Liteya 12

Diskur oyo oyebi bobele makanisi mpe diskur ya mbalakaka

1, 2. Ndenge nini Jéhovah azali kosalisa biso ete toyeba koloba malamu?

¹ “Bomitungisa te soko bokoloba nini. Mpo ete bokozwa likambo likokoka na bino koloba bobele na ntango yango. Mpo ete bino mpenza bokoloba te kasi elimo na Tata na bino ekoloba na nzela na bino.” (Mat. 10:19, 20) Maloba oyo boye mapesaki elikya mingi epai na bayekoli ya liboso ya Yesu. Lelo lisusu, mazali kolendisa baministre ya nsango malamu bamipesi na Nzambe wana ebengami bango mpo na kopesa litatoli liboso na mikonzi. Elingi koloba te ete Baklisto Batemwe ya Jéhovah bazwi na ekamwiseli “liloba na mayele” mpe “liloba na boyebi” lokola ezalaki na bamoko batemwe baklisto na ekeke ya liboso. (1 Bakol. 12:8) Nzokande, tozali koteyama malamu na lisangá ya Nzambe, mpe lokola elakamaki, elimo na Nzambe ezali kokundola biso ndenge tosengeli koyanola.

² Na formation oyo ozwi na boyekoli ya Biblia, na Eteyelo ya mosala ya Nzambe mpe na makita mosusu ya lisangá, motó na yo etondi na boyebi mingi. Oyekoli mitinda ya moboko ya boyengebene mpe ndenge nini okoki kosalela yango na makambo ndenge na ndenge ya bomoi na yo. Na kosangana na yo na mosala ya kosakola, omeseni koloba mpe koteya bato mosusu makambo oyo yo oyebi. Ozali kosala yango na masolo oyo oyebi bobele makanisi to na masolo ya mbalakaka.

3. Likeseni nini ezali kati na diskur oyo oyebi bobele makanisi mpe diskur ya mbalakaka?

³ Atako ezali penepene, nzokande kokesena ezali kati na mitindo oyo mibale ya masolo. Talela ndakisa elandi mpo na koyeba kokesenisa yango. Okei ndako na ndako mpe obandi kolobela moto nsango malamu engebene plan moko ozali na yango polele kati na makanisi na yo. Nzokande, atako oyebi malamu plan na yo, obongisaki maloba ya sikisiki te oyo okosalela mpo na kobimisa makanisi ozali na yango. Lisolo na yo ekozala bongo improvisée to bobele likanisi nde ozali na yango na motó kasi liloba mokomoko te. Nzokande, ekoki kozala ete moto abimisi ntembe to atuni motuna moko, oyo yo oyebaki te ete akotuna mpe omibongisaki mpenza mpo na yango te. Na formation oyo osili kozwa na Salle du Royaume, okokoka kopesa eyano to ndimbola, oyo okotoka yango kati na ebombelo na yo ya boyebi ya Biblia. Eteni oyo ya lisolo na yo ekozala impromptue to ya mbalakaka, elingi koloba okanisi yango mpe olobi yango bobele na ntango wana batuni yo.

4. Ndenge nini tokoki komilengela mpo na kosala diskur bobele na makanisi oyo tozali na yango na motó?

⁴ Diskur oyo oyebi bobele makanisi. Ezala na mosala ya kosakola ndako na ndako to na diskur esalemi liboso ya lisangá mobimba, komilengela ezali fungola mpo na kolonga kati na diskur oyo oyebi bobele makanisi. Mpo na kosala diskur motindo oyo, bongisa naino plan moko ezali na bapwɛ́ mingi oyo olingi kolobela. Na nse ya bapwɛ́ wana, monisa makanisi mikemike, bandakisa, mikapo ya Biblia mpe bilakiseli oyo ekopesa yo nzela na kosala diskur moko oyo mpenza ekoteya bato. Omibongisela nyonso liboso, longola bobele maloba ya sikisiki oyo okosalela.

5-7. Matomba nini mazali na diskur oyo oyebi bobele makanisi na motó?

⁵ Diskur oyo oyebi bobele makanisi ezali na matomba mingi. Moko na yango ezali boye ete ekotikela yo bonsomi ya kokotisa makambo ya sika wana ezali yo koloba. Na diskur motindo oyo, makanisi mazali lokola pike te oyo ekoki kobongwana te, lokola ekozalaka na badiskur oyo esengeli bobele kotangama. Na ntango olingi kobanda koloba, okoki komona makambo oyo makotinda yo ete obongola diskur na yo mwa moke. Na ndakisa, mwa ntango moke liboso ya koleka liboso, okoki koyoka ete bato mingi ya sika bayei mpo na kolanda diskur. Okokoka kobongola diskur na yo mwa moke mpo na kosalisa bango ete basimba ntina na makambo ozali kolobela bango. To mpe, okoki komona ete bilenge mingi bayei mpo na koyoka yo. Na yango, okoki kopona bandakisa oyo ekosalisa bango bamona polele ndenge nini bakoki kosalela kati na bomoi na bango makanisi oyo okoyebisa bango.

⁶ Litomba ya mibale ya diskur oyo oyebi bobele makanisi ezali boye ete ezali kopusa elimo na mosala. Etikeli yo bonsomi ya kokotisa makanisi ya sika wana ezali yo koloba. Mbala mingi, soki bayoki bazali kolanda oratere na mposa nyonso mpe na likebi nyonso, okomona ete makanisi mosusu ekobimela oratere, oyo akolinga kokotisa yango kati na diskur na ye, soki ezali diskur improvisé, elingi koloba ete ayebi bobele makanisi minene.

⁷ Litomba ya misato ya diskur oyo oyebi bobele makanisi ezali boye ete ezali kopesa yo nzela na kotala bayoki na yo mbala na mbala mpe kozala na boyokani ya direk elongo na bango. Bakolanda na likebi nyonso makambo ozali kolimbwela bango. Bakomona ete oyebi malamu lisolo na yo mpo ete ozali kotalatala bankasa te. Okokoka mpe komona mbongwana nyonso na bilongi ya bayoki na yo. Soki omoni ete basepeli mpenza na lisolo na yo te, okoki kokotisa makambo oyo makosepelisa bango. Tomoni ete diskur na makanisi mpamba ekopesa yo nzela na koloba lokola moto azali kosolola na baninga, na móto nyonso mpe na motema polele.

8-10. Wapi mitambo tokoki kozwana na yango mpe ndenge nini tokoki kopengola yango?

⁸ Nzokande, diskur oyo oyebi bobele makanisi ezali mpe na makama na yango, kasi tokoki kopengola yango. Na ndakisa, oratere akoki kooka elengi ya kobakisa makanisi mosusu mingi mpe akoya kolekisa minite bapesaki ye. Na ntango ayoki elengi ya koloba, makanisi ya ndenge na ndenge ezali kobimela ye mpe akoluka kokota na bandimbola milai. Okoki kopengola likama yango soki okokoma na plan na yo baminite oyo opesi na eteni moko na moko ya diskur na yo. Na nsima esengeli na yo kolanda se minite wana.

⁹ Likama mosusu ezali ya kobosana makambo ya ntina, koloba makambo oyo oyebi nyonso te to ezali bongo te, mpe koloba makambo mazangi preve to bilembeteli. Nzokande, soki ozali kotalaka banote na yo mpe okitisi motema, okokoka kolanda plan na yo mpe kopengola motambo ya kobosana makambo mosusu to koloba makambo mazali bongo te. Mpo na oyo etali likama ya koloba makambo mazangi preve to bilembeteli, okoki kopengola yango soki osali plan moko malamu mingi, oyo ezali na bapwɛ́ mingi ya ntina mpe okómi pembenipembeni bapreve na yango mpe mikapo ya Biblia oyo esimbi yango.

¹⁰ Atako diskur oyo oyebi bobele makanisi minene ekosengaka te ete oyekola mpe osimba liloba mokomoko oyo okosalela, ezali malamu ete omekameka kati na elimo na yo bafraze oyo okosalela. Okolonga na yango soki obateli kati na elimo na yo chene ya makanisi oyo okosalela. Na yango okopengola bilobeli oyo bibongi te mpe maloba oyo maponami malamu te. Soki ozali kosala makasi ya koloba malamu mikolo nyonso, okozala na mikakatano mingi te na ntango okosala diskur. Ya solo, okoki kozanga maloba mosusu ya kitoko mpe elobeli na yo to style na yo ekokokana te na oyo ekozalaka na badiskur oyo esengeli bobele kotangama, nzokande bayoki bakotalela mpenza mokakatano oyo te, mpamba te okozala kolobela bango lokola lisolo. Tala diskur na yo mbala mingi liboso ya kosala yango. Mpo na bamoko, ekoki bobele kotanga plan na mongongo ya kokita, kotambwisaka bafraze kati na motó na bango. Nzokande ba oratere mingi bamonaka malamu, mingimingi na kotalela minite epesameli bango, ete bameka badiskur na bango na mongongo makasi.

11, 12. Mpo na nini ebongi malamu ete oratere azala na plan na maboko?

¹¹ Nsima na mikolo mingi mpe komesena, okozala na likoki ya koyeisa plan na yo mokuse, kotika bobele maloba ya ntina oyo makokundola yo bapwɛ́ ndenge na ndenge ya diskur na yo. Okoki kokoma banote yango mpe mikapo ya Biblia na fiche moko to na lokasa moko oyo okoki kotala yango kozanga kobunga. Mpo na badiskur mike, lokola oyo na Eteyelo ya mosala ya Nzambe, bamoko bamonaka malamu kokanga plan na bango na motó. Nzokande mabe moko ezali te soki okozala na plan moko mokuse na maboko mpamba te okoki kobosana likambo to mobulu moko ekoki kobima oyo ekokata chene ya makanisi na yo. Kasi mpo na badiskur minene, lokola diskur piblike, eleki malamu kozala na plan monene oyo ezali na ndimbola mingi na kati, oyo okoki kotalaka yango wana ezali yo koloba.

¹² Koyeba koloba na makanisi oyo ozali na yango na motó ezali eloko na motuya mingi kati na mosala na biso ya ndako na ndako. Mpamba te, soki moto abimisi ntembe to akati biso mpo na ntina mosusu, tokoki kotika naino pembeni makambo oyo tozalaki koloba, mpo na koyanola ye, mpe na nsima kozongela makanisi oyo tobongisaki. Soki nde tokangaki na motó maloba nyonso ya sikisiki ya lisolo na biso, ekozala mpasi na kokata yango mpe kozongela yango na nsima.

13-15. Mabaku nini tokutanaka na yango ya koloba mbalakaka, mpe tokoki kosala nini mpo na komilengela mbangumbangu?

¹³ Diskur ya mbalakaka. Liloba “mbalakaka” elimboli “kozanga kobongisa, kozanga kokana, na mbala moko”. Elingi koloba ete lisolo ya mbalakaka ezali lisolo na likambo oyo oyekola naino yango te? Te, mpamba te mpo na koteya malamu likambo moko, esengeli kozala ete osila koyekola yango. Nzokande, ezalaka na mabaku oyo, kozanga ete bayebisa yo liboso, basengi yo ete oloba na ntina na likambo moko, nzokande omibongisaki mpo na yango te. Ekoki kozala motuna oyo moto atuni yango wana ezali biso koleka ndako na ndako. Libaku motindo oyo ekoki mpe komonana wana ezali biso kozongela bato, to ntango tozali kotambwisa boyekoli ya Biblia na ndako, na kopesaka litatoli ya libaku malamu to ntango tozali kosamba na miso ya magistrat soki mpe mokonzi mosusu ya Leta. Na mabaku motindo oyo, kolandana ya maloba mpe bafraze ekozala ya mbalakaka, nzokande boyebi oyo osili kozwa na nzela na boyekoli na yo na lisangá ya Nzambe ekopesa yo makanisi. Na yango, kati na diskur ya mbalakaka, tozali kosalela makambo oyo toyekola kala, ata toyekolaki yango mpo na libaku oyo emonani te.​—Yis. 50:4.

¹⁴ Soki bayebisi yo, ata etikali bobele mwa minite moke, ete bakosenga na yo osala lisolo moko, mwa batoli oyo elandi ekoki kosalisa yo: ya liboso, pona pwɛ́ moko to pwɛ́ mibale ya minene oyo okolobela; ya mibale, lukela yango bilembeteli mpe mikapo ya Biblia ekokani na yango; ya misato, luka ndenge okobandela, kasi ezala mokuse. Esili yo kosala boye, ozali prêt mpo na koloba. Libaku ekoki kopesamela yo na ndakisa mpo na kosala devuare ya mbalakaka na Eteyelo ya mosala ya Nzambe soki nkolo ya devuare ayei te.

¹⁵ Kati na Makomami tozali kokuta ndakisa ya baministre ya Jéhovah oyo batatolaki mpo na solo na motindo ya mbalakaka. Na ndakisa Bayuda bamemaki Etienne na makasi kino na miso ya Mikóló na Bayuda; kuna batatoli ya lokuta bafundaki ye. Kasi Etienne asalaki diskur moko ya ntina mingi, ya mbalakaka, oyo tokoki kotanga yango na mokapo 7 na mokanda ya Misala. Bato na Atene bakamataki Paulo mpe bamemaki ye na ngomba ya Ale, esika oyo bazalaki koyoka masolo; kuna batunaki ye na ntina na bindimeli na ye. Asalelaki bango lisolo kitoko mpe ya mbalakaka oyo tokoki kotanga yango na Misala, mokapo 17.

16-18. Mpo na nini bandeko bapesameli badevuare basengeli komimesenisa na koloba na makanisi bobele na motó, na esika ete bakanga diskur mobimba na motó?

¹⁶ Lolenge eleki malamu. Mbala mosusu bandeko oyo babandi kosala masolo sika balingaka kokoma makambo nyonso na lokasa mpe kotanga yango. Nzokande, oyo ezali lolenge malamu mpenza te, mpe ebongi ete batika yango noki soki likoki ezali, mpamba te bakokoka kotalaka bayoki na bango te mpe maloba na bango makozala na ton ya lisolo te. Ya solo, mabaku mosusu ezali, oyo esengaka ete moto atanga diskur, kasi programme ya eteyelo ezali mpe na botangi; okoki bongo kosalela libaku wana mpo na komimekisa na kotanga. Nzokande mpo na masolo mosusu, mesena koloba bobele na lisalisi ya mwa banote.

¹⁷ Bandeko mosusu bayekolaka kokanga lisolo mobimba na motó mpo ete balingi kosalela banote te. Nzokande, kosala lisolo mobimba na motó ezalaka na bambeba, mpamba te okozala suple te, okokoka mpe kobatela bomoto na yo te, mpe okoki kobosana makambo ya ntina. Okoki kokanga na motó bobele mwa bafraze ya ntina mingi, na ndakisa maloba ya ebandeli to maloba ya nsuka, nzokande ebongi kosala boye te mpo na diskur mobimba.

¹⁸ Mwango eleki malamu mpo na kosala diskur ezali oyo ya kosimba bobele makanisi ya ntina na motó. Ezali mwango yango tosalelaka kati na mosala ya kosakola, mpe tozali bongo kobongisama mpo na koyeba koloba bobele na makanisi na motó, kozanga komiponela liboso liloba mokomoko. Ezali mpe mwango oyo tosalelaka mingi na makita ya lisangá, mpo ezali kopesa biso nzela na koloba kozanga kotanga mpe na motema nyonso; soki tokolakisa nsango na biso na motindo oyo, tokozwa matomba malamu mingi. Na yango, omimesenisa kosala masolo na yo bobele na makanisi ya ntina na motó. Mpe ata tosengeli koloba mbalakaka na bantango mosusu, tokozala ete tosila kobongama kala, mpamba te Jéhovah azali kobongisa biso libela mpo toyeba koloba bobele na makanisi na motó mpe na mbalakaka. Ndenge nyonso mibale ezali na ntina na yango kati na mosala na biso mpo na Nzambe.