Bomoi na yo ya mikolo mizali koya ésilá kotangama?

SOKI ekomeli yo ete obika na likama ya liwa, okokanisa ete etángamaki bongo ete okobika? To okozala na esengo mpo ntango wana ofandaki na esika malamu?

Moto moko ya mayele salomo alobaki ete: “Nabutwi mpe na moni ete na nse na moi elonga kati na komekama ezali mpo na bato na mbango te, to etumba epai na bato na makasi te, to kwanga epai na bato na mayele te, to mosolo epai na bato na boyebi te, to ngolu epai na bato bameseni na mosala te, nde ntango mpe makambo makanami te makokwela bango nyonso.” (Mosakoli 9:11) Makambo masalemaka mbala mingi lo kola tokokanaka yango te. Na momekano moto oyo amonanaki lokola molongi azoki mpota, mowelani na ye oyo amonanaki lokola akolonga te, azwi elonga. Mikakatano ya mosolo ekoki kokweisa mombongo ya moto moko ya kolongobana, likambo oyo likopesa nzela na mowelani na ye oyo azangi kolongobana na kokoma na bozwi mingi. Kasi Salomo alobaki ete makambo oyo masila kokanama liboso Te. Mazali bobele makambo oyo mazali kobima na “ntango mpe makambo makanami te.

Yesu Klisto mpe amonaki likambo yango. Wana azalaki koloba mpo na likambo moko liyebanaki na bato mingi, atunaki ete: “Bango zomi na mwambe baoyo ndako molai na Siloame ekwelaki bango mpe ebomaki bango, bokanisi ete bango baleki bato nyonso bafandi na Yelusaleme na mabe?” (Luka 13:4) Yesu alobaki te ete likámá oyo ekwelaki bato wana ekanamaki to ezali mokano na Nzambe, akanisaki mpe te ete bato oyo bazwaki likámá bazalaki na mabe koleka bato misusu. Likámá oyo ezalaki bongo ndakisa ya komonisa lolenge nini ntango mpe makambo makanami te ekoki kobima.

Na esika moko te Biblia elobi ete Nzambe asilá kokana mokolo ya liwa na biso. Ezali solo ete Mosakoli 3:1, 2 elobi ete: “Ntango ezali mpo na eloko na eloko, ee, ntango mpo na likambo na likambo na nse na moi: ntango na kobotama mpe ntango na kokufa, ntango na kokona mpe ntango na kopikola yango ekonamaki.” Kasi awa Salomo alobelaki bobele mpo na zongazonga (cycle) ya bomoi mpe liwa oyo ezali konyokola bato bazangi kokoka. Tozali kobotama, mpe na ntango moko, na eleko tokokoma na mbula oyo bato baumelaka awa na mokili​—mbala mingi ezalaka nsima na mibu 70 to 80​—tozali kokufa. Kasi wana lisusu, Nzambe asilá kokana te na liboso mokolo ya liwa na biso, ndenge moko asila kokana na liboso te eleko oyo mosali na bilanga “akolona” to “akobuka oyo ekonamaki.”

Mpo na kobakisa Salomo amonisi epai mosusu ete moto akoki kokufa liboso na ntango: “Zala mabe na koleka te mpe zala zoba te. Mpo na nini okokufa liboso na ntango na yo?” (Mosakoli 7:17) Toli oyo ekoki kolimbola mpenza nini Soki eleko na liwa na biso esila kokanama liboso? Biblia ezali nde kobwaka liteya oyo ete makambo manso masilá kotángama liboso. Bayisraele bapengwi baoyo bandimaki likanisi wana ya Bapakano, bakweisamaki mpenza epai na Nzambe. Yisaya 65:11 (MN) elobi ete: “Nde bino bosili kotika Jéhovah, bobosani ngomba na ngai mosantu, bokotɛmisaka mesa mpo na nzambe na makila malamu mpe bokotondisa kopo na vinyo esangani mpo na nzambe ya makambo masili kotangama.”

Na bongo, ezali nde kozanga mayele na kokanisa ete makambo mabe mpe mpasi oyo makomeli biso esila kokanama to euti na Nzambe ye moko. Biblia elobi ete “Nzambe azali bolingo,” mpe kofunda ye ete azali ntina na mpasi na bato ekotelemela solo mobimba oyo ya moboko.​—1 Yoane 4:8.

Mikano na Nzambe

Tokoki koloba nini mpo na bilikya na biso ya lobiko? Lokola bomoi na biso ekanamá te, tokoki kosukisa ete tosengeli kotambolatambola kozanga mokano kati na bomoi? Te, mpamba te Nzambe asilá kokana bomoi na mikolo mizali koya mpo na bato banso. Biblia elobi mpo na kozalisama ya “mabelé na sika epai kuna boyengebene ekozala.”​—2 Petelo 3:13.

Mpo na kokokisa elaka na ye, Nzambe ye moko asengeli kozwa bikateli na makambo ya bato. Mbala mosusu, na kozanga koyeba, osilá kosambela mpo ete yango esalama bongo na kozongelaka libondeli oyo elobi ete: “Tika bokonzi na yo eya! Tika mokano na yo esalema na nse lokola na likoló.” (Matai 6:10) Bokonzi yango ezali boyangeli ya solo oyo etyami kati na likoló. Na kobondeláká mpo na boyei na Bokonzi yango, ozali kosɛnga ete eya kobotela boyangeli ya mokili na mabɔkɔ na biyangeli ya ntango oyo.​—Danyele 2:44.

Ndenge nini okoki kobongisa bomoi na yo mpo na mikolo mizali koya

Bopusi oyo mbongwana wana ya kokamwa ekozala na yango likoló na bomoi na yo na mikolo mizali koya etali te makambo oyo masilá kotangama liboso, to mpe ntango mpe makambo makanamaki liboso te, kasi etali nzela oyo ozwi likatami ya kolanda. Omikundola lisusu likámá ya liwa oyo libimaki na ndako molai ya Siloame. Yesu asalelaki likambo wana ya mawa mpo na kopesa liteya moko ya motuya koleka. Bato oyo bazwaki likama na ntango ndako molai wana ebukanaki, bazalaki na likoki ya kokima te. Nzokande, bayoki na Yesu bakokaki kokima kobomama oyo ekokomela bato baboyami na Nzambe. Yesu akebisaki bango: “Soki bokobongola mitema te, bino banso bokokufa bobele bongo.” (Luka 13:4, 5) Na elobeli mosusu, bakokaki kozwa ekateli mpo na bomoi na bango na ntango ekoya.

Likoki motindo moko lipesameli biso lelo oyo​—ya kosala makasi mpo na lobiko na biso. (Bafilipi 2:12) Nzambe alingi ete “bato banso babika mpe bakoma na boyebi ya solo.” (1 Timoté 2:4) Ata soki biso nyonso tozali kopusama na eutelo na biso to na makambo oyo tozalaki na yango liboso, Nzambe apesaki biso bonsomi, likoki ya kopona lolenge nini tolingi kosalela bomoi na biso. (Matai 7:13, 14) Tokoki kopona kosala malamu to mabe. Tokoki kozwa lokumu malamu epai na Jéhovah Nzambe mpe kozala na bomoi, to kotelemela ye mpe kokufa.

Bato mingi basepeli kozala na bomoi kozanga kotalela Nzambe. Batye bomoi na bango mobimba na boluki biloko ya mosuni, bisengo to lokumu. Kasi Yesu akebisi biso ete: “Keba mpe senzela na ntina na lokoso nyonso, mpo ete bomoi na moto ezali kati na motuya na biloko bizali na ye te.” (Luka 12:15) Na yango bomoi na biso esimbami na eloko nini? Na 1 Yoane 2:15-17, Biblia elimboli ete: “Bolinga mokili te soko makambo kati na mokili te. . . . Makambo nyonso oyo mazali kati na mokili,​—mposa mabe ya nzoto, mposa mabe ya miso mpe enzombo ya bizaleli​—mauti na Tata te kasi mauti na mokili. Mokili ezali mpe kolongwa mpe mposa mabe na yango lokola, nde ye oyo akosalaka mokano ya Nzambe akoumela seko.”

Pona bomoi

Ndenge nini okoki komindimisa solo ete ozali kosala mpenza mokano na Nzambe? Yesu alobaki ete: “Oyo ezali bomoi na seko: ete bayeba yo Nzambe moko ya solo mpe motindami na yo Yesu Klisto.” (Yoane 17:3) Kondima etongami likoló na boyebi ya solo ya Biblia. “Soko na kondima te ekoki kosepelisa Nzambe te, mpo ete ekoki na babelemi na Nzambe kondima ete azali mpe ete akozongisa libonza epai na bango bakolukaka ye.” (Baebele 11:6) Boyebi oyo ozali na yango mposa ekoki kozwama kozanga nkaka. Ba Témoins de Jéhovah basili kosalisa bamilió na bato na kozwa yango na nzela na boyekoli ya Biblia poso na poso.”

Ekosengela na yo ete osala mwa mbongwana mpo na kosepelisa Nzambe. Osengeli mbala mosusu kotika bizaleli mabe mpe misala ya mbindo. Kasi kolemba te mpamba te kobongwana eleki yo na nguya te. Likanisi oyo ete likambo moko likoki kobongwana te, ezali bobele moko na makanisi oyo mauti na likanisi oyo ete, makambo manso masilá kotángama liboso. Na lisalisi ya Jéhovah, moto nyonso akoki “kobongwana na kozwa makanisi ya sika mpe kozwa “bomoto na sika.” (Baloma 12:2; Baefese 4:22-24) Nzambe akozanga te komona milende oyo ozali kosala mpo na kosepelisa ye. Azali ntango nyonso pene mpo na kopambola baoyo banso bazali kosala mokano na ye.

Yeba ete, koyekola Biblia ekosilisa mikakatano na yo nyonso te. Basaleli na sembo ya Nzambe bazali lokola bato nyonso, oyo bazali kokutana na makámá mpe na makambo ya mawa. Atako bongo, Nzambe akoki kopesa biso mayele oyo ekoki kosalisa biso mpo na kotemela monguna (Yakobo 1:5) Tokozala lisusu na esengo na koyeba ete tozali na boyokani malamu elongo na Nzambe. Masese 16:20 elobi ete “ye oyo akotalela Jéhovah azali na esengo.”

Na kati ya paradis oyo ekozongisama na nse ya Bokonzi na Nzambe, tokomitungisa lisusu te mpo na ntango mpe makambo makanami te. Ya solo, Nzambe akolongola makambo nyonso oyo mazali kobebisa bolamu na bato lelo oyo. Biblia elaki ete: “Akolongola mpisoli nyonso na miso na (biso, mpe kufa ekozala lisusu te, na mawa, na kolela, na mpasi, lisusu mpe te.” (Emoniseli 21:4) Bato mingi bakufa na makama bakosekwa.​—Yoane 5:28, 29.

Okosangola nde bomoi kitoko oyo na mikolo mizali koya? Wana Yisraele elingaki kokota na mabelé ya ndaka, Moïse alobaki na bango ete: “Natii liboso na yo bomoi mpe kufa, lipamboli mpe elakeli mabe, na bongo pona bomoi ete yo na bana na yo bozala na bomoi mpe ete olinga Jéhovah Nzambe na yo na motema na yo mobimba mpe otosa mongongo na ye mpe okangama na ye, mpo ete ye azali bomoi mpe mikolo mingi mpo na yo.”​—Deteronome 30:19, 20.

Te, bomoi na biso esilá kotángama liboso te. Bolamu na biso na mikolo mizali koya, ee, bolamu na biso ya seko ezali kati na maboko na biso. Topona bongo bomoi.