Biyano na mituna na bino

◼ Tosengeli mpe kotánga boyekoli ya Biblia na kati ya libota na lapolo ya mosala ya kosakola oyo topesaka na nsuka ya sanza?

Soki tata to mama oyo azali moklisto atambwisaka boyekoli ya Biblia na kati ya libota mpe bana oyo bazwi naino batisimo te bazalaka wana, tata to mama yango akoki kokoma na lapolo na ye ngonga moko na pɔsɔ, bozongeli ya sika moko na pɔsɔ mpe boyekoli ya Biblia moko na nsuka ya sanza. Akokoma kaka mitángo wana ata soki boyekoli yango eumelaka koleka ngonga moko, esalemaka mbala mibale to koleka na pɔsɔ, to mpe ayekolaka bongo na mwana mokomoko.​—Talá buku Lisangá, lok.105.

Soki bato nyonso ya libota bazali Batatoli oyo bazwi batisimo, moboti wana akokoma te na lapolo na ye ngonga oyo alekisaka na koyekola na libota na ye, akotánga mpe boyekoli yango te na lapolo na ye (kasi akokoma yango soki mwana moko oyo azali kolanda koyekola buku ya mibale nsima ya batisimo na ye azali). Ezali bongo mpamba te lapolo ya mosala ya kosakola ya lisangá emonisaka libosoliboso mosala oyo basakoli bazali kosala mpo na kosakola nsango malamu mpe koteya solo ya Biblia epai ya bato oyo bazali naino basaleli ya Yehova te oyo bamipesá mpe bazwá batisimo. (Mat. 24:14; 28:19, 20) Atako bongo, yango elingi koloba te ete koyekola Biblia na kati ya libota ezali lisusu na ntina mingi te.

Baboti baklisto nde bazali na mokumba ya koyekola na bana na bango. Baboti oyo bazali na mposa básalisa bango mpo boyekoli ya Biblia ezala na libota na bango to mpo bábongisa lolenge oyo bayekolaka na libota na bango bakoki kosɛnga lisalisi yango na bankulutu. Soki ezali na makambo oyo esɛngi ete mosakoli mosusu ayekola na mwana moko oyo azwi naino batisimo te, oyo azali na kati ya libota ya baklisto oyo bazali mpe na kati ya lisangá, esengeli kotuna naino mokɛngɛli-mokambi to mokɛngɛli na mosala ya kosakola. Soki bandimi, mosakoli yango akoki kotánga boyekoli yango na lapolo na ye lokola kaka atángaka boyekoli ya Biblia oyo asalaka na bato mosusu.

Koteya bana banzela ya Yehova esɛngaka ntango mpe milende mingi koleka mwa mitángo oyo ekomamaka na lapolo ya mosala ya kosakola. (Det. 6:6-9; Mas. 22:6) Baboti baklisto babongi kozwa longonya mpo na ndenge bazali kokokisa mokumba monene oyo bazali na yango ya kobɔkɔla bana na bango “na disipilini mpe na makebisi ya Yehova.”​—Ef. 6:4.