Kosalela plan

BATO mingi babangaka ntango kaka bakanisaka ete basengeli kosalela plan mpo na kosala lisolo na bango. Bamiyokaka malamu soki bakomi makambo nyonso oyo bakoloba to soki bakangi yango na motó.

Nzokande soki totali malamu, mokolo na mokolo, biso nyonso tolobaka kasi tokomaka makambo yango kokoma te. Tolobaka bongo ezala na masolo na biso na kati ya libota to na baninga, ezala na mosala ya kosakola, ezala mpe ntango tosalaka mabondeli na biso na motema mobimba, mpo na biso moko to liboso ya bato.

Bokeseni ezali ntango okomi makambo nyonso oyo okoloba na lisukulu na yo mpe ntango ozali kosalela plan? Atako kosala lisukulu oyo ozali kotánga lokola maniskri ekoki kosalisa yo obimisa mpenza makanisi oyo ebongi mpe opona maloba oyo esengeli, kasi yango esimbaka mpenza mitema ya bato te. Ntango ozali kotánga bafraze mwa mingi, okomona ete obandi kotánga yango mbangumbangu mpe ozali lisusu komatisa to kokitisa mongongo ndenge omeseni kosala yango te ntango osololaka na bato. Soki makanisi na yo nyonso ezali kaka na papye na esika ete ezala epai ya bato oyo bazali koyoka yo, mingi kati na bango bakolanda yo na likebi mpenza te ndenge bakokaki kolanda yo soki bamonaki mpenza ete makanisi na yo nyonso ezali epai na bango mpe ozali kolobela makambo oyo etali bango. Mpo lisolo na yo esimba mpenza mitema ya bato, eleki malamu oloba lokola nde euti mpenza na motema na yo.

Eteyelo ya mosala ya Teokrasi esalemi mpo na kosalisa biso na bomoi na biso ya mokolo na mokolo. Mpo na kosolola malamu na baninga na biso ntango tokutanaka na bango, tobimisaka papye te mpo na kotángela bango makanisi na biso to mpo maloba na biso elandana malamu. Na mosala ya kosakola, tomemaka papye te mpo na kotánga makambo oyo tokoloba na kobanga noki tóbosana makanisi mosusu oyo tolingi koyebisa bato. Ntango ozali kosala lisolo na eteyelo mpo na komonisa ndenge ya kopesa litatoli ntango okutani na likambo boye to boye, salá makasi ete oloba mpenza ndenge omeseni koloba. Soki omibongisi malamu, okomona ete esengeli kaka kosala plan moko, ezala na motó to na papye, mpo obosana te makanisi ya ntina oyo olingi kolobela. Kasi ndenge nini okoki kokóma na momeseno ya kosalela plan?

Tyá makanisi na yo na molɔngɔ. Mpo okoka kosalela plan na lisolo na yo ntango ozali koloba, osengeli kotya makanisi na yo na molɔngɔ. Yango elimboli te ete osengeli kopona maloba oyo okobimisa, kasi ete osengeli nde kokanisa makambo okoloba liboso ya koloba yango.

Tomonaka moto mosusu oyo azalaka mɔ́tɔmɔ́tɔ, akoki kobimisa maloba oyo akanaki te mpe na nsima, amileli ete asengelaki te koloba yango. Bato mosusu balobaka makambo ya malonga te, mpamba te basilisaka likanisi moko te liboso ya koleka na mosusu. Okoki kolonga mikakatano oyo nyonso mibale, soki ozwi ntango ya kofanda mwa kimya mpe kolandisa makanisi na yo malamu na motó, liboso ete obanda koloba. Luká libosoliboso komityela mokano moko; na nsima, poná ndenge makanisi na yo ekolandana mpo okokisa mokano yango mpe na nsuka, bandá koloba.

Ozali komibongisa mpo na mosala ya kosakola? Kosuka kaka te na kobongisa sakosi na yo ya mosala ya kosakola, kasi tyá mpe makanisi na yo na molɔngɔ. Soki oponi kosalela makanisi oyo epesami na Mosala na biso ya Bokonzi, tángá yango nyonso mbala ebele mpo okanga makanisi ya ntina na motó. Tyá makanisi yango ya ntina na fraze moko to mibale ya mikuse. Bongisá yango na maloba na yo moko na kotalela makambo oyo bato ya teritware na bino bazalaka na yango. Okomona ete ezali malamu mingi kozala na plan na yo na motó. Yango esɛngi nini? (1) Mpo na kobanda lisolo na yo, okoki kolobela mwa makambo oyo etungisaka bato ya teritware na yo. Sɛngá moto yango apesa likanisi na ye. (2) Luká kozala na likanisi ya sikisiki oyo okoyebisa moto yango na likambo oyo bozali kolobela; bongisá mpe vɛrsɛ moko to mibale oyo ezali komonisa makambo Nzambe alaki mpo na kobɔndisa bato. Soki likoki emonani, monisá mpenza ete Yehova akosala bongo na nzela ya Bokonzi na ye, elingi koloba boyangeli na ye ya likoló. (3) Lendisá moto yango asalela makambo oyo bolobeli. Okoki kolakisa ye mokanda moko to kosɛnga ye oyekola na ye Biblia mpe bóyokana mikolo oyo bokokutana mpo na kokoba na lisolo yango.

Na ntembe te, plan oyo osengeli kosalela na libaku wana ezali ya papye te, kasi oyo osengeli kokanga na motó. Soki olingi kokoma plan na yo kokoma, boye esengeli kozala kaka na mwa maloba moke oyo okosalela na ebandeli ya lisolo na yo, vɛrsɛ moko to mibale mpe mwa maloba oyo okosalela mpo na kosukisa lisolo na yo. Soki tomibongisi mpe tozali kosalela plan ya ndenge wana, yango ekosalisa biso tóloba makambo ebele ebele te; ekosalisa biso tókɔtisa mpenza na makanisi ya moto wana nsango ya polele oyo tomemeli ye mpe akobosana yango te.

Soki ezali na mituna oyo bato mingi ya teritware na yo batunaka to maloba oyo balobaka mpo na kokata lisolo, ekozala malamu olukaluka na mikanda mpo na koyeba ndenge ya koyanola na yango. Mbala mingi, esɛngaka kaka kobongisa makanisi mibale to misato ya ntina mpe bavɛrsɛ oyo esimbi yango. Okoki kozwa mpenza plan oyo osengeli na yango soki otali mwa buku “Masolo mpo na kosolola na Biblia” to mitó ya likambo moke oyo ekomami na makomi ya moindo makasi na kati ya mokanda Ndenge ya kosolola na bato na Makomami. Okoki mpe komona maloba mosusu ya malamu na mokanda mosusu, oyo olingi kokɔtisa na lisolo na yo. Komá mwa plan moko ya mokuse mpe salá fotokopi ya maloba yango (to komá maloba yango na plan na yo) mpe bombá yango esika moko na mikanda na yo ya mosala ya kosakola. Ntango moto oyo ozali kosolola na ye abimisi motuna yango to ayebisi yo likambo yango mpo na kokata lisolo, yebisá ye ete osepeli mingi na ndenge apesi yo libaku ya komonisa ye ntina oyo tondimaka likambo boye to boye. (1 Pet. 3:15) Salelá plan na yo mpo na kopesa ye eyano.

Ntango oyo osengeli kosala libondeli mpo na libota na yo, mpo na etuluku moko ya boyekoli to mpo na lisangá mobimba, ezali mpe malamu kobongisa makanisi oyo okoloba. Na Luka 11:2-4, Yesu apesaki bayekoli na ye plan moko ya mokuse mpo na kosala libondeli malamu. Ntango bafungolaki tempelo ya Yelusaleme, Salomo asalaki libondeli moko molai. Emonani ete akanisaki likambo yango liboso ya kosala libondeli wana. Alobelaki libosoliboso Yehova mpe elaka oyo apesaki Davidi; na nsima, alobelaki tempelo mpe na nsuka, alobelaki makambo ya sikisiki mpe bato ndenge na ndenge. (1 Mik. 8:22-53) Bandakisa wana ekoki kosalisa biso.

Salá ete plan na yo ezala na mindɔndɔ te. Okosalela plan mpo na kosala lisukulu? Makambo nini osengeli kokoma na plan yango?

Kobosana te ete ntina ya plan ezali ya kosalisa yo obosana makanisi na yo te. Mbala mosusu okomona malamu kokoma mwa bafraze moke oyo okosalela na ebandeli ya lisolo na yo. Kasi nsima na yango, tyá likebi na yo mingi nde na makanisi, kasi na maloba te. Soki ozali kokoma makanisi yango lokola bafraze, salelá bafraze oyo ezali mikuse. Mwa makanisi ya ntina oyo olingi kolobela esengeli komonana polele na kati ya plan na yo. Mpo na yango, okoki kokoma yango na makomi ya minene, kotya mokɔlɔtɔ na nse na yango to kokoma yango na langi mosusu. Na nse ya likanisi mokomoko ya ntina, tyá makanisi oyo olingi kosalela ntango okolobela likanisi yango ya ntina. Tyá bavɛrsɛ oyo okotánga. Ezalaka mpenza malamu mingi kotánga bavɛrsɛ yango na kati ya Biblia yango moko. Komá mpe bandakisa oyo okosalela. Okoki mpe kotya maloba ya bato mosusu oyo ebongi mpenza mpo na lisolo na yo. Salá ete plan na yo ezala na makambo nyonso ya sikisiki oyo okolobela. Ekozala mpasi te mpo osalela plan na yo soki ezali polele mpe na molɔngɔ.

Bato mosusu basalelaka baplan ya mokuse mpenza. Ekoki kozala kaka mwa maloba ya ntina, bavɛrsɛ oyo molobi akoloba maloba na yango kozanga kotánga na Biblia mpe bililingi to bafɔtɔ oyo ekosalisa ye ayeba makanisi oyo akobimisa. Soki molobi azali kosala lisolo na ye na plan ya mokuse, akoki kobimisa makanisi na ye na molɔngɔ mpe koloba ndenge ameseni koloba ntango asololaka na bato. Yango nde ntina ya liteya oyo.

Na lokasa 39 tii na 42 ya mokanda oyo, ezali na lisolo oyo elobi ete: “Ndenge ya kosala plan ya lisolo na yo” Ekozala malamu otánga yango soki basɛngi yo osalela liteya oyo: “Kosalela plan.”

Ndenge ya kosalela plan. Awa, mokano na yo ezali kaka te ya kobongisa plan ya lisukulu na yo, kasi ya kosalela yango malamu mpenza.

Mbala ya liboso oyo okosalela plan na yo, ezali ntango ozali komekameka ndenge ya kosala lisukulu na yo. Talá motó ya likambo monene, tángá likanisi mokomoko ya ntina, mpe yo moko bimisá boyokani oyo ezali kati na likanisi yango mpe motó ya likambo monene. Komá ntango boni okoki kolekisa na likanisi mokomoko ya ntina. Sikoyo zongelá likanisi ya ntina ya liboso mpe yekolá yango. Talelá lisusu makanisi oyo esimbi yango, bavɛrsɛ, masese mpe bandakisa oyo okosalela mpo na kolobela likanisi yango. Zongelá yango mbala mingi tii ntango okoyeba eteni wana malamumalamu. Salá bongo mpo na likanisi mokomoko ya ntina. Talelá mpe makambo oyo okoki kotika mpo olekisa ngonga te. Na nsuka, zongelá lisukulu mobimba. Talelá nde makanisi, kasi maloba te. Kokanga lisukulu na yo nyonso na motó te.

Ntango ozali kosala lisukulu na yo, osengeli kotalaka bato oyo bazali koyoka yo. Nsima ya kotánga vɛrsɛ moko, osengeli koyeba kolimbola yango; mpo na yango, okosalela Biblia, kasi plan na yo te. Ndenge moko mpe, soki osaleli ndakisa moko, lobá yango ndenge olobaka ntango ozali kosolola na baninga na yo, na esika ete otánga yango na plan na yo. Ntango ozali koloba, kotánga fraze mokomoko na plan na yo te. Lobá lokola nde makambo yango euti na motema na yo mpe okosimba mitema ya bato oyo bazali koyoka yo.

Soki oyebi mpenza kosalela plan mpo na koloba, boye ozali mpenza kokende liboso mpo na kokóma moto oyo ayebi koloba liboso ya bato mingi.