Bomoi nsima na liwa motuna oyo bato bayebi koyanola te

“Soki moto akokufa akobika nde lisusu?” (Yobo 14:14). Bato ya mbula nyonso ya bikolo nyonso bazali kososola likoló na motuna oyo Yobo atunaki esili koleka bikeke mingi, mpe bameki kopesa biyano.

Bagreke ya kala bazalaki koloba ete milimo ya bakufi ebikaka nsima na liwa. Ezalaki kokatisa ebale Styx mpo na kokende na Lifelo, bokonzi oyo bozali na nsé na mabelé. Kuna, basambisi bazali kokweisa bango mpo na konyokwama na boloko oyo ezali na bitutu milai, to kolongisa bango mpo na kozwa bolamu oyo boleki kati na champs Elysées (epai kuna milimo ya bilombe mpe ya bato malamu mizali kopema engebene likanisi ya Bagreke). Mabota mosusu bazalaki kokanisa ete milimo ya bakufi ezalaki kokóma minzoto to mpe biloko mosusu bikopesaka pole. Bamosusu bazalaki nkutu koloba ete, milimo mizalaki kongenga mingi mpe ete ebendamaki epai na sanza; wana sanza ezalaki kotonda na kongenga na boumeli ya sanza misato, milimo milekisamaki epai na moi.

Na mikolo na biso mpe lisusu, mateya na ntina etali bomoi nsima na liwa ezali mingi. Ba hindous mpe Babudiste bazali kondima ete moto azalaka lisusu na bomoi nsima na liwa. Ba musulmans bazali koteya ete nzoto nde ekufaka kasi molimo te, mpe ete na ntango ya kosambisama ya nsuka, molimo ekokende na paradis to mpe na lifelo. Mingi na baprotesta bazali kondima ete milimo ya bakufi ezali lisusu na bomoi nsima na liwa mpo na kokende kozwa mbano na likoló to mpe mpo na konyokwama na móto ya lifelo. Na likambo yango, lingomba ya katolike ebakisaki liteya ya limbe mpe epongelo to purgatoire.

Na mikili misusu, bindimeli na ntina etali milimo ya bakufi esangisi mingi mpenza mateya na bonkoko mpe oyo na boklisto ya lokuta. Na ndakisa, na Afrique occidentale, na ntango moto akufi, bakatolike mpe baprotesta bakozipaka kitalatala mpo moto moko te atala yango mpe amona elimo ya mowei. Mikolo ntuku minei nsima na liwa ya moto oyo balingaki mingi, libota na ye mpe baninga bakobongisa feti moko mpo na elambo ya kokende ya molimo na ye na likoló. Na nsima, mingimingi na ntango na Noel, to na Bonané, basangani ya libota bakokende na nkunda mpe bakosopa masanga likoló na nkunda. Bazali nkutu koloba na mowei mpo na kosenga lisalisi epai na ye mpe koyebisa bansango ya libota.

Na lolenge emonani, mangomba makeseni bazali na boyokani te na ntina na oyo ezali kosalema nsima na liwa. Na kokesene, mangomba yango ezali pene na likanisi bobele moko, oyo ete: molimo ekufaka te. Ebele na mateya na ntina na bomoi nsima na liwa ezali bobele bongolabongola likoló na lisolo oyo ya ntina mingi.

Kasi, mituna oyo makasi ezali koya na makanisi: Endimeli ya liteya oyo ete molimo ekufaka te ezwi libandeli na yango wapi? Eteyami nde kati na Makomami? Soki ezali bongo te, ndenge nini ata mpe mangomba na boklisto te ezali koteya yango? Ezali wana mituna oyo esengeli te na kopengola. Ezala bindimeli nini ya lingomba na yo, liwa ezali eloko okoki kopengola te. Tosengi yo na kotalela mituna yango na elimo ezangi koponapona.