Tótambwisa boyekoli ya Biblia na ndenge oyo ekosalisa bato bákola
Eteni 8: Tómema bayekoli na Ebongiseli ya Yehova
1. Mpo na nini ezali malamu kolobelaka likambo moko etali ebongiseli ya Yehova pɔsɔ na pɔsɔ ntango ozali koyekola na moto Biblia?
1 Ntango tozali koyekola na bato Biblia, mokano na biso ezali kaka te koteya bango mateya ya ntina mingi ya Biblia, kasi mpe kosalisa bango bákɔta na lisangá ya boklisto. (Zek. 8:23) Mwa buku Batatoli ya Yehova—Bazali banani? Makambo nini bandimaka? ekoki kosalisa biso na kosala bongo. Pesá moto oyo abandi koyekola Biblia mwa buku yango, mpe lendisá ye atánga yango. Ntango bozali koyekola pɔsɔ na pɔsɔ, zwáká mwa miniti mpo na kolimbolela ye likambo moko etali ebongiseli ya Yehova.
2. Ndenge nini tokoki kolendisa bayekoli ya Biblia mpo báyanganaka na makita ya lisangá?
2 Makita ya lisangá: Eloko ya libosoliboso oyo ekoki kosalisa moyekoli ya Biblia asepela na ebongiseli ya Nzambe ezali kosangana elongo na biso na makita ya lisangá. (1 Kol. 14:24, 25) Na bongo, okosalisa ye amesana na yango soki olimboleli ye makita mitano oyo tosalaka pɔsɔ na pɔsɔ, likita moko na boyekoli moko. Yebisá ye motó ya likambo ya lisukulu ya bato nyonso oyo ekosalema na pɔsɔ elandi. Lakisá ye makambo oyo tokotalela na boyekoli ya Linɔ́ngi ya Mosɛnzɛli mpe na boyekoli ya mokanda na lisangá. Limbolelá ye ndenge Eteyelo ya mosala ya Teokrasi mpe Likita ya mosala esalemaka. Soki ozali na lisolo na eteyelo ya Teokrasi, ntango mosusu okoki komekameka yango elongo na ye. Yebisá ye makanisi ya ntina ya makambo oyo elobelamaki na makita. Salelá bililingi oyo ezali na mikanda na biso mpo na kosalisa ye amona ndenge makita yango esalemaka. Soki kaka boyekoli na moto mbala ya liboso, bengá ye mbala moko na makita.
3. Makambo nini tokoki kolobela na oyo etali ebongiseli ya Yehova?
3 Soki bokómi pene na kosala Ekaniseli, mayangani, to soki etikali moke mokɛngɛli ya zongazonga aya kotala lisangá na bino, zwá mwa miniti mpo na kolimbolela moyekoli ebongiseli yango mpe kolendisa ye asepela na yango. Mokemoke, pesá biyano na mituna lokola oyo: Mpo na nini tobengamaka Batatoli ya Yehova? Mpo na nini tobengaka bisika na biso ya makita Ndako ya Bokonzi? Mikumba nini bankulutu mpe basaleli na misala bazalaka na yango? Ndenge nini mosala ya kosakola mpe bateritware ebongisami? Ndenge nini mikanda na biso esalemaka? Ndenge nini ebongiseli na biso ezwaka mbongo? Na likambo etali kotambwisa mosala, biro ya filiale mpe Lisangani ya Mikóló-Bakambi basalaka mosala nini?
4, 5. Ndenge nini bakasɛti-video na biso ekoki kosalisa moto asepela na ebongiseli ya Yehova?
4 Bakasɛti-video oyo eteyaka: Eloko mosusu oyo ekoki kosalisa moyekoli asepela na ebongiseli ya Yehova ezali bakasɛti-video. Yango ekoki komema bango tii na nsuka ya mabelé (Kasɛti-video: Jusqu’aux extrèmités de la terre), kosalisa bango bámesana na lisangá mobimba ya bandeko (Kasɛti-video: Toute la communauté des frères), mpe kosalisa bango bámona ndenge mateya ya Nzambe esangisi biso (Kasɛti-video: Unis grâce à l’enseignement divin). Mwasi moko oyo azwaka bazulunalo mpe mikanda na biso mosusu eleki sikoyo mbula mitano, atangisaki mai ya miso ya esengo ntango atalaki kasɛti-video: Les Témoins de Jéhovah: un nom, une organisation (Batatoli ya Yehova—Nkombo mpe ebongiseli na bango). Azalaki kondima Batatoli oyo bazalaki kokende kotala ye, kasi nsima ya kotala kasɛti-video wana, amonaki ete asengelaki mpe kondima ebongiseli ya Yehova. Abandaki koyekola Biblia na ndenge esengeli, mpe pɔsɔ oyo elandaki, ayanganaki na makita na Ndako ya Bokonzi.
5 Soki tozali kolekisa mwa miniti pɔsɔ na pɔsɔ elongo na moyekoli ya Biblia mpe kosalela bisaleli oyo tozali na yango, tokoki mokemoke komema bayekoli ya Biblia na ebongiseli kaka moko oyo Yehova azali kosalela lelo oyo.