Engebene Biblia

Ndenge nini koyika mpiko ntango tozali lisusu na elikya te?

EKÓMELAKA biso nyonso ete tózala lisusu na elikya te na likambo moko to mosusu. Kasi bato mosusu babungisaka mpenza elikya nyonso oyo bazalaki na yango mpe bamonaka kutu malamu bákufa na esika ya kozala na bomoi.

Biblia emonisi ete ata basaleli ya Nzambe oyo bazali sembo bakutanaka na mikakatano mpe mitungisi oyo esalaka ete báyeba te soki bakosala nini. Talá ndakisa ya Eliya na Yobo, bato oyo bazalaki na boyokani malamu na Nzambe. Mpo na kobatela bomoi na ye, Eliya akimaki Mokonzi mwasi mabe Yezabele mpe na nsima, “asɛngaki [Yehova] ete molimo na ye ekufa.” (1 Mikonzi 19:1-4, NW) Yobo, moto ya sembo, akutanaki na makambo mingi ya mpasi, lokola maladi mabe oyo abelaki mpe liwa ya bana na ye zomi. (Yobo 1:13-19; 2:7,8) Lokola ayebaki lisusu eloko ya kosala te, Yobo alobaki ete: “Nalingi nakufa na ngai na esika ya konyokwama boye.” (Yobo 7:15, The New English Bible) Emonani polele ete basaleli yango ya Nzambe, atako bazalaki sembo, bakómaki na mitungisi makasi.

Bato mosusu lelo oyo, mpo banuni mpe bakómi na mpasi, to mpo molongani akufi to mpe mpo na mikakatano makasi ya mbongo, bazali lisusu na elikya te. Bato mosusu bazalaka na mitungisi oyo ezali kosila te, to bakutanaki na likambo moko na bomoi na bango to mikakatano ya libota; ntango bakanisaka yango, bamimonaka lokola babungi na kati ya mbu, esika mbonge ezali kozongisa bango nsima mpe ezali kosala ete bákóma na libongo te. Mobali moko alobaki boye: “Okomiyoka lokola ozangi ntina, lokola nde bato bakokanisa yo te soki okufi. Na bantango mosusu, moto azali komiyoka ete azali ye moko mpe azali komona ete akokoka lisusu te.”

Ntango mosusu makambo ebongaka mpe mitungisi wana makasi esilaka. Kasi tokosala nini soki mbongwana moko te ekosalema? Ndenge nini Biblia ekoki kosalisa biso tóyika mpiko ntango tozali lisusu na elikya te?

Biblia ekoki kosalisa yo

Yehova azalaki na likoki mpe na nguya ya kosalisa Eliya na Yobo na mikakatano na bango. (1 Mikonzi 19:10-12; Yobo 42:1-6) Koyeba likambo yango ekosalisa biso mpenza lelo oyo! Biblia elobi boye: “Nzambe azali ekimelo mpe nguya na biso; amonani solo na kosunga na ntango na mpasi.” (Nzembo 46:1; 55:22) Atako ekoki kokómela biso na komona ete eloko mosusu ya kosala ezali te, Yehova alaki ete akosimba biso makasi na lobɔkɔ na ye ya mobali ya bosembo. (Yisaya 41:10) Ndenge nini tokoki koluka mpe kozwa lisungi na ye?

Biblia elobi ete na nzela ya libondeli, “kimya ya Nzambe oyo eleki makanisi nyonso, ekosɛnzɛla mitema na [biso] mpe [makanisi, NW] na [biso] kati na Klisto Yesu.” (Bafilipi 4:6, 7) Lokola tozali na mpasi, mbala mosusu tozali komona ete mikakatano na biso ekosila te. Kasi soki tozali ‘koyika mpiko mpo na kobondela,’ Yehova akoki kobatela mitema na biso mpe makanisi na biso, akopesa biso nguya oyo esengeli mpo tóyika mpiko.​—Baloma 12:12; Yisaya 40:28-31; 2 Bakolinti 1:3, 4; Bafilipi 4:13.

Soki tozali kolobela mikakatano na biso polele na kati ya libondeli, tokozwa matomba. Atako ekoki kozala mpasi tólobela makanisi na biso, tosengeli koyoka nsɔni te mpo na koyebisa Yehova ndenge oyo tozali komiyoka mpe likambo oyo ebimisi mokakatano yango. Tosengeli kosɛnga ye apesa biso makasi mpo tóyika mpiko na boumeli ya mokolo mobimba. Biblia endimisi biso ete: “[Yehova akokokisa, NW] mposa na bango baoyo bakobanga ye, akoyoka mpe koganga na bango mpe akobikisa bango.”​—Nzembo 145:19.

Longola libondeli, tosengeli mpe kobundisa ezaleli ya kozala biso moko. (Masese 18:1) Bato mosusu bamipesaki mpo na kosalisa bazalani na bango mpe yango elendisaki bango. (Masese 19:17; Luka 6:38) Tózwa ndakisa ya Maria,a mwasi moko oyo azalaki kobundana na maladi ya kanser mpe kaka na mbula moko, bato mwambe ya libota na ye bakufaki. Mokolo na mokolo, Maria asengelaki kosala makasi mpo na kolongwa na mbeto mpe kokende kosala misala na ye. Mokolo na mokolo, azalaki kobima mpo na kokende koteya bato mosusu Biblia mpe azalaki kozangisa makita ya boklisto te. Ntango azalaki kozonga ndako, Maria azalaki koyoka ete mitungisi na ye ezalaki kozonga lisusu makasi. Kasi, lelo oyo, lokola asalaka makasi akanisa ndenge oyo akoki kosalisa bato mosusu, Maria azali na likoki ya koyika mpiko.

Bongo soki tozali komona ete ezali mpasi kobondela to tozali komona ete tozali kokoka te kotika ezaleli ya kozala kaka biso moko? Soki ezali bongo, tosengeli koluka lisungi. Biblia elendisi biso tókende epai ya “bankulutu ya lisangá.” (Yakobo 5:13-16, NW) Moto moko oyo azalaki konyokwama ntango nyonso na makanisi alobaki boye: “Na bantango mosusu, soki osololi na moto moko oyo otyelaka motema, yango ekosalisa yo ozala na kimya na makanisi mpe otalela makambo ndenge ezali.” (Masese 17:17) Kasi, soki maladi nde ezali kolɛmbisa yo nzoto mpe ozali koyeba te soki osala nini, ekoki kozala malamu okutana na minganga oyo basalisaka maladi yango.b​—Matai 9:12

Atako nkisi ezali te mpo na kosilisa mikakatano nyonso lelo oyo, tosengeli te kotya ntembe ete Nzambe akoki te kosalisa biso tóyika mpiko na mikakatano na biso. (2 Bakolinti 4:8) Soki tozali kobondela ntango nyonso, soki tozali koboya ezaleli ya kozala kaka biso moko mpe soki tozali koluka lisalisi oyo ebongi, yango ekosalisa biso tózala lisusu malamu. Biblia elaki ete Nzambe akosilisa makambo nyonso oyo ezali kosala ete tózala lisusu na elikya te. Mokano ya baklisto ezali ete bátyela Nzambe motema mpe bázela mokolo oyo ‘makambo ya liboso ekokanisama te.’​—Yisaya 65:17; Emoniseli 21:4.

[Maloba na nse ya lokasa]