Amulibambile Bushiku Buyandika Abuumbi Mumwaaka

1. Ino nceebonshi bushiku bwa Ciibalusho mbushiku buyandika abuumbi mumwaaka? (Luka 22:​19, 20)

BANTU bakwe Yehova balabona ayi bushiku bwa Ciibalusho ca lufu lwakwe Klistu, mbushiku buyandika abuumbi mumwaaka. Ici ncocakucitika comwibo Yesu ncaakalwiita bashikwiiya bakwe ayi banookwiibaluka. (Amubelenge Luka 22:​19, 20.) Kuli sheebo shiinji shipa kwaamba ayi tunoolangila kucanika ku Ciibalusho. Amuleke tubandikeko pashimwi shiniini.

2. Ino nshiinshi shimwi shipa kwaamba ayi tulangile kucanika ku Ciibalusho?

² Ciibalusho cilatucafwa kuyeeya pakuyandika kwa cilubula. Cilatwiibalusha nshila mbweenga twatondesha kulumba pa mulambu wakwe Yesu. (2 Koli. 5:​14, 15) Alimwi cilatupa coolwe ‘cakuyuminishanya’ abamakwesu abenankashi. (Loma. 1:12) Mwaaka uli oonse baanji bakaboolela mwisule balacanikaako. Bamwi balasuna akutalika kusebensela Yehova ceebo cakubatambula kabotu. Alimwi bantu baanji basuni kwiiya balasuna kutalika kweenda panshila itola kubuumi ceebo cashintu nshebabona akunyumfwa. Ishi shoonse shilapa kwaamba ayi Ciibalusho cibe cakucitika ciyandika abuumbi kulindiswe!

3. Ino Ciibalusho cilatucafwa buyani kuba bacatene abamakwesu abenankashi nsengwe yoonse? (Amubone acikope.)

³ Alimwi tulalangila kucanika ku Ciibalusho mukwiinga cilatucafwa kuba bacatene abamakwesu abenankashi nsengwe yoonse. Bakamboni Bakwe Yehova balabungana nsengwe yoonse lisuba ndyelitoya mukupila. Soonse tulakutika kulikani lyaamba pa kuyandika kwa cilubula. Tuleemba nyiimbo shobilo shakulumbaisha Lesa, kwiinshamo shinkwa awaini akwaamba cakuswa panshi lyamoyo ayi “ameni” kumipailo ili 4. Mu mawoola alibo 24 mabungano oonse alacita cintu comwi. Amuyeeyebo Yehova a Yesu mbobasangalala na batubona nsengwe yoonse katubatondesha bulemu munshila yamushobo uyu.

4. Ino nshiinshi nsheshi twiiye mumutwi uyu?

⁴ Mumutwi uyu tutocana shikumbulo kumiipusho iyi itokonkelaawo: Ino nshiinshi nsheenga twaciita kwaamba ayi tulibambile kucanikaako ku Ciibalusho? Ino inga twacita buyani kwaamba ayi tucafwe bamwi kucanikaako? Alimwi ino inga twacita buyani kwaamba ayi tucafwe baabo bakaboolela mwisule? Shikumbulo kumiipusho iyi shitootucafwa kuba balibambite pacakucitika ici ciyandika.

NSHEENGA TWACIITA KWAAMBA AYI TULIBAMBILE KUCANIKAAKO KU CIIBALUSHO

5. (a) Ino nceebonshi tulyeelete kukutumana kuyeeya pakuyandika kwa cilubula? (Kulumbaisha 49:​7, 8) (b) Ino nshiinshi nshomweeya mu vidyo yaamba ayi Ino Yesu Wakafwita Nshi?

⁵ Cintu comwi ciyandika abuumbi nceenga twaciita kwaamba ayi tulibambile kucanikaako ku Ciibalusho, nkukutumana kuyeeya pa mulambu wakwe Yesu Klistu. Taakuwo nceenga twaciita kwaamba ayi tulilubule kububi. (Amubelenge Kulumbaisha 49:​7, 8; amubone avidyo icite mutwi waamba ayi Ino Yesu Wakafwita Nshi?)a Aboobo Yehova wakabika bubaambo kwaamba ayi Yesu aabe buumi bwakwe kwaamba ayi atupulushe. Yehova a Yesu bakalyaaba abuumbi kwaamba ayi batupe cilubula. (Loma. 6:23) Na katukutumana kuyeeya pakulyaaba Yehova a Yesu nkobakacita, tulaakunoolumba abuumbi pa cilubula. Tutobandikako pashintu shiniini shatakalinga shuubu kucita Yehova a Yesu nshebakacita kwaamba ayi batulubule. Sombi cakutaanguna, ino nshiinshi Yehova a Yesu nshobakacita kwaamba ayi batupe cilubula?

6. Ino cilubula cilaamba nshi alimwi ino nceebonshi Yesu wakalinga kweelete kwaaba buumi bwakwe mbuli cilubula?

⁶ Cilubula nga maali alipilwa kuboosha cintu cimwi cakasoweka. Adamu ndyakalengwabo wakalinga muntu umaninite. Ndyakabisha wakasowa coolwe cakuba abuumi butamani pomwi abana bakwe. Kwaamba ayi Yesu oole ceeco Adamu ncaakasowa, wakaaba buumi bwakwe bumaninite mbuli cilubula. Yesu ndyaakalinga pacishi, “taakwe kucitawo cibiibi nabi kubeca.” (1 Pit. 2:22) Yesu ndyaakafwa wakalinga muntu umaninite bweenka Adamu mbwakalinga kaatana kubisha. Aboobo Yesu ndyakaaba buumi bwakwe wakalipilila buumi Adamu mbwakasowa.—1 Koli. 15:45; 1 Timo. 2:6.

7. Ino Yesu wakeeleshekwa buyani ndyaakalinga pacishi?

⁷ Yesu ndyaakalinga pacishi wakanyumfwila Yehova mushintu shoonse nabi ndyecakalinga ciyumu kucita boobo. Nabi kwaamba ayi Yesu wakalinga kumaninite, wakatolelela kunyumfwila bashali bakwe batakalinga kumaninitewo. (Luka 2:51) Ndyaakalinga cikula bwaangu, wakalinga kweelete kukaka kuyungwa kubamwi mpashi abo bakalinga kusuni kwaamba ayi atanonyumfwila bashali bakwe na kutashomeka kuli Yehova. Alimwi Yesu ndyakakomena wakalinga kweelete kukaka meelesho akwe Satana uyo wakalinga kusuni kwaamba ayi abishe, akucileka kushomeka kuli Lesa. (Mate. 4:​1-11) Satana wakalinga kushinishite kupa kwaamba ayi Yesu abishe kwaamba ayi atacikoonshi kwaaba buumi bwakwe mbuli cilubula.

8. Ino ngamapensho nshi aamwi Yesu ngakalinga kweelete kuliyumya?

⁸ Kuli mapensho aamwi Yesu ngaakaliyumya ndyaakalinga kusebensa ncito yakushimikila. Balwani bakwe bakamupensha alimwi bakalinga kusuni kumucaya. (Luka 4:​28, 29; 13:31) Wakalinga kweelete kuliyumya ceebo ca shintu shimwi bashikwiiya bakwe nshobatakalinga kucita kabotu. (Maako 9:​33, 34) Ndyebakalinga kumoombolosha bakamupensha akwaamba shibiibi palinguwe. Lyalo wakafwa lufu lucisa abuumbi alimwi lulensha nsoni. (Ebu. 12:​1-3) Ndyaakalinga pafwiifwi akufwa pacisamu cakupenshesha, wakalinga kweelete kuliyumya kwakubula kushitilishikwa a Yehova.b—Mate. 27:46.

9. Ino tulalinyumfwa buyani pa mulambu wacilubula wakwe Yesu? (1 Pita 1:8)

⁹ Ncakutatoonsha kwaamba ayi, Yesu wakapenga abuumbi kwaamba ayi atupe cilubula. Na twayeeya pashintu shoonse Yesu nshaakacita kwaamba ayi aabe buumi bwakwe mbuli cilubula, tulamusuna abuumbi.—Amubelenge 1 Pita 1:8.

10. Ino nshiinshi Yehova nshaakalyaaba kucita kwaamba ayi atupe cilubula?

¹⁰ Ino nshiinshi Yehova nshaakalyaaba kucita kwaamba ayi Yesu aabe buumi bwakwe mbuli cilubula? Yehova a Yesu balicite bushicibusa buyumu abuumbi bweenka mbociba kumushali musankwa amwanaakwe musankwa. (Tus. 8:30) Aboobo amuyeeyebo Yehova mbwaakalinyumfwa ndyakabona Mwanaakwe kaaliyumya mumapensho aanji pacishi. Ncakutatoonsha kwaamba ayi Yehova cakamucisa kumoyo abuumbi ndyakabona Mwanaakwe kaacitilwa shintu shitaluleme, kukakwa akweleshekwa.

11. Amwaambe cakubonenaako citondesha Yehova mbwaakalinyumfwa Yesu ndyaakacaikwa.

¹¹ Mushali wakafwitwawo kale mwaana alicishi kabotu mushali mbwalinyumfwa buumba abuumbi na camushobo uyu cacitika. Tulishomete cakutatoonsha kwaamba ayi bafu balaakubushikwa. Nacibi boobo, ici tacitupi kwaamba ayi tutalinyumfwi cibiibi na twafwitwa shikamukowa nabi shicibusa. Cakubonenako ici cilatucafwa kunyumfwishisha Yehova mbwakalinyumfwa ndyakabona Mwanaakwe ngwaasuni abuumbi mbwaakapenga lyalo akufwa pabushiku bwa Nisani 14, 33 C.E.c—Mate. 3:17.

12. Ino nshiinshi nsheenga twaciita na kwacala nsondo shiniini kwaamba ayi bushiku bwa Ciibalusho bushike?

¹² Kuswa sunu kuya mukushika pa bushiku bwa Ciibalusho, amweeleshe kwiiya shiinji pa mulambu wacilubula ndyemutoocita ciiyo capalwaanu na Kulambila Kwamukwashi. Amusebenseshe libuku lya mu Chitonga lyaamba ayi Bbuku Ligwasya Kuvwuntauzya lya Bakamboni ba Jehova na kusebensesha mabuku amwi aamba shamu Baibo kwaamba ayi mushibe shiinji pamakani acilubula.d Alimwi amushinishe kukonkela mulongo wakubelenga Baibo kwa Ciibalusho ucanika mu kabuku ka Buumi bwa Bwineklistu Anciito Yesu—Kabuku Kamabungano. Alimwi pabushiku bwa Ciibalusho mutakalubiiko kweebela pulogilamu ilibetele ya Kulambila Kwamacuunsa. Na twalibambila kucanikaako ku Ciibalusho, tulaakuba balibambite kucafwako bamwi kwaamba ayi abalo bakacanikeeko.—Esila 7:10.

AMUCAFWE BAMWI KWAAMBA AYI BAKACANIKEEKO

13. Ino ninshila nshi yakutaanguna mbweenga twacafwa bamwi kucanikaako ku Ciibalusho?

¹³ Ino inga twacita buyani kwaamba ayi tucafwe bamwi kucanikaako ku Ciibalusho? Nshila yomwi mbweenga twacafwa bamwi nkwiinda mukubeeta. Kwiilika pakwiita bantu mbotucana ndyetutoshimikila, inga twalemba mulongo wabaabo mbotusuni kwiita. Pamulongo uyo inga paba beshikamukowa, mbotusebensaabo, mbotwiiyabo, na bantu bamwi mbotushi. Nabi kwaamba ayi inga katutacitewo tupepa tuunji twakwiita bantu ku Ciibalusho, inga twabatumina linki kusebensesha fooni na tabuleti. Inga twakankamana kufula kwa bantu beenga bacanikaako!—Shiku. 11:6.

14. Ino ncakubonenaako nshi citondesha ayi kwiita muntu kwaamba ayi akacanikeeko ku Ciibalusho inga kwapa kwaamba ayi asunishishe kucanikaako?

¹⁴ Na mweeta muntu kwaamba ayi akacanikeeko ku Ciibalusho inga wasuna kucanikaako. Nankashi umwi weebetwe kumusankwa uteshi Kamboni, wakakankamana beebaye ndyebakamulwiita ayi batoya anguwe ku Ciibalusho. Ino nceebonshi nankashi wakakankamana? Mukwiinga lyoonse tebakalinga kucanikaako nabi wabeeta. Ino nciinshi cakapa kwaamba ayi paciindi ici beebaye basune kucanikaako? Beebaye bakaamba ayi: “Munene umwi mulibungano ngobakalinga kushibenaakwe wakabapa kapepa ka kubeeta ku Ciibalusho.” Bakacanikaako ku Ciibalusho mwaaka uyu, alimwi bakatolelela kucanikaako myaaka yakakonkelawo.

15. Ino nshiinshi nshotweelete kunokwiibaluka ndyetutokwiita bantu kucanika ku Ciibalusho?

¹⁵ Munokwiibaluka ayi abo mbotwiita kusa mukucanikaako ku Ciibalusho inga baba amiipusho, bunene bunene na tabana kucanikaako kale kumabungano esu. Inga cabota kuyeeya pamiipusho njeenga batwiipusha akuba balibambite kwiikumbula. (Kolo. 4:6) Kucakubonenaako, bamwi inga baliipusha ayi: ‘Ino nshiinshi shicitika ku Ciibalusho?’ ‘Ino cilatola ciindi cilaamfu buyani?’ ‘Ino ndyeelete kufwala buyani?’ ‘Sa ndyeelete kulipila kwaamba ayi ncanikeeko?’ ‘Sa balenshamo mbale kusenga maali?’ Aboobo ndyetutokwiita muntu kucanika ku Ciibalusho inga twamwiipusha ayi, “Sa kuli miipusho njomucite?” lyalo akukumbula miipusho njeenga kaacite. Alimwi inga twamutondesha vidyo yaamba ayi Amwiibaluke Lufu Lwakwe Yesu ayaamba ayi Nciinshi Cicitika Paŋanda ya Bwaami? kwaamba ayi tumucaafwe kunyumfwishisha kubungana kwesu mbokucitwa. Alimwi muciiyo 28 mulibuku lya Amusangalale Abuumi kwamuyayaya! muli makani ngeenga twamulwiitaako.

16. Ino njimiipusho nshi imwi abo bacanika ku Ciibalusho kwaciindi cakutaanguna njeenga kabacite?

¹⁶ Pesule lyakucanika ku Ciibalusho, bantu basuni kwiiya inga kabacite miipusho aimwi. Mpashi inga baliipusha ayi, ‘Ino nceebonshi taakuwo balyako shinkwa nabi kunwako waini?’ Na ayi, ‘Ino nceebonshi mbaniinibo balyako akunwa?’ Alimwi mpashi inga basuna kushiba mankanda ngotucita Ciibalusho. Kwiilikaawo, mpashi inga basuna kushiba na mabungano oonse a Bakamboni Bakwe Yehova alacitwa munshila yomwi. Nabi kwaamba makani aya oonse alabandikwaawo mulikani lya Ciibalusho, abo bacanikaako kwaciindi cakutaanguna inga bayandika kubasansulwita kabotu. Mutwi wamakani ucanika pa jw.org waamba ayi, “Ino Nceebonshi Bakamboni Bakwe Yehova Balacita Mulalilo wa Mwaami Munshila Ipusene Amaceeci Amwi?” inga watucafwa kukumbula miipusho imwi njeenga kabacite. Tulisuni kucita nsheenga twacikonsha bushiku bwa Ciibalusho kabutana kushika, pa Ciibalusho alimwi apesule lya Ciibalusho kwaamba ayi tucafwe baabo bacite myoyo ilibambite kutambula ‘buumi butamaani’ kufubilaamo mucakucitika ici.—Milimo 13:48.

AMUCAFWE BAABO BAKABOOLELA MWISULE

17. Ino nshiinshi nsheenga bamanene bacita kwaamba ayi bacafwe baabo bakaboolela mwisule? (Esekelo 34:​11, 12, 16)

¹⁷ Ino nshiinshi nsheenga bamanene bacita kwaamba ayi bacafwe baabo bakaboolela mwisule na ciindi ca Ciibalusho cashika? Amucite shintu shitondesha ayi mulababikilaako maano. (Amubelenge Esekelo 34:​11, 12, 16.) Ciibalusho kacitana kushika, amushinishe kwiita bantu baanji bakaboolela mwisule. Amubacaafwe kushiba ayi mulibasuni alimwi mulisuni kubacafwa munshila ili yoonse njeenga mwacikonsha. Amubeete kucanikaako ku Ciibalusho. Na bacanikaako amubatambule camaansa obilo. Pesule lya Ciibalusho, amutolelele kubandika abamakwesu abenankashi aba akubapa lucafwo lwakumushimu ndobayandika kwaamba ayi baboolele kuli Yehova.—1 Pit. 2:25.

18. Ino nshiinshi nsheenga soonse twaciita kwaamba ayi tucafwe baabo bakaboolela mwisule? (Bene Loma 12:10)

¹⁸ Boonsebo mulibungano inga bacafwa baabo bakaboolela mwisule na bacanikaako ku Ciibalusho. Munshila nshi? Kwiinda mukubatondesha lusuno, inkuumbu abulemu. (Amubelenge Bene Loma 12:10.) Munokwiibaluka ayi mpashi tacakalinga cuubu kwaamba ayi bamakwesu abenankashi aba bacanikeeko kumabungano. Mpashi bakalinga kuloonda ayi teshi bakabatambule kabotu.e Aboobo amuleye kubeepusha miipusho yeenga yabalensha nsoni na kwaamba maswi eenga abakalasha. (1 Tesa. 5:11) Bamakwesu abenankashi aba mbashominyineesu. Tulasangalala kulambila Yehova pomwi ambabo alimwi!—Kulu. 119:176; Milimo 20:35.

19. Ino nshoolwe nshi nshotucana ceebo cakwiibaluka lufu lwakwe Yesu?

¹⁹ Tulalumba kwaamba ayi Yesu wakatulwiita ayi tunokwiibaluka lufu lwakwe mwaaka amwaaka alimwi tulanyumfwishisha kuyandika kwakucita boobo. Na twacita boobo, soonse sotucanikaako tulacafwikwa munshila shiinji. (Isa. 48:​17, 18) Lusuno ndotucite pali Yehova a Yesu lulayuminaako. Tulatondesha ayi tulalumba pasheesho nshobakatucitila. Tulaba abushicibusa buyumu abamakwesu abenankashi. Alimwi mpashi inga twacafwa bamwi kushiba mbweenga bafubilaamo mu shoolwe nshotucite ceebo ca cilubula. Soonse atucite nsheenga twacikonsha kwaamba ayi tukabe balibambite pabushiku bwa Ciibalusho ca mwaaka uno, bushiku buyandika abuumbi mumwaaka!