Kozanga bosembo epalangani mingi!

Dannya asalaka na kompanyi moko monene ya mombongo na engumba Hong Kong. Akendeki kotala izini moko mpo na koyeba soki ekokoka kobimisa biloko na ndenge kompanyi na bango esɛngaka. Na mpokwa, ntango bazalaki kolya, mokambi ya izini yango apesaki Danny anvɛlɔpi moko oyo na kati ezalaki na kanyaka ya bankama ya badolare; mbongo yango ekokanaki na lifuti ya Danny ya mbula mobimba.

● Likambo ekómelaki Danny, ekómelaka mpe bato mingi. Na mokili mobimba, makambo ya kozanga bosembo epalangani na ndenge moko ya nsɔmɔ! Na ndakisa, balapolo ya tribinale moko emonisi ete kati na mobu 2001 mpe 2007, kompanyi moko monene na Allemagne efutaki badolare pene na miliare moko na ndambo ya kanyaka mpo ezwa bakiliya.

Atako makambo ya mabe oyo bakompanyi mosusu esali etindi bábimisa mibeko mosusu mpo na kopekisa kanyaka, momeseno yango epalangani lisusu mingi koleka. Na mobu 2010, ebongiseli moko (Transparency International) esalaki ankɛtɛ moko mpe emonaki ete na mokili mobimba, “kanyaka ebakisami mingi na mbula misato oyo euti koleka.”

Mpo na nini kozanga bosembo epalangani mingi boye? Kosala makambo na bosembo efutaka? Soki efutaka, ndenge nini moto akoki kosala makambo na bosembo? Biblia ekoki nde kosalisa biso na likambo yango?

[Maloba na nse ya lokasa]