Kamukaikelenga ira Yohova unosangalala na nyo

1. N’nga arumiwi enango ororomeleya a Yohova tanoorucheya na mathuulelo avi?

PYOLIMBI-A idhiwa ira Yohova unosangalala naatwee othene ninga gulu. Bibilya linoonga ira: “Yohova unosangalala naatwee.” (Sal. 149:4) Mbweye hora dhinango atu enango anokaikela novifukanga ira, ‘N’nga Yohova unosangalala na miyo vamekene?’ Anjinji mwaarumiwi ororomeleya a Yohova awalelene hora dhinango tanoorucheya na mathuulelo enala.—1 Sa. 1:6-10; Yob. 29:2, 4; Sal. 51:11.

2. N’nga mbaatu avi Yohova anoasangalalana liye?

² Bibilya linothonyi-edha ira atu enao oi kai olongomana, anooda m’sangalali-a Yohova. N’nga ninairena a-vi vyevi? Ninofwanela m’roromela Yesu Kristu nobadiziwa. (Ju. 3:16) Naira ee-no ninothonyi-edha vochena ira nitochinyuwa vyodawa vi-u thitho nitolanyedha ira ninongo irana vyongo vinofuna Nlungu. (May. 2:38; 3:19) Yohova unosangalala aniona niirangana vyevi naifunelo yoi nikale vauxamwali olimba na liye. Yohova unosangalala na i-yo thitho unoniona ira nili afwee avarimani nadhowanave iranga vyongo vyothene vinaode i-yo, vokwakwaneli-edha vyalanyedhile i-yo vahora yavivelela i-yo.—Sal. 25:14.

3. N’nga ninofuna nitapanyeni n’ni muyofunjedha yei?

³ N’nga mwasiwa ngwan’ni hora dhinango atu enango anooda vivwanga ninga Nlungu kanosangalala naaliwa? N’nga Yohova unothonyi-edha a-vi ira unosangalala na i-yo? N’nga Makristau tanaire a-vi ira ta-akaikelenga ira Nlungu unosangalala naaliwa?

MWASIWA NGWAN’NI ATU ENANGO ANOTHUULELA IRA YOHOVA KANOSANGALALA NAALIWA?

4-5. Angalive ira hora dhinango ninooda vionango ninga o-okaana basa, n’nga ninooda kala osikimizela n’ni?

⁴ Anjinji a i-yo nikadhi nirucheyanga na mathuulelo ovionanga ira nili atu o-okaana basa romela ningali a-ima. (Sal. 88:15) Bali mwinango dhinalee Adrián aongile: “Hora dhothene ndaviona ninga mutu o-okaana basa. Ndanoolobela ira banja li-u lidha volowe muilambo ipya angalive ira miyo ndili o-ofwanelela volowa muilambwiyo.” Tony wenuo a-aulukulele banji mwa Amboni aongile ira: “Anamabalanga katinandiwandelevo ira anondidhiveliwana venango ndinyindela. Vyevyo vyanoondiiri-a ira ndivionenga ira kavali yongo iliyothene inaire miyo ira ndisangalali-enga anamabalanga.”

⁵ Akala hora dhinango ninorucheya na mathuulelo ovionanga ninga atu o-okaana basa, nithuulelengani ira ngu Yohova uniitanile. (Ju. 6:44) Yohova unoona vyongo vyapama mwa i-yo vyoi i-yo okene kaninoviona thitho liye unoidhiwa pama mirimi-u. (1 Sa. 16:7; 2 Li. 6:30) Kaninofwanela kaikelanga aniwandela ira nili atu apereso yavadhulu.—1 Ju. 3:19, 20.

6. N’nga rumiwi Paulo avivwa a-vi namwasa wa vyodawa vyairile liye walelene?

⁶ Anjinji a-iyo na-anafunjedhe imbarimbari, nanoira vyongo vyoi ninoviombanave landu fiyedha va-eeni. (1 Pe. 4:3) Masiki Makristau ororomeleya, anolimbanana rima ofuna irana vyongo vyothakala. N’nga nyo munoviomba thitho landu? Akala ndi ee-no, idhiwa ira arumiwi anjinji ororomeleya a Yohova takadhi taviombanga landu. Mofwanafwani-a, rumiwi Paulo anoovivwela tangaranga athuulela vyongo vyadawi-idhe liye. (Aro. 7:24) Pyaimbarimbari ira atoochinyuwa vyodawavyee nobadiziwa. Mbwenye liye atoovionga ira “ndili mwana maningi vari vaarumiwi othene” thitho “ndili odawa maningi.”—1 Ak. 15:9; 1 Ti. 1:15.

7. N’nga ninofwanela thuulelanga n’ni vamwasa wa vyongo vyadawi-idhe i-yo ndulimu?

⁷ Babi-u wa dhulu Yohova unonilanyedha ira nachinyuwa unonilevelela. (Sal. 86:5) Nadhivwelanga tangaranga namwasa wa vyodawa vyairile i-yo, kanikaikelenga Yohova aniwandela ira utonilevelela.—Ako. 2:13.

8-9. N’nga ninamali-e a-vi mathuulelo oonanga ira kavali yongo inaire i-yo ira nim’sangalali-enga Yohova?

⁸ I-yo othene ninofuna ira nim’labelenga Yohova ninga mwemo munaodele i-yo. Mbwenye atu enango anoona ira kavali yongo iliyothene inaire aliwa ira Yohova asangalalenga na aliwa. Rongola mwinango dhinalee Amanda aongile ira: “Hora dhinjinji ndinothuulela ira irana vyongo vinjinji vom’labela Yohova unothapulela ira hora dhothene ndiirenga vyongo vinjinji kwaranya vyongo vinaode miyo irana. Voi ee-no ndanoovilimbi-edha ira ndiirengana vyongo vinjinji kwaranya vyevyo vinaode miyo. Mbwenye ndaimwanana irana vyongovyo, ndanoosukwala maningi voi ndathuulela ira na Yohovene utosukwala maningi.”

⁹ N’nga ninaire a-vi ira nimali-e mathuulelo aliothene oonanga ira kavali yongo iliyothene inaire i-yo ira nim’sangalali-e Yohova? Nithuulelengani ira Yohova unonivwechecha thitho ngololela. Yohova kanodedi-edhela ira niirenga vyongo vya-anaode i-yo irana. Yohova unosimba vyongo vyothene vinoirana i-yo vodhilimbi-edha. Muthuulelenga thitho vifwanafwani-o vya Bibilyani vyaatu enao tam’labenle Yohova na rimiwa othene. Mofwanafwani-a, kathuulelani vya rumiwi Paulo. Liye atoolaba basa mwathindhi maningi, wenda maulendo olapa maningi thitho romi-a mipingo minjinji. N’nga vyongo vyachinjile aliwa vaingumiyee noimwanananga irana vyongo vinjinji va basa yolaleela, Nlungu kaasangalala na liye? Imbarimbari choi Nlungu anoosangalala na liye. Paulo atoodhowanave irangana vyongo vyaoda liye thitho Nlungu atom’raeli-a. (May. 28:30, 31) Molandana na rumiwi Paulo, vyongo vinoira i-yo vom’labela Yohova vinooda chinja. Mbwenye wa Yohova yongo yofuneya maningi chiifunelo yeyo ina i-yo va vyongovyo. Va-eeni dhoweni nitapanyeni ndhila dhinango dhinothonyi-edha Yohova ira unosangalala na i-yo.

N’NGA YOHOVA UNOTHONYI-EDHA A-VI IRA UNOSANGALALA NA I-YO?

10. N’nga “ninavivwe” a-vi Yohova aniwandelanga ira unosangalala na i-yo? (Juwau 16:27)

¹⁰ Dhela Bibilyani. Yohova unofunechecha wandela atu anoadhiveliwana liye ira unosangalala naaliwa. Malemba anoonga fendo mbinli vevo Yohova vyam’mwandenle liye Yesu ira ngumwanee odhiveliwiwa thitho unosangalala na liye. (Mat. 3:17; 17:5) N’nga mungadhiveliwile uvwa Yohova ausikimizeli-angani ira unosangalala na nyo? Yohova unoonga na i-yo ira unonidhiveliwana mbwenye kai vamethoni na vametho liye unoonga na i-yo dhela M’madhwee Bibilyani. Ninovwa madhu a Yohova oonga ira unosangalala na i-yo naleringa madhu a Yesu mumabukhu amilanyu yaphama. (Muleri Juwau 16:27.) Yesu anoo-arela pama makalelo Ababee. Voi naleringa ira Yesu anoosangalala na anama-arelee ororomeleya oi katali olongomana, ninoidhiwa thitho ira Yohova unosangalala na i-yo.—Ju. 15:9, 15.

11. N’nga nagumanangana nyarwa vinothapulela ira Yohova kanosangalala na i-yo? (Yakobo 1:12)

¹¹ Dhela mu vyoiravyee. Yohova ngofunechecha nikami-a. Mofwanafwani-a, Yohova unoniva-a vyongo vinofuneela i-yo. Hora dhinango unorumeli-a ira nigumanena nyarwa ninga mwemo mwairele liye na Yobo wenuo ali olongomana. (Yob. 1:8-11) Nagumanangani nyarwa kavinothapulela ira Nlungu kanosangalala na i-yo. Malomwee vyevi vinoniva-a ngari yothonyi-edha ira ninom’dhiveliwana maningi Nlungu nom’roromela. (Muleri Yakobo 1:12.) Ninoonani ira Yohova unonisamalela mwaudhivela anikami-anga vilela nyarwa.

12. N’nga ninofunjedhavo n’ni vavyongo vyam’mwireele Dmitrii?

¹² Kathuulelani vyam’muireele bali mwinango wau Asiya dhinalee Dmitrii. Basalee latoomala thitho vatoovira myedi minjinji a-anafwanye basa n’nango. Dmitrii atoothuulela voira vyongo vinjinji vabasa yolaleela, vyevyo vyathonyi-edha ira anom’nyindela maningi Yohova. Vatoovira myedi minjinji a-anafwanyeve basa. Voi ee-no atooroma bulela maningi thitho akalecha ogonathene. Liye atooroma vikaikela akala ali lombwana venango baba wa pama thitho akala Yohova anoosangalala na liye. Namaulo adambo lelo, mwanee wa-iyana atoolemba vakartani madhu anofwanyeya va lemba la Esaya 30:15 anoonga ira: “Munodha kala akopolo mwakala opwaseya thitho mwathonyi-edhanga ira munondinyindela.” Mwaneuo atoodhana kartalo vagoni babee noonga ira, “Baba mwaonanga ira kamunovivwa pama, muthuulelenga lemba leli.” Dmitrii atoozindiyela ira Yohova anookami-a banjalee fwanya vyodya, vyowara na limburo lokaathi. Dmitrii aongile ira: “Vyongo vyafuneela miyo irana kukalave opwaseya nodhowanganave nyindela Nlungwanga.” Nyo thitho mwagumanangana vyowesedha ninga vyevi, kamukaikelenga ira Yohova unoudhiveliwanani thitho unodha ukami-ani vilela.

13. N’nga Yohova unooda i-ndi-edha basa aani vofuna nithonyi-edha ira unosangalala na i-yo? N’nga unoirana a-vi vyevi?

¹³ Dhela wa Makristau afwi-u. Yohova uno-indi-edha basa abali naarongoli-u vofuna nithonyi-edha ira unosangalala na i-yo. Mofwanafwani-a, unooda iri-a abali enango ira taonge madhu olimbi-a vahora yofwanelela. Vyevi piyevyo vyam’muireele rongola mwinango wau Asiya wenuo avikumbanyedha maningi. Rongoluo basalee latoomala thitho atooroma bulela maningi. Vasogolovee man’nee atoira yodawa ilukulu no-ii-iwa izoyee ninga ndimuwa wavapingoni. Rongolula aongile ira: “Kandavwechecha mwasiwa vyongo vyothene vyevi vyanoireya. Ndathuulela ira venango nditoira vyongo vinango vyodaweya thitho Yohova kanosangalala na miyo.” Rongolula atom’vepa Yohova ira am’sikimizele ira unosangalala na liye. N’nga Yohova am’sikimizele a-vi rongolula? Liye aongile ira: “Andimuwa avapingoni tatoonga na miyo thitho tatoondisikimizeli-a ira Yohova unondidhiveliwana.” Vangavirile hora atom’vepa Yohova ira am’kami-e. Rongolula aongile ira: “Dambo lelolene ndatoowachela makarta okumela wa abali naarongola apingoni. Vahora yaleri miyo madhwiwa olimbi-ala, ndatoona ira Yohova utowakula malobelwanga.” Hora dhothene Yohova unothonyi-edha ira unosangalala na i-yo dhela mumadhwee olimbi-a enao anoniwandela abali naarongoli-u.—Sal. 10:17.

14. N’nga ndi ndhila inango iivi inothonyi-edha Yohova ira unosangalala na i-yo?

¹⁴ Yohova unothonyi-edha ira unosangalala na i-yo vo-indi-edha basa Makristau ira taniva-e malangi-o akala pyofuneeleya. Mofwanafwani-a, hora ya arumiwi Yohova atoo-indi-edha basa Paulo ira alembele Makristau afwee makarta 14. Makartanimo mwatookala malangi-o akopolo na audhivela. Mwasiwa ngwan’ni Yohova atom’mwandela Paulo ira alembe malangi-o ala? Yohova ngu Baba waudhivela thitho unolangi-a a-imee “enao anoasangalalana liye.” (San. 3:11, 12) Nawachela malangi-o a Bibilyani nionenga ira nguumboni othonyi-edha ira Nlungu unosangalala na i-yo. (Aeb. 12:6) N’nga ndi vyongo vinango viivi vinothonyi-edha ira Yohova unosangalala na i-yo?

UMBONI UNANGO OTHONYI-EDHA IRA NLUNGU UNOSANGALALA NA I-YO

15. N’nga Yohova unovelela zimwee ochena wa atu avi? N’nga mwasiwa ngwan’ni vyevi pyolimbi-a?

¹⁵ Yohova unovelela zimu ochena wa atu enao anoasangalalana liye. (Mat. 12:18) Nidhifukenga ira: “N’nga miyo ndinothonyi-edha makalelo oi ngu zimu wa Nlungu unondikami-a ira ndaakaena? N’nga va-eeni munoona ira muli oleva rima maningi mwafwanafwani-edha na hora yali nyo mwa-anafunjedhe vyoonga Yohova? Imbarimbari choi mwathonyi-edhanga maningi makalelo oi ngu zimu ochena uukami-idheni ira mwaakaena, paevo thitho vanoona nyo umboni othonyi-edha ira Nlungu unosangalala na nyo.—Muone kwadru la muru oi: “Makalelo enao atu anokaana aliwa mokami-iwa na zimu ochena.”

16. N’nga Yohova uno-ndi-edha basa atu aavi ira talaleele milanyu yaphama? N’nga nyo munovivwa a-vi namwasa wa vyevi? (1 Atezalonika 2:4)

¹⁶ Yohova unovelela basa yolaleela milanyu yaphama waatu anosangalala na liye. (Muleri 1 Atezalonika 2:4.) Kaonani mwemo rongola mwinango dhinalee Jocelyn mwaganyalele liye namwasa olaleela milanyu yaphama. Dambo n’nango liye avenyathidhe angali osukwalene. Jocelyn aongile ira: “Kandana kopolo voi ndaviona ninga mutu o-okaana basa. Mbwenye vahora yeniyo ndali painiya thitho va dambo lelo lali loi ndidhowe muurumiwini. Ndatoolobela wa Yohova thitho ndatooda dhowa muurumiwini.” Va dambo lelo Jocelyn atoogumana na m’ma mwinango oriya rima dhinalee Mariya oi atoorumela funjedha Bibilya. Vangavirile myedi mingasi Mariya atom’mwandela Jocelyn ira vahora yagogoda liye suwo ali alobelanga wa Nlungu ira am’kami-e. Vothuulela vyaireilevi, Jocelyn aongile ira: “Ndavivwa ninga Yohova unandiwandela ira, ‘Ndinosangalala na weyo.’” Pyaimbarimbari ira kai hora dhothene vevo atu vananivuruwanenga aliwa nalaleelanga. Mbwenye kanikaikelenga akala Yohova unosangalala nadhilimbi-edha wandela atu enango milanyu yapama.

17. N’nga ninofunjedhavo n’ni va vyevyo vyaongile Vicky vyoonga vya yotuva yakuto? (Salimo 5:12)

¹⁷ Yohova uno-indi-edha basa kuto ira akami-e atu enao anosangalala na liye. (1 Ti. 2:5, 6) N’nga a-vi akala rimi-u unoruni-ave vyoi Yohova unosangalala na i-yo angalive ira ninororomela kuto thitho nitomala badiziwa? Nithuulelengani ira kai hora dhothene inaroromelenga i-yo rimi-u, mbwenye niroromelenga maningi Yohova. Liye unoona ira atu anororomela kuto mbolongomana thitho unowalanyedha ira unodha araeli-a. (Muleri Salimo 5:12; Aro. 3:26) Thuulela vya kuto watom’kami-a maningi Vicky. Dambo n’nango angaromile thuulela vya yotuva yakuto, atoonga ira: “Yohova ukadhi alevanga rima maningi na miyo wahora indendai, mbwenye vili ninga ndinam’mwandela ira, ‘Nyo Yohova kamunam’dhiveliwena mutu ninga miyo. Sembe ya Mwaninyu kinakunele vyodawa vyanga.’” Angathuulele maningi vya yotuva yakuto, atooroma ona ira Yohova unom’dhiveliwana. Na-iyene thitho nathuulelangani vya yotuva yakuto, ninoroma onanga ira Yohova unonidhiveliwana.

18. N’nga akala ninodhowanave m’dhiveliwana Babi-u wadhulu kaninofwanela kaikelanga vyan’ni?

¹⁸ Angalive ira ninovilimbi-edha a-rela makundo atapanyileni i-yo ala, hora dhinango ninooda sukwala nokaikelanga akala Yohova unosangalala na i-yo. Vyaireya e-no, muthuulelenga ira Yohova unosangalala naatu enao “anodhowanave m’nyindela.” (Yak. 1:12) Mudhowenave kala vauxamwali na Yohova thitho muonenga ndhila dhinothonyi-edha liye ira unosangalala na nyo. Hora dhothene muthuulelenga ira Yohova “kali undendai na mutu uliwethene wa i-yo.”—May. 17:27.