Makanisi mpo na ndenge ya kolakisa mwa babuku—Eteni 2
BATELÁ YANGO
Quel est le but de la vie? Comment le découvrir?
Nsima ya kopesa moto oyo olingi kosolola na ye mbote, okoki koloba boye:
“Lelo oyo, bomoi etondi na mikakatano mpe na makambo ya mawa. Okanisi ete tosalemaki mpo na kozala na bomoi ya ndenge wana? [Tiká ye apesa eyano.] Mwa buku oyo emonisi ete nsukansuka, mokano oyo Nzambe azalaki na yango na ebandeli mpo na bato mpe mabelé ekokokisama. [Lobelá elilingi ya nkasa 20-21. Na nsima, tángá paragrafe 9, lobelá polele Yisaya 14:24 mpe 46:11.] Ntango nakoya mbala ya nsima, nakosepela komonisa yo esika oyo Biblia elobi ete Nzambe akozongisa Paladiso awa na mabelé.” Tikelá ye mwa buku yango, mpe bóyokana mpo ozongela ye.
Ntango okozongela ye, okoki koloba boye:
“Mbala eleki, nalobaki ete mokano ya Nzambe ezali ete bato bázala na bomoi ya seko na paladiso awa na mabelé. [Lakisá ye lisusu elilingi ya nkasa 20-21.] Yebá ete Yesu, Petelo, mpe Davidi balobelaki Paladiso.” Sɛngá ye azwa mwa buku na ye. Na nsima, fungolá na nkasa 21-22, mpe bótalela paragrafe 10-13. Sɛngá ye bóyekola na ye Biblia, to bóyokana mpo bótalela moko ya mitó ya makambo mike na nkasa 29-30 mbala ya nsima.
―――◆―――
Mosakoli oyo azali elenge akoki koloba boye:
“Bilenge mingi lokola ngai bamitungisaka mingi mpo na mikolo ezali koya. Okanisi ete bana oyo bakobotama na bambula ekoya bakozala na bomoi ya malamu koleka? [Tiká ye apesa eyano.] Biblia elobi ete bato ya mokili mobimba bakozala na bomoi ya malamu na mikolo ezali koya. [Fungolá na elilingi ya lokasa 31 na mwa buku yango, mpe tángá maloba ya elilingi. Na nsima, tángá 2 Petelo 3:13.] Mwa buku oyo elobeli mapamboli oyo Nzambe abombeli bato na mikolo ezali koya. [Lobelá polele mitó ya makambo mike oyo ezali na makomi ya moindo, na nkasa 29-30, mpe tikelá ye mwa buku yango.] Nakosepela kozongela yo lisusu mpo na koyebisa yo elaka oyo Nzambe apesi ya kosilisa bitumba.” Bóyokana mpo ozongela ye.
Ntango okozongela ye, okoki koloba boye:
“Na mbala eleki, nalobelaki na mokuse mokano oyo Nzambe azali na yango ya kozongisa paladiso awa na mabelé. [Lobelá lisusu elilingi ya lokasa 31.] Nakosepela koyeba likanisi na yo na elaka oyo Nzambe apesi ya kosilisa bitumba.” Sɛngá ye azwa mwa buku na ye. Na nsima, bótánga mpe bólobela paragrafe 3-6 na lokasa 29. Bóyokana mpo bótalela paragrafe 7-8 ntango okozongela ye mbala ya nsima.
―――◆―――
Soki mokóló moko azali kosakola elongo na mwana moko ya moke, akoki kobanda mpe koloba boye:
“Soki osepeli, ________ alingi kolakisa yo elilingi moko mpe kotángela yo vɛrsɛ moko na kati ya Biblia. [Mwana alakisi elilingi mpe atángi maloba ya elilingi ya lokasa 31 mpe na nsima, atángi Emoniseli 21:4.] Mwa buku oyo ezali kolimbola makambo oyo Nzambe akosala mpo na kosilisa mikakatano oyo ezali kokómela bato lelo oyo. [Lobelá na mokuse mitó ya makambo mike oyo ezali na makomi ya moindo na nkasa 29-30, mpe tikelá ye mwa buku yango.] Ntango tokoya mbala ya nsima, nakosepela kolakisa yo makambo oyo Biblia elobi mpo na nsuka ya bamaladi nyonso.”
Ntango bokozongela moto yango, mokóló akoki koloba boye:
“Ntango tosololaki mbala eleki, nalobaki ete nakosepela komonisa yo makambo oyo Biblia elobi na oyo etali ndenge bamaladi nyonso ekosila. Talá oyo balobi awa.” Sɛngá ye azwa mwa buku na ye. Na nsima, bótalela paragrafe 9-14 ya lokasa 29. Sɛngá ye bóyekola na ye Biblia, to bóyokana mpo bótalela paragrafe 15-17 mbala ya nsima.
Maloba ya kolimbola elilingi na lokasa 3]
Siplema oyo ezali na makanisi ndenge na ndenge oyo ekosalisa bino bóbongisa masolo mpo na kolakisa mwa babuku. Bokoki kobongisa makanisi yango na kotalela teritware ya lisangá na bino.—Talá Mosala na biso ya Bokonzi ya Yanuali 2005, lok. 8 mpe ya Yuni 2005 lok. 3, 4.