“Mosolo nyonso wana moutaka wapi?”

BAOYO batalaka kasɛti video ya la Société Watch Tower “Les Témoins de Jéhovah — un nom, une organisation” bakamwaka mingi. Bamonaka mibali mpe basi na nzoto kolɔngɔ́nɔ́ ya mposo mpe biutelo ndenge na ndenge, bazali na bilongi ya kofungwana mpe bazali kosala elongo kati na bomoko. Ezali bobele te bankóto ya basáli wana ya esengo nde babendaka likebi na bango kasi mpe ebele ya bandako ya biro monene ya la Société na Brooklyn mpe na bibokwelo na yango ya bibwele na Wallkill, na New York. Kasɛti yango emonisaka ete na kati na bandako yango ezali na bamasini ya sika​—binyateli oyo bisalaka na lombangu mpenza mpe bamasini ya kokangisa babúku oyo ezali kobimisa bamilió ya mikanda sanza na sanza, ebele ya baordinatɛrɛ, misala misusu mingi ya kopesa mabɔkɔ.

Yango ezali komonisa kobimisama ya mosolo mingi. Basusu batunaka ete: “Mosolo nyonso wana moutaka wapi?”

Bato oyo bayaka kotala biro monene ya la Société bakamwaka mpe. Batombolaka mitó na bango mpo na kotala ndako ya kolala oyo ezali na makoló 30, moko kati na bandako mingi yango esalelami mpo na kofandisa basáli ya bolingo malamu 3 000 oyo basalaka kuna. Botali ya Esika monene ya kolakisama ya Watchtower ezali na ntáká ya bakilomɛtɛlɛ soko 110 longwa na Brooklyn ekamwisaka mpe. Atako ezali naino kotongama, basáli 1 200 bazali kofanda mpe kosala kuna. Bakelasi mibale ya bamisionɛrɛ ekobanda kotambwisama kuna mbula na mbula mpe bakotindama na bateritware na bango na mikili mosusu. Ezali uta na esika wana nde litambwisi ezali kopesama na masangá 10 000 ya Batatoli ya Yehova na États-Unis. Na mikolo oyo, bafiliale mingi mpe esili koyeisa minene bandako na yango to bazali sikawa kosala bongo. Mpo na kokokisa misala wana nyonso ezali kosɛnga mosolo mingi mpenza. Bato batunaka ete: “Mosolo nyonso wana moutaka wapi?”

Eyano ezali ete eutaka na bato oyo bazali lokola bato nyonso, lokola mokomoko kati na biso. Bazali bato oyo, kati na mokili mobimba, bazali na mposa ya kosala nyonso oyo ekoki na bango mpo na kotombola mosala ya ntina mingi ya boklisto, mosala ya kosakola mpe ya koteya. Elimo wana ya bolingo malamu ezali na moboko na yango.

Ndakisa oyo Yisalaele ya kala emonisaki

Esili koleka bambula 3 500, mposa ya makabo ya bolingo malamu emonanaki. Yehova asɛngaki na Mose ete atonga mongombo, to “hema na koyangana” mpo ete ekoka kosalelama na ntina na losambo na ye. Malako ya botongi oyo Nzambe apesaki bango esɛngaki kosalela biloko mingi ya motuya. Yehova apesaki etindá ete: “Bókamata na kati na bino makabo mpo na [Yehova]. Soko moto alingi kopesa na motema malamu, mbɛlɛ aya na likabo na [Yehova].” (Exode 35:4-9) Lolenge nini bato bayanolaki? Lisoló liyebisi biso ete “babutwaki, moto na moto na mposa na motema na ye mpe moto na moto akanaki boye na makanisi na ye, bayaki na makabo na [Yehova] mpo na kobongisa hema na koyangana mpe mpo na mosala na yango mpe mpo na bilamba na bulɛɛ.” Mokemoke, ‘makabo ya bolingo malamu’ ekómaki mingi na boye ete ‘elekaki oyo esengelaki mpo na mosala molakelaki [Yehova].’ (Exode 35:21-29; 36:3-5) Oyo nde elimo ya kokaba, ya kofungola mabɔkɔ, oyo bato yango bamonisaki!

Pene na bambula 500 na nsima, libyangi mosusu lipesamaki ete Bayisalaele bafungola mabɔkɔ mpo na kopesa makabo. Mokano oyo Mokonzi Davidi azalaki na yango ya kotonga ndako ya libela mpo na Yehova kati na Yelusaleme ekómaki pene ya kokokisama na nzela ya mwana na ye Salomo. Davidi ye moko ayanganisaki mpe apesaki eteni monene ya makabo oyo esengelaki. Basusu mpe bapesaki makabo na ntango Davidi abimisaki libyangi ya komema “likabo mpo na Yehova.” Yango ebotaki mbuma nini? “Bato basepelaki, mpo ete bapɛsaki na motema malamu, zambi babimisaki makabo na motema mobimba epai na [Yehova]. Mokonzi Davidi mpe asepelaki na esengo monene.” (1 Ntango 22:14; 29:3-9) Palata mpe wolo oyo epesamaki ekómaki na motuya ya pene na 50 miliare ya badolare na mbongo ya lelo!​—2 Ntango 5:1.

Tomoni kati na bandakisa oyo ete moto moko te apusamaki na makasi ete apesa makabo. Ezalaki bobele “na bolingo malamu” mpe “epesamaki na motema mobimba.” Yehova akokaki kosepela bobele na makabo oyo mapesamaki na motema mobimba. Bobele bongo, na ntango libaku ya kopesa mosolo emonanaki mpo na kosunga baklisto oyo bazalaki na bosɛnga na ekeke ya liboso, ntoma Paulo akomaki ete esengelaki kopesama “lokola mpako te.” Abakisaki ete: “Moto na moto asala pelamoko na motema na ye, na mposa moke te mpe na kopusama te.”​—2 Bakolinti 9:5, 7.

Mposa na mikolo na biso

Na mikolo na biso mposa ya kopesa makabo ezali? Ee, ezali mpenza mpe ekozala lisusu mingi koleka na mikolo mizali koya. Mpo na nini?

Baklisto basili kozwa bitindá ya sikisiki mpo na ntango oyo ya nsuka. Yesu apesaki epai na bayekoli na ye etindá oyo ete: “Boye bokende kozalisa bayekoli na mabota nyonso, kobatisa bango na nkombo na Tata mpe na Mwana mpe na [elimo, NW] mosantu, kolakisa mpe bango ete bátosa nyonso esili ngai kolakisa bino. Mpe talá, ngai nazali na bino elongo mikolo nyonso kino nsuka na ekeke.”​—Matai 28:19, 20.

Mpo na kokokisa mosala wana monene ya koteya mpe ya kosakola awa ezali biso sé kobɛlɛma na “nsuka ya ebongiseli ya biloko oyo,” ezali kosɛnga ntango mpe mosolo. Mpo na nini? Mpo na nyonso oyo esɛngami mpo na komema nsango ya Bokonzi ya Nzambe “kino na nsuka na mokili.” (Misala 1:8) Lelo, bato mingi bamipesi te na koyekola Makomami lokola Bayuda ya ekeke ya liboso bazalaki kosala yango. Ya solo, ebele mpenza ya bafándi na mabelé bayebi nkutu Biblia malamu te mpe batalelaka yango te lokola Liloba ya Nzambe. Basakoli basengeli kobongisama mpo na kotindama na bamboka ya mosika. (Baloma 10:13-15) Mpe kanisá naino nkótá boni etalelami kati na mosala yango! Baoyo bateyami bazali na mposa ya Babiblia mpe mikanda mikolimbolaka Biblia mpo na kotánga mpe koyekola na nkóta na bango moko. Mpo na kosakola mpenza epai na bato nyonso, mpe komema bango mokemoke ete bakɔmela na elimo na boye ete bango mpe bákoka kosunga basusu ezali kosɛnga kobongisama monene.​—2 Timoté 2:2.

Kasi Yesu alobaki ete “nsango malamu na bokonzi” esengeli liboso “kosakolama na mokili mobimba lokola litatoli na mabota nyonso, mpe bongo nsuka ekoya.” (Matai 24:14) Na yango, oyo ezali ntango ya kopesa nyonso engebene makoki na biso mpo na kosala mosala wana ya ntina mingi. Bozwi na biso ekoki bongo kosalelama na lolenge malamu mpenza, liboso ete bozwi ya mosuni ezala lisusu na ntina te.​—Ezekiele 7:19; Luka 16:9.

Mosolo yango mokendeke wapi?

La Société Watch Tower ezali kobimisa mikanda oyo mikolimbolaka Biblia na nkótá koleka 230, bakisá mpe na makomi ya bakufi-miso mpe na bilembo ya bimimi na kasɛti video. Yango ezali kosɛnga bituluku ya babongoli mpe babongisi na lokótá mokomoko wana. Kanisá naino kokokisama ya mosala oyo nyonso, bobele mpo na zulunalo Linɔ́ngi ya Mosɛnzɛli oyo ezali kobimisama na nkótá 121 sanza na sanza mpe kati na yango ebimisami na dati moko na nkótá 101, ezali likambo ya kokamwisa mpenza. Kasi ezali na ntina mpo ete bato na mabelé mobimba bákoka kozwa mpe kotánga makambo bobele moko. Mbula na mbula ntálo ya nkasa mpe bisaleli mosusu oyo esalelamaka mpo na kobimisa nsango ya bokonzi kati na mikanda to kati na bakasɛti ya radio to ya video ezali komata. Mosolo wana nyonso mokoki kofutama na kosaleláká makabo oyo eutaka epai na bandeko na biso.

Mosala ya kosakola mpe ya koteya ezali kokokisama kati na bateritware ya masangá koleka 75 000 ya Batatoli ya Yehova kati na mokili mobimba. Mpo na koyanganisa mpe kolendisa bango, bakɛngɛli-batamboli bakendeke kotala lisangá moko moko mbala mibale na mbula. Mayangani mpe ekokisaka mokumba monene mpo na oyo etali kopesa kolakisama. Bisika minene bisengeli kofutelama mpo na mayangani oyo elendisaka mpenza kondima. Makabo na yo masalelami mpe mpo na mokano wana.

Mayangani masalemaka mingimingi mbala misato na mbula, nzokande masangá mayanganaka mbala mitano na pɔ́sɔ. (Kokanisá na Exode 34:23, 24) Koya ya ebele ya bato oyo bazali kondima nsango malamu ezali kosɛnga kobakisama ya bankóto ya masangá. Na lisalisi na bamilió ya badolare oyo ezali kodefisama na nzela ya la Société, bankámá ya Bandako ya Bokonzi ya sika ezali kotongama mbula na mbula, mpe mingi mosusu ezali kozongisama ya sika to koyeisama monene. Atako yango ezali mosolo oyo mozali kokende mpe kozonga mpe kosalelama mbala na mbala, kasi mposa mpe ezali kokóla ntango nyonso.

Mikili epai kuna bokóli ezali monene mpenza ezali bongo bamboka ya Mpótó ya Ɛ́sti oyo ezalaki na nsé ya boyangeli ya ex-Union Soviétique. Tozalaki mpenza na esengo ya koyoka mokemoke nsango ete mosala mofungwamaki kuna na mikili yango! Sikawa bamisionɛrɛ mingi bazali kotindama kati na bamboka wana mingi mpenza. Bafiliale ya sika esili kotongama kati na bamboka mosusu, kobakisáká bongo motango ya basáli ya bolingo malamu ya libota ya Betele na mokili mobimba oyo bakómi koleka 15 000. Ya solo, bandako ya filiale epai basengeli kofanda esengeli kosombama to kotongama. Makabo na bino mazali kosalisa mpo na kokokisa mposa wana.

Mosala nyonso wana ya koteya mpe ya kolakisa nsango malamu emonani polele na miso ya Satana mpe bademó na ye. Bakoki kosala nyonso oyo ekoki na bango mpo na kopekisa milende ya basaleli ya sembo ya Yehova to kobimisela bango mikakatano. (Emoniseli 12:17) Yango elimboli ete tosengeli kosamba mingi mpo na kobatela ntómo ya basaleli ya Nzambe ya kosakola mpe ya komitambwisa engebene mibeko ya sembo ya Nzambe. Lisusu, kobebisama mpo na bitumba, oyo ebongiseli ya biloko ya Satana ezali kobimisa, bakisá mpe makámá mauti na biloko bizalisami, emonisi ete biloko ya lisungi bisengeli kotindama mbala na mbala mpo na bandeko na biso mibali mpe basi oyo bazwi mpasi mpe bazalani na bango. Makabo na bino masungaka mpo na kopesa lisalisi wana ya ntina mingi.

Yehova akopesa yo mbano

Kofungola motema mpo na kopesa ntango mpe bozwi na biso mpo na kotombola mosala ya Nkolo ememaka nkutu mapamboli mingi mpenza. Lolenge nini? Mpamba te Nzambe, oyo biloko nyonso bizali na ye, akopesa biso mbano. Masese 11:25 elobi ete: “Molimo na kokabela akofulisama monene; ye oyo akomema mai akozwa mpe mai mpo na ye moko.” Yehova asepelaka mpenza na ntango tosalaka oyo ekoki na biso mpo ete losambo na ye ekende liboso. (Baebele 13:15, 16) Alakaki epai na Bayisalaele ya kala oyo basengelaki kopesa makabo oyo esɛngamaki na kondimana na Mibeko ete: “[Yehova] na bibele alobi ete, Meká ngai sasaipi na yango, soko nakozipwela bino maninisa na lola te kosopela bino lipamboli kino esika ekozanga mpo na yango.” (Malaki 3:10) Bokóli ya elimo oyo Basaleli ya Yehova bazali na yango lelo oyo ezali elembeteli ete Nzambe azali kokokisa eláká na ye.

Mosala monene oyo ya kosakola epai na bato nyonso mokolo ya kobikisama mpe ya kosalisa bato na motema sembo ete bákota na nzela ya bomoi ekokóba ntango nyonso te. (Matai 7:14; 2 Bakolinti 6:2) Kasi basangani nyonso ya “ebele monene” basengeli koyanganisama. (Yoane 10:16) Tosengeli mpenza kokokisa mokumba monene wana! Mpe mokomoko na biso akozala mpenza na esengo, wana akozala kati na mokili ya sika ya boyengebene mpe na kokanisáká makambo oyo, akoloba ete: ‘Nasanganaki mpenza mobimba kati na mosala wana ya nsuka ya koyanganisa’!​—2 Petelo 3:13.

[Etanda na lokasa 30, 31]

Lolenge basusu bazali kopesa makabo mpo na mosala ya kosakola Bokonzi

MAKABO MPO NA KOSIMBA MOSALA YA MOKILI MOBIMBA: Bandeko mingi bazali kobomba mwa mosolo to bazali kokɔtisa kati na ebongiseli na bango mwa mosolo oyo bazali kotya yango na sanduku ya makabo oyo ezali na likomi: “Makabo mpo na mosala ya la Société na mokili mobimba—Matai 24:14.” Sanza na sanza, masangá mazali kotinda mbongo oyo ezwami na sanduku yango na biro ya la Société na Brooklyn, New York, to na biro ya filiale oyo ezali penepene.

MAKABO: Makabo ya bolingo malamu makoki kotindama mbala moko na Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, to na filiale ya la Société na mokili na bino. Okoki mpe kopesa biloko ya paúni to biloko mosusu ya motuya. Mokanda moko ya mokuse esengeli kokende nzela moko na makabo nyonso mpo na komonisa ete ezali makabo ya bolingo malamu.

MAKABO OYO MAKOKI KOZONGISAMA: Okoki kopesa Watch Tower Society mbongo, oyo ekoki kobatelama kino liwa ya mopesi, oyo akoki komibombela lotómo ya kozwa yango lisusu soki akómi na bosɛngá.

ASSURANCE: Watch Tower Society ekoki kofutelama assurance to kozwa litomba ya mosolo ya pension. Soki ezali bongo, ebongi koyebisa na la Société.

MOSOLO NA BÁNKI: Na mikili misusu, nimero ya kɔnti na bánki, mosolo oyo mobombami mpe mosolo ya epaso oyo mobombami mokoki kofungwama mpo na Watch Tower Society to kotyama na nkombo ya Watch Tower Society na kufa ya moto yango. Soki ezali bongo, ebongi koyebisa na la Société.

LOTÓMO YA MOSOLO: Lotómo ya mosolo ekoki kopesamela Watch Tower Society na lolenge ya makabo ya libela to na kobateláká makoki ya kozwa mosolo yango naino ozali na bomoi.

MAPANGO TO NDAKO: Mapango, ndako to biloko mosusu oyo ekoki kotekama ekoki kopesama na Watch Tower Society; mokabi akoki kopesa yango libela, to akoki kobatela lotómo ya kofanda kati na yango naino azali na bomoi. Liboso na kopesa biloko nyonso na la Société, esengeli koyebisa ye yango.

MOKANDA YA KOPESA LIBULA: Biloko to ndako to mosolo ekoki kopesama na Watch Tower Bible and Tract Society of Pennsylvania na mokanda ya kozwa libula oyo mondimami na mibeko, to tokoki kopesa na la Société lotómo ya kozwa biloko oyo totiki. Biloko oyo bitikami mpo na mangomba bikokitisamaka mpako epai na ye oyo apesameli yango. Kopi moko ya mokanda ya kozwa libula to ya boyokani ya kozwa biloko esengeli kotindama na la Société.

MAKABO MAKANAMI: La Société asili koyanganisa mayebisi matali “Makabo makanami.” Baoyo bazali kokana kopesa likabo ya sikisiki epai na la Société sikawa to kotika libula nsima ya liwa, mayebisi wana makoki kozala na ntina mingi mpo na bango. Yango ezali bongo malamu soki balingi kokokisa mokano moko kati na libota to kokana kotekisa ndako wana bazali kosalela matomba ya mpako oyo ekitisami na motuya ya likabo to libula.

Soki ozali na mposa ya toli na likambo yango, komá na adresi oyo elandi: Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, to na filiale ya la Société oyo ezali penepene na esika ofandi.