Ndenge ya kobongisa masolo na yo ya eteyelo

NA ETEYELO, lisolo nyonso oyo bapesi yo osala ekosalisa yo okóma kosala masolo malamu. Soki ozali komipesa mpenza na motema moko, okomona ete mokemoke, okokóma kosala masolo na yo malamu mpe basusu bakomona yango. (1 Tim. 4:15) Eteyelo oyo ekosalisa yo okolisa mpenza makoki na yo.

Obangaka soki bapesi yo lisolo mpo na kosala na lisangá? Yango ekómelaka mpe bato nyonso, ata soki osalaka masolo na eteyelo yango banda kala. Nzokande, ezali na mwa makambo oyo ekoki kosalisa yo omitungisa mingi te. Zalá na momeseno ya kotángaka na mongongo makasi na ndako. Pesáká biyano mbala na mbala na makita ya lisangá, mpe soki ozali mosakoli, sakoláká mbala na mbala. Yango ekosalisa yo oyeba koloba na miso ya bato. Lisusu, soki bapesi yo lisolo, bongisá yango mikolo mingi liboso mpe zongelá yango mbala na mbala na mongongo makasi. Kobosana te ete okoloba na miso ya bato oyo bazali na boboto. Liboso osala ata lisolo nini, bondelá Yehova. Asepelaka kopesa elimo santu na ye epai ya basaleli na ye oyo bazali kosɛnga ye yango.​—Luka 11:13; Filp. 4:6, 7.

Yebá esika makoki na yo esuki na likambo oyo olingi kosala. Esɛngaka ntango mpo na kokóma molobi mpe moteyi malamu. (Mika 6:8) Soki outi kokomisa nkombo na yo na eteyelo, kokanisa te ete okosala mbala moko masolo na ndenge ebongi mpenza. Salá nde makasi ete obanda naino kosalela toli moko kati na toli oyo ebongisami mpo na molobi. Yekolá liteya oyo elobeli toli yango na mokanda oyo. Soki likoki ezali, salá devuare oyo epesami wana. Yango ekosalisa yo oyeba makambo oyo ezali na toli yango liboso osala lisolo na yo na lisangá. Mokemoke, okobanda kosala masolo malamu.

Ndenge ya komibongisa mpo na kotánga

Komibongisa mpo na kotánga na miso ya bato elimboli kaka te koyeba kotánga maloba oyo ezali na mokanda. Salá makasi mpo okanga mpenza ntina ya makambo oyo ozali kotánga. Ntango kaka bayebisi yo ete okotánga, tángá lisolo yango mobimba mpe kobosana te ntina oyo ozali kotánga. Salá makasi okanga ntina ya likanisi oyo ezali na fraze mokomoko mpe na paragrafe mokomoko mpo oyeba kobimisa makanisi yango malamumalamu mpe otánga yango na ndenge esengeli. Soki diksionɛrɛ ezali, luká koyeba ndenge ya kotánga maloba oyo omeseni na yango naino te. Salá makasi oyeba mpenza lisolo yango malamu. Baboti bakoki kosalisa bana na bango básalaka bongo.

Ozwi mokumba ya kotánga bavɛrsɛ na Biblia to, mbala mosusu, baparagrafe ya lisolo mpo na boyekoli ya Linɔ́ngi ya Mosɛnzɛli? Soki bozali na bakasɛti ya botángi ya Biblia to ya Linɔ́ngi ya Mosɛnzɛli na monɔkɔ oyo okotánga, mbala mosusu ekozala malamu olanda yango mpe otya likebi na ndenge motángi azali kotánga maloba, bisika azali kopema, ndenge azali konyata maloba ya ntina mpe ndenge azali komatisa to kokitisa mongongo. Na nsima, salá makasi ete yo mpe osala bongo ntango okotánga.

Ntango obandi komibongisa mpo na kotánga, yekolá malamumalamu liteya oyo elobeli ndenge molobi asengeli kosala, lokola nde basɛngi yo osala yango. Soki likoki ezali, nsima ya kotánga lisolo yango na mongongo makasi mbala ebele mpo na komeka yango, zongelá lisusu kotánga liteya yango. Salá makasi osalela malamu mpenza toli oyo ezali na mokanda oyo.

Mateya wana ezali kobongisa yo mpenzampenza mpo na mosala ya kosakola. Ntango ozali kosakola, mbala mingi osengeli kotángela bato mosusu. Lokola Liloba ya Nzambe ezali na nguya ya kobongola bomoi ya bato, ezali na ntina mingi ete otángaka yango malamu. (Ebe. 4:12) Kokanisa te ete nsima ya lisolo moko to masolo mibale mpamba nde okoyeba kotánga malamu mpenza, kozanga mokakatano. Ntango ntoma Paulo akomelaki moklisto moko oyo azalaki nkulutu mpe aumelaki bambula mingi na mosala yango, alobaki boye: “Kobá komipesa na botángi liboso ya bato nyonso.”​—1 Tim. 4:13.

Ndenge ya kobongisa lisolo oyo bapesi motó ya likambo mpe bamonisi ndenge ya kosala yango

Okosala ndenge nini soki, na eteyelo, bapesi yo lisolo moko oyo bamonisi yo ndenge ya kosala yango?

Osengeli kotalela makambo misato ya ntina: (1) motó ya likambo oyo bapesi yo, (2) ndenge lisolo ekosalema mpe moto oyo okosala na ye lisolo yango, mpe (3) toli oyo basɛngi yo osalela.

Osengeli koluka makambo oyo okoloba na lisolo na yo. Kasi liboso omipesa mpenza na koluka makambo yango, kanisá naino malamumalamu ndenge oyo okosala lisolo yango mpe moto oyo okosala na ye lisolo, mpamba te yango nde ekosalisa yo oyeba makambo nini okoloba mpe ndenge nini okoloba yango. Ndenge nini okosala lisolo na yo? Okolakisa bato oyo bazali koyoka yo lolenge ya koyebisa moto oyo oyebani na ye nsango malamu? To okolakisa makambo oyo ekoki kobima ntango tokutani na moto mpo na mbala ya liboso? Moto yango azali mokóló na yo to yo ozali mokóló na ye? Akokanisa nini na lisolo oyo bokosolola? Ayebi makambo nini na lisolo yango? Na nsuka ya lisolo na yo, olingi moto yango asala nini? Biyano na mituna oyo nde ekosalisa yo obongisa makanisi ya ntina oyo okolobela.

Epai wapi okozwa makanisi mpo na lisolo oyo bapesi yo? Na mokanda oyo, na nkasa 33 kino 38, okokuta lisolo “Ndenge ya kolukaluka na mikanda.” Tángá yango mpe na nsima, lukáluká na mikanda oyo ozali na yango. Okozanga te kozwa makanisi mingi koleka kutu oyo okoki kolobela na lisolo na yo. Tángá makanisi yango mwa mingi mpo oyeba mpenza makambo oyo okoki kosalela na lisolo na yo. Nzokande, ntango ozali kotánga, kobosana te ndenge okosala lisolo na yo mpe moto oyo okosala na ye lisolo. Tyá elembo na makanisi oyo ebongi mpo na kosalela yango na lisolo na yo.

Liboso obanda kobongisa ndenge okosala lisolo na yo mpe liboso osilisa kopona makanisi mosusu, zwá ntango ya kotánga toli oyo basɛngi yo. Bapesi yo lisolo yango mingimingi mpo bátalela yo soki oyebi kosalela toli yango.

Soki otosi ngonga oyo bapesi yo mpo na lisolo na yo, okozala na esengo, mpamba te okosala lisolo na yo tii na nsuka. Yango ezali na ntina mpamba te soki olekisi ngonga, bakoyebisa yo. Nzokande, na mosala ya kosakola, totalelaka ngonga ntango nyonso te. Yango wana, ntango ozali kobongisa lisolo na yo, yebá soki okosala yango na miniti boni, kasi luká libosoliboso kolobela makambo oyo bato oyo bazali koyoka yo bakosimba.

Tólobela ndenge ya kosala lisolo. Talá makanisi oyo ezali na lokasa 82 mpe poná moko oyo ebongi na yo mpo na mosala ya kosakola mpe oyo omoni ete ekoyokana malamu na motó ya likambo na yo. Soki osalaka masolo kobanda kala na eteyelo, moná ete makanisi yango ekosalisa yo okóma na makoki oyo esengeli mpo na mosala ya kosakola mpe okolisa yango.

Soki mokɛngɛli na Eteyelo ya mosala ya Teokrasi ayebisi yo ndenge okosala lisolo na yo, ndimá yango. Masolo mingi etalelaka ndenge ya kosala na mosala ya kosakola. Soki opesá naino te litatoli na lolenge oyo basɛngi yo, sololá na basakoli oyo basalá yango mpo ozwa makanisi. Soki likoki ezali, meká kosala lisolo oyo bapesi yo, na ndenge oyo okosala yango na eteyelo. Yango ekosalisa yo okokisa ntina mpenza ya mateya oyo ozali kozwa na eteyelo.

Lisolo oyo ekosalema lokola lisukulu

Soki ozali mobali, mbala mosusu lisolo oyo bapesi yo ekozala mwa lisukulu ya mokuse oyo okosala yango na lisangá. Ntango ozali kobongisa lisukulu yango, talelá mpe makambo ya ntina oyo tosili kolobela mpo na masolo oyo esalemaka lokola bilakiseli. Awa, bokeseni ezali: bato oyo okosolola na bango mpe lolenge okosala lisolo na yo.

Mbala mingi, ekozala malamu obongisa lisolo na yo mpo esalisa moto nyonso oyo akoyoka yo. Mingi kati na baoyo bakolanda yo bayebi mateya ya ebandeli ya Biblia. Ekoki kozala mpe ete bayebi malamu likambo oyo okolobela. Talelá makambo oyo bayebi na lisolo na yo. Salá makasi osalisa bango ezala ata na lolenge nini ntango okosala lisolo na yo. Omituna boye: ‘Ndenge nini nakoki kosalela lisolo na ngai mpo nakolisa botɔndi na ngai mpe ya bato oyo bakoyoka ngai mpo na Yehova? Na lisolo na ngai, makambo nini ekosalisa biso tóyeba mokano ya Nzambe? Ndenge nini lisolo yango ekoki kosalisa biso tózwa bikateli ya malamu na kati ya mokili oyo bato bamipesi na mposa ya nzoto?’ (Ef. 2:3) Mpo ozwa biyano malamu na mituna oyo, osengeli kolukaluka. Ntango ozali kosalela Biblia, salá makasi ete osuka kaka na kotánga bavɛrsɛ te. Salá ete bato oyo bazali koyoka yo bákanisa likoló na bavɛrsɛ oyo ozali kotánga mpe monisá ndenge yango esengeli kotinda bango bázwa bikateli oyo esengeli. (Mis. 17:2, 3) Koluka koloba makambo ebele ebele te. Salá lisolo na yo na ndenge ete ezala mpasi te mpo bato oyo bazali koyoka yo bákanga yango na motó.

Ntango ozali kobongisa lisolo na yo, osengeli mpe kotya likebi na ndenge okoloba. Komona yango likambo moke te. Meká lisukulu na yo mbala na mbala na mongongo makasi. Milende oyo ozali kosala mpo na koyekola mpe kosalela toli oyo etali bizaleli ndenge na ndenge ya molobi ekosalisa yo mingi mpo okende liboso. Ezala obandi kosala masolo sika to osalaka yango banda kala, bongisáká yango malamu mpo okoka koloba kozanga kobanga mpe osala lisolo na yo na nsai mpenza, omonisa esengo to mawa soki esengeli. Ntango ozali kosala lisolo mokomoko na eteyelo, kobosana te mokano na yo ya kosalela likabo to likoki ya koloba oyo Nzambe apesi yo mpo na kokumisa Yehova.​—Nz. 150:6.