Nkomá ya batángi

Kozanga mosala Napesi bino matɔ́ndi mingi mpo na molɔngɔ́ ya masoló ya motó na likambo “Kozanga mosala​—Mwango ya kolónga mozali.” (8 Mársi 1996, ebimeli ya Lifalansé) Masoló yango mayaki mpenza na ntango nazalaki koluka mosala, kasi nazwaki mosala te. Namekaki komilukela mosala na ndako, ndenge bolobelaki yango na lokasa 11, mpe yango ezali kotambola malamu mpo na ngai. Matɔ́ndi epai na Yehova mpo na bino!

J. M., Guyane française

Masoló yango malobelaki ezalela oyo nautaki kozala kati na yango kala mingi te. Na ntáká ya basanza bobele moke, nasengelaki komimesenisa na kosala “misala ya lolenge nyonso,” bobele ndenge lisoló moko elobaki yango. Kasi nalɛmbaki nzoto te mpo na yango. Nasalaki makasi ya kozala na makanisi ya bolóngi, mpe nsukansuka nazwaki mosala moko ya ngwi. Na boumeli ya ntango nyonso wana, nazalaki kosungama na mwasi na ngai, oyo ayebaki kosalela mosolo malamu. Natɔ́ndi bino lisusu mpo na masoló wana oyo mazali kosalisa biso na kosalela mitindá ya Biblia na ntango ya mikakatano.

U. C., Italie

Nasepelaki mingi na etánda na bino oyo elobaki ete “Komilukela mosala na ndako.” Nazali mobongisi-nzela ya sanza na sanza, mopalanganisi ya nsango malamu ntango nyonso, mpe na boumeli ya mbula mibale nazalaki kosala na esika monene ya bobateli-bana. Nazalaki kobatela bana liboso mpe nsima ya kelasi, mpe nazalaki kozwa lifuti malamu. Yango epesaki ngai nzela ya kosakola na katikati ya mokolo, mpe mosala na ngai mozalaki kozwa ngai bobele ngonga minei mokolo na mokolo. Baboti mingi bamonisaki botɔ́ndi mpamba te ezali mpasi kozwa moto oyo azali kobatela bana malamumalamu. Nazali kolikya ete basusu mpe bakoki kozwa mosala oyo ekosunga bango na kosalela Yehova.

T. K. L., États-Unis

Bopesaki makanisi ete bato oyo bazangi mosala bakoki kosala misala na bango moko, na ndakisa kobongisa biloko oyo bibebá, kokata bato nsuki, kosɛnzɛla lopango, mpe bongo na bongo. Bolobaki mpe ete na bantango mosusu bato yango bakoki kosala piblisité mpo na misala na bango na kosaleláká bato misala yango ofelé to na ntalo moke. Likambo yango likobuka mibeko ya Letá na mboka Allemagne te?

R. T., Allemagne

Mibeko mikeseni engebene mboka na mboka, mbala mosusu makanisi wana makoyokana te na mibeko ya mikili misusu. Yango wana, na lokasa 9, tomonisaki ntina ya koyeba mpe kotosa mibeko mitali mpako liboso ya komikɔtisa na mosala motindo wana. Baklisto basengeli kotosa mibeko ya mikili epai kuna bafandi. (Baloma 13:1)​—BABIMISI.

Zoo (lopango ya banyama)  Nasepelaki mpenza na lisoló oyo lilobaki “Koyekola Biblia​—Kati na Zoo!” (8 Mársi 1996, ebimeli ya Lifalansé) Makambo oyo malobamaki na ntina na banyama oyo batángami kati na Biblia esepelisaki ngai mingi. Nayebaki soke moke te ete zɛbrɛ elobelami kati na Biblia. Nasepelaki mpe na paragrafe oyo elobelaki nsɛlɛlɛ. Lisoló yango lilendisi ngai ete nasala bolukiluki mpo na koyeba ata nyama moko na sanza moko.

M. F., États-Unis

Moninga na ngai ya motema Nalingi komonisa botɔ́ndi na ngai ya solosolo mpo na lisoló kitoko oyo lizali na motó na likambo ete “Moninga na ngai ya motema.” (Apríli-Yúni 1996) Nazalaki na esengo ya kotánga ete boninga ya motema motindo wana esalemaki atako bokeseni monene ezalaki na mbula ya kobotama. Yango emonisi mpenza ete bilenge basɛngisami te kozala na boninga makasi bobele na baoyo bakokani na bango na mbula ya kobotama. Ezali na ebele ya bampaka oyo bazali na makambo mingi ya kopesa, na eksperiansi, na mayele, mpe na masɛki.

S. T., Angleterre

Lisoló yango limonisaki ete boyokani malamu ekoki kosalema kati na bilenge mpe bampaka mpe ete bilenge bakoki kozwa litomba na eksperiansi mingi oyo bampaka bazali na yango. Ngai moko mpe nazalaki kolekisa bangonga mingi ya esengo mpe ya nsái elongo na moninga moko oyo azali mokóló. Asalaki mingi mpo na kosalisa ngai ete nalónga mikakatano na ngai, na ndakisa bopusi ya baninga.

W. S., Autriche

Kino sikawa, naino nameká te koyekola makambo epai na bampaka. Na lisalisi ya lisoló oyo, nasosoli sikawa makambo oyo nakoki koyekola epai na bato motindo wana. Nazali na mposa makasi ya kosala boninga ya motema elongo na bamoko kati na bampaka oyo bazali na bwanya mingi.

R. K., Japon