Mpo na nini bazali kosala yango?

¹ Na ntina na Yesu, esakolamaki ete ‘mposa mpo na ndako ya Nzambe ekolya ye.’ (Nz. 69:9) Mposa makasi Yesu azalaki na yango mpo na losambo ya solo epesami na Yehova epusaki ye ete atya mosala na ye na esika ya liboso. (Luka 4:43; Yoa. 18:37) Na mikolo na biso, Batatoli ya Yehova bazali komonisa na mosala na bango mposa makasi motindo moko mpo na kotatola na ntina na solo. Na mobu moleki, mwayene ya basakoli 645 509 bamipesaki sanza na sanza na lolenge moko to mosusu ya mosala ya mobongisi-nzela. Biso lokola tosilá komipesa na Nzambe, tosengeli biso banso kotalela kati na libondeli soki tokoki komibongisa mpo na kozala babongisi-nzela basungi to ya sanza na sanza.​​​—Nz. 110:3; Mos. 12:1; Lom. 12:1.

² Tozali kobika na eleko moko ya moimi mpe ya mposa ya bozwi ya mosuni; bato mingi bazali kokanga ntina te ete bamoko bazali komipesa mingi na mosala ya kosakola nzokande yango ezali mosala ya kozwela yango mosolo te to mpe lokumu te. Mpo na nini babongisi-nzela bazali kosala yango? Bayebi ete bazali komipesa na mosala ya lobiko. Lokola bapusami na bolingo mozindo ya Yehova mpe ya bazalani na bango, bazali komiyoka ete basɛngisami na kopesa lisungi na bango mpo na kobikisa bomoi ya bato. (Lom. 1:14-16; 1 Tim. 2:4; 4:16) Babalani mibale babongisi-nzela balobelaki malamu likambo yango na mokuse: “Mpo na nini tozali babongisi-nzela? Tolingaki kozala na ntina malamu ya komonisa epai ya Nzambe soki tozalaki babongisi-nzela te?”

³ Ndeko mosusu ya mwasi alobelaki ekateli na ye ya kobanda mosala ya mobongisi-nzela: “Ngai mpe mobali na ngai tozwaki ekateli ya kobika bobele na lifuti moko, likambo oyo esɛngaki ete tótika koluka biloko mingi. Atako bongo, Yehova apambolaki biso mpe, atikaki biso na bobóla to na kozanga biloko te.  . . . Nasili kokanga ntina ya solo ya bomoi: Nazali kosunga bato oyo bazali komonisa mposa ya koyeba ete Yehova, Nzambe ya solo, azali mosika te na baoyo bazali koluka ye.” Lokola bayebi ete ntango ezali kokende mbangu, babongisi-nzela bazali kosepela na biloko ya ntina mpo na kobikela kasi bazali nde konduka biloko ya motuya ya solo ya elimo oyo bikoumela seko.​​​—1 Tim. 6:8, 18, 19.

⁴ Soki ezalela na yo epesi yo nzela, mpo na nini te kokota na molɔngɔ́ ya bankámá ya bankóto ya bandeko mibali mpe basi oyo bazali babongisi-nzela kati na mokili mobimba? Yango ekopesa yo nzela ya kozwa esengo lokola bango.