Masolo ya Basakoli ya Bokonzi

Bazali kokutana na bato oyo bamonana mpenza te

BATATOLI YA YEHOVA basalaka makasi mpo na koyebisa nsango ya Bokonzi epai ya moto nyonso oyo bakoki kokutana na ye. Ntango mosusu esɛngaka milende mingi mpo na kokutana na bato oyo bazalaka mingimingi na ndako te. (Malako 13:10) Mpo na yango, ndeko moko oyo azali mobongisi-nzela monene na ekólo moko ya Amerika ya sudi, ayebisi lisolo oyo elandi.

“Mokolo moko nayokaki ete guvɛrnɛrɛ ya etúká akoya kotala bamboka oyo batindaki ngai na mwasi na ngai. Lokola azalaki mpenza moko ya bato oyo bazalaka mingimingi na ndako te, nakomelaki ye mokanda mpe na kati na yango natyaki mikanda mingi oyo elimbolaka Biblia, lokola mwa buku Nzambe azali kosɛnga nini epai na biso? mpe babuku L’humanité à la recherche de Dieu na Boyebi oyo ezali komema na bomoi ya seko. Na mokanda oyo nakomelaki ye, nalimbolelaki ye ntina ya mikanda yango.

“Lokola nazalaki na mposa ya koyeba makanisi na ye nsima ya kotánga mikanda yango, nasɛngaki ete nakutana na ye. Nsima ya mwa bapɔsɔ, bapesaki ngai nzela ya kokutana na ye, mpe na mokolo yango namemaki kasɛti video Les Témoins de Jéhovah: un nom, une organisation. Nasololaki na ye pene na ngonga mibale. Nsima ya kotala kasɛti video elongo na guvɛrnɛrɛ, natunaki ye nini akanisaki mpo na yango. Azongisaki ete: ‘Ezali na ebongiseli mosusu te na mabele lokola oyo ya bino. Elingaki kozala malamu mingi soki nazalaki na bato lokola bino mpo na kosalisa ngai na kokokisa malamu mikano ya bokonzi na ngai!’ Na nsima, atunaki ngai soki nasilá kokóma na biro monene ya ebongiseli na biso. Nayebisaki ye ete atako yango ezali mokano oyo namityelaki banda ntango nazalaki na mbula 14, nazwá naino te libaku ya kokenda kotala biro monene ya ebongiseli na biso na Brooklyn, na New York. Ezali moko ya mikano oyo nakokaka kokokisa yango te. Atalaki ngai tii mpe na nsima alobaki ete alingi kosalisa ngai mpo na likambo yango. Abongiselaki biso mikanda ya Leta oyo esengeli mpo na kosala mobembo na mboka mopaya mpe afutelaki biso tikɛ ya mpɛpɔ!

“Lelo oyo, guvɛrnɛrɛ azwaka mbala na mbala bazulunalo Linɔ́ngi ya Mosɛnzɛli mpe Lamuká! Tozali kolikya ete mosika te, tokobanda koyekola na ye Biblia.”