Tyá kominanola na esika ebongi na yango

¹ Na mikolo oyo ya mpasi, biso nyonso tozalaka na mposa ya konyolisa nzoto na bantango mosusu. Ezali na mitindo mosusu ya kominanola oyo ezali malamu. Kasi soki okómi kolekisa ntango mingi na kominanola, na kosakana, mpe na kobɛta masolo, mokemoke yango ekobanda kolya yo ntango oyo okokaki kosalela mpo na makambo ya elimo. Yango wana, tosengeli kotya kominanola na esika ebongi na yango. (Mat. 5:3) Ndenge nini tokoki kosala yango? Soki tolandi toli oyo ezali na Baefese 5:15-17.

² Kolekisa ndelo te: Paulo akomelaki baklisto ete basengeli ‘kokeba mpenza’ na ndenge bazali kotambola, bázala bato ya mayele. Yango wana, mpo tólekisa ndelo te na kominanola, tosengeli kozala na bokatikati mpe koyeba komipekisa. Ebongi tókanisa malamumalamu ndenge tosalelaka ntango na biso oyo mosala ezalaka te. Kominanola esengeli komemela biso mwa matomba na nzoto, kasi esengeli te kolekisa biso ntango mpambampamba to kolembisa biso na nsima ya kosala yango. Soki tomiyoki ete tosali mosala ya mpunda, tozwi eloko te, mpe tomoni lokola tosali mabe moko boye nsima ya kosala lisano moko boye, wana elakisi ete tosengeli kobongisa lisusu ndenge oyo tozali kosalela ntango na biso.

³ Zalá mayele: Paulo apesaki biso toli ‘tósombaka ntango oyo ebongi’ mpo na kosala makambo oyo eleki ntina na bomoi na biso, tózala “bazoba te.” (Ef. 5:15-17, NW ) Baklisto oyo bamipesi [na Nzambe] bakoki ata moke te kokómisa kominanola likambo oyo eleki ntina mingi na bomoi na bango. Atako kopema mpe kozwa mwa mopɛpɛ ekoki kopesa biso nzoto makasi, tóbosana te ete nguya ya Nzambe nde epesaka makasi ya elimo. (Yis. 40:29-31) Misala ya Teokrasi lokola koyekola Biblia, koyangana na makita ya lisangá, mpe kobima na mosala ya kosakola nde esalisaka biso tozwa elimo ya Nzambe, kasi tozwaka yango na kominanola te.

⁴ Tyá makambo oyo eleki ntina na esika ya liboso: Paulo alobaki na baklisto ete “bókoba kososola soki mokano ya Yehova ezali nini.” Yesu ateyaki ete makambo nyonso oyo tokosala esengeli kozala mpo na Bokonzi ya Nzambe, oyo ezali eloko ya libosoliboso na bomoi na biso. (Mat. 6:33) Tosengeli kosala libosoliboso makambo oyo ekopesa biso nzela ya kozala na bomoi oyo eyokani na komipesa na biso epai ya Yehova. Na nsima nde, tokoki kotya kominanola na esika ebongi na yango. Soki tosali bongo, yango ekomemela biso matomba mingi, mpe tokosepela na yango mingi koleka.​—Mos. 5:12.