Mpasi oyo liwa epesaka

Liwa ezalaka likambo ya kolobela na esengo te. Bato mingi balingaka kobɛta masolo na yango te. Kasi ata ndele, likambo yango ekómaka kaka. Mpe mpasi oyo liwa epesaka ezalaka makasi mpenza.

Eloko moko te ekoki kosalisa moto mpo ayoka mpasi te ntango moboti, molongani, to mwana na ye akufi. Moto akoki kokufa na mbalakaka to nsima ya kobɛla ntango molai. Ezala ndenge nini, mpasi oyo liwa epesaka ezalaka makasi mpenza, mpe ekoki kobulunganisa moto.

Antonio, oyo tata na ye akufaki na aksida ya motuka, alobi boye: “Ezalaki lokola nde moto akangi ndako na bino mpe akimi na bafungola. Mwaye ya kokɔta na ndako ezali te. Otikali kaka na makanisi ya makambo ya kala. Ozali koboya kondima likambo oyo ekómeli bino, mpo ozali komona ete ezali sembo te, kasi ozali na eloko ya kosala te.”

Dorothy, oyo azalaki na mbula 47 ntango mobali na ye akufaki, amitunaki mituna mingi. Lokola azalaki molakisi na Eteyelo ya mokolo ya lomingo, azalaki komona ete nyonso esukaka na liwa te. Kasi azalaki kozwa biyano ya malamu te. Atunaki pastɛrɛ moko ya Lingomba ya Angleterre ete: “Nini ekómelaka moto soki akufi?” Pastɛrɛ ayanolaki boye: “Moto moko te ayebi. Tózela kaka mpo tómona.”

Esengeli “tózela kaka mpo tómona”? Tokoki te koyeba mpenza soki nyonso esukaka na liwa?