Mokanda euti na Irlande

Konje oyo eleki bakonje nyonso nazwá!

BABOTI na ngai balobaki na ngai boye: “Osengeli kosala eloko moko oyo ekosalisa yo obosana naino baekzamɛ na yo. Tókende naino kotala bandeko na yo na Irlande mpe tósakwela bato oyo bazalaka na libaku te ya koyoka nsango malamu ya Bokonzi.”

Nakanisaki kutu te ete likanisi yango ezali malamu. Longola kobanga oyo nazalaki na yango mpo nabongisaki baekzamɛ na ngai malamu te, nazalaki mpe kobanga mobembo yango, mpo nalongwá naino na Angleterre te mpe nasalá naino mobembo na mpɛpɔ te. Ndenge nini elenge mwasi ya mbula 17, oyo afandaka na kartye moko na Londres epai bato bazalaka mingi, amesana na mwa engumba moke boye na nsuka mpenza ya sudi-wɛsti ya Irlande?

Nasengelaki komitungisa te. Ntango kaka mpɛpɔ na biso ekiti, nasepelaki mpenza komona Irlande. Kasi, lokola ezalaki ntɔngɔ mpenza, nayokaki mpɔngi kaka ntango tobandi mobembo na motuka. Nazalaki kolala mwa moke mpe kofungola miso mpo na komona bazamba kitoko oyo ezalaki ngámbo na ngámbo ya mwa nzela yango ya motuka, oyo ezalaki na bifelo oyo batongá na mabanga.

Butu ya liboso, tokómaki na engumba ya Skibbereen, mpe tolekisaki mpokwa moko ya malamu mpe tolendisanaki elongo na libota moko oyo eyaki na Irlande mpo na kopesa mabɔkɔ na mosala ya kosakola Bokonzi. Tosalaki masano ya masolo ya Biblia. Mokomoko na biso azalaki kozwa na kati ya sakosi nkombo ya moto moko oyo Biblia elobeli mpe na nsima azalaki kosala bajɛste mpo na komonisa likambo moko oyo moto yango akutanaki na yango. Basusu bazalaki kokanisa mpe kotánga nkombo ya moto yango.

Mokolo oyo elandaki, ngai ná baboti na ngai, leki na ngai ya mobali, ná bandeko na biso, mpe libota mosusu, tomataki na motuka moko mpe tokendaki na esanga Heir, epai bato soki 30 bafandaka. Yesu alobaki ete nsango malamu esengeli kosakolama na mabele mobimba esika bato bafandi. Yango wana, tolekisaki mokolo mobimba elongo na bato wana, oyo bayebi koyamba bapaya, mpe tolakisaki bango makanisi ya kolendisa oyo ezali na Biblia; tosepelaki mpe na mokili wana kitoko.

Ntango moi engalaki, mapata ezalaki bule. Mopɛpɛ etondaki na nsolo moko kitoko, mpe ezalaki koningisa nkasa ya ebele ya banzete ya kokoti. Bafololo etondaki na katikati ya esanga yango na bisika oyo ezalaki maimai. Nzela ya zɛlo oyo ezali pembenipembeni ya mai ekendá tii na bisika ya mabangamabanga oyo esalá ngomba epai bandɛkɛ lokola lingongo mpe fou de Bassan bafandaka na bana na bango. Na mosika, tozalaki komona bisanga ya mikemike, oyo mingi na yango bato bazalaka te, oyo babengaka Roaringwater Bay. Tokamwaki mingi mpenza na biloko nyonso oyo Yehova asalá na esika yango!

Nasepelaki ndenge nazwaki baninga mingi ya malamu na lisangá ya Batatoli ya Yehova na Skibbereen mpe ndenge namekaki kosala makambo oyo nasalá naino te liboso. Likambo ya sika oyo esepelisaki ngai makasi ezali kolúka bwato. Ezali na eloko moko te oyo ekokani na kotala libongo ya esanga yango ntango ozali kolúka bwato! Tozalaki kokende koluka mbisi mpo tólya na mpokwa, kasi Ba phoques, banyama moko ya mai ezalaki kowela mbisi yango liboso kutu biso tókanga yango. Tosalaki masano na biso moko na libongo mpe nabinaki kutu mabina ya Irlande.

Tozwaki mpe mwa ntango mpo na koluka koyeba makambo ya Skibbereen. Na mobu 1840, ntango pomme de terre ezalaki lisusu kobota malamu te, mpasi ekɔtaki na engumba yango mpe na bamboka ya pembenipembeni. Bankóto ya bato bakufaki na nzala, mpe bato 9 000 na kati ya bato yango bakundamaki na libulu moko. Tobɔndisamaki mpo toyebi ete mosika te, ntango Bokonzi ya Nzambe ekoyangela, nzala ekozala lisusu te, mpe ebele ya bato oyo bakufaki na ndenge wana ya nsɔmɔ bakozonga lisusu na bomoi na paradiso awa na mabele.

Tokendaki elongo na Batatoli ya engumba yango mpo na kotala bato oyo ezalaka mpasi kokuta bango na teritware monene wana. Tozalaki koleka na nzela moko ya moke, oyo ekei tii na bandako oyo ezali likoló mpenza ya ngomba, oyo etalani na mbu ya Irlande. Kuna mpe, bato oyo tokutanaki na bango bazalaki na boboto mpe bayambaki biso malamu. Ndenge tosalaki na esanga Heir, tobandaki naino komonisa ete toyei konje mpe tozali kolekisa mwa ntango na biso ya konje mpo na koyebisa basusu nsango malamu ya Biblia.

Mama asololaki na mwasi moko oyo andimaki kozwa bazulunalo na biso, Linɔ́ngi ya Mosɛnzɛli mpe Lamuká! Ntango tokutanaki na mwasi yango lisusu, alobaki bazulunalo yango esepelisi ye mingi.

Alobaki boye: “Nabondeli bino, bómemela ngai bazulunalo mosusu mpe bóya kosolola na ngai.” Toyebisaki ye ete mosika te tokozonga epai na biso, kasi tokotindela ye moto mosusu.

Alobaki boye: “Malamu, ntango bokozonga lisusu awa, bóya kotala ngai. Nakobosana bino te!”

Tolekisaki mokolo ya nsuka ya konje na biso na libongo elongo na bandeko ya lisangá ya mboka yango. Topelisaki mɔtɔ ya nkoni na mabanga mpe tolambaki mbɛmbɛ ya mai, oyo tolɔkɔtaki na mabanga oyo mai ya mbu ememaki na libongo. Mwana mwasi yango asepelaki mpenza na makambo oyo akutanaki na yango kuna!

Na yango, nakoki koloba nini na pɔsɔ oyo nalekisaki na Irlande? Ezalaki konje oyo eleki bakonje nyonso nazwá! Nasepelaki kaka te na makambo kitoko oyo namonaki kuna, kasi mpe mpo nayebaki ete nasali likambo oyo esepelisaki Yehova mpe ekumisaki ye. Nasepelaka kosalela Nzambe na biso, mpe ntango ozali na baninga mingi mpe libota oyo ezali na makanisi ndenge moko na oyo ya yo mpe ezali kosala elongo na yo, esengo ebakisamaka koleka. Ntango nazongaki ndako, natɔndaki Yehova ndenge apesaki ngai baninga wana ya malamu, oyo balingaka ye mpe mpo na makambo kitoko oyo nakotikala kobosana te.

[Eutelo ya bafɔtɔ na lokasa 25]

An Post, Irlande