“Palata ezali ya ngai mpe wolo ezali ya ngai”

NA EKEKE ya motoba liboso na ntango na biso (L.T.B.), Sirise, Mokonzi ya Perse, asikolaki basaleli ya Nzambe na boombo na Babilone. Mingi na bango bazongaki na Yelusaleme mpo na kotonga lisusu tempelo ya Yehova, oyo ebebaki. Bayuda oyo bazongaki na mboka na bango bazalaki na bomoi ya mpasi mpe bikólo oyo bazalaki pene na bango bazalaki kotɛmɛla mosala wana ya kotonga. Yango wana, batongi mosusu bakómaki komituna soki bakosilisa mpenza ebakata ya mosala wana.

Na nzela ya mosakoli na ye Hagai, Yehova ayebisaki batongi ete azali na bango. Alobaki boye: “Nakoningisa bikólo nyonso mpe biloko kitoko ya bikólo nyonso ekokɔta; mpe nakotondisa ndako oyo na nkembo.” Mpo na bamposa ya batongi oyo bazalaki kokelela, Hagai alobaki boye: “‘Palata ezali ya ngai, mpe wolo ezali ya ngai,’ Yehova ya mampinga alobi bongo.” (Hagai 2:7-9, NW) Mbula mitano nsima ya nsango wana ya kolendisa oyo Hagai asakolaki, basilisaki kotonga.​—Ezela 6:13-15.

Maloba wana ya Hagai ezali mpe kolendisa basaleli ya Nzambe lelo oyo, ntango bazali kosala misala ya minene oyo etali losambo ya Yehova. Na 1879, ntango moombo ya sembo mpe ya mayele abandaki kobimisa Linɔ́ngi ya Mosɛnzɛli, oyo bazalaki kobenga na ntango wana Linɔ́ngi ya Mosɛnzɛli ya Siona mpe Mosakoli ya kozala ya Klisto, zulunalo yango ezalaki na maloba oyo: “Tondimi ete YEHOVA moto azali kopesa mbongo mpo na kobimisa ‘Linɔ́ngi ya Mosɛnzɛli ya Siona,’ mpe lokola ezali bongo, tokoki te kosɛnga to koluka mbongo epai ya bato mpo na kobimisa yango. Ntango Yehova, ye oyo alobi ete: ‘Wolo nyonso mpe palata nyonso ya ngomba ezali ya ngai,’ akotika kopesa mbongo oyo esengeli mpo na kobimisa yango, wana nde tokoyeba ete ntango ekoki mpo tótika kobimisa zulunalo yango.”

Banda wana, Linɔ́ngi ya Mosɛnzɛli etiká kobima ata mokolo moko te. Nimero ya liboso ebimaki na bakopi 6 000, kaka na Lingelesi. Lelo oyo, mwayene ya bakopi oyo ebimaka na nimero mokomoko ezali ya 28 578 000, na minɔkɔ 161.a Lamuká!, zulunalo mosusu oyo ebimaka elongo na Linɔ́ngi ya Mosɛnzɛli, ebimisamaka na mwayene ya 34 267 000, na minɔkɔ 81.

Batatoli ya Yehova bazali kosala misala mingi oyo ezali na mokano ndenge moko na Linɔ́ngi ya Mosɛnzɛli; kokumisa Yehova lokola Nkolo Mokonzi ya molɔ́ngɔ́ mobimba mpe kosakola nsango malamu ya Bokonzi na ye. (Matai 24:14; Emoniseli 4:11) Elikya ya Batatoli lelo oyo ekokani na oyo Linɔ́ngi ya Mosɛnzɛli elobelaki na 1879. Bandimaka ete Nzambe azali kosimba mosala na bango mpe ete mbongo ekozanga te mpo na misala oyo ye azali kosepela na yango. Kasi, Batatoli ya Yehova bazwaka mpenza mbongo wapi mpo na misala na bango? Mpe misala nini bazali kosala mpo na kosakola nsango malamu na mokili mobimba?

Bazwaka mbongo wapi mpo na mosala na bango?

Ntango babimaka na mosala ya kosakola, Batatoli ya Yehova bakutanaka ntango nyonso na motuna oyo: “Bafutaka bino mpo na mosala oyo bosalaka?” Eyano ezali ete bafutaka bango te. Bapesaka ntango na bango ofele. Botɔndi ya basakoli yango nde etindaka bango bálekisa bangonga ebele na koyebisa basusu makambo ya Yehova mpe bilaka kitoko oyo Biblia epesi mpo na mikolo ekoya. Bazali na botɔndi mpo na makambo oyo Nzambe azali kosalela bango mpe mpo na ndenge mosala ya kosakola ezali kobongisa bomoi na bango. Yango wana, basepelaka kosakwela basusu nsango malamu yango. Ntango bazali kosala yango, batosaka etinda ya Yesu oyo: “Bozwi ofele, bópesa ofele.” (Matai 10:8) Na yango, mposa na bango ya kozala batatoli ya Yehova mpe ya Yesu etindaka bango bábimisa mbongo na bango moko mpo na kokende koyebisa bindimeli na bango epai ya basusu, ata mpe baoyo bafandi mpenza mosika na bango.​—Yisaya 43:10; Misala 1:8.

Ndenge mosala yango ezali kosalema mpe biloko oyo bazali kosalela mpo na kokokisa yango, na ndakisa bisika ya kobimisa mikanda, babiro, bandako ya mayangani, bandako ya bamisionɛrɛ mpe bongo na bongo, esɛngaka mbongo mingi. Mbongo yango eutaka wapi? Mbongo mpo na misala nyonso wana eutaka na makabo ya bolingo. Batatoli ya Yehova basengisaka bandeko ya masangá te ete bápesa mbongo mpo na kotambwisa misala ya Bokonzi; bafutisaka mpe bato mbongo te mpo na mikanda oyo bapesaka bango. Soki moto asepeli kopesa makabo mpo na kosimba mosala na bango, Batatoli bandimaka yango na esengo. Tótalela na ndakisa mbongo oyo ezali kobima kaka mpo na mosala ya kobongola mikanda, oyo ezali kosala ete mosala ya kosakola ekende liboso.

Mikanda ezali kobongolama na minɔkɔ 437

Na boumeli ya ebele ya bambula, mikanda ya Batatoli ya Yehova ezali na kati ya mikanda oyo ezali kobongolama na minɔkɔ mingi koleka. Batrakte, mwa babuku, bazulunalo mpe babuku ebongolami na minɔkɔ 437. Yango wana, lokola misala mosusu oyo etambwisaka mosala ya kosakola, mosala ya kobongola mikanda ezali mpe kosɛnga mbongo mingi. Mosala yango esɛngaka mpenza nini?

Soki masolo esili kobongisama na Lingelesi, batindaka yango na mokili mobimba na nzela ya Internet, epai ya babongoli oyo bayekoli mosala yango. Ekipi mokomoko ya babongoli ezali na mokumba ya moko ya minɔkɔ oyo mikanda na biso ezali kobongolama. Na kotalela mikanda oyo bazali kobongola mpe monɔkɔ oyo bazali kobongola na yango, motángo ya babongoli na ekipi mokomoko ekoki kozala na bato kobanda na 5 kino 25.

Soki basilisi kobongola lisolo moko, babongisaka yango lisusu na kotalela Lingelesi, mpe na nsima batángaka yango kozanga kotalela Lingelesi. Basalaka bongo mpo bábimisa mpenza makanisi oyo ezali na Lingelesi, mpe na elobeli ya polele. Kasi, bakutanaka na mikakatano ndenge na ndenge. Soki lisolo moko ezali na maloba ya makasi, esɛngaka babongoli básala bolukiluki na Lingelesi (to na minɔkɔ mosusu lokola Lifalanse, Russe, Espagnol) mpe na monɔkɔ oyo bazali kobongola na yango mpo bábimisa mpenza makanisi ndenge ezali na Lingelesi. Na ndakisa, soki lisolo moko ya Lamuká! ezali kolobela makambo ya siansi to ya masolo ya kala, esɛngaka bábongoli básala bolukiluki makasi.

Babongoli mingi basalaka na babiro ya filiale ya Batatoli ya Yehova. Na kati na bango, bamosusu bazali bandeko ya Betele mpe bamosusu bayaka kaka kopesa mabɔkɔ. Bamosusu mpe babongolaka na bisika oyo minɔkɔ yango elobamaka. Bafutaka bango mpo na mosala yango te. Bapesaka baoyo basalaka na Betele bisika ya kolala, biloko ya kolya mpe mwa mbongo mpo na bamposa na bango ya mikemike. Na mokili mobimba, tokoki kozala na Batatoli soki 2 800 oyo babongolaka mikanda. Sikoyo, babiro ya filiale ya Batatoli ya Yehova 98 ezali na babongoli to ezali kokamba mosala ya kobongola na bisika mosusu. Na ndakisa, biro ya filiale ya Russie ezali na babongoli kolela 230 oyo basalaka na Betele to bapesaka kaka mabɔkɔ, oyo bazali kobongola na minɔkɔ koleka 30, ata mpe minɔkɔ mosusu lokola Tchouvachie, Ossète mpe Ouïgour, oyo eyebani kaka na Russie.

Mateya mpo na babongoli

Ndenge moto nyonso oyo ameká koyekola monɔkɔ mosusu ayebi yango, ezalaka pɛtɛɛ te mpo na kobongola makambo ya makasi. Mosala ya babongoli ezali ya kobimisa mpenza makanisi ya Lingelesi na monɔkɔ na bango, na elobeli ya polele, ndenge mpenza bato balobaka, mpo moto oyo azali kotánga ayoka lokola nde ekomamaki kaka na monɔkɔ wana. Mosala yango esɛngaka mpenza mayele. Mpo na kokóma mobongoli ya solosolo, esɛngaka bambula mingi, mpe Batatoli ya Yehova bapesaka babongoli na bango formasyo ntango nyonso. Ntango mosusu, bandeko bakendaka kotala bango mpo na kosalisa bango bábakisa lisusu mayele na mosala ya kobongola mpe ya kosalela ordinatɛrɛ.

Mateya ezali mpenza kobota mbuma. Na ndakisa, biro ya filiale ya Batatoli ya Yehova na Nicaragua elobaki boye: “Mpo na mbala ya liboso, ndeko moko ya filiale ya Mexique alakisaki babongoli na biso ya monɔkɔ ya Miskito mayele ya kobongola mpe ndenge ya kosala mosala yango. Yango esalisi babongoli na biso bákolisa mpenza mosala na bango.”

Maloba oyo ezali mpenza kosimba mitema

Babimisaka Biblia mpe mikanda oyo elimbolaka yango na monɔkɔ boye to boye mpo na kosimba mitema ya bato oyo balobaka minɔkɔ yango; mpe ezali kosalema kaka bongo. Na 2006, Batatoli ya Yehova ya Bulgarie batondaki na esengo ntango Libongoli ya Mokili ya Sika ya Makomami ya Grɛki ya boklisto ebimaki na monɔkɔ na bango. Biro ya filiale ya Bulgarie eyebisi ete ezwaki ebele ya mikanda ya botɔndi mpo na yango. Bandeko ya masangá bazali koloba ete “sikoyo, Biblia ekómi kosimba mpenza mitema na bango, kasi kaka makanisi te.” Mobange moko na engumba sofia alobaki ete: “Natángá Biblia na boumeli ya mbula ebele, kasi natángá naino te libongoli oyo ezali pɛtɛɛ mpe ezali mpenza kosimba motema lokola oyo.” Ndenge moko, na Albanie, nsima ya kozwa Libongoli ya Mokili ya Sika na mobimba na yango na monɔkɔ ya Albanie, Motatoli moko alobaki ete: “Liloba ya Nzambe ezali koyokana kitoko mpenza na monɔkɔ ya Albanie! Oyo nde libaku kitoko tozwi ya koyoka Yehova azali koloba na biso na monɔkɔ na biso moko!”

Kobongola Biblia mobimba ekoki kosɛnga mwa bambula ebele. Kasi, soki yango ekoki kosalisa bamilio ya bato básimba Liloba ya Nzambe mpo na mbala ya liboso, omoni te ete ekozala mosala ya mpunda te?

“Biso tozali bato oyo bazali kosala elongo na Nzambe”

Ya solo, mosala ya kobongola ezali kaka moko ya ebele ya misala ya ntina oyo ezali kosalema mpo mosala ya kosakola esalema na ndenge oyo ebongi. Kokoma mikanda, konyata yango, mpe kotinda yango na masangá mpe ebele ya misala mosusu oyo esalemaka na babiro ya filiale, na bazongazonga, mpe na masangá ya Batatoli ya Yehova esɛngaka milende mpe mbongo mingi. Kasi, basaleli ya Nzambe ‘bamipesaka na bolingo na bango moko’ mpo na kokokisa mosala yango. (Nzembo 110:3) Bamonaka yango libaku malamu lokola bazali kopesa mabɔkɔ na mosala yango mpe batalelaka yango lokola lokumu, mpo Yehova amonaka bango ete bazali ‘kosala elongo na ye.’​—1 Bakolinti 3:5-9.

Emonani mpenza ete ye oyo alobaki ete “palata ezali ya ngai, mpe wolo ezali ya ngai” azali na mposa ya mbongo na biso te mpo mosala na ye esalema. Ya solo, Yehova apesi basaleli na ye lokumu na ndenge apesi bango libaku ya kosangana mpo na kosantisa nkombo na ye na mosala ya kosakola nsango oyo ezali kopesa bomoi “na bikólo nyonso.” (Matai 24:14; 28:19, 20) Omoni te ete osengeli kosala nyonso mpo na kopesa mabɔkɔ na mosala yango oyo ekozongelama lisusu te?

[Maloba na nse ya lokasa]

[Etanda na lokasa 18]

“EZALI KOSALISA BISO MINGI”

Mwana moko ya mwasi ya mbula 14 akomelaki biro ya filiale ya Batatoli ya Yehova ya Cameroun boye: “Nsima ya kosomba biloko ya kelasi ya mbula mobimba, natɛkaki bakaye mibale ya mbula eleki na dolare 5. Nasangisi dolare 5 wana ná dolare 1,82 oyo nazalaki kobomba mpe napesi yango likabo. Nazali kolendisa bino bókoba na mosala kitoko oyo bozali kosala. Matɔndi mingi mpo na Linɔ́ngi ya Mosɛnzɛli mpe Lamuká! Ezali kosalisa biso mingi!”

[Etanda/​Elilingi na lokasa 18]

LIKABO OYO ELEKI MBULA NA YE

Biro ya filiale ya Batatoli ya Yehova ya Mexique ezwaki mokanda ya Manuel, elenge moko ya mbula motoba, oyo afandaka na etúká ya Chiapas. Lokola ayebi naino kokoma te, moninga na ye moko asalisaki ye. Manuel alobaki boye: “Nkɔkɔ na ngai ya mwasi akabelaki ngai ngulu ya mwasi. Ntango ebotaki, nazwaki mwana oyo alekaki kitoko mpe bandeko basalisaki ngai na kobɔkɔla yango. Natɛki ngulu yango, mpe na bolingo nyonso, natindi likabo oyo. Ngulu yango ezalaki na kilo 100 mpe basombaki yango na dolare 110. Nasɛngi bino bósalela mbongo yango mpo na Yehova.”

[Etanda na lokasa 19]

‘BÓSALELA YANGO MPO NA KOBONGOLA BIBLIA’

Na mayangani ya etúká ya Batatoli ya Yehova oyo esalemaki na Ukraine na 2005, Libongoli ya Mokili ya Sika ya Makomami ya Grɛki ya bokilisto ebimaki na monɔkɔ ya Ukraine. Na mokolo oyo elandaki, bakutaki mokanda na kati ya kɛsi moko ya makabo. Elobaki boye: “Nazali na mbula libwa. Matɔndi mingi mpo na Makomami ya Grɛki. Mama azalaki kopesa ngai ná leki na ngai ya mobali mbongo oyo ya tike mpo na kokende na kelasi. Kasi, soki mbula ebɛti te, tozalaki kokenda na makolo mpe kobomba mbongo yango: dolare 10. Ngai ná leki na ngai tosepeli bósalela yango mpo na kobongola Biblia mobimba na monɔkɔ ya Ukraine.”

[Etanda na lokasa 20]

NDENGE BATO MOSUSU BAPESAKA

MAKABO MPO NA MOSALA YA KOSAKOLA NA MOKILI MOBIMBA

Bato mingi babombaka mwa mbongo mpe batyaka yango na bakɛsi ya makabo oyo bakomá “Makabo mpo na mosala ya kosakola na mokili mobimba.​—Matai 24:14.”

Sanza na sanza, masangá etindaka mbongo yango na biro ya Batatoli ya Yehova oyo etalelaka mosala na ekólo na bango. Moto akoki mpe kotinda mbala moko mbongo na Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, to na biro ya filiale ya Batatoli ya Yehova oyo ekambaka mosala ya kosakola na ekólo oyo azali. Ba-chèque oyo batindi na adrɛsi oyo topesi awa esengeli kopesama na “Watch Tower.” Moto akoki mpe kopesa babiju to biloko mosusu ya motuya. Akotinda yango nzela moko na mwa mokanda moko oyo ekoyebisa ete ezali likabo oyo apesi.

MAKABO OYO MAKOKI KOZONGISAMA

Moto akoki kotya mbongo na banki na nkombo ya Watch Tower. Kasi, soki asɛngi yango, bakozongisela ye yango. Mpo na koyeba ebongiseli yango malamu, tuná na Treasurer’s Office na adrɛsi oyo ezali likoló.

MAKABO OYO EBONGISAMI LIBOSO

Longola makabo ya mbongo oyo moto apesi mbala moko, ezali na lolenge mosusu ya kopesa mpo na kosunga mosala ya Bokonzi na mokili mobimba. Ekoki kozala:

Asiransi: Moto akoki kokoma nkombo ya Watch Tower mpo ezwa mbongo ya asiransi to ezwa mbongo na ye ya epaso.

Mosolo na banki: Na mikili mosusu, moto akoki kofungola kɔnti na banki, kopesa certificat de dépôt, to kobombisa mbongo ya epaso mpo na Watch Tower, to kotya yango na nkombo ya Watch Tower mpo Watch Tower esangola yango soki akufi.

Lotomo ya mosolo: Okoki kopesa na Watch Tower lotomo ya mosolo (titres et obligations) lokola likabo mpo na libela, to kobatela lotomo ya kozwa mbongo yango ntango ozali naino na bomoi.

Lopango to ndako: Moto akoki kopesa likabo ya ndako to lopango oyo ekoki kotɛkama, soki ezali ndako oyo afandi, akobatela lotomo ya kosalela yango ntango azali naino na bomoi. Yambo ya kopesa biloko ya ndenge wana, esengeli koyebisa biro ya filiale na bino.

Makabo oyo ebotaka: Moto akoki kosɛnga ete bákoma nkombo ya Lisangani moko ya Batatoli ya Yehova, oyo ekoponama, oyo endimami na mibeko ya Leta, na kɔnti na ye na banki to na lotomo na ye ya mosolo. Moto yango to mpe moto mosusu oyo ye moko akopona akobanda kozwa mbongo oyo mosolo yango ekobanda kobota mbula na mbula na bomoi na ye mobimba. Na mbula oyo likabo ya ndenge wana epesami, Leta akokitisa mpako oyo moto oyo apesi yango asengelaki kofutaka mpo na bozwi na ye.

Mokanda ya kopesa libula: Moto akoki kopesa Watch Tower biloko to ndako to mosolo na mokanda ya kozwa libula oyo endimami na mibeko, to akoki kopesa Watch Tower lotomo ya kozwa biloko oyo akotika. Soki moto asali mokanda mpo na kopesa lingomba lotomo ya kozwa biloko na ye ntango akokufa, Leta akoki kokitisa mpako oyo afutaka mpo na biloko yango.

Lokola ebengeli “Makabo oyo ebongisami liboso” emonisi yango, lolenge oyo ya makabo esɛngaka ete mopesi azwa bibongiseli. Mpo na kosalisa bato oyo balingi kopesa makabo oyo ebongisami liboso mpo na mosala ya Batatoli ya Yehova na mokili mobimba, mwa buku moko esilá kobongisama oyo ekomami na Espagnol mpe na Lingelesi, oyo ezali na motó ya likambo ete Charitable Planning to Benefit Kingdom Service Worldwide (Makabo oyo ebongisami liboso mpo na mosala ya Bokonzi na mokili mobimba). Mwa buku yango ekomami mpo na koyebisa bato lolenge ekeseni ya kopesa makabo na bango, ezala balingi kopesa yango sikoyo to balingi kotika lotomo ya kozwa yango nsima ya liwa na bango. Nsima ya kotánga mwa buku yango mpe kosolola na bapesi-toli na makambo ya mibeko mpe ya mpako, bato mingi basungaki mosala ya Batatoli ya Yehova na mokili mobimba mpe Leta akitiselaki bango mpako mpo na biloko na bango. Moto akoki kozwa mwa buku yango soki asɛngi yango mbala moko na Charitable Planning Office.

Mpo na koyeba makambo mosusu, tindá mokanda to bengá na telefone na adrɛsi oyo ezali na nse to na biro ya Batatoli ya Yehova na ekólo oyo ofandi.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707

[Bililingi na lokasa 19]

Babongoli na monɔkɔ ya Miskito, na filiale ya Nicaragua