bâ na timinu mu makani ma Nzambi matariri nza ya môna, peleko tivuvu ti makani mo mbo malungana, mu bungu ti mbo matilunganana. Kâ, mbo tutatamana mu bâ na nsatu ya zolo Yehova na bantu. Diangana, luzolo lweto mu bawu mbo lutatamana mu kula mankululu.

² Mu bungu ti mbo wufwanakana ti tatatamana mu bâ na luzolo, mbo tuzonzela biyuvu bitatu. Tiyuvu tia ntete, mu bungu dia nti tufweti zolosono? Tia nzole, bwe tulendi songasana luzolo? Tia ntatu, bwe tulendi tatamana mu bâ na luzolo lwa ngolo beto na beto?

MU BUNGU DIA NTI TUFWETI ZOLOSONO?

3. Mu bungu dia nti tufweti zolosono?

³ Mu bungu dia nti we mfunu kwe beto mu zolosono? Mu bungu ti luzolo mbo lusongelaka ti Bakristo ba matieleka twena. Yezu watâ kwe milongoki miandi ti: ‘Ni bo, bantu babansoni bazabila ti beno milongoki miani miena​—tala ti lubêle na luzolo beno na beno.’ (Za 13:35) Kâ mpe, bu tuzolosonoko beto na beto, mbo tutatamanaka mu bâ mu bumosi. Paulo watâ luzolo ‘kolo dia lunga dia bumosi.’ (Kol. 3:14) Kâ, musamu wakaka wa mfunu we kô wusaka ti tazolosono beto na beto. Ntumwa Za watsoneka kwe mpangi zandi ti: ‘Wô zololo Nzambi, fweti zolo mpe mpangi’andi.’ (1 Za 4:21) Bu tusongasanaka luzolo, mbo tusongelaka luzolo lweto mu Nzambi.

4-5. Hana tifwani tita songela ka bwe luzolo lweto mu Nzambi lwe tintwari na luzolo lweto mu bantu bakaka.

⁴ Mu ntia mpila luzolo lweto mu Yehova lwe nguria tintwari na luzolo lu tusongelaka kwe mpangi zeto? Mu tifwani, tabongeno tintwari tie ha kati dia mutima’eto na binama biakaka bia mu nitu. Doktere bu kasimbaka koko kweto mu zaba ntinu za menga meto, lendi zaba ka bwe mutima’eto wuta hanina. Ntia malongi tulendi baka mu tifwani tio mu musamu wutariri luzolo?

⁵ Ntiana kwa doktere bu ke na lenda dia zaba tikolela tia mutima’eto bu katala ntinu za menga meto, tulendi zaba tala ti luzolo lwa ngolo lwe neto mu Nzambi, bu tutaluzula luzolo lwe neto mu bantu bakaka. Tala ti tumweni ti luzolo lweto mu mpangi zeto ludimini, wulendi songela ti luzolo lweto mpe mu Nzambi lwayizi dimina. Kâ, bu tuvulu songelaka luzolo mu mpangi zeto, mbo wusongelaka ti luzolo lweto mu Nzambi ngolo lwena.

6. Mu bungu dia nti tufweti bêla na lwaka tala ti luzolo lweto mu mpangi zeto ludimini? (1 Za 4:​7-9, 11)

⁶ Tufweti bâ na lwaka tala ti luzolo lweto mu mpangi zeto ludimini. Mu bungu dia nti? Mu bungu ti mbo wusongela ti timpeve tieto mu mpasi tiena. Ntumwa Za wa katomo songela bu katubambula ti: ‘Muntu, kamana tâ ti: “Nzambi nzololo”, kâ belele mpwana’andi, yandi ngungu yena, mu bungu ti wô lembo zolo mpwana’andi wu kamonaka, ka lendi’â kazolo Nzambi ko wu kalembo monaka.’ (1 Za 4:20) Ntia malongi tuta baka? Yehova mbo kabâ mu nsayi tala ti luzolo tusongasanaka beto na beto.—Tanga 1 Za 4:​7-9, 11.

BWE TULENDI SONGASANA LUZOLO?

7-8. Bwe tulendi songasana luzolo beto na beto?

⁷ Mu Zu dia Nzambi mbala zazingi tubakaka ntumunu eyi, ‘Yendeno zolosono beno na beno.’ (Za 15:​12, 17; Rom. 13:8; 1 Tes. 4:9; 1 Pi. 1:22; 1 Za 4:11) Kâ, luzolo tifu tiena tibâka mu mutima’eto, mpe ka kwena muntu we na lenda dia tanga mutima ko. Buna, bwe tulendi songela luzolo lweto kwe mpangi zeto? Ni mu nzonzolo’eto na mu nsalulu zeto.

⁸ Mpila zazingi ze kô zi tulendi songela kwe mpangi zeto ti bawu tuzololo. Tabongeno bala ba bifwani: ‘Muna muntu ke tê butieleka kwe mpwana’andi.’ (Zka. 8:16) ‘Bêno mu tidzunu beno na beno.’ (Mak. 9:50) “Bâkeno bantu ba ntete mu kwe tizanguri beno na beno.” (Rom. 12:​10, NWT) “Bwanasanakeno beno na beno.” (Rom. 15:​7, NWT) ‘Yendeno [. . .] hanasane mulemvo beno na beno.’ (Kol. 3:13) ‘Yendeno natasane madema beno na beno.’ (Nga. 6:2) ‘Yendeno titindisi beno na beno.’ (1 Tes. 4:18) “Tatamaneno [. . .] mu yikasana ngolo beno na beno.” (1 Tes. 5:​11, NWT) ‘Yendeno tisambiriri beno na beno.’—Zaki 5:16.

9. Mu bungu dia nti tifu tia tindisaka bantu bakaka yena mpila ya mfunu ya songela luzolo? (Tala mpe tifwani.)

⁹ Tazonzeleno mpila zi tulendi songela luzolo mu mpila zi tuzonzele mu paragrafe yiyôkele. Mbo tutaluzula ndwengosolo ya hana Paulo yitâka: ‘Yendeno titindisi beno na beno.’ Mu bungu dia nti tifu tia tindisaka bantu bakaka yena mpila ya songela luzolo? Mu mabanza ma buku dimosi dizonzelaka Bibila, ntelo ya sarila Paulo ya ‘tindisa’ mbo yizolo tâka “bâ penepene na muntu mu mu tindisa bu kena mu mpasi za ngolo.” Buna, bu tuhanaka lutindusu, mbo tubakisaka mpangi zeto ze mu mpasi mu telama na mu tatamana mu diatila mu nzila ya luzingu. Ntangu zazansoni zi tubandakanaka mpangi zeto mu bidilu biawu, mbo tubasongelaka luzolo.—2 Kor. 7:​6, 7, 13.

10. Ntia tintwari tie ha kati dia tiari tia mutima na lutindusu?

¹⁰ Tifu tia bâ na tiari tia mutima na tia hana lutindusu nguria tintwari biena. Ngano mu ntia mpila? Muntu we na tiari tia mutima mbo katindisaka bantu bakaka, mpe mbo kayêlaka mu ba hana lubakusu mu mpasi zawu. Buna bu tubâka na tiari tia mutima, mbo titutumaka mu tindisa bantu bakaka. Tataleno ka bwe Paulo kasongela tintwari tie ha kati dia tiari tia mutima tia Yehova na lutindusu lu kahanaka. Paulo watâ Yehova “Tata dia tiari tiatingi na Nzambi ya mbombolo ni mbombolo.” (2 Kor. 1:​3, NWT) Mu verse yi, Paulo wasarila ntelo ya “tiari tiatingi” mu zonzela tiari tia mutima mu bantu bakaka. Buna, Nzambi mbo bamutâka “Tata peleko Titeko tia tiari tiatingi mu bungu ti tiari tia mutima tiatingi tie nandi mu bantu.” Mpe tiari tio tia mutima mbo timutumaka mu tu tindisa mu mpasi zeto zazansoni. (2 Kor. 1:4) Ntiana kwa mamba ma tsema madukaka mu mukelo malembekaka bô bê na nsatu mamba, Yehova mbo kalembekaka, mpe mbo katindisaka bô bê mu mpasi. Bwe tulendi landila tifwani tia Yehova bu tusongelaka tiari tia mutima, mpe bu tutindisaka bantu bakaka? Mpila yimosi yi tulendi bwa sila, ni mu kurisa bifu bie tintwari na tifu tia hanaka lutindusu. Ngano bifu biango ni bie?

11. Tintwari na Bisi-Kolose 3:12 na 1 Piere 3:​8, ntia bifu biakaka tufweti kurisa mu simbirila luzolo lweto lututumaka mu tindisa bantu bakaka?

¹¹ Nti bitubakisa mu tatamana mu simbirila luzolo lwe neto nsatu ngatu tatatamana mu titindisa beto na beto bilumbu biabiansoni? Tufweti kurisa bifu ntiana nsayi, luzolo mu bampangi na mbote. (Tanga Bisi-Kolose 3:12; 1 Piere 3:8.) Bwe bifu bio bitubakisilaka? Bu tubâka na tiari mu mpangi zeto, mpe bu tubabelokelaka lwaka, mbo tubâka na nsatu yayingi mu ba tindisa bu babâka mu mpasi. Ntiana bwa tâ wo Yezu, ‘mio misampaka mu mutima, munwa ni mio kadukisaka. Muntu wa mbote misamu mia mbote kwa kadukisaka mi kalundaka ku mutima’andi.’ (Mat. 12:​34, 35) Tifu tia tindisaka mpangi zeto bu babâka na nsatu lubakusu, mpila yena ya mfunu ya ba songela luzolo lweto.

BWE TULENDI TATAMANA MU BÂ NA LUZOLO LWA NGOLO BETO NA BETO?

12. a) Mu bungu dia nti tufweti tatamana mu sa keba? b) Ntia tiyuvu tutaluzula bwawu bu?

¹² Beto bansoni tuzololo tatatamana mu zolosono beto na beto. (1 Za 4:7) Kâ, mfunu wena kwe beto mu bambuka ti Yezu walwengesa ti ‘luzolo mbo luwola kwe pôka dia bantu.’ (Mat. 24:12) Yezu keri’â zolo tâka ko ti milongoki miandi mbo miaketi bika mu songasana luzolo. Kâ, tufweti saka keba ngatu bantu ba nza bakondoko luzolo ka batusobesandi. Na mabanza mo mu mutu, tataluzuleno tiyuvu eti tia mfunu: Ngano nti bikubakisa mu zaba tala ti luzolo lwaku mu mpangi zeto ngolo lwena?

13. Nti bilendi kotesa luzolo lweto mu ntontolo?

¹³ Mpila yimosi ya deza ngolo za luzolo lweto ni mu tala ka bwe tusaka bu tulaka misamu miakaka mia luzingu. (2 Kor. 8:8) Ntumwa Piere wazonzela musamu wumosi. Watâ ti: ‘Mu miamiansoni, vulueno tatamana mu luzolo [lwa ngolo] beno na beno, mu bungu ti luzolo pôka dia masumu lukusunaka.’ (1 Pi. 4:8) Buna makuba na masumu ma mpangi zeto malendi kotesa luzolo lweto mu ntontolo.

14. Tintwari na 1 Piere 4:​8, ntia mpila luzolo lufweti bâ neto? Hana tifwani.

¹⁴ Tatomoeno taluzula misamu mia tâ Piere. Lweka lwa ntete lwa verse 8 mbo luzonzelaka mpila luzolo lu tufweti bâ na lo—“luzolo lwa ngolo.” Ntelo ya sarila Piere mu tâ ‘ngolo’ mbo yizolo tâka “tiralala.” Lweka lwa nzole lwa verse mbo luzonzelaka ka nti luzolo lwa ngolo lututumaka mu sa. Mbo lukusunaka masumu ma mpangi zeto. Tulendi bonga tifwani eti: Tusimbiri luzolo lweto mu moko mole, mpe tubendele lo malembe-malembe ntiana kwa mulele wulendi tirarala tii bu luzibika masumu mamingi, kâ ka mole’â ko kwa peleko matatu. ‘Kusuna’ peleko zibika, wuzololo tâ lemvokela. Ntiana kwa mulele wulendi zibika mvindu, luzolo lulendi zibika makuba na masumu ma bampwana’eto.

15. Tala ti luzolo mu mpangi zeto nguria ngolo lwena, ngano nti tulendi sa? (Bisi-Kolose 3:13)

¹⁵ Luzolo lweto mu bampwana’eto lufweti bâ ngolo mu lenda mu lemvokela masumu ma mpangi zeto—ni bu sa ti ntangu zakaka ngolo zazingi zidinganaka mu sila bo. (Tanga Bisi-Kolose 3:13.) Bu tulendaka mu lemvokela bampwana’eto, mbo tusongelaka ti luzolo lweto ngolo lwena, mpe mbo tutâka Yehova nsayi. Nti biakaka bilendi tu bakisa mu lembo kipa mfwemoso na makuba ma bampwana’eto?

16-17. Nti bitomo tu bakisa mu lembo kipa masumu ma fioti ma mpangi zeto? Hana tifwani. (Tala mpe tifwani)

¹⁶ Tûla mabanza mu bifu bia mbote bia mpangi zaku, ka mu bifu biawu bia mbi’â ko. Tafwanakasa’eti misamu emi. Banza’eti tintwari wena na bampangi. Luyôkese ntangu ya mbote, mpe ntete lwahambana, lubakiri foto ya beno bansoni. Buna, lubakiri foto zole zakaka, ngatu ya ntete ka yitomene’â ko. Lweka na foto zitatu. Kâ mu foto yimosi, lumweni ti mpangi yisietele tidiri. Ngano nti lusa mu foto yo? Mbo lufwasa yo mu bungu ti foto zole zakaka ze neno, mpe mu foto zo beno bansoni, mu kati na mpangi yo yisieteleke tidiri, seha luta seha.

¹⁷ Tafwanakasa foto zi tulundaka na misamu mi tusilaka nsimu. Mbo tuvulu bambukilaka ntangu za mbote zi tuyôkesaka na mpangi zeto. Kâ banza’eti, mpangi yitêle peleko yiyirikiri musamu wa mbi. Ngano nti tufweti sa mu musamu wo? Tufweti sarila ngolo mu fwasa wo mu nsimu’eto ntiana kwa bu tusiri mu bungu dia foto ya mbi? (Bin. 19:11; Efz. 4:32) Tulendi bonga nzengolo ya fwasa disumu dia fioti diyirikiri mpangi’eto mu bungu ti mbo tubambukilaka ntangu zazîngi za mbote zi tayôkesa nandi. Mio ni misamu mi tuzololo tatatamana mu sila nsimu.

MU BUNGU DIA NTI LUZOLO LWE NGURIA MFUNU LUMBU TI

18. Ntia misamu mia nguri mitariri luzolo tulongokele mu timoko ti?

¹⁸ Mu bungu dia nti tuzololo ti luzolo mu beto na beto lwatatamana mu bâ ngolo? Ntiana bu tulongokele wo, bu tusongelaka luzolo kwe mpangi zeto, mbo tusongelaka luzolo lweto mu Yehova. Bwe tulendi songela luzolo lweto mu mpangi zeto? Mpila yimosi yi tulendi bwa sila ni mu ba hanaka lutindusu. Mbo tubâ na lenda dia tatamana mu hanasana lutindusu tala ti tiari tia mutima tie neto. Bwe tulendi tatamana mu bâ na luzolo lwa ngolo mu mpangi zeto? Ni mu sarila ngolo za lemvokelaka fote zawu.

19. Mu bungu dia nti we nguria mfunu lumbu ti mu songasana luzolo beto na beto?

¹⁹ Mu bungu dia nti we nguria mfunu lumbu ti mu songasana luzolo beto na beto? Tataleno musamu wa tâ Piere: ‘Nsuka ya miamiansoni yituriri. [. . .] Vulueno tatamana mu luzolo beno na beno, mu bungu ti luzolo pôka dia masumu lukusunaka.’ (1 Pi. 4:7, 8) Mu bungu ti nsuka ya nza yi ya mbi yeka nguria penepene, ngano nti tulendi kêla? Yezu watâ kwe milongoki miandi ti: ‘Makanda mamansoni mbo malubela mu bungu dia nkumbu’ani.’ (Mat. 24:9) Mu telamana yina kwa mpila yo, tufweti tatamana mu bâ mu bumosi. Tamana sila bo, ngolo zi sarila Satana mu tu hambasa mbo zifunka mu bungu ti luzolo lutuvukasaka, ‘kolo diena dia lunga dia bumosi.’—Kol. 3:14; Flp. 2:​1, 2.