Ha pa 7 maˬ

Yeˍsuˆ kʼoˆ ve leh te ve anˇ tuˬ awˬ ceuˬ hkʼa peu˗eˬ Yaˬhoˉvaˬ ve te hkʼaˇ dawˇ hkʼaˇ hkʼaˬ hkʼe cawˬ ve htaꞈ hpeuꞈ maw laˇ ve yoˬ. (Yoˇ 14:9) Yeˍsuˆ anˇ tuˬ te ve htaꞈ ngaˬ hui aˬ htoꞈ ma henˇ yuˬ gʼa ve le? Yeˍsuˆ leh yawˇ ve Awˬ pa Yaˬhoˉvaˬ ngaˬ hui htaꞈ haꞈ jaˇ ve yoˬ. Yeˍsuˆ miˬ guiˬ hkʼoˆ chehˇ htaˇ chaw yaˇ tuꞈ ve hkanˍ ve htaꞈ yawˇ anˇ tuˬ te leh ga piˇ ve lehˬ, yawˇ chaw yaˇ htaꞈ hkʼaˬ hkʼe taw haꞈ ve tehꞈ hpeuꞈ maw laˇ ve yoˬ. Teˇ pawˆ htaˇ mehˆ cuˉ ve hawˉ hkʼaˆ 2 gʼaˇ Yeˍsuˆ ga laˇ tuˬ lawˬ ve yoˬ. (Maꞈ 20:30-34) Liꞈ hpu hkʼaw kʼoˆ ve, Yeˍsuˆ “ha kʼaˉ” ve pa taw yawˇ hui htaꞈ gu na˗e piˇ ve yoˬ. Ha kʼaˉ ve chi ve lehˬ nyi ma hkʼaw tawˆ la ve awˬ ceuˬ hpehꞈ ve yoˬ. Chi hkʼe ve htaꞈ pa taw Yeˍsuˆ meuꞈ ve kaˆ ve chaw htaꞈ caˍ piˇ leh hkiˬ tuꞈ keuˆ ve hawˉ hkʼaˆ teˇ gʼaˇ htaꞈ kaꞈ yawˇ gu na˗e piˇ ve yoˬ. Chi lehˬ Yeˍsuˆ yawˇ hui htaꞈ haꞈ ve tehꞈ hpeuꞈ maw piˇ ve yoˬ. (Maꞈ 15:32; Mk 1:41) Chi ve lehˬ Yaˬhoˉvaˬ ha kʼaˉ puiˉ jaˇ ve Gʼuiˬ sha hpehꞈ ve tehꞈ ngaˬ hui yonˍ gʼa leh ngaˬ hui tuꞈ ve hkanˍ ve gʼa hpuˇ htaˇ, Yeˍsuˆ mawˬ leh yawˇ ngaˬ hui htaꞈ haꞈ leh nyi ma naˬ jaˇ ve yoˬ. (Luˉ 1:78; 1 Peˍ 5:7) Yaˬhoˉvaˬ leh Yeˍsuˆ miˬ guiˬ hkʼoˆ lo tuꞈ ve hkanˍ ve maˇ cawˬ tcuh gaˇ ve yoˬ. w23.04 3 ¶4-5

Maˇ˗awˍ ve chaw dawˇ cawˇ ve awˬ lawn ngaˬ hui maˇ gʼaw leh maˇ na cawˇ ve yoˬ. Chi hkʼoˆ kaꞈ, ngaˬ hui daꞈ ve dawˇ hkʼaˇ cawˬ tuˬ gʼa te cawˇ ve yoˬ. Ngaˬ hui Liꞈ hpu gʼaw leh gʼa hpfuhˆ nyi cawˇ ve, gʼa hpawnˬ daꞈ˗e ve, leh hkʼaˬ htaˆ kaꞈ gʼa hto toˇ˗e cawˇ ve yoˬ. Ngaˬ hui chi hkʼe te ve kʼo, Yaˬhoˉvaˬ ka tiꞈ te taˍ laˇ ve ngaˬ hui hkanˍ maˇ gʼaˇ lawꞈ lawꞈ ve beˬ ve lawˇ ve htaꞈ yawˇ maˇ hpuˇ tcuh laˇ taˍ. (1 Kawˇ 10:12, 13) Tuꞈ ve hkanˍ ve awˬ leh meuˇ ve awˬ yanˇ hkʼaw ngaˬ hui teˇ gʼaˇ le le Yaˬhoˉvaˬ htaꞈ ka tiꞈ yeˬ gʼa tuˬ hkʼaˬ htaˆ kaꞈ bon gʼa lawˬ cawˇ ve yoˬ. Yawˇ ngaˬ hui htaꞈ “dawˇ haˍ tuˬ hkʼa peu˗eˬ yawˇ htaꞈ hto piˇ” tcuh gaˇ ve yoˬ. (Chiˇ 62:8) Yaˬhoˉvaˬ nawˬ awˬ pon te laˇ ve teˇ ceuˬ le le yawˇ htaꞈ chiˇ mvuh leh awˬ bon uiˍ jaˇ tehꞈ kʼoˆ piˇ cawˇ ve yoˬ. Nawˬ Gʼuiˬ sha ve kanˉ te ve hkʼaw haꞈ hanˉ ve cawˬ tuˬ, shoꞈ shaꞈ ve htaꞈ yeunˇ hkanˍ gʼaˇ tuˬ, leh nawˬ gʼa hpuˇ chehˇ ve beˬ ve lawˇ ve htaꞈ yeunˇ hkanˍ gʼaˇ tuˬ, Yaˬhoˉvaˬ ga laˇ tuˬ bon lawˬ sheˍ. Aˬ htoꞈ ma ve teˇ ceuˬ htawˇ maˇ kʼoˆ, nawˬ hkʼaˬ htaˆ kaꞈ bon maˇ gʼa lawˬ tuˬ taˇ te laˇ tcuh. w23.05 7 ¶17-18

Aˬ htoꞈ ma te ngaˬ hui hpawnˬ daꞈ˗e ve le? A yeˇ uiˍ ve awˬ hkʼaˇ lehˬ, Yaˬhoˉvaˬ htaꞈ chiˇ mvuh ve yoˬ. (Chiˇ 26:12; 111:1) Chi hkʼoˆ kaꞈ, tuꞈ ve hkanˍ ve awˬ yanˇ chi ve hkʼaw hpawnˬ daꞈ kuiˬ hkʼaw teˇ gʼaˇ leh teˇ gʼaˇ awˬ gʼaˇ piˇ daꞈ tuˬ awˬ yanˇ cawˬ ve yoˬ. (1 Hteˇ 5:11) Ngaˬ hui laꞈ sheh chiˇ leh hkʼawꞈ htaˇ, chi ve lehˬ ngaˬ hui Yaˬhoˉvaˬ htaꞈ chiˇ mvuh tuˬ te laˇ leh awˬ viˉ awˬ nyi awˬ gʼaˇ gʼa tuˬ kaꞈ te piˇ ve yoˬ. Yaꞈ hkʼaˇ, ngaˬ hui teˇ pawˆ pawˆ kʼo hkʼawꞈ maˇ haˆ ve pa taw sha ve maˇ heˆ. Maˇ heˆ leh ngaˬ hui laꞈ sheh chiˇ ve htawˇ, sheh kʼai paˍ ngaˬ hui hkʼawꞈ gaˇ ve hkʼe hkʼa dehꞈ maˇ kuˬ laˇ ve yoˬ. Chi ve teˇ hpaˍ htaꞈ ngaˬ hui yeunˇ hkanˍ gʼaˇ tuˬ aˬ htoꞈ ma ga laˇ ve le? Pawˇluꞈ shu htaꞈ dawˇ nyi leh “awˬ gʼaˇ piˇ daꞈ chehˇ˗oˆ” tehꞈ kʼoˆ ve yoˬ. Ngaˬ hui hkʼawꞈ ve maˇ zuhˬ ve htawˇ, awˬ viˉ awˬ nyi awˬ gʼaˇ gʼa ve tehꞈ ngaˬ hui shiˍ htaˇ, chi ngaˬ hui leuˉ leh hkʼawꞈ gaˇ tuˬ te laˇ ve yoˬ. Sheh kʼai paˍ ngaˬ hui hkʼawꞈ tuˬ hkʼa dehꞈ maˇ kuˬ laˇ ve kʼo, Hkriꞈ yaˇ awˬ moˍ hkʼaw awˬ nu ve chaw gʼa hkʼawꞈ ve htaꞈ ngaˬ hui kaꞈ ha lehˬ ve yoˬ.—1 Peˍ 3:8. w23.04 20-21 ¶1-3

Baˍbuˍlonˍ venˇ hkʼaw shu ceˬ te ve 70 hkʼawꞈ gaˬ˗oˬ ve Yuˇdaꞈ chaw htaꞈ yawˇ hui chehˇ kuiˬ Iˉsaˍreˍlaˆ mvuhˇ miˬ lo kʼoꞈ˗e hpehꞈ ve tehꞈ jawˇ mawˇ tawˇ piˇ ve yoˬ. (Ezr 1:2-4) Chi hkʼe hpehꞈ ve lehˬ, Yaˬhoˉvaˬ teˇ gʼaˇ ceh tiˉ te gʼa ve yoˬ. Awˬ lawn kʼo, Baˍbuˍlonˍ chaw lehˬ awˬ ceˬ htaꞈ maˇ hpehˇ piˇ. (Isy 14:4, 17) Yaꞈ hkʼaˇ, Baˍbuˍlonˍ venˇ luˬ kʼai˗oˬ htaˇ, uˉ peunˍ paˍ awˬ suhˉ teˇ gʼaˇ Yuˇdaꞈ chaw tawˆ˗e hpehꞈ ve tehꞈ kʼoˆ piˇ ve yoˬ. Yehˬ shehˍ hpaˇ hpehꞈ ve Yuˇdaꞈ chaw lehˬ, yawˇ hui Baˍbuˍlonˍ venˇ hkʼaw chehˇ tuˬ ve laˇ, maˇ heˆ leh tawˆ˗e tuˬ ve laˇ, a yeˇ uiˍ ve awˬ lawn chi htaꞈ gʼa dawˇ cheˆ ve yoˬ. Yaꞈ hkʼaˇ, chi hkʼe dawˇ cheˆ ve sha ve maˇ heˆ. Yuˇdaꞈ chaw chaw mawˇ teˇ hpaˍ kʼo kʼawꞈ˗e vuiˇ jaˇ ve pa taw, maˇ kʼawꞈ˗e ve yoˬ. Chi hkʼoˆ kaꞈ, Yuˇdaꞈ chaw maˇ˗awˍ ve kʼo, Baˍbuˍlonˍ venˇ hkʼaw paw taˍ ve yoˬ. Hkʼe te leh, yawˇ hui Baˍbuˍlonˍ venˇ hkʼaw ve awˬ lawn ceh tiˉ shiˍ ve yoˬ. Iˉsaˍreˍlaˆ mvuhˇ miˬ lo yawˇ hui ve chehˇ kuiˬ tehꞈ maˇ dawˇ leh oˇ kaˬ lo yawˇ hui ve awˬ puˍ awˬ pi chehˇ kuiˬ ceh tiˉ hpehꞈ ve tehꞈ shawˍ ve yoˬ. Leh Yuˇdaꞈ chaw teˇ hpaˍ kʼo Baˍbuˍlonˍ venˇ lo teˇ ceuˬ le le hpawˇ kaꞈ hpehꞈ sha ve pa taw, yawˇ hui ve yehˬ leh tanˇ kaˬ hkʼaˇ htaꞈ baˬ taˉ tuˬ haˍ ve, maˇ heˆ leh yawˇ hui maˇ chehˇ jaw ve mvuhˇ miˬ hkʼaw ca chehˇ˗e tuˬ kaꞈ haˍ ve yoˬ. w23.05 14 ¶1-2

Yeunˇ hkanˍ ve, teˇ gʼaˇ leh teˇ gʼaˇ ha kʼaˉ daꞈ ve, leh haꞈ daꞈ ve, ngaˬ hui leuˉ leh cawˬ tuˬ Liꞈ hpu hkʼaw kʼoˆ laˇ taˍ ve yoˬ. Luˉkaꞈ liꞈ 21:19 hkʼaw kʼoˆ ve, ‘nawˬ awˬ leh meuˇ hkʼa gaˬ yeunˇ hkanˍ ve kʼo, co co taiˍ taiˍ a shaꞈ gʼa tuˬ yoˬ.’ Kawˇlawˇsehˇ liꞈ 3:12 hkʼaw kʼoˆ ve, ‘ha kʼaˉ puiˉ ve htaꞈ veuꞈ deh˗o.’ 1 Hteˇsaˍlawˇniˆ liꞈ 4:9, 10 hkʼaw kʼoˆ ve, ‘teˇ gʼaˇ leh teˇ gʼaˇ haꞈ daꞈ tuˬ Gʼuiˬ sha nawˬ hui htaꞈ maˍ laˇ peuˬ. Awˬ viˉ awˬ nyi teˇ hpaˍ˗oˬ, chi aꞈ kehˉ leuˉ leh haꞈ maˇ la tuˬ ngaˬ hui nawˬ hui htaꞈ awˬ gʼaˇ peꞈ laˇ ve yoˬ.’ Liꞈ hpu awˬ tawn chi ve teˇ hpaˍ awˬ laꞈ gʼawˇ hui lehˬ, yeunˇ hkanˍ ve, teˇ gʼaˇ leh teˇ gʼaˇ ha kʼaˉ daꞈ ve, leh haꞈ daꞈ ve leuˉ leh cawˬ˗oˬ ve chaw htaꞈ bvuhꞈ piˇ ve yoˬ. Yaꞈ hkʼaˇ, yawˇ hui te hkʼaˇ dawˇ hkʼaˇ chi ve teˇ hpaˍ leuˉ leh gʼa te tawˆ la sheˍ ve yoˬ. Ngaˬ hui kaꞈ chi hkʼa shuˍ shuˍ gʼa te cawˇ ve yoˬ. Awˉ lawˉ peuˇ ve Hkriꞈ yaˇ te hkʼaˇ dawˇ hkʼaˇ chi ve hkʼaˬ hkʼe hpeuꞈ maw daꞈ ve, leh nawˬ yawˇ hui htaꞈ hkʼaˬ hkʼe henˇ yuˬ gʼa tuˬ kaꞈ teˇ geh henˇ tuˬ yoˬ. Chi hkʼe te ve lehˬ, nawˬ tuꞈ jaˇ hkanˍ jaˇ ve htaꞈ gu hehnˇ taˍ gʼa tuˬ ga laˇ ve yoˬ. Tuꞈ jaˇ hkanˍ jaˇ ve awˬ yanˇ gaˬ la htaˇ, nawˬ hkʼaˬ hkʼe te tuˬ shiˍ leh caˉ leh yeunˇ hkanˍ tuˬ yoˬ tehꞈ dawˇ teh taˍ ve yoˬ. w23.07 2-4 ¶4, 8

Leuˆ yuˬ taˍ ve chaw maˇ heˆ leh “awˬ kaˍ awˬ nu yawˬ teˇ hpaˍ” hpehꞈ ve htawˇ maˇ kʼoˆ, “daꞈ kehˬ ve yaꞈ kʼaw” hkʼoˆ hkʼaˬ htaˆ kaꞈ gʼa toˇ cawˇ ve yoˬ. Awˬ lawn kʼo, Gʼuiˬ sha ve mvuhˇ miˬ miˬ guiˬ hkʼoˆ daꞈ ve awˬ ceuˬ maˇ maˇ te laˇ htaˇ, ngaˬ hui chi teˇ hkui leh awˬ gʼuˇ suhˍ hpawˇ kaꞈ Yaˬhoˉvaˬ htaꞈ caˉ leh oˉ kʼoˍ pui gʼa tuˬ ga laˇ ve yoˬ. (Yoˇ 10:16) 1919 hkʼawꞈ C.E. htaˇ tanˬ leh laiˉ lanˬ gʼaˇ maˇ heˆ heˆ ve bon Uiˍ ve Baˍbuˍlonˍ hkʼaw tawˆ la leh daꞈ kehˬ ve yaꞈ kʼaw hkʼoˆ toˇ la ve yoˬ. Yuˇdaꞈ chaw Iˉsaˍreˍlaˆ mvuhˇ miˬ lo kʼawꞈ˗e htaˇ, yawˇ hui ve yaꞈ kʼaw hkʼoˆ lo tawˍ ve tsuhˇ ve hkʼa peu˗eˬ htaꞈ Yaˬhoˉvaˬ gu piˇ ve yoˬ. (Isy 57:14) Leh chi beuꞈ teˇ co˗e kaꞈ “daꞈ kehˬ ve yaꞈ kʼaw” htaꞈ Yaˬhoˉvaˬ gu laˇ ve laˇ? 1919 hkʼawꞈ maˇ gaˬ sheˍ laiˉ ha hkʼawꞈ htaˇ, Yaˬhoˉvaˬ htaꞈ yawˆ yan ve chaw laiˉ gʼaˇ htaꞈ cuˇ leh Uiˍ ve Baˍbuˍlonˍ hkʼaw tawˆ la tuˬ tawˍ ve tsuhˇ ve gʼa hpuˇ ve chaw htaꞈ ga piˇ ve yoˬ. (Isy 40:3 htaꞈ tehˆ daꞈ sheˍ.) Nyi ma nuˇ nehˬ ve chaw Uiˍ ve Baˍbuˍlonˍ hkʼaw tawˆ la tuˬ leh Yaˬhoˉvaˬ ve chaw geh teˇ geh oˉ kʼoˍ pui la tuˬ laiˉ ceuˬ gu piˇ ve yoˬ. w23.05 16 ¶8-9

Yaˬhoˉvaˬ lehˬ ngaˬ hui htaꞈ yawˇ ve kanˉ ha lehˬ ha kʼa ve hkʼaw te tcuh gaˇ ve yoˬ. (2 Kawˇ 9:7) Yaꞈ hkʼaˇ, ngaˬ hui Hkriꞈ yaˇ ve dawˇ teh taˍ ve htaꞈ hkʼa dehꞈ maˇ gʼaꞈ te gaˇ ve kʼo, gʼa coˇ caˇ cawˇ sheˍ ve laˇ? Tcuh yaˇ Pawˇluꞈ ve awˬ lawn htaꞈ teˇ geh nyi sheˍ. Yawˇ kʼoˆ ve, “ngaˬ awˬ to shawˍ baˬ taˍ ve chaw maˇ gʼa hpehꞈ tuˬ, ngaˬ ve awˬ to htaꞈ chu˗eˬ leh, ngaˬ ve awˬ to htaꞈ uˉ peunˍ tuˬ te ve yoˬ.” (1 Kawˇ 9:25-27) Pawˇluꞈ teˇ pawˆ pawˆ kʼo yawˇ maˇ te gaˇ ve htawˇ, cawˇ ve awˬ ceuˬ htaꞈ te tuˬ yawˇ awˬ to htaꞈ uˉ peunˍ ve yoˬ. Pawˇluꞈ Yaˬhoˉvaˬ awˬ pon te ve htaꞈ yawˇ ha lehˬ˗aw laˇ? Ha lehˬ ve yoˬ. Yaˬhoˉvaˬ yawˇ htaꞈ laꞈ shawnˍ piˇ ve yoˬ. (2 Tiˆ 4:7, 8) Pawˇluꞈ ve awˬ lawn hkʼa shuˍ ngaˬ hui dawˇ teh taˍ ve htaꞈ hkʼa dehꞈ maˇ te gaˇ ve htawˇ, ngaˬ hui coˇ caˇ leh gʼaꞈ te ve kʼo, Yaˬhoˉvaˬ ha lehˬ jaˇ tuˬ yoˬ. Awˬ ceuˬ chi hkʼe ve te tuˬ ngaˬ hui maˇ dawˇ cawˇ ve htawˇ, ngaˬ hui te ve lehˬ yawˇ htaꞈ haꞈ ve pa taw yoˬ. Yaˬhoˉvaˬ Pawˇluꞈ htaꞈ awˬ bon naꞈ piˇ ve hkʼe, ngaˬ hui htaꞈ kaꞈ awˬ bon naꞈ laˇ tuˬ yoˬ. (Chiˇ 126:5) Ngaˬ hui Yaˬhoˉvaˬ awˬ bon naꞈ laˇ ve htaꞈ gʼa ve kʼo, ngaˬ hui te gaˇ ve nyi ma cawˬ tuˬ yoˬ. w23.05 29 ¶9-10

Yaˬhoˉvaˬ ve awˬ nyi htaꞈ maˇ gʼa ponˬ ve chaw lehˬ, zuhꞈ muiˉ kʼa ve chaw htaꞈ shuˍ ve tehꞈ tcuh yaˇ Pawˇluꞈ tehˆ taˍ ve yoˬ. Zuhꞈ muiˉ kʼa ve chaw lehˬ awˬ paˇ awˬ kui aˬ htoꞈ ma hpehꞈ ve htaꞈ maˇ shiˍ leh awˬ yanˇ ponˬ kʼai ve htaꞈ kaꞈ maˇ shiˍ ve yoˬ. A yeˇ uiˍ ve aˬ htoꞈ ma hpehꞈ la ve htaꞈ yawˇ maˇ shiˍ leh teꞈ chiˉ kaꞈ maˇ gʼaꞈ te ve yoˬ. Chi beuꞈ teˇ co˗e maˇ˗awˍ ve chaw kaꞈ zuhꞈ muiˉ kʼa ve chaw htaꞈ shuˍ ve yoˬ. (Roˉ 11:8) Miˬ guiˬ hkʼoˆ lo hpehꞈ la chehˇ ve shaˉ hkiˆ teˇ hpaˍ lehˬ, ngaˬ hui awˬ leh meuˇ ve awˬ yanˇ hkʼaw chehˇ taˍ ve tehꞈ yawˇ hui maˇ yonˍ leh, tuꞈ jaˇ hkanˍ jaˇ ve gaˬ la chehˇ ve htaꞈ kaꞈ yawˇ hui maˇ yonˍ ve yoˬ. (2 Peˍ 3:3, 4) Chaw yaˇ hkʼaˬ hkʼe te ve htawˇ, teˇ nyi leh teˇ nyi ponˬ kʼai vuiˇ jaˇ ve pa taw, ngaˬ hui shaˍ tiꞈ gʼa te cawˇ ve yoˬ. (1 Hteˇ 5:6) Ngaˬ hui nyi ma gawˬ lehˍ cawˬ leh yonˍ yeˬ cawˇ ve yoˬ. Aˬ htoꞈ ma pa taw le? Awˬ lawn kʼo, chi beuꞈ teˇ co˗e mvuhˇ miˬ hpawˇ leh chaw yaˇ awˬ moˍ shoꞈ shaꞈ ve htaꞈ maˇ gʼa caˉ daꞈ ve yoˬ. Yaˬhoˉvaˬ ve awˬ nyi gʼaˇ hteꞈ gaˬ la paˇ neˇ htaˇ, awˬ lawn chi hkʼe ve hkʼaw ngaˬ hui pawnˇ daꞈ˗e tuˬ nyiˉ laˇ jaˇ ve yoˬ. Yaꞈ hkʼaˇ, ngaˬ hui hkʼaˬ hkʼe te tuˬ taˇ dawˇ haˍ. Awˬ lawn kʼo, Yaˬhoˉvaˬ ve daꞈ kehˬ ve awˬ ha hpu ngaˬ hui nyi ma gawˬ lehˍ cawˬ leh yonˍ yeˬ ve cawˬ tuˬ ga laˇ ve yoˬ. Leh ngaˬ hui cuˇ yiˍ cawˬ ve hkʼaw dawˇ cheˆ gʼa tuˬ kaꞈ ga laˇ ve yoˬ.—Luˉ 12:11, 12. w23.06 10 ¶6-7

Nawˬ Sanˍsonˍ ve awˬ meh htaꞈ gʼa kaˇ htaˇ, aˬ htoꞈ ma htaꞈ dawˇ mawˬ ve le? Teˇ gʼaˇ le le aꞈ kehˉ awˬ gʼaˇ hehnˇ jaˇ ve htaꞈ nawˬ dawˇ mawˬ ve yoˬ. Yaꞈ hkʼaˇ, Sanˍsonˍ dawˇ cheˆ ve maˇ cawˇ ve pa taw, yawˇ a shaꞈ teꞈ kuiˬ hkʼaw shoꞈ shaꞈ jaˇ ve awˬ ceuˬ gʼa hpuˇ ve yoˬ. Chi hkʼe hpehꞈ ve htawˇ, Sanˍsonˍ ka tiꞈ yeˬ leh Yaˬhoˉvaˬ awˬ pon te piˇ ve teˇ ceuˬ le le htaꞈ nyi ve yoˬ. Ngaˬ hui awˬ pon awˬ bon gʼa tuˬ Sanˍsonˍ ve awˬ lawn Liꞈ hpu hkʼaw Yaˬhoˉvaˬ bvuhꞈ keu tcuh taˍ laˇ ve yoˬ. Iˉsaˍreˍlaˆ chaw htaꞈ ga piˇ tuˬ, Yaˬhoˉvaˬ Sanˍsonˍ htaꞈ cuˇ leh anˇ tuˬ laiˉ ceuˬ te ve yoˬ. Sanˍsonˍ suh ve laiˉ ha hkʼawꞈ peuˬ hkʼawꞈ nawˉ, Yaˬhoˉvaˬ tcuh yaˇ Pawˇluꞈ htaꞈ dawˇ pawnˍ piˇ leh, yonˍ hkʼaˇ yonˍ yeˬ ve chaw awˬ meh bvuhꞈ keu kuiˬ liꞈ kʼoˆ hkʼaw, Sanˍsonˍ ve awˬ meh kaꞈ bvuhꞈ keu tcuh ve yoˬ. (Heˍ 11:32-34) Sanˍsonˍ ve awˬ lawn ngaˬ hui htaꞈ kaꞈ awˬ gʼaˇ peꞈ laˇ ve yoˬ. Yawˇ ve a shaꞈ teꞈ kuiˬ hkʼaw tuꞈ hkanˍ jaˇ ve gʼa hpuˇ htaˇ, Yaˬhoˉvaˬ htaꞈ gʼaˇ va ve yoˬ. Sanˍsonˍ ve awˬ lawn ngaˬ hui htaꞈ maˍ laˇ leh awˬ gʼaˇ kaꞈ peꞈ laˇ ve yoˬ. w23.09 2 ¶1-2

Ngaˬ hui leuˉ leh yeunˇ hkanˍ gʼaˇ tuˬ, ngaˬ hui aˬ htoꞈ ma awˬ lawn dawˇ haˍ ve, teˇ hkui teˇ hkui bon lawˬ ve hkʼaw Yaˬhoˉvaˬ htaꞈ kʼoˆ piˇ sheˍ. (1 Hteˇ 5:17) Chi teˇ hkui nawˬ shoꞈ shaꞈ jaˇ ve maˇ gʼa hpuˇ sheˍ ve htawˇ, nawˬ htawˇ dawˇ nawˬ dawˇ cawˬ ve, nyi ma maˇ sha ve, maˇ heˆ leh hkʼaˬ hkʼe te tuˬ maˇ shiˍ htaˇ, Gʼuiˬ sha ga laˇ tuˬ lawˬ gʼa ve yoˬ. Chi teˇ hkui teˇ nyi le le shoꞈ shaꞈ ve awˬ lawn gʼa hpuˇ ve maˇ uiˍ ve htawˇ, Yaˬhoˉvaˬ ga laˇ tuˬ coˇ caˇ leh lawˬ gʼa ve yoˬ. Awˬ gʼuˇ suhˍ hpawˇ shoꞈ shaꞈ ve chi aꞈ kehˉ gʼa hpuˇ jaˇ htaˇ, Yaˬhoˉvaˬ ga laˇ tuˬ lawˬ ve nawˬ htawˇ dawˇ nawˬ dawˇ maˇ cawˬ leh, nawˬ htaꞈ hkʼaˬ hkʼe htaˇ ga piˇ cawˇ ve, leh hkʼaˬ hkʼe ga piˇ tuˬ ve, Gʼuiˬ sha shiˍ ve tehꞈ nawˬ yonˍ gʼa ve yoˬ. (Chiˇ 27:1, 3) Chi teˇ hkui ngaˬ hui tuꞈ ve hkanˍ ve gʼa hpuˇ ve htaꞈ yeunˇ hkanˍ gʼaˇ ve kʼo, awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ yeunˇ hkanˍ gʼaˇ tuˬ yoˬ. (Roˉ 5:3) Aˬ htoꞈ ma te chi hkʼe kʼoˆ gʼa ve le? Awˬ viˉ awˬ nyi laiˉ gʼaˇ dawˇ ve, yeunˇ hkanˍ gʼaˇ ve teˇ pawˆ le le, awˬ gʼuˇ suhˍ hpawˇ shoꞈ shaꞈ ve gʼa hpuˇ htaˇ, yeunˇ hkanˍ gʼaˇ tuˬ yoˬ. Yaˬhoˉvaˬ ga laˇ ve pa taw yawˇ hui shoꞈ shaꞈ ve htaꞈ yeunˇ hkanˍ gʼaˇ ve yoˬ. Yawˇ hui shoꞈ shaꞈ ve gʼa hpuˇ sheˍ ve kʼo, Yaˬhoˉvaˬ ga laˇ tuˬ yoˬ tehꞈ leuˉ leh yonˍ gʼa ve yoˬ. Yawˇ hui chi hkʼe yonˍ ve lehˬ awˬ gʼuˇ suhˍ hpawˇ tuꞈ jaˇ hkanˍ jaˇ ve gʼa hpuˇ htaˇ yeunˇ hkanˍ gʼaˇ tuˬ yoˬ.—Yaˍ 1:2-4. w23.07 3-4 ¶7-8

Yaˬhoˉvaˬ lehˬ nyi ma nuˇ nehˬ leh ha kʼaˉ puiˉ jaˇ ve pa taw, yawˇ lehˬ awˬ hkʼaˇ ca puiˉ ve Gʼuiˬ sha hpehꞈ ve yoˬ. Tawˇ pa haˉ te kʼo, Sawˉdonˍ venˇ htaꞈ te luˬ htaˇ, yawˇ lehˬ nyi ma nuˇ nehˬ ve tehꞈ hpeuꞈ maw laˇ ve yoˬ. Yaˬhoˉvaˬ mvuhˇ naw ma tcuh yaˇ htaꞈ cuˇ leh Lawˇtaˍ hkʼaw hkʼoˆ lo hpaw˗e tuˬ kʼoˆ piˇ tcuh ve yoˬ. Yaꞈ hkʼaˇ, Lawˇtaˍ kawˆ jaˇ ve pa taw, yawˇ leh yawˇ ve yehˬ kʼa Zawˇraˆ venˇ ehˉ hkʼaw hpaw˗e tcuh laˇ tuˬ lawˬ ve yoˬ. Yaꞈ hkʼaˇ, awˬ tehˬ kʼo venˇ chi htaꞈ kaꞈ Yaˬhoˉvaˬ te luˬ tuˬ dawˇ teh taˍ ve yoˬ. Hkʼe te leh, Yaˬhoˉvaˬ kʼoˆ taˍ ve hkʼe Lawˇtaˍ gʼa gʼaꞈ te ve yoˬ. Chi hkʼe hpehꞈ ve htawˇ, Lawˇtaˍ lawˬ ve hkʼe Yaˬhoˉvaˬ gʼaꞈ te ve yoˬ. Chi kʼoˆ gaˇ ve lehˬ, Zawˇraˆ venˇ htaꞈ Yaˬhoˉvaˬ te luˬ tuˬ dawˇ teh taˍ ve htaꞈ maˇ kʼawꞈ te luˬ ve yoˬ. (Awˬ 19:18-22) Peuˬ laˬ ve laiˉ ha hkʼawꞈ htaˇ, Yaˬhoˉvaˬ Niˇnaˍveˍ chaw htaꞈ ha kʼaˉ piˇ ve yoˬ. Yawˇ Niˇnaˍveˍ venˇ htaꞈ te luˬ tuˬ yoˬ tehꞈ tcuh kaˍ paˍ Yoˇnaˆ htaꞈ cuˇ leh kʼoˆ piˇ tcuh ve yoˬ. Yaꞈ hkʼaˇ, Niˇnaˍveˍ chaw venˇ baˆ dawˇ hpfuhˆ htaˇ, Gʼuiˬ sha yawˇ hui htaꞈ ha kʼaˉ ve yoˬ. Yawˇ awˉ lawˉ htaˇ dawˇ teh taˍ ve hkʼe venˇ chi htaꞈ maˇ te luˬ.—Yn 3:1, 10; 4:10, 11. w23.07 21 ¶5

Yawˇshaˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le? Yawˇshaˆ lehˬ suhˆ cehˬ awˬ geu maˇ tcuhˆ naˉ leh tawˆ kaˬ piˇ taˍ ve hkʼe ceh hpehꞈ ve yoˬ. Leh Yawˇyaˍdaˆ suh peuˬ hkʼawꞈ nawˉ yawˇ htaꞈ maˇ heˆ heˆ ve oˉ kʼoˍ pui ve chaw ca jehˬ la ve pa taw, yawˇ Yaˬhoˉvaˬ htaꞈ baˬ taˉ ve yoˬ. Suhˆ cehˬ awˬ geu maˇ naˉ ve lehˬ mvuhˇ haw laˬ htaˇ paˍ˗e sha ve hkʼa shuˍ, tehˆ maˍ laˇ ve chi kaꞈ yehˬ kʼa hkʼaw ve chaw maˇ heˆ leh Hkriꞈ yaˇ awˬ moˍ hkʼaw ve chaw Yaˬhoˉvaˬ htaꞈ kawˆ leh yawˆ yan ve pa taw, yawˇ hui te ve hkʼe, ngaˬ hui te ve ceh maˇ gʼa te tuˬ gʼa mawˬ ve yoˬ. Ngaˬ hui Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ ngaˬ hui yawˇ htaꞈ haꞈ leh a shu yawˇ hkʼaˇ yawˇ Yaˬhoˉvaˬ htaꞈ kawˆ leh gʼa yawˆ yan cawˇ ve yoˬ. Ngaˬ hui leuˉ leh chi hkʼe te gʼa tuˬ kaiˬ ve hkʼaw Liꞈ hpu gʼaw leh gʼa henˇ ve, hkʼaˬ htaˆ kaꞈ hkʼa dehꞈ dawˇ nyi leh bon gʼa lawˬ ve yoˬ. (Yrm 17:7, 8; Kawˇ 2:6, 7) Yaˬhoˉvaˬ lehˬ ngaˬ hui te maˇ gʼa ve awˬ leuˉ maˇ te tcuh laˇ ve yoˬ. Yaˬhoˉvaˬ ngaˬ hui htaꞈ te tcuh gaˇ ve awˬ ceuˬ Cuˇ yiˍ piˇ ve liꞈ 12:13 hkʼaw kʼoˆ taˍ ve yoˬ. Oˇ kaˬ lo kʼoˆ ve, “Gʼuiˬ sha htaꞈ kawˆ leh yawˇ ve awˬ liˇ tawˇ hkawˇ teˇ hpaˍ htaꞈ na yuˬ˗oꞈ. Chi hkʼe te tuˬ, Gʼuiˬ sha ngaˬ hui htaꞈ te hpanˍ taˍ laˇ ve yoˬ.” Awˬ gʼuˇ suhˍ hpawˇ ngaˬ hui aˬ htoꞈ ma gʼa hpuˇ ve htawˇ maˇ kʼoˆ, ngaˬ hui Yaˬhoˉvaˬ htaꞈ kawˆ leh yawˆ yan ve kʼo, ngaˬ hui Yaˬhoˉvaˬ htaꞈ ka tiꞈ yeˬ gʼa tuˬ yoˬ. Leh ngaˬ hui Yaˬhoˉvaˬ geh meuˆ daꞈ ve htaꞈ teˇ ceuˬ˗ehˬ kaꞈ te luˬ laˇ maˇ gʼa. w23.06 19 ¶17-19

Kaˇ nanˉ ehˉ 5 awˉ lawˉ teˇ tawn hkʼaw “kʼaw jaw hkʼoˆ lo mui shehˍ hpaˇ kʼoˆ ve” yoˬ. (Hpeuꞈ 21:5) Tawˇ hkawˇ chi ve lehˬ daꞈ jaˇ. Awˬ lawn kʼo, Hpeuꞈ maˍ ve liꞈ hkʼaw tawˇ hkawˇ chi ve Yaˬhoˉvaˬ kʼoˆ taˍ ve 3 pawˆ cawˬ ve yoˬ. Tawˇ hkawˇ chi lehˬ mvuhˇ naw ma tcuh yaˇ maˇ heˆ leh, Yeˍsuˆ kʼoˆ taˍ ve kaꞈ maˇ heˆ tehꞈ htawˆ hkanˍ laˇ taˍ ve tehꞈ hpeuꞈ maw laˇ ve yoˬ. Yaꞈ hkʼaˇ, chi Yaˬhoˉvaˬ hpehꞈ ve yoˬ. Chi htaꞈ pa taw, tawˇ hkawˇ chi htaꞈ ngaˬ hui hkʼa dehꞈ yonˍ gʼa ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ lehˬ “maˇ heˍ puiˉ.” (Tiˇ 1:2) Chi htaꞈ pa taw, Hpeuꞈ maˍ ve liꞈ 21:5, 6 hkʼaw kʼoˆ taˍ ve htaꞈ awˬ tehˬ awˬ na yonˍ gʼa ve yoˬ. Yaˬhoˉvaˬ kʼoˆ ve, “awˬ ceuˬ hkʼa peu˗eˬ htaꞈ ngaˬ awˬ suhˉ kʼawꞈ te ve yoˬ.” Awˬ tehˬ kʼo, Yaˬhoˉvaˬ lehˬ awˬ gʼuˇ suhˍ hpawˇ hpehꞈ la tuˬ ve awˬ ceuˬ htaꞈ kʼoˆ chehˇ ve yoˬ. Yaꞈ hkʼaˇ, Yaˬhoˉvaˬ lehˬ hpehꞈ la˗oˬ ve awˬ ceuˬ htaꞈ kʼoˆ chehˇ ve htaꞈ shuˍ ve yoˬ. Ka tiꞈ te taˍ ve chi awˬ tehˬ awˬ na hpehꞈ la tuˬ yoˬ tehꞈ Yaˬhoˉvaˬ yonˍ gʼa jaˇ ve tehꞈ hpeuꞈ maw laˇ ve yoˬ.—Isy 46:10. w23.11 3-4 ¶7-8

Tcuh yaˇ Peˍtruˆ awˬ gʼaˇ nuˇ kuiˬ htaꞈ gʼa tawˍ daꞈ chehˇ sheˍ ve yoˬ. Teˇ lawn lawn htaꞈ teˇ geh nyi sheˍ. Liꞈ hpu hkʼaw tcuh kaˍ paˍ ve tawˇ hkawˇ kʼoˆ taˍ ve hkʼe, Yeˍsuˆ lehˬ tuꞈ hkanˍ ve hkʼaw gʼa suh˗e tuˬ yoˬ tehꞈ kʼoˆ maˍ piˇ htaˇ, Yeˍsuˆ chi hkʼe maˇ gʼa hpuˇ taˬ tehꞈ Peˍtruˆ kʼoˆ ve yoˬ. (Mk 8:31-33) Chi hkʼoˆ kaꞈ, a shu teˇ gʼaˇ shu aꞈ kehˉ uiˍ ve le tehꞈ, Peˍtruˆ leh awˬ nu ve awˬ laꞈ gʼawˇ hui gʼawˬ daꞈ hkʼeh ve yoˬ. (Mk 9:33, 34) Yeˍsuˆ miˬ guiˬ hkʼoˆ lo a shaꞈ teꞈ chehˇ ve awˬ leh meuˇ teˇ haˉ htaˇ, Peˍtruˆ nyi ma zuhˆ ve hkʼaw hawˉ hkʼaˆ teˇ gʼaˇ ve naˍ paw htaꞈ chaw cheˆ piˇ ve yoˬ. (Yoˇ 18:10) Oˇ ve teˇ haˉ hkʼaw Peˍtruˆ kawˆ jaˇ leh Yeˍsuˆ htaꞈ 3 pawˆ chiˇ baˬ piˇ ve yoˬ. (Mk 14:66-72) Chi Peˍtruˆ nyi ma luˬ jaˇ tuˬ te piˇ ve pa taw gʼaˇ hteꞈ hawˬ ve yoˬ. Peˍtruˆ yawˇ te yaꞈ ve awˬ ceuˬ htaꞈ nyi ma luˬ ve htawˇ, Yeˍsuˆ yawˇ htaꞈ dawˇ law chehˇ sheˍ ve yoˬ. Yeˍsuˆ kʼawꞈ teꞈ tu la peuˬ hkʼawꞈ nawˉ, yawˇ Peˍtruˆ htaꞈ haꞈ ve tehꞈ hpeuꞈ maw piˇ ve yoˬ. Peˍtruˆ Yeˍsuˆ ve yawˬ htaꞈ nyi haꞈ shaˉ tuˬ awˬ vuiˬ piˇ ve yoˬ. (Yoˇ 21:15-17) Yeˍsuˆ te tcuh gaˇ ve teˇ ceuˬ le le htaꞈ Peˍtruˆ te ve yoˬ. Chi htaꞈ pa taw, Peˍteˍkoˆteˍ pawehˇ awˬ nyi htaˇ, Peˍtruˆ Yeˍruˆsaˍlehnˍ venˇ lo chehˇ leh daꞈ kehˬ ve awˬ ha hpu leuˆ yuˬ piˇ ve awˉ lawˉ teˇ moˍ hkʼaw yawˇ kaꞈ teˇ gʼaˇ hpehꞈ ve yoˬ. w23.09 21-22 ¶6-7

Tcuh yaˇ Peˍtruˆ nyi haꞈ shaˉ paˍ hui htaꞈ kʼoˆ piˇ ve, “Gʼuiˬ sha ve yawˬ awˬ moˍ htaꞈ hkʼa dehꞈ haꞈ shaˉ˗oˆ.” (1 Peˍ 5:1-4) Nawˬ nyi haꞈ shaˉ paˍ hpehꞈ ve kʼo, awˬ viˉ awˬ nyi htaꞈ haꞈ leh a yeˇ yuˬ piˇ gaˇ jaˇ ve tehꞈ ngaˬ hui shiˍ ve yoˬ. Yaꞈ hkʼaˇ, teˇ pawˆ pawˆ kʼo, nawˬ kanˉ maˇ jaˇ ve, maˇ heˆ leh heuˬ jaˇ ve pa taw, awˬ viˉ awˬ nyi htaꞈ hkʼa dehꞈ nyi haꞈ shaˉ piˇ maˇ gʼa tehꞈ dawˇ ve yoˬ. Chi hkʼe hpehꞈ ve kʼo, nawˬ hkʼaˬ hkʼe te cawˇ ve le? Nawˬ dawˇ haˍ ve awˬ lawn Yaˬhoˉvaˬ htaꞈ kʼoˆ piˇ leh nawˬ awˬ viˉ awˬ nyi htaꞈ hkʼaˬ hkʼe taw ga piˇ gaˇ jaˇ ve kaꞈ yawˇ htaꞈ kʼoˆ piˇ sheˍ. Peˍtruˆ kʼoˆ ve, “chaw teˇ gʼaˇ gʼaˇ shu htaꞈ ga piˇ ve kʼo, Gʼuiˬ sha peꞈ laˇ ve awˬ gʼaˇ awˬ shaˉ htaꞈ cuˇ leh ga piˇ˗oˆ.” (1 Peˍ 4:11) Nawˬ ve awˬ viˉ awˬ nyi chi teˇ hkui gu maˇ gʼa ve shoꞈ shaꞈ ve laiˉ ceuˬ gʼa hpuˇ ve yoˬ hehˉ. Yeˍsuˆ “yawˬ hawˉ shehˍ hpaˇ” hpehꞈ leh nawˬ aꞈ kehˉ awˬ viˉ awˬ nyi htaꞈ ga piˇ gʼa jaˇ ve tehꞈ tawnˇ taˍ sheˍ. Yeˍsuˆ lehˬ awˬ viˉ awˬ nyi htaꞈ chi teˇ hkui leh miˬ guiˬ awˬ suhˉ hkʼaw kaꞈ ga piˇ gʼa ve yoˬ. Chi htaꞈ pa taw, Yaˬhoˉvaˬ chi teˇ hkui nyi haꞈ shaˉ paˍ htaꞈ te tcuh gaˇ ve awˬ ceuˬ lehˬ, awˬ viˉ awˬ nyi htaꞈ haꞈ ve, a yeˇ yuˬ piˇ ve, leh “yawˬ awˬ moˍ mehˆ gʼuˇ suhˍ henˇ kuiˬ jawˬ kuiˬ hpehꞈ piˇ˗oˆ.” w23.09 29-30 ¶13-14

Ngaˬ hui miˬ guiˬ yaˇ dawˇ ve hkʼe dawˇ ve htaꞈ jaw kʼai cawˇ ve yoˬ. Miˬ guiˬ yaˇ dawˇ ve hkʼe ngaˬ hui dawˇ ve kʼo, ngaˬ hui Yaˬhoˉvaˬ leh yawˇ ve awˬ liˇ awˬ hkʼaˇ htaꞈ kaꞈ a yeˇ maˇ yuˬ tuˬ yoˬ. (1 Kawˇ 3:19) Maˇ˗awˍ ve chaw lehˬ, yawˇ hui te gaˇ ve hkʼe te ve pa taw, “miˬ guiˬ ve cuˇ yiˍ” htaꞈ dawˇ cawˇ ve yoˬ. Peˍraˍgaˍ venˇ lo ve chaw leh Saˍtiˍrehˇ venˇ lo ve chaw lehˬ, haˉ chawˇ haˉ paˆ te leh shaˉ hoꞈ htaꞈ oˉ kʼoˍ pui ve lehˬ, a hkʼe leˇ hpehꞈ ve tehꞈ dawˇ ve yoˬ. Oˇ kaˬ lo chehˇ ve Hkriꞈ yaˇ teˇ hpaˍ kaꞈ yawˇ hui hkʼe dawˇ la ve yoˬ. Chi htaꞈ pa taw, Hkriꞈ yaˇ chi ve 2 moˍ hkʼaw haˉ chawˇ haˉ paˆ te ve cawˬ ve pa taw, Yeˍsuˆ hehnˇ chaweh beˆ maˍ piˇ ve yoˬ. (Hpeuꞈ 2:14, 20) Chi beuꞈ teˇ co˗e ngaˬ hui kaꞈ miˬ guiˬ yaˇ dawˇ ve hkʼe dawˇ tuˬ nyiˉ laˇ ve chaw lehˬ, yehˬ kʼa hkʼaw ve chaw, awˬ suhˍ awˬ shaˍ hpawˇ ve awˬ viˉ awˬ nyi, maˇ heˆ leh awˬ chawˇ ngaˬ hui ve yonˍ ve awˬ liˇ awˬ hkʼaˇ hehnˇ jaˇ leh, Gʼuiˬ sha ve awˬ liˇ awˬ hkʼaˇ htaꞈ a yeˇ maˇ yuˬ leh maˇ gʼaꞈ te tuˬ te laˇ ve yoˬ. Tawˇ pa haˉ te kʼo, Liꞈ hpu hkʼaw ve awˬ liˇ awˬ hkʼaˇ a yeˇ maˇ uiˍ leh piˍ jaˇ˗oˬ tehꞈ yawˇ hui kʼoˆ laˇ ve yoˬ. Teˇ pawˆ pawˆ kʼo, Yaˬhoˉvaˬ hkʼa tawˍ lehˆ maˇ beˆ maˍ laˇ ve pa taw, “bvuhꞈ taˍ ve awˬ hkʼaˇ suh ceh tiˉ” ngaˬ hui maˇ gʼaꞈ te gaˇ ve yoˬ.—1 Kawˇ 4:6. w23.07 16 ¶10-11

Yeˍsuˆ ve awˬ e Maˍriˆ awˬ gʼaˇ cawˬ tuˬ ga laˇ ve htaꞈ loˍ ve yoˬ. Leh Maˍriˆ awˬ hpawˇ maˇ heuˆ sheˍ leh yawˇ yaˇ kaꞈ maˇ cawˬ jaw sheˍ. Yaꞈ hkʼaˇ, awˬ gʼuˇ suhˍ hpawˇ Meˍsiˉyaꞈ hpehꞈ tuˬ ve yaˇ teˇ gʼaˇ htaꞈ yawˇ gʼa nyi haꞈ shaˉ ve yoˬ. Chi hkʼe ceh tiˉ maˇ heˆ. Maˍriˆ hawˉ hkʼaˆ geh kaꞈ maˇ zuhꞈ jaw sheˍ. Yaꞈ hkʼaˇ, yawˇ yaˇ hu ve tehꞈ yawˇ ve chaw haˉ paˍ Yoˇsehꞈ htaꞈ gʼa kʼoˆ piˇ cawˇ ve yoˬ. Chi hkʼe kʼoˆ piˇ ve lehˬ sha ve maˇ heˆ. (Luˉ 1:26-33) Maˍriˆ awˬ gʼaˇ cawˬ tuˬ aˬ htoꞈ ma ga piˇ ve le? Maˍriˆ awˬ nu ve chaw ga laˇ tcuh ve yoˬ. Tawˇ pa haˉ te kʼo, Maˍriˆ yawˇ ve awˬ vuiˬ chi htaꞈ caˉ daꞈ ve hkʼa dehꞈ te gʼa tuˬ, mvuhˇ naw ma tcuh yaˇ Gaˍbeˍlaˆ kʼoˆ laˇ tuˬ lawˬ ve yoˬ. (Luˉ 1:34) Peuˬ hkʼawꞈ nawˉ, Maˍriˆ yawˇ ve awˬ viˉ awˬ nyi Eˇliˇsaˍbehˆ geh kʼai tuˬ, Yuˇdaꞈ mvuhˇ miˬ hkʼaw hkʼoˆ lawˬ hkʼoˆ lo cawˬ ve venˇ teˇ venˇ lo yawˇ kʼai ve yoˬ. Maˍriˆ gʼoˇ peˬ hkʼaw hu taˍ ve Yaˇ paˍ htaꞈ caˉ daꞈ ve tcuh kaˍ paˍ ve tawˇ hkawˇ kʼoˆ leh Yaˬhoˉvaˬ dawˇ pawnˍ laˇ ve htaꞈ gʼa ve tehꞈ, Eˇliˇsaˍbehˆ Maˍriˆ htaꞈ chiˇ mvuh piˇ ve yoˬ. (Luˉ 1:39-45) Maˍriˆ Yaˬhoˉvaˬ htaꞈ kʼoˆ piˇ ve, nawˬ “kanˇ paˆ uiˍ ve htaꞈ te taˍ peuˬ.” (Luˉ 1:46-51) Maˍriˆ awˬ gʼaˇ cawˬ la tuˬ Yaˬhoˉvaˬ lehˬ mvuhˇ naw ma tcuh yaˇ Gaˍbeˍlaˆ leh Eˇliˇsaˍbehˆ htaꞈ cuˇ ve tehꞈ hkʼa tawˍ lehˆ gʼa mawˬ ve yoˬ. w23.10 14-15 ¶10-12

Yeˍsuˆ ve awˬ laꞈ gʼawˇ 144,000 gʼaˇ htaꞈ daꞈ kehˬ ve awˬ ha hpu leuˆ yuˬ piˇ leh Yaˬhoˉvaˬ geh hkʼa dehꞈ meuˆ daꞈ gʼa ve yoˬ. Yawˇ hui mvuhˇ naw ma hkʼoˆ lo Yeˍsuˆ geh teˇ geh paw hkuˇ gʼa te ve yoˬ. (Hpeuꞈ 14:1) Daꞈ kehˬ ve aˉ po kʼo hkʼaw daꞈ kehˬ ve bawehˇ lehˬ, leuˆ yuˬ taˍ ve chaw miˬ guiˬ hkʼoˆ lo chehˇ htaˇ kaꞈ Gʼuiˬ sha ve yaˇ tehꞈ shawˍ˗oˬ ve htaꞈ kʼoˆ gaˇ ve yoˬ. (Roˉ 8:15-17) Daꞈ kehˬ jaˇ ve bawehˇ mvuhˇ naw ma hkʼoˆ lo kʼoˆ gaˇ ve yoˬ. Chi lehˬ Yaˬhoˉvaˬ ve chehˇ kuiˬ hpehꞈ ve yoˬ. Daꞈ kehˬ ve leh daꞈ kehˬ jaˇ ve bawehˇ awˬ kaˍ lo “hpaˬ kaˍ” kaˍ taˍ ve lehˬ, Yeˍsuˆ ve awˬ to chaw yaˇ hpehꞈ ve htaꞈ kʼoˆ gaˇ ve yoˬ. Chi ve lehˬ Yeˍsuˆ ve awˬ to chaw yaˇ hpehꞈ sheˍ leh mvuhˇ naw ma hkʼoˆ lo taˆ˗e leh co ha hpawˇ ve bon yehˬ lonˉ hkʼaw Paw hkuˇ lonˉ te maˇ gʼa sheˍ. Hkʼe te leh, Yeˍsuˆ yawˇ ve awˬ to gʼa tanˇ piˇ sheˍ ve yoˬ. Chi hkʼoˆ kaꞈ, chi hkʼe te ve lehˬ leuˆ yuˬ taˍ ve chaw teˇ gʼaˇ le le mvuhˇ naw ma hkʼoˆ lo taˆ˗e gʼa tuˬ ve awˬ pon hpehꞈ ve yoˬ. Yaꞈ hkʼaˇ, yawˇ hui mvuhˇ naw ma hkʼoˆ lo laꞈ shawnˍ gʼa tuˬ chaw yaˇ hpehꞈ ve awˬ to gʼa tanˇ piˇ sheˍ ve yoˬ.—Heˍ 10:19, 20; 1 Kawˇ 15:50. w23.10 28 ¶13

Eˇhpaˍrenˍ ve awˬ ceuˬ awˬ hkʼaˇ Giˉdonˍ htaꞈ deˇ piˇ htaˇ, yawˇ maˇ beuꞈ. Yawˇ chaw chi ve teˇ hpaˍ htaꞈ tawˇ daꞈ daꞈ yaw piˇ ve yoˬ. (Suhˉ 8:1-3) Yawˇ nyi ma nuˇ nehˬ ve tehꞈ hpeuꞈ maw piˇ ve lehˬ, chaw chi teˇ hpaˍ aˬ htoꞈ ma ve awˬ lawn htaꞈ beuꞈ ve le naˍ hkʼa dehꞈ na taˍ piˇ ve yoˬ. Eˇhpaˍrenˍ ve awˬ ceuˬ awˬ hkʼaˇ nyi ma gawˬ lehˍ cawˬ la tuˬ, Giˉdonˍ tawˇ yaw piˇ tuˬ awˬ hkʼaˇ shiˍ ve yoˬ. Cuˇ yiˍ cawˬ ve nyi haꞈ shaˉ paˍ Giˉdonˍ htaꞈ henˇ yuˬ gʼa ve yoˬ. Awˬ viˉ awˬ nyi yawˇ hui htaꞈ deˇ piˇ ve htawˇ, yawˇ hui maˇ beuꞈ leh awˬ viˉ awˬ nyi hkʼaˬ hkʼe dawˇ ve htaꞈ yawˇ hui na taˍ piˇ leh tawˇ daꞈ daꞈ yaw piˇ ve yoˬ. (Yaˍ 3:13) Nyi haꞈ shaˉ paˍ chi hkʼe te ve kʼo, Hkriꞈ yaˇ awˬ moˍ hkʼaw dawˇ sha gawˬ lehˍ ve cawˬ tuˬ yoˬ. Giˉdonˍ Meˉdiˍanˍ chaw htaꞈ bawˆ gʼaˇ htaˇ, Iˉsaˍreˍlaˆ chaw yawˇ htaꞈ chiˇ mvuh piˇ ve yoˬ. Awˬ nu ve chaw yawˇ htaꞈ maˇ chiˇ mvuh laˇ tcuh gaˇ. Yaꞈ hkʼaˇ, yawˇ kʼoˆ ve, Iˉsaˍreˍlaˆ chaw maꞈ bawˆ gʼaˇ ve lehˬ Yaˬhoˉvaˬ ga laˇ ve yoˬ. (Suhˉ 8:22, 23) Leh nyi haꞈ shaˉ paˍ hkʼaˬ hkʼe te Giˉdonˍ htaꞈ henˇ yuˬ gʼa tuˬ le? Yawˇ hui Gʼuiˬ sha ve kanˉ hkʼa dehꞈ te gʼa htaˇ, yawˇ hui Yaˬhoˉvaˬ htaꞈ chiˇ mvuh cawˇ ve yoˬ. (1 Kawˇ 4:6, 7) Tawˇ pa haˉ te kʼo, awˬ viˉ awˬ nyi, nyi haꞈ shaˉ paˍ teˇ gʼaˇ htaꞈ maˍ puiˉ leh maˍ cheuˬ jaˇ tehꞈ chiˇ mvuh piˇ htaˇ, yawˇ maˍ ve awˬ lawn Liꞈ hpu hkʼaw cawˬ ve tehꞈ kʼoˆ cawˇ ve yoˬ. Leh Gʼuiˬ sha ve kanˉ hkʼaˇ ngaˬ hui htaꞈ maˍ laˇ ve daꞈ jaˇ tehꞈ kʼoˆ cawˇ ve yoˬ. Teˇ pawˆ pawˆ kʼo, nyi haꞈ shaˉ paˍ dawˇ ve awˬ viˉ awˬ nyi yawˇ maˍ ve awˬ ceuˬ htaꞈ nyi hkʼaˇ suh ve yoˬ hehˉ. Leh awˬ viˉ awˬ nyi Yaˬhoˉvaˬ htaꞈ chiˇ mvuh tuˬ yawˇ te piˇ chehˇ ve laˇ? w23.06 4 ¶7-8

Yaˬhoˉvaˬ ngaˬ hui ve bon lawˬ hkawˇ htaꞈ maˇ hkʼawꞈ laˇ sheˍ ve kʼo, ngaˬ hui a shu yawˇ awˬ to htaꞈ na hkawˇ na nyi cawˇ ve, ‘ngaˬ lawˬ ve cawˇ˗aˬ laˇ?’ Ngaˬ hui awˬ pon aˬ htoꞈ ma daꞈ ve htaꞈ ngaˬ hui shiˍ ve tehꞈ dawˇ ve yoˬ. Yaꞈ hkʼaˇ, chi ngaˬ hui awˬ pon daꞈ ve maˇ heˆ. Shoꞈ shaꞈ ve teˇ ceuˬ ceuˬ htaꞈ caˉ daꞈ ve ngaˬ hui Yaˬhoˉvaˬ geh bon lawˬ ve kʼo, shoꞈ shaꞈ ve htaꞈ gu laˇ tuˬ ngaˬ hui yawˇ geh lawˬ ve yoˬ. Yaꞈ hkʼaˇ, ngaˬ hui ve shoꞈ shaꞈ ve htaꞈ gu laˇ tuˬ awˬ hkʼaˇ Gʼuiˬ sha shiˍ leh, ngaˬ hui loˍ ve awˬ ceuˬ yawˇ ve a loˍ htaꞈ maˇ hawˍ daꞈ ve yoˬ hehˉ. (1 Yoˇ 5:14) Tawˇ pa haˉ te kʼo, yaˇ Yaˬhoˉvaˬ ve kanˉ te leh awˬ tehˬ ve hkʼaw kʼawꞈ chehˇ tuˬ Yaˬhoˉvaˬ ga laˇ tuˬ lawˬ ve awˬ pa awˬ e ve awˬ lawn htaꞈ dawˇ nyi sheˍ. Chi hkʼe lawˬ ve lehˬ nyi˗a kʼo, daꞈ ve yoˬ. Yaꞈ hkʼaˇ, Yaˬhoˉvaˬ yawˇ ve kanˉ te tuˬ chaw teˇ gʼaˇ htaꞈ kaꞈ maˇ nyiˉ piˇ ve tehꞈ ngaˬ hui shiˍ ve yoˬ. Yaˬhoˉvaˬ lehˬ ngaˬ hui teˇ gʼaˇ le le leh yaˇ ehˉ kaꞈ yawˇ ve kanˉ te tuˬ, a shu yawˇ hkʼaˇ yawˇ leuˆ yuˬ tcuh gaˇ ve yoˬ. (Bon 10:12, 13; 30:19, 20) Chi htaꞈ pa taw, awˬ pa awˬ e yaˇ Yaˬhoˉvaˬ ve kanˉ te leh yawˇ htaꞈ awˬ chawˇ te gaˇ tuˬ, yawˇ hui maˍ piˇ ve yaˇ nyi ma hkʼaw gaˬ tuˬ ve awˬ hkʼaˇ htaꞈ shiˍ tuˬ, yawˇ hui Yaˬhoˉvaˬ ga laˇ tuˬ bon lawˬ ve awˬ hkʼaˇ gʼa pa ve yoˬ.—Tawˇ 22:6; Efs 6:4. w23.11 21 ¶5; 23-24 ¶12

Aˬ htoꞈ ma te teˇ gʼaˇ leh teˇ gʼaˇ awˬ gʼaˇ piˇ daꞈ ve a yeˇ uiˍ jaˇ ve le? Chi ngaˬ hui awˬ viˉ awˬ nyi htaꞈ haꞈ ve tehꞈ hpeuꞈ maw piˇ ve yoˬ. Liꞈ hpu htaꞈ caˉ daꞈ ve liꞈ kʼoˆ teˇ kʼoˆ hkʼaw kʼoˆ ve, “awˬ gʼaˇ piˇ daꞈ˗oꞈ.” Choˬ kaˬ lo Pawˇluꞈ kʼoˆ ve, “awˬ gʼaˇ piˇ ve kʼoˆ gaˇ ve lehˬ, shoꞈ shaꞈ ve gʼa hpuˇ jaˇ ve chaw htaꞈ awˬ gʼaˇ piˇ tuˬ awˬ paˇ lo chehˇ taˍ ve yoˬ.” Chi htaꞈ pa taw, awˬ viˉ awˬ nyi tuꞈ ve hkanˍ ve gʼa hpuˇ chehˇ ve chaw htaꞈ ngaˬ hui awˬ gʼaˇ piˇ htaˇ, yawˇ ka tiꞈ yeˬ ve hkʼaw Yaˬhoˉvaˬ ve kanˉ caˉ leh te kʼai tuˬ ngaˬ hui ga piˇ chehˇ ve yoˬ. Ngaˬ hui ga piˇ ve leh awˬ gʼaˇ piˇ ve teˇ pawˆ le le, chi ngaˬ hui yawˇ htaꞈ haꞈ ve tehꞈ hpeuꞈ maw piˇ ve yoˬ. (2 Kawˇ 7:6, 7, 13) Teˇ gʼaˇ leh teˇ gʼaˇ ha kʼaˉ daꞈ ve lehˬ, awˬ gʼaˇ piˇ ve htaꞈ caˉ daꞈ ve yoˬ. Awˬ nu ve chaw htaꞈ ha kʼaˉ puiˉ ve lehˬ, tuꞈ ve hkanˍ ve gʼa hpuˇ chehˇ ve chaw htaꞈ awˬ gʼaˇ piˇ gaˇ ve yoˬ. Chi htaꞈ pa taw, ngaˬ hui yawˇ htaꞈ awˬ gʼaˇ piˇ gʼa tuˬ teˇ gʼaˇ leh teˇ gʼaˇ ha kʼaˉ daꞈ ve awˉ lawˉ gʼa cawˬ cawˇ ve yoˬ. Yaˬhoˉvaˬ ha kʼaˉ puiˉ leh, yawˇ shu htaꞈ awˬ gʼaˇ hkʼaˬ hkʼe piˇ puiˉ ve, Pawˇluꞈ hkʼaˬ hkʼe kʼoˆ ve htaꞈ teˇ geh nyi sheˍ. Pawˇluꞈ kʼoˆ ve, Yaˬhoˉvaˬ lehˬ “ha kʼaˉ puiˉ ve Awˬ pa hpehꞈ leh, dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha hpehꞈ ve yoˬ.”—2 Kawˇ 1:3. w23.11 9-10 ¶8-10

Yeˍsuˆ ve awˬ laꞈ gʼawˇ teˇ gʼaˇ le le tuꞈ ve hkanˍ ve gʼa hpuˇ tuˬ yoˬ tehꞈ shiˍ ve yoˬ. Tcuh yaˇ Pawˇluꞈ kaꞈ chi hkʼa shuˍ gʼa hpuˇ ve yoˬ. Hteˇsaˍlawˇniˆ venˇ hkʼaw chehˇ ve awˬ viˉ awˬ nyi htaꞈ yawˇ kʼoˆ piˇ ve, “tuꞈ ve hkanˍ ve htaꞈ ngaˬ hui gʼa hkanˍ tuˬ yoˬ tehꞈ, ngaˬ hui nawˬ hui geh chehˇ ve teˇ yanˇ ngaˬ hui kʼoˆ taˍ ve yoˬ.” (1 Hteˇ 3:4) Leh Kawˇrenˍhtuˆ venˇ hkʼaw chehˇ ve awˬ viˉ awˬ nyi htaꞈ yawˇ liꞈ bvuhꞈ piˇ ve, “ngaˬ hui gʼa hkanˍ peuˬ ve tuꞈ ve hkanˍ ve teˇ hpaˍ awˬ lawn nawˬ hui htaꞈ shiˍ piˇ gaˇ ve yoˬ. Ngaˬ hui a shaꞈ gʼa ponˬ tuˬ ve htaꞈ maˇ dawˇ.” (2 Kawˇ 1:8; 11:23-27) Chi beuꞈ teˇ co˗e ve Hkriꞈ yaˇ kaꞈ tuꞈ ve hkanˍ ve htaꞈ gʼa hpuˇ tuˬ yoˬ tehꞈ shiˍ ve yoˬ. (2 Tiˆ 3:12) Nawˬ Yeˍsuˆ ve tawˇ hkawˇ na yuˬ leh yawˇ ve awˬ laꞈ gʼawˇ hpehꞈ ve pa taw, awˬ chawˇ, awˬ suhˍ awˬ shaˍ hpawˇ ve awˬ viˉ awˬ nyi nawˬ htaꞈ tawˍ laˇ ve yoˬ hehˉ. Nawˬ teˇ lawn le le htaꞈ ka tiꞈ yeˬ gaˇ ve pa taw, nawˬ kanˉ te kuiˬ lo shoꞈ shaꞈ ve gʼa hpuˇ tuˬ te laˇ˗aw laˇ? (Heˍ 13:18) Nawˬ ve dawˇ law kuiˬ awˬ nu ve chaw htaꞈ kʼoˆ piˇ ve pa taw, mvuhˇ miˬ uˉ peunˍ ve tawˍ laˇ ve gʼa hpuˇ˗aw laˇ? Yaꞈ hkʼaˇ, ngaˬ hui tuꞈ ve hkanˍ ve aˬ htoꞈ ma gʼa hpuˇ ve htawˇ maˇ kʼoˆ, Pawˇluꞈ kʼoˆ ve ngaˬ hui ha lehˬ ve cawˬ tuˬ yoˬ. w23.12 10-11 ¶9-10

Yaˍkoˆ lehˬ shoꞈ shaꞈ ve laiˉ ceuˬ htaꞈ gʼa yeunˇ hkanˍ sheˍ ve yoˬ. Yaˍkoˆ ve yaˇ paˍ 2 gʼaˇ Suˉmonˍ leh Leˍviˆ kaꞈ yawˇ hui ve yehˬ kʼa yaꞈ taw tuˬ te piˇ leh Yaˬhoˉvaˬ ve awˬ meh luˬ tuˬ kaꞈ te piˇ ve yoˬ. Chi hkʼe ceh tiˉ maˇ heˆ. Yaˍkoˆ haꞈ jaˇ ve Raˍhkeˍlaˆ yaˇ paˍ 2 gʼaˇ teˇ gʼaˇ paw htaˇ suh˗e ve yoˬ. Leh oˇ ve teˇ yanˇ meuꞈ lonˉ kaˆ lonˉ gaˬ la ve pa taw, Yaˍkoˆ mawˇ˗oˬ ve htawˇ, Eˇjiˇtuꞈ mvuhˇ miˬ lo gʼa hpaw˗e ve yoˬ. (Awˬ 35:16-19; 37:28; 45:9-11, 28) Yaˍkoˆ shoꞈ shaꞈ ve gʼa hpuˇ maˇ jaˇ ve htawˇ, Yaˬhoˉvaˬ ka tiꞈ te taˍ laˇ ve htaꞈ hkʼaˬ htaˆ kaꞈ yonˍ ve yoˬ. Yaˬhoˉvaˬ Yaˍkoˆ htaꞈ hkʼaˬ htaˆ kaꞈ haꞈ chehˇ sheˍ ve tehꞈ hpeuꞈ maw piˇ ve yoˬ. Tawˇ pa haˉ te kʼo, Yaˬhoˉvaˬ Yaˍkoˆ htaꞈ awˬ bon naꞈ piˇ leh hpu shi mawˇ jeˬ maˇ maˇ cawˬ tcuh ve yoˬ. Yaˍkoˆ yawˇ haꞈ jaˇ ve yaˇ paˍ Yoˇsehꞈ suh maw jaˇ˗oˬ ve tehꞈ dawˇ ve htaꞈ gʼa kʼawꞈ mawˬ daꞈ ve Yaˬhoˉvaˬ htaꞈ awˬ bon uiˍ jaˇ tehꞈ kʼoˆ piˇ ve htaꞈ dawˇ nyi sheˍ. Yaˍkoˆ Yaˬhoˉvaˬ htaꞈ meuˆ daꞈ ve pa taw, yawˇ shoꞈ shaꞈ ve gʼa hpuˇ maˇ jaˇ ve htawˇ yeunˇ hkanˍ gʼaˇ ve yoˬ. (Awˬ 30:43; 32:9, 10; 46:28-30) Chi htaꞈ pa taw, ngaˬ hui Yaˬhoˉvaˬ geh hkʼaˬ htaˆ kaꞈ meuˆ daꞈ ve kʼo, ngaˬ hui maˇ dawˇ maˇ gaˇ ve hkʼaw shoꞈ shaꞈ ve gʼa hpuˇ ve htawˇ, ngaˬ hui yeunˇ hkanˍ gʼaˇ tuˬ yoˬ. w23.04 15-16 ¶6-7

Chiˇ mvuh ve liꞈ kaˇ nanˉ uiˍ 23 hkʼaw Yaˬhoˉvaˬ haꞈ pehnˇ ve, leh nyi haꞈ shaˉ laˇ ve htaꞈ yonˍ gʼa tuˬ hpeuꞈ maw laˇ ve yoˬ. Daˍviˆ lehˬ Chiˇ mvuh ve liꞈ chi teˇ puꞈ bvuhꞈ paˍ hpehꞈ ve yoˬ. Yawˇ kʼoˆ ve, Yaˬhoˉvaˬ lehˬ yawˬ hawˉ shehˍ hpaˇ hpehꞈ leh yawˇ Yaˬhoˉvaˬ geh meuˆ daꞈ ve yoˬ. Daˍviˆ kʼoˆ ve, Yaˬhoˉvaˬ yawˇ htaꞈ sheh kʼai laˇ chehˇ ve pa taw, yawˇ kawˆ tuˬ maˇ cawˬ ve tehꞈ dawˇ ve yoˬ. Leh Daˍviˆ kaꞈ Yaˬhoˉvaˬ htaꞈ hkʼa dehꞈ yonˍ gʼa ve yoˬ. Yawˇ a shaꞈ teꞈ chehˇ ve teˇ co˗e Yaˬhoˉvaˬ yawˇ htaꞈ haꞈ ve tehꞈ, hpeuꞈ maw laˇ chehˇ ve htaꞈ gʼa shiˍ ve yoˬ. Leh Daˍviˆ chi hkʼe taw taw yonˍ gʼa tuˬ aˬ htoꞈ ma te piˇ ve le? Daˍviˆ loˍ ve awˬ ceuˬ hkʼa peu˗eˬ Yaˬhoˉvaˬ ga laˇ chehˇ ve tehꞈ gʼa mawˬ ve yoˬ. Yaˬhoˉvaˬ lehˬ Daˍviˆ ve awˬ chawˇ hpehꞈ leh yawˇ htaꞈ nyi hkʼaˇ suh jaˇ ve tehꞈ gʼa mawˬ ve yoˬ. Chi ve htaꞈ pa taw, Daˍviˆ awˬ gʼuˇ suhˍ hpawˇ aˬ htoꞈ ma gʼa hpuˇ ve htawˇ maˇ kʼoˆ, yawˇ loˍ ve awˬ ceuˬ Yaˬhoˉvaˬ ga laˇ tuˬ yoˬ tehꞈ yonˍ gʼa ve yoˬ. Yaˬhoˉvaˬ Daˍviˆ htaꞈ haꞈ leh hkʼa dehꞈ nyi haꞈ shaˉ laˇ tuˬ yoˬ tehꞈ yonˍ gʼa ve pa taw, yawˇ awˬ gʼaˇ cawˬ ve, ha lehˬ ve, leh teꞈ chiˉ kaꞈ maˇ dawˇ haˍ tuˬ te piˇ ve yoˬ.—Chiˇ 16:11. w24.01 29 ¶12-13

Maꞈ lonˉ 2 pawˆ teˇ pawˆ htaˇ tanˬ leh laiˉ mvuhˇ miˬ hkʼaw Yaˬhoˉvaˬ ve chaw hto toˇ gʼa ve yoˬ. Chi ve lehˬ chaw yaˇ maˇ maˇ Yaˬhoˉvaˬ htaꞈ shiˍ la tuˬ te piˇ leh yawˇ ve kanˉ te la tuˬ kaꞈ te piˇ ve yoˬ. Leh chi teˇ hkui hto toˇ ve kanˉ miˬ guiˬ chi hkʼoˆ lo tzuhˇ kʼai˗oˬ ve yoˬ. Chi beuꞈ teˇ co˗e Uˉ peunˍ ve Kawˍmiˍtiˍ kaꞈ Yeˍsuˆ beˆ maˍ laˇ ve htaꞈ yehˇ chehˇ sheˍ ve yoˬ. Yawˇ hui awˬ viˉ awˬ nyi htaꞈ Yaˬhoˉvaˬ leh Yeˍsuˆ loˍ ve hkʼe beˆ maˍ piˇ chehˇ sheˍ ve yoˬ. Yawˇ hui Hkriꞈ yaˇ awˬ moˍ hkʼaw ve awˬ viˉ awˬ nyi htaꞈ beˆ maˍ piˇ tuˬ, toˇ nyi shehˍ hpaˇ leh nyi haꞈ shaˉ paˍ htaꞈ yehˇ ve yoˬ. Liꞈ hpu hkʼaw kʼoˆ ve, leuˆ yuˬ taˍ ve chaw hpehꞈ ve nyi haꞈ shaˉ paˍ leh Hkriꞈ yaˇ awˬ moˍ hkʼaw nyi haꞈ shaˉ paˍ hkʼa peu˗eˬ Yeˍsuˆ ve “laꞈ sha paˉ” lo chehˇ taˍ ve yoˬ. (Hpeuꞈ 2:1) Chi hkʼe hpehꞈ ve htawˇ, nyi haꞈ shaˉ paˍ teˇ gʼaˇ le le maˇ biˇ ve chaw hpehꞈ ve yoˬ. Yawˇ hui te yaꞈ la ve yoˬ. Moˉseˍ, Yawˇsuˆ leh tcuh yaˇ hui kaꞈ teˇ pawˆ pawˆ kʼo te yaꞈ ve yoˬ. (Heh 20:12; Ys 9:14, 15; Roˉ 3:23) Yaꞈ hkʼaˇ, Yeˍsuˆ Hkriꞈ lehˬ ka tiꞈ yeˬ leh cuˇ yiˍ cawˬ ve, leh nyi haꞈ shaˉ paˍ teˇ gʼaˇ le le htaꞈ kaꞈ beˆ maˍ piˇ chehˇ ve tehꞈ, ngaˬ hui hkʼa tawˍ lehˆ gʼa mawˬ ve yoˬ. Chi htaꞈ pa taw, awˬ viˉ awˬ nyi leuˆ yuˬ taˍ ve chaw htaꞈ cuˇ leh Yeˍsuˆ chi hkʼe te beˆ maˍ laˇ chehˇ ve tehꞈ, ngaˬ hui yonˍ ve yoˬ. w24.02 23-24 ¶13-14

Chi teˇ hkui kaꞈ ngaˬ hui Yaˬhoˉvaˬ ha lehˬ tuˬ te piˇ gʼa ve yoˬ. Chi lehˬ ngaˬ hui Yaˬhoˉvaˬ ve kanˉ te htaˇ, yawˇ htaꞈ awˬ bon uiˍ hkawˇ kʼoˆ piˇ leh nawˬ yawˇ htaꞈ hkʼaˬ hkʼe taw haꞈ ve awˬ nu ve chaw htaꞈ kʼoˆ maˍ piˇ gʼa ve yoˬ. Awˬ nu ve chaw yawˇ htaꞈ shiˍ gʼa tuˬ ngaˬ hui ga piˇ leh Gʼuiˬ sha htaꞈ ngaˬ hui nyi ve hkʼe awˬ nu ve chaw kaꞈ nyi tuˬ ngaˬ hui gʼa ga piˇ cawˇ ve tehꞈ tawnˇ taˍ sheˍ. (Yaˍ 4:8) Liꞈ hpu hkʼaw Yaˬhoˉvaˬ htaꞈ caˉ daꞈ ve hkʼaˬ hkʼe kʼoˆ taˍ ve, leh yawˇ ve te hkʼaˇ dawˇ hkʼaˇ kaꞈ awˬ nu ve chaw shiˍ tuˬ ngaˬ hui ga piˇ gaˇ ve yoˬ. Tawˇ pa haˉ te kʼo, Gʼuiˬ sha lehˬ haꞈ pehnˇ ve, hteˇ ve cawˇ ve, cuˇ yiˍ, kanˇ paˆ, leh Yaˬhoˉvaˬ ve te hkʼaˇ dawˇ hkʼaˇ awˬ nu ve awˬ ceuˬ kaꞈ yawˇ hui htaꞈ kʼoˆ maˍ piˇ gaˇ ve yoˬ. Chi hkʼoˆ kaꞈ, ngaˬ hui Yaˬhoˉvaˬ htaꞈ chiˇ mvuh leh yawˇ ha lehˬ tuˬ te piˇ gʼa ve lehˬ, yawˇ htaꞈ henˇ yuˬ ve yoˬ. Ngaˬ hui chi hkʼe te ve kʼo, haiˬ ve miˬ guiˬ chi hkʼoˆ lo awˬ nu ve chaw htaꞈ peun daꞈ leh aˬ htoꞈ ma te ngaˬ hui yawˇ hui htaꞈ peun daꞈ ve shiˍ gaˇ tuˬ te piˇ ve yoˬ hehˉ. (Maꞈ 5:14-16) Ngaˬ hui awˬ nu ve chaw geh teˇ geh chehˇ htaˇ, aˬ htoꞈ ma te ngaˬ hui teˇ ceuˬ ceuˬ te ve awˬ nu ve chaw htaꞈ maˇ shuˍ ve, teˇ nyi le le ngaˬ hui yawˇ hui htaꞈ kʼoˆ maˍ piˇ tuˬ awˬ yanˇ cawˬ ve yoˬ. Ngaˬ hui chi hkʼe te htaˇ, nyi ma nuˇ nehˬ ve chaw Gʼuiˬ sha htaꞈ shiˍ gaˇ tuˬ kaꞈ te piˇ ve yoˬ. Chi hkʼe te ve lehˬ Yaˬhoˉvaˬ ha lehˬ tuˬ te piˇ ve yoˬ.—1 Tiˆ 2:3, 4. w24.02 10 ¶7

Nawˬ co ha hpawˇ ve chaw mawˇ hpehꞈ tuˬ, nawˬ awˬ bon cawˬ ve teˇ ceuˬ ceuˬ htaꞈ gʼa te jawˬ ve yoˬ. Chi hkʼe te ve lehˬ awˬ bon cawˬ jaˇ. Tawˇ pa haˉ te kʼo, nawˬ Hkriꞈ yaˇ awˬ moˍ hkʼaw ga piˇ gʼa ve, nawˬ awˬ to maˇ heˆ leh yehˬ kʼa htaꞈ hu gʼa ve, leh awˬ viˉ awˬ nyi geh meuˆ daꞈ tuˬ kaꞈ ga laˇ ve yoˬ. Tawˇ pa haˉ te kʼo, liꞈ gʼaw gʼa leh bvuhꞈ gʼa tcuh ve yoˬ. Liꞈ hpu hkʼaw kʼoˆ ve, Yaˬhoˉvaˬ maˍ laˇ ve tawˇ hkawˇ htaꞈ teˇ nyi le le gʼaw leh hkʼa dehꞈ dawˇ nyi ve chaw lehˬ, ha lehˬ ve cawˬ leh yawˇ aˬ htoꞈ ma te ve htawˇ te gʼa tuˬ yoˬ. (Chiˇ 1:1-3) Liꞈ hpu teˇ nyi le le gʼaw ve chaw lehˬ, Yaˬhoˉvaˬ hkʼaˬ hkʼe dawˇ ve htaꞈ shiˍ leh, yawˇ hkʼe ve dawˇ hkʼaˇ cawˬ tuˬ yoˬ. Leh Liꞈ hpu hkʼaw beˆ maˍ laˇ taˍ ve htaꞈ yawˇ yehˇ tuˬ ve awˬ hkʼaˇ shiˍ ve yoˬ. (Tawˇ 1:3, 4) Hkriꞈ yaˇ awˬ moˍ hkʼaw ve awˬ viˉ awˬ nyi lehˬ, awˬ viˉ awˬ nyi hawˉ hkʼaˆ Liꞈ hpu hkʼaw ve awˬ lawn maˍ laˇ leh beˆ maˍ laˇ gʼa ve htaꞈ gʼaˇ va gʼa ve yoˬ. Nawˬ gʼaw gʼa leh hkʼa dehꞈ bvuhꞈ gʼa ve kʼo, nawˬ bon maˍ hkawˇ gu gʼa leh, awˬ viˉ awˬ nyi awˬ bon cawˬ tuˬ hkʼawꞈ gʼa ve yoˬ. Leh awˬ viˉ awˬ nyi co ha hpawˇ yonˍ yeˬ ve cawˬ tuˬ kaꞈ ga piˇ gʼa ve yoˬ. Chi hkʼoˆ kaꞈ, nawˬ gʼaw gʼa leh hkʼa dehꞈ bvuhꞈ gʼa ve kʼo, nawˬ ve liꞈ kʼoˆ hkʼaw bvuhꞈ keu taˍ gʼa tuˬ kaꞈ ga laˇ gʼa ve yoˬ. Chi lehˬ nawˬ co ha hpawˇ yonˍ yeˬ ve cawˬ tuˬ ga laˇ gʼa leh, awˬ nu ve chaw htaꞈ kaꞈ awˬ gʼaˇ piˇ gʼa tuˬ ga laˇ gʼa ve yoˬ. w23.12 26-27 ¶9-11

Nawˬ hkʼaˬ hkʼe htaˇ kawˆ ve kʼo, Yaˬhoˉvaˬ awˬ gʼuˇ suhˍ hpawˇ te tuˬ ve awˬ ceuˬ htaꞈ dawˇ nyi sheˍ. Leh miˬ guiˬ awˬ suhˉ hkʼaw Saˍtanˍ maˇ cawˬ˗o htaˇ, hkʼaˬ hkʼe hpehꞈ tuˬ ve htaꞈ nawˬ dawˇ nyi sheˍ. 2014 hkʼawꞈ hpawnˬ daꞈ lonˉ 3 nyi hkʼaw ngaˬ hui shiˍ tuˬ te maˍ laˇ ve teˇ lawn, awˬ pa hpehꞈ ve chaw yehˬ kʼa hkʼaw ve chaw teˇ gʼaˇ le le geh tawˇ yaw daꞈ ve yoˬ. 2 Tiˆmoˉseˍ liꞈ 3:1-5 hkʼaw kʼoˆ daꞈ ve aꞈ kehˉ, miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ tuˬ kʼoˆ daꞈ ve yoˬ. “Miˬ guiˬ awˬ suhˉ hkʼaw ha lehˬ ve ceh tiˉ cawˬ ve yoˬ. Awˬ lawn kʼo, teˇ gʼaˇ le le haꞈ daꞈ ve, awˬ tehˬ ve htaꞈ haꞈ ve, nyi ma taˍ nehˬ ve, nyi ma nuˇ nehˬ ve, Yaˬhoˉvaˬ htaꞈ chiˇ mvuh ve ceh tiˉ cawˬ tuˬ yoˬ. Yaˇ awˬ pa awˬ e hkawˇ na ve, awˬ bon uiˍ hkawˇ shiˍ ve, ka tiꞈ yeˬ ve, awˬ viˉ awˬ nyi htaꞈ haꞈ ve, teˇ gʼaˇ leh teˇ gʼaˇ yawˆ yan daꞈ ve, shu htaꞈ chiˇ mvuh piˇ ve, a shu yawˇ awˬ to htaꞈ yuˬ tiˍ gʼaˇ ve, nuˇ nehˬ ve, daꞈ ve awˬ ceuˬ htaꞈ haꞈ ve, ka tiꞈ yeˬ ve chaw hpehꞈ ve, na yuˬ puiˉ ve, nyi ma uiˍ ve mvuh ve maˇ cawˬ ve, Gʼuiˬ sha htaꞈ haꞈ leh miˬ guiˬ ha lehˬ tuˬ teˇ hpaˍ htaꞈ maˇ te ve chaw hpehꞈ ve yoˬ. Leh Gʼuiˬ sha htaꞈ nyi ma awˬ tawˬ hkʼa gaˬ yawˆ yan ve chaw hpehꞈ ve yoˬ. Nawˬ chaw chi teˇ hpaˍ htaꞈ awˬ chawˇ te sheˍ.” Nawˬ awˬ pon kʼo, miˬ guiˬ awˬ suhˉ hkʼaw ve a shaꞈ teꞈ hkʼaˇ hkʼaˬ hkʼe hpehꞈ ve, nawˬ ve yehˬ kʼa hkʼaw ve chaw, maˇ heˆ leh awˬ chawˇ geh yaw daꞈ gaˇ˗aw laˇ? w24.01 6 ¶13-14

“Gʼuiˬ sha lehˬ yawˇ ve chaw teˇ hpaˍ htaꞈ nyi ma cawˇ ve” yoˬ tehꞈ, ngaˬ hui gʼa shiˍ htaˇ awˬ gʼaˇ gʼa jaˇ ve yoˬ. (Chiˇ 149:4) Yaꞈ hkʼaˇ, chaw teˇ hpaˍ hkʼa dehꞈ maˇ yonˍ gʼa leh htawˇ dawˇ nawˬ dawˇ cawˬ ve yoˬ. Leh ‘Yaˬhoˉvaˬ yawˇ htaꞈ nyi hkʼaˇ suh˗aw laˇ?’ tehꞈ, Liꞈ hpu ve awˬ co˗e htaˇ, Gʼuiˬ sha ve kanˉ te ve chaw teˇ hpaˍ kaꞈ chi hkʼe dawˇ jaw ve yoˬ. (1 Saˍ 1:6-10; Yb 29:2, 4; Chiˇ 51:11) Maˇ biˇ ve chaw yaˇ kaꞈ Yaˬhoˉvaˬ nyi hkʼaˇ suh tuˬ te piˇ gʼa ve tehꞈ, Liꞈ hpu hkʼaw hkʼa tawˍ lehˆ hpeuꞈ maw laˇ ve yoˬ. Chi hkʼaˬ hkʼe te hpehꞈ kʼai gʼa ve le? Chaw oˇ ve teˇ gʼaˇ Yeˍsuˆ htaꞈ yonˍ leh Baˆtiˆsaˬ haꞈ yuˬ ve kʼo, hpehꞈ kʼai gʼa ve yoˬ. (Yoˇ 3:16) Chi htaꞈ pa taw, ngaˬ hui awˬ tehˬ awˬ na venˇ baˆ dawˇ hpfuhˆ˗oˬ ve tehꞈ, awˬ nu ve chaw mawˬ tuˬ gʼa te cawˇ leh, Yaˬhoˉvaˬ loˍ ve teˇ ceuˬ le le te tuˬ ngaˬ hui awˬ to chiˇ aꞈ˗oˬ ve tehꞈ, awˬ nu ve chaw mawˬ tuˬ kaꞈ gʼa te cawˇ ve yoˬ. (Tcuh 2:38; 3:19) Ngaˬ hui Yaˬhoˉvaˬ geh meuˆ daꞈ tuˬ, awˬ ceuˬ chi ve teˇ hpaˍ htaꞈ te ve yawˇ ha lehˬ jaˇ ve yoˬ. Ngaˬ hui awˬ to chiˇ aꞈ taˍ ve hkʼe gʼaꞈ te ve kʼo, Yaˬhoˉvaˬ ngaˬ hui htaꞈ nyi hkʼaˇ suh jaˇ leh yawˇ ve awˬ chawˇ tehꞈ shawˍ laˇ ve yoˬ.—Chiˇ 25:14. w24.03 26 ¶1-2

Mvuhˇ miˬ uˉ peunˍ paˍ ngaˬ hui htaꞈ maˇ hto toˇ tcuh laˇ ve htawˇ, ngaˬ hui Yeˍsuˆ ve awˬ laꞈ gʼawˇ hui htaꞈ henˇ yuˬ leh caˉ leh hto toˇ cawˇ ve yoˬ. Ngaˬ hui Yaˬhoˉvaˬ ve kanˉ caˉ leh te gʼa tuˬ yawˇ ga laˇ tuˬ yoˬ tehꞈ yonˍ gʼa ve yoˬ. Ngaˬ hui haꞈ hanˉ ve leh cuˇ yiˍ cawˬ gʼa tuˬ bon lawˬ gʼa ve yoˬ. Ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ Yaˬhoˉvaˬ ga laˇ tuˬ lawˬ sheˍ. Ngaˬ hui laiˉ gʼaˇ awˬ to hpawˇ maˇ heˆ leh nyi ma hpawˇ naˬ ve, haꞈ ve chaw suh˗e ve, yehˬ kʼa hkʼaw shoꞈ shaꞈ ve awˬ lawn gʼa hpuˇ ve, fawˉ ve mehˍ ve gʼa hpuˇ ve, maˇ heˆ leh shoꞈ shaꞈ ve awˬ nu ve, leh chi ve hkʼa peu˗eˬ ngaˬ hui gʼa hpuˇ ve yoˬ hehˉ. Naˬ beuˬ a naˍ maˇ heˆ leh maꞈ te daꞈ ve gʼa hpuˇ ve kʼo, chi ve teˇ hpaˍ htaꞈ yeunˇ hkanˍ gʼaˇ tuˬ haˍ ve yoˬ. Chi ve teˇ hpaˍ nawˬ gʼa hpuˇ chehˇ ve kʼo, nawˬ hkʼaˬ hkʼe gʼa hpuˇ chehˇ ve leh hkʼaˬ hkʼe dawˇ ve meuˆ daꞈ jaˇ ve awˬ chawˇ htaꞈ kʼoˆ maˍ piˇ ve hkʼe, bon lawˬ ve hkʼaw Yaˬhoˉvaˬ htaꞈ kʼoˆ maˍ piˇ sheˍ. Leh Yaˬhoˉvaˬ “nawˬ htaꞈ ga laˇ tuˬ yoˬ” tehꞈ yonˍ gʼa ve yoˬ. (Chiˇ 37:3, 5) “Tuꞈ ve hkanˍ ve htaꞈ gʼa hkanˍ ve teˇ yanˇ” yeunˇ hkanˍ gʼaˇ tuˬ hkʼaˬ htaˆ kaꞈ bon lawˬ ve lehˬ ngaˬ hui htaꞈ ga laˇ gʼa ve yoˬ. (Roˉ 12:12) Yaˬhoˉvaˬ yawˇ ve kanˉ te ve chaw aˬ htoꞈ ma gʼa hpuˇ chehˇ ve htaꞈ shiˍ leh “yawˇ hui kuˬ hkawˇ htaꞈ yawˇ na yuˬ leh ponˬ piˇ ve yoˬ.”—Chiˇ 145:18, 19. w23.05 5-6 ¶12-15

Ngaˬ hui a yeˇ uiˍ ve awˬ lawn gʼa dawˇ cheˆ htaˇ, ‘Yaˬhoˉvaˬ ve a loˍ’ hkʼaˬ hkʼe cawˬ ve htaꞈ ngaˬ hui coˇ caˇ leh gʼa na gʼa cawˇ ve yoˬ. Leh chi ve htaꞈ gʼa gʼaꞈ te ve yoˬ. (Efs 5:17) Ngaˬ hui teˇ ceuˬ ceuˬ gʼa hpuˇ htaˇ, chi ve htaꞈ caˉ daꞈ ve ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ gʼa hpfuhˆ nyi ve yoˬ. Chi hkʼe hpfuhˆ nyi ve lehˬ, Yaˬhoˉvaˬ hkʼaˬ hkʼe dawˇ ve htaꞈ ngaˬ hui shiˍ gaˇ leh yawˇ ve awˬ liˇ awˬ hkʼaˇ htaꞈ ngaˬ hui gʼaꞈ te ve kʼo, cuˇ yiˍ cawˬ ve hkʼaw dawˇ cheˆ gʼa ve yoˬ. “Haiˬ ve awˬ shehˍ hpaˇ” Saˍtanˍ lehˬ, miˬ guiˬ hkʼoˆ lo beˬ laˇ ve awˬ ceuˬ ngaˬ hui htaꞈ leuˉ leh te tcuh gaˇ ve yoˬ. Ngaˬ hui chi hkʼe tiˉ te chehˇ ve kʼo, Gʼuiˬ sha ve kanˉ te tuˬ awˬ yanˇ maˇ cawˬ ve yoˬ. (1 Yoˇ 5:19) Hkriꞈ yaˇ teˇ hpaˍ hpu ca ve htaꞈ awˉ lawˉ teh ve, liꞈ chi mvuh mvuh henˇ ve, maˇ heˆ leh Yaˬhoˉvaˬ ve kanˉ te ve aꞈ kehˉ, chi ve teˇ hpaˍ htaꞈ a yeˇ uiˍ jaˇ tehꞈ shawˍ ve yoˬ. Chi hkʼe te ve kʼo, yawˇ miˬ guiˬ yaˇ hkʼe ve dawˇ hkʼaˇ cawˬ la˗oˬ ve yoˬ. Awˬ tehˬ kʼo, chi ve teˇ hpaˍ yaꞈ ve maˇ heˆ. Yaꞈ hkʼaˇ, chi ve teˇ hpaˍ ngaˬ hui awˬ pon a yeˇ uiˍ jaˇ ve tehꞈ taˇ shawˍ. w24.03 24-25 ¶16-17