Mituna oyo bilenge batunaka . . .

Miziki ebéngami “Rock alternatif”: Ebongi nde mpo na ngai?

“Banzembo oyo ezali kolobela makambo ndenge na ndenge mpe mikakatano oyo bilenge bazali kokutana na yango etaleli ngai.”​—George, elenge mobali ya mibu 15.a

“Ezali na katikati ya miziki “pop” mpe “heavy metal””​—Dan, elenge mobali ya mibu 19.

“Ezali miziki ya sika. Ekeseni. Ezali mpo na bato nyonso te.”​—Maria, elenge mwasi ya mibu 17.

ROCK alternatif. Bilenge mingi balingaka koyoka yango. Mikóló mingi batungisamaka na yango. Mpe ekoki kozala ete baboti mingi bayebi yango mpenza malamu te to mpe bayebi yango ata moke te.

Ya solo, ezali pɛtɛɛ te kolimbola na sikisiki mpenza soki rock alternatif ezali nini. Na ebandeli, ezalaki miziki ya bilenge oyo bazalaki kolinga koyoka miziki ya ndenge mosusu, miziki oyo ekeseni na oyo ezalaki koyokama na radio. Bamoko balobi ete yango ebandaki mpenza na ntango baradio oyo etambwisami na bilenge banakelasi epesaki nzela na bamoko ya bituluku ya bayembi oyo biyebanaki mpenza te ete bango mpe bákoka koyokama​—bituluku oyo bizalaki komikumisa ete bábebisaki miziki na bango te na kondimaka masɛngami ya bakompanyi oyo esalaka badiskɛ. Baalanga-nzembo wana ya sika baboyaki esaleli ya bakompanyi minene ya badiskɛ mpe lolenge ya kosala piblisité ya miziki, lokola na kosaláká ba videoclips. Lisusu, maloba ya nzembo na bango ekesanaki mpenza na oyo ya nzembo mingi oyo elekaka na Hit-parade.

Na kokesana na “heavy metal” to mpe “rap,” rock alternatif ezalaka mpenza pɛtɛɛ te mpo na kokesenisa yango to mpo na koyeba yango. Ata banganga-mayele na makambo ya kobimisa nzembo na badiskɛ mpe bakasɛti bazali na makanisi makeseni na ntina na rock alternatif. Mpamba te lokola nkombo emonisi yango, esangisi mindule mpe mayoki ndenge na ndenge. Elenge mobali moko alobaki ete: “Ezali mpasi mpo na koyeba esika na yango. Yango esangisi eteni monene ya miziki ya mikolo oyo.” Elenge mosusu amekaki kolimbola yango na maloba oyo: “Yango ezalaka ntango nyonso makasimakasi te to mpe elala te, ezalaka mbangumbangu te, malɛmbɛ mpe te, makɛlɛlɛ te, kasi ya nsé mpe te.” Elenge mosusu kútu andimaki ete: “Nandimisami te soki nakoki solo koloba ete nalingaka rock alternatif mpamba te nayebi mpenza te soki yango ezali nini.”

Ata soki ezali nini, koyebana makasi ya rock alternatif esali ete mingi kati na babɛti na yango bátalelama lokola bavɛdɛti minene. Lisusu, emonani ete baboti bazali mpenza kopekisa yango te lokola bazali kosala mpo na heavy metal to lolenge mosusu ya rock ya makɛlɛlɛ mingi. Ya solo, emonani ete baboti mingi bazali koyeba te wapi lisangá ya baalanga-nzembo to mpe wapi nzembo oyo ekoki kolobama ete ezali “ya rock alternatif.” Atako bongo, ezali na ntina ete osalela bokɛngi na ntina na miziki wana.

Nini ezali kobenda bato?

Na ndakisa, tótalela ntina oyo bilenge mingi bazali kobendama na miziki yango. Mpo na bilenge mingi ezali bobele likambo ya kolanda baninga. Ezali mpe kopesa nzela na kozala na masoló to mpe kosala makambo elongo, lokola kodefisana bakasɛti mpe ba CD (disque compact).

Nzokande, mpo na bilenge mingi, ezali nde lokito mpe nsango ya rock alternatif nde ezali kobenda bango. Bilenge mingi bazali komona ete mayoki na bango mpe makambo bazali kokutana na yango na bomoi ekokani na oyo ya basáli na nzembo. Nimero moko ya zulunalo Time ezalaki na molɔngɔ́ ya masoló na likambo oyo, elimbolaki ete: “Wana nzembo ya miziki pop ezali mbala mingi kolobela lolango, nzembo ya rock alternatif ezali mbala mingi na maloba oyo mazali komonisa mayoki ya mabe: kobungisa elikya, mposa mabe ya nzoto, mobulungano. . . . Soki ozali na bambula ya bolenge to mpe pene na mbula 20, ekoki kozala ete baboti na yo basilá koboma libala. Rock alternatif esili kokóma lolenge ya komonisa mayoki na nzela ya loláká, na kolobeláká mpenzampenza mikakatano oyo mizali kosilisama te lokola liyoki ya kotikama mpe ya kozanga boyengebene.” Na yango, animatɛrɛ moko ya emisyó ya miziki na radio oyo ozali na mbula 21 alobi ete: “Esepelisaki ngai mpe baninga na ngai mpamba te bana ya eleko na biso bazali na mposa ya mokili te. Eloko moko te ya malongá ekoki kosalema mpo na biso nsima wana tokosilisa kelasi.”

Bilenge baklisto mosusu bakómi mpe kolinga miziki yango mingi. Ya solo, mingi bazali koboya nzembo oyo ezali na maloba mabe, ya botomboki, ya mobulu, to mpe ya mbindo. Atako bongo, bamoko kati na bilenge baklisto yango bamonisi ete bazali mpe na bokɛngi mpo na nzembo oyo emonani lokola ete ezali mabe te. Dan, elenge moko, alobaki ete: “Bamoko kati na bayembi bayebani ete basangisaka nzoto mibali na mibali mpe basi na basi to basalelaka bilangwiseli, mpe nzembo na bango elobelaka lolenge ya bomoi na bango.” Elenge mosusu na nkombo ya Jack, alobi ete: “Bituluku mosusu ya bayembi bakanisaka ete moto moko te azali komibanzabanza mpo na bango, mpo na mikakatano na bango, to mpo na bomoi ya bilenge ya eleko oyo na mikolo mizali koya, mpe bazali komonisa yango kati na nzembo na bango. Mingi bazangi matindiki to mpe bazangi elikya.”

Kebá!

Biblia eyebisi biso ete “mokili mobimba ezali kolala na kati na oyo mabe,” Satana Zábolo. (1 Yoane 5:19) Na yango, osengeli kokamwa te ete miziki ezali moko na myango oyo Satana azali kosalela mpo na kozimbisa bilenge. Masoló mingi masilaki kobimisama kati na zulunalo oyo mpe na Linɔ́ngi ya Mosɛnzɛli, mamonisaki likambo yango.b Makebisi oyo masilaki kopesama na ntina na miziki ya rap mpe heavy metal mabongi mpe mpo na miziki ya “rock alternatif.” Lokola Biblia elobi yango, “moto na mayele akotala malamu na nzela ekokenda ye.”​—Masese 14:15.

Na ndakisa, kolanda bato mosusu mpo na oyo etali kopona lolenge ya miziki oyo osengeli koyoka ezali bozoba. Simbá etindá oyo euti na Biblia, oyo ekoki mpe kosalelama ntango moto azali kotika ete bato mosusu bázwa makatami mpo na ye: “Boyebi te ete soko bokomipesa bino mpenza epai na moto ete bósalela ye na botosi, bozali baombo na ye oyo bokotosaka?” (Baloma 6:16) Mpo na elenge moklisto, likambo lizali te ya koyeba soki oyo wapi endimami epai na baninga na ye kasi nde wapi oyo “ekosepelisa Nkolo.” (Baefese 5:10) Epai mosusu, lolenge nini ya bilenge balingaka mingi miziki wana? Ezali nde bilenge oyo bamonani ete bazali na esengo, bazali na bokatikati, mpe basepelaka na makambo ya elimo? To ezali nde kolingama libosoliboso epai na bilenge oyo bazali mawamawa, bazangi esengo, to mpe bazali na nkanda?

Ya solo, bilenge mosusu oyo bazali na esengo, bazali na bokatikati, bazali na elikya, bakoki mpe kobendama na “rock alternatif.” Kasi, talelá naino likambo oyo: Baklisto, bilenge mpe mikóló, bazali na bomoi malamu liboso na bango na mikolo mizali koya, boye te? (2 Petelo 3:13) Ntoma Paulo azali kokundwela biso bosolo ya bilaka ya Nzambe na maloba oyo: “Nzambe akoki komimonisa na lokuta . . . te.” (Baebele 6:18) Na yango, okozwa litomba nini soki ozali komikɔtisa na lolenge elongobani te ya kotalela mikolo mizali koya, lokola yango emonisami na nzembo misusu ya “rock alternatif ?” Komizindisa na lolenge ya miziki oyo ezali komonisa bobángi, kozanga elikya, ekolendisa mpenza kondima na yo? Lisusu, koyoka mbala na mbala miziki motindo wana ekoki kozala na bopusi nini likoló na mayoki na yo?

Salá liponi

Yango elimboli te ete miziki nyonso ebéngami “alternatif” ezali mabe to ezali na likámá. Kasi, kanisá soki oyoki ete moto moko alingi kotyela yo ngɛngɛ na bilei. Atako okotika kolya te, kasi okotalela bilei na yo na likebi, boye te? Koyebáká ete Satana azali komeka kobebisa lolenge na biso ya kotalela makambo mpe elimo na biso, esengeli mpe kosala ete tózala na bokɛngi na ntina na lolenge ya miziki oyo tosepeli koyoka yango. Lokola Biblia elobi yango, “litoi ekomeka maloba lokola monɔkɔ ekomekaka bilei.” (Yobo 34:3) Na esika ya kolanda bato lokola mokufi-miso, osengeli nde kotalela malamumalamu miziki oyo olingi koyoka.

Lolenge nini okoki kosala yango? Etánda oyo ezali na motó na likambo ete “Lisungi mpo na lolenge ya kopona miziki” ezali na makanisi mabongi oyo okoki kosalela yango. Lisusu, meká kotuna epai na baboti baklisto likanisi na bango na ntina na miziki oyo ozali koyoka. (Masese 4:1) Mbala mosusu eyano na bango ekokamwisa yo! Ya solo, baboti na yo bazali mikóló koleka yo. Na ntembe te, bakoki mbala mosusu kozala na bosepeli lolenge moko te na yo na ntina na miziki. Kasi soki bazali kosepela te na lolenge ya miziki na yo kino kotalela yango ete ezali mabe, ya mbindo, to ya nsɔni, osengeli nde koboya kotya mpenza likebi na oyo bazali koyebisa yo? Biblia elobi ete: “Moto na mayele akoyoka mpe akofulukisa mayele.”​—Masese 1:5.

Talelá mpe bopusi ya miziki yango likoló na yo. Ezali komema yo na koyoka nkanda, na kotomboka, to na koyoka ete otungisami na makanisi? Soki ɛɛ, ezali wana bilembo ya likebisi oyo osengeli te kotalela yango lokola likambo moke! Mpo na nini te kopona miziki oyo ekonyolisa yo, oyo ekokitisa mayoki na yo to oyo ekopesa yo esengo?

Lolenge ya miziki ezali ntango nyonso kobongwana. Mosika te, lolenge mosusu ya miziki ekobima mpe ekobenda bato. Koluka te ete omemama na mbongé oyo ezali kobongwana mbala na mbala. Zalá na bososoli mpe salá liponi na oyo etali miziki oyo okoyoka. Ondimisama ete ozali koyoka makambo oyo mazali pɛto mpe oyo mazali kotonga. (Bafilipi 4:8) Na lolenge yango, miziki ekozala moko na bisengo ya bomoi oyo ezali na motuya mpe na esengo!

[Maloba na nse ya lokasa]

[Likanisi ya paragrafe na lokasa 22]

“Wana nzembo ya miziki pop ezali mbala mingi kolobela lolango, nzembo ya rock alternatif ezali mbala mingi na maloba oyo mazali komonisa mayoki ya mabe: kobungisa elikya, mposa mabe ya nzoto, mobulungano.”​—Zulunalo Time

[Etanda na lokasa 23]

Lisungi mpo na lolenge ya kopona miziki

◆ Talá malamumalamu ezipeli ya kasɛti to ya diskɛ. Mbala mingi yango epesaka makanisi na ntina na lolenge ya miziki mpe babɛti na yango. Kebá na ezipeli ya kasɛti oyo ezali na bililingi ya bato ya mobulu, bilembo ya bademó, bato bazali na elateli mpe lolenge ya kokatisa nsuki oyo elongobani te, to mpe bolumbu ya bato.

◆ Talelá nsango oyo maloba ya nzembo ezali kopesa. Yango ezali komonisa makanisi mpe lolenge ya bomoi ya baalanga-nzembo. Makanisi nini balingi ete yo ondima yango?

◆ Mayoki mpe makanisi oyo baalanga-nzembo balingi ete yo omekola yango ekoki komonana na lolenge ya mondule na yango​—mawa, esengo, kozanga kotyela bato motema, kolamwisa mposa ya kosangisa nzoto, kimya, to mpe kozanga elikya.

◆ Talelá lolenge ya bato oyo bazali mingi kosepela na lolenge ya miziki yango. Okosepela kokokana na etuluku ya bato yango mpe lolenge na bango?

[Elilingi na lokasa 23]

Bilenge mingi bazali komona ete maloba ya nzembo ya mikolo na biso etaleli bango