Ozali na boyebi nini likoló na Biblia?

‘Mokanda ya Toma ezali solo kati na Biblia? Na ntembe te. Kasi mokanda na Yona ezali kati na yango te. Bongo esika nini Yesu abotamaki? O! ezali na Yelusaleme​—ekoki kozala na Nazarete? Nayebi mpenza te soki mokanda na Yisaya ezali kati na eteni ya yambo ya Biblia to kati na eteni ya mibale. Bantoma bazalaki boni? Nayebi mpenza malamu te.’

KATI na zulunalo Christianity Today, tokokaki kotanga ete: “Likambo na kokamwa ekoki kozala te soko biyano oyo bizwamaki bobele epai na baoyo bazali baklisto te. Kasi oyo ezali kokamwisa​—mpe kotungisa bato—​ezali likambo oyo ya komona ete Makomami mayebani malamu te epai na baklisto babotami sika.”

Totanga mwa bandakisa: 22% ya baklisto ya nkombo mpamba baoyo batunamaki bakanisaki ete mokanda na Toma mozali kati na Biblia, mpe ete 13% bakokaki kopesa biyano ya sikisiki te. Mpo na oyo etali mokanda na Yona, 27% balobaki ete ezali kati na Biblia, mpe 12% balobaki ete bayebaki yango te. 6% bazalaki ata na likanisi moke te likoló na esika oyo Klisto abotamaki, nzokande 16% balobelaki Yelusaleme mpe 8% balobaki ete Nazarete. Koleka 13% bayebaki te esika oyo mokanda na Yisaya mozali kati na Biblia, nzokande 11% balobaki ete ezali na Makomami na greke na boklisto (“Kondimana na Sika”). Wana mingi bayebaki ete bantoma bazali zomi na mibale, 12% ya bato oyo batunamaki bapesaki mituya misusu kobanda na 2 kino koleka 20 mpe 10% bayebaki koyanola te.

Motuna oyo momonanaki makasi ezalaki oyo ya koyeba soko ete lisese “Omibatela yo moko, boye Nzambe akobatela yo” lizwami kati na Biblia to mpe te. Bobele 38% na “baklisto” oyo batunamaki nde bayebaki ete maloba yango mazali kati na Biblia te, nzokande mingi (42%) bakanisaki ete wana ezali maloba ya Biblia. Bamosusu bayebaki te nini basengelaki koyanola.

Zulunalo Christianity Today etuni ete, “Mpo na nini bato bayebi Biblia mingi te?” “Mingimingi ezali mpo ete bato bakotangaka yango mingi te. Ndambo na Baamériké batángaka Biblia te. Mingi na baklisto babotami sika batángaka Biblia bobele mbala moko to mibale na poso, to ata mbala moko te. Ezali likambo na kokamwa te na komona ete baklisto mingi bayebi Makomami te.”