Bizaleli malamu oyo esilaka ngala te​—Komipekisa

TOLI YA BIBLIA: “Zoba abimisaka elimo na ye nyonso, kasi ye oyo azali na bwanya abatelaka yango ezala kimya tii na nsuka.”​—Masese 29:11.

MATOMBA: Soki basɛngi yo osala liste ya matomba oyo komipekisa epesaka, ekosɛnga liboke ya bapapye! Kutu, ezaleli yango ebatelaka sante na biso. Biblia elobi boye: “Motema ya kimya ezali bomoi ya nzoto ya mosuni.” Elobi lisusu ete “motema oyo ezali na esengo esalaka malamu lokola eloko oyo ebikisaka.” (Masese 14:30; 17:22) Kasi, minganga bamonisi ete bato oyo basilikaka nokinoki mpe babombaka nkanda bazali na likama mingi ya kobɛla, mingimingi maladi ya motema. Kasi, matomba ya ezaleli ya komipekisa esuki kaka na sante te.

Cassius, oyo azali sikoyo na mbula koleka 30, alobi boye: “Nazalaki koswana mpambampamba mpe kosilika noki mpe mbala mingi nazalaki kobunda. Nazalaki mpenza komipesa kilo te. Kasi, makambo wana nyonso ebongwanaki ntango nakómaki kosalela batoli ya Biblia. Nayekolaki kopekisa nkanda na ngai mpe komonisa ezaleli ya komikitisa mpe kolimbisa. Soki bongo te, mbɛlɛ nasuká na bolɔkɔ. Ya solo, namiyokaka lokola nde nabiká na liwa!”