“Kumisá Yehova na biloko na yo ya motuya”​—Ndenge nini?

“KUMISÁ [Yehova] na biloko na yo [ya motuya, NW] mpe na mbuma na liboso na bozwi na yo nyonso.” Maloba oyo ya mayele mapemami, makomamaki esili koleka soko mbula 2 600, mazali mafungola mpo na kozwa mapamboli mingi ya Yehova, mpamba te mokomi akóbi komonisa ete: “Boye bibombelo na yo ikotonda maa mpe bikamwelo na yo ikobimisa vinyo na sika mingi mpenza.”​—Masese 3:9, 10.

Kokumisa Nzambe elimboli nini? Biloko nini ya motuya oyo tokokumisa na yango Nzambe? Mpe lolenge nini tokoki kosala yango?

“Kumisá Yehova”

Kati na Makomami, liloba ya sikisiki ya Liebele mpo na kolobela lokumu ezali bongo ka·vohdhʹ, mpe elimboli “kiló.” Na bongo kokumisa moto elimboli kotalela ye lokola ete azali na kiló, na bopusi, to azali na motuya. Liloba mosusu ya Liebele mpo na lokumu, yeqarʹ, ezali mpe kobongolama na “motuya” to “biloko ya motuya.” Motindo moko, liloba ya Greke ti·meʹ, oyo ebongolami na “lokumu” kati na Biblia, ezali kopesa likanisi ya kopesa lokumu, motuya. Boye moto moko akokumisa moto mosusu na komoniseláká ye limemya mozindo mpe kopesáká ye lokumu.

Ezali mpe na lolenge mosusu ya kopesa lokumu. Tálela lisoló ya moyuda ya sembo Moledekai, oyo na libaku moko atɔndɔlaki mwango mabe ya koboma Asueruse, Mokonzi ya ekólo Perse ya kala. Nsima na yango, ntango mokonzi ayokaki ete eloko moko te esalemaki mpo na kokumisa Moledekai mpo na likambo yango, atunaki ministrɛ-mokonzi na ye, Hamana, lolenge nini eleki malamu mpo na kokumisa moto oyo mokonzi asepeli na ye. Hamana akanisaki ete lokumu motindo yango ekopesama na ye, kasi amikosaki! Atako bongo, Hamana alobaki ete moto yango asengeli kolatisama na “bilamba na mokonzi” mpe kotambola na “mbalata oyo mokonzi asili kotambola na yango.” Asukisaki ete: “Tiká mpe ete batambolisa ye likoló na mbalata na nzela monene na mboka naino ezali bango kosakola ete, Ekosalama boye epai na moto oyo mokonzi alingi kokumisa ye.” (Esetele 6:1-9) Na libaku oyo, kopesa moto lokumu elimbolaki kosanzola ye liboso ya bato nyonso mpo ete bápesa ye lokumu.

Motindo moko, ezali na lolenge mibale mpo na kopesa Yehova lokumu: Komonisela ye lokumu koleka kati na bomoi na yo moko mpe kosanzola ye liboso na bato nyonso na kosanganáká mpe na kosimbáká mosala ya kosakola nkombo na ye liboso na bato nyonso.

“Biloko na yo ya motuya”—Bizali nini?

Na ntembe te, biloko na biso ya motuya esangisi bomoi na biso, ntango na biso, makoki na biso, mpe makasi na biso. Ezali boni mpo na bozwi na biso ya mosuni? Tálela maloba ya Yesu ntango amonaki mwasi moko mobola mokufeli mobali kotya mea mibale kati na ebombelo ya mosolo na tempelo. Alobaki ete: “Mwasi oyo mobola aleki bango nyonso na kopesa makabo, mpo ete baoyo nyonso batii mosolo molekaki na bango kati na makabo, nde mwasi oyo na kozanga na ye, atii nyonso ezalaki na ye mpo na kolya.” (Luka 21:1-4) Yesu akumisaki mwasi oyo mokufeli mobali mpo asalelaki bozwi na ye ya mosuni mpo na kotombola losambo ya Yehova.

Na bongo, biloko ya motuya oyo Salomo alobelaki esangisi mpe eloko nyonso ya mosuni oyo tokoki kozala na yango. Mpe maloba “mbuma na liboso na bozwi na yo nyonso” ezali kopesa likanisi ya kopesa Yehova oyo eleki kitoko kati na biloko na biso ya motuya.

Lolenge nini, kopesa biloko ya mosuni ekoki kokumisa Yehova? Biloko nyonso bizali ya ye te? (Nzembo 50:10; 95:3-5) “Biloko nyonso ekoutaka na yo,” Davidi andimaki yango kati na libondeli ya mozindo oyo ye asalaki epai na Yehova. Mpe mpo na makabo mingi oyo ye mpe bato na ye bapesaki mpo na botongi tempelo, Davidi alobaki ete: “Topesi yo bobele biloko na yo moko.” (1 Ntango 29:14) Na yango ntango tozali kopesa makabo epai na Yehova, tozali bobele kozongisa oyo ye, mpo na malamu ya motema na ye, apesaki biso. (1 Bakolinti 4:7) Kasi, ndenge tomonisi yango liboso, kokumisa Yehova esangisi kosanzola ye na miso ya bato mosusu. Mpe makabo ya mosuni oyo mazali kosalelama mpo na botomboli losambo ya solo ezali kokumisa Nzambe. Biblia ezali na bandakisa kitoko ya lolenge oyo ya kokumisaYehova.

Bandakisa ya ntango ya kala

Esili koleka mbula soko 3 500, ntango elaká ekokaki mpo na Yehova ya kopesa hema ya koyangana lokola esika ya losambo kati na mokili mokauki mpo na Bayisalaele, mposa emonanaki mpo na biloko ya motuya ndenge na ndenge, oyo bisɛngamaki mpo na mosala ya Nzambe. Yehova apesaki Mose lilako ete ‘apesa nzela na moto nyonso ya motema malamu amema likabo mpo na Yehova.’ (Exode 35:5) Lisoló ekóbi koloba ete: “Babutwaki, moto na moto na mposa na motema na ye mpe moto na moto akanaki boye na makanisi na ye, bayaki na makabo na Yehova mpo na kobongisa hema na koyangana mpe mpo na mosala na yango mpe mpo na bilamba na bulɛɛ.” (Exode 35:21) Ɛɛ, makabo na bango ya bolingo malamu, epesamaki mingi koleka oyo bazalaki na yango mposa mpo na mosala na boye ete “bato bapekisamaki na kopesa”!​—Exode 36:5, 6.

Tótalela ndakisa mosusu. Ntango hema ya koyangana ekokisaki mokano na yango mpe bibongiseli bizwamaki mpo na botongi tempelo, Davidi apesaki ye moko makabo mingi mpo na tempelo oyo mwana na ye Salomo akotonga. Asalaki mpe libyangi na basusu ete básangana na ye, mpe bato [ya Yisalaele] bapesaki makabo ya biloko ya motuya mpo na Yehova. Bobele motuya ya palata mpe wolo ekokaki kozala soko dolare miliare 50 ya ntango oyo. “Wana bato basepelaki, mpo ete bapesaki na motema malamu.”​—1 Ntango 29:3-9; 2 Ntango 5:1.

“Makabo ya bolingo malamu” na mikolo na biso

Na mikolo na biso lolenge nini tokoki kozwa esengo euti na kopesa makabo ya bolingo malamu? Mosala moleki ntina oyo mozali kosalema na ntango oyo ezali oyo ya kosakola Bokonzi mpe kozalisa bayekoli. (Matai 24:14; 28:19, 20; Misala 1:8) Mpe Yehova amonaki ete ebongi apesa matomba ya Bokonzi, oyo ezali na mabelé, epai na Batatoli na ye.​—Yisaya 43:10.

Emonani polele ete esɛngi mosolo mpo na kosunga mosala oyo Batatoli ya Yehova bazali kosala lelo oyo. Kotonga mpe kobatela Bandako ya Bokonzi, bisika ya mayangani, babiro ya filiale, binyatelo ya mikanda, mpe Babetele ezali kosɛnga mosolo. Lisusu, kobimisa mpe kokabola Biblia mpe mikanda mikolimbolaka Biblia na nkótá ikeseni esɛngaka mpe mosolo. Mosolo oyo mokoutaka wapi? Na nzela na makabo oyo mapesamaka bobele na bolingo malamu!

Makabo mingi koleka mautaka na bato oyo​—bakokani na mwasi mokufeli mobali oyo Yesu amonaki—​bazali bobele na makoki moke. Baboyi kotikala nsima na lolenge wana ya kokumisa Yehova, na bongo bazali kopesa mwa mosolo “engebene makoki na bango mpenza,” mpe na ntango mosusu “koleka makoki na bango.”​—2 Bakolinti 8:3, 4, NW.

Paulo alobaki na baklisto ya Kolinti ete: “Moto na moto asala pelamoko na motema na ye, na mposa moke te mpe na kopusama te; mpo Nzambe alingi ye oyo akopesaka na esengo.” (2 Bakolinti 9:7) Likabo lipesami na esengo esɛngaka kobongisama malamu. Paulo ayebisaki Bakolinti ete: “Na mokolo na yenga, moko na moko na bino akaba mpe abatela eloko ye moko kati na yango esili ye kozwa, ete soko nakoya makabo malukama te.” (1 Bakolinti 16:2) Motindo moko, na nkuku mpe na bolingo malamu, baoyo bazali kolikya kopesa makabo mpo na kotombola mosala ya Bokonzi lelo bakoki kobomba ndambo ya biloko na bango mpo na mokano yango.

Yehova azali kopambola baoyo bazali kokumisa ye

Lokola bozwi ya mosuni yango moko ememaka bozwi ya elimo te, kokaba biloko na biso ya motuya​—ntango na biso, makasi na biso, mpe biloko na biso ya mosuni—​mpo na kokumisa Yehova ekomemela biso mapamboli mingi. Ezali bongo mpamba te Nzambe, oyo biloko nyonso bizali ya ye, andimisi biso ete: “Molimo na kokabela akofulisama monene; ye oyo akomema mai akozwa mpe mai mpo na ye moko.”​—Masese 11:25.

Nsima ya liwa ya Mokonzi Davidi, mwana na ye Salomo asalelaki makabo tata na ye ayanganisaki mpo na kotonga tempelo ya lokumu, lokola Yehova alobaki. Ntango nyonso Salomo atikalaki sembo na losambo na ye epai na Nzambe, “Yuda mpe Yisalaele bafandaki na kimya longwa na Dani kino Bele-seba . . . mikolo nyonso na Salomo.” (1 Mikonzi 4:25) Bibombelo ya biloko bitondaki, bambeki ya vinyo etondaki​—wana Yisalaele ‘azalaki kokumisa Yehova na biloko na ye ya motuya.’

Na nsima, Yehova alobaki na nzela ya mosakoli Malaki ete: “[Yehova] na bibele alobi, meka ngai sasaipi na yango, soko nakozipwela bino maninisa na lola te kosopela bino lipamboli kino esika ekozanga mpo na yango.” (Malaki 3:10) Bozwi ya elimo oyo basaleli ya Yehova bazali na yango lelo ezali elembeteli ete Nzambe azali kobatela elaká na ye.

Yehova azali solo na esengo ntango tozali kopesa mabɔkɔ mpo na kotombola matomba ya Bokonzi. (Baebele 13:15, 16) Mpe azali kolaka ete akosunga biso soki ‘tolandi koluka liboso Bokonzi mpe boyengebene na ye.’ (Matai 6:33) Na esengo monene na motema, tiká ete ‘tókumisa Yehova na biloko na biso ya motuya.’

[Etanda na nkasa 28, 29]

Lolenge basusu bapesaka na bolingo malamu makabo mpo na mosala ya mokili mobimba

Bandeko mingi bazali kobomba mwa mosolo, to bakani kosala bongo, mpe bazali kotya yango na kɛsi ya makabo oyo ekomami likoló ete: “Makabo mpo na mosala ya la Société na Mokili Mobimba​—Matai 24:14.” Sanza na sanza masangá mazali kotinda mbongo yango na biro monene ya la Société na Brooklyn, New York, to na biro ya filiale oyo ezali penepene.

Makabo ya bolingo malamu ya mbongo makoki kotindama mbala moko na Treasure’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, to na biro ya filiale ya la Société na mboka na bino. Okoki mpe kopesa bijoux to biloko mosusu ya motuya. Osengeli kokoma mokanda moko ya mokuse mpo na komonisa ete makabo yango ezali makabo ya bolingo malamu.

Makabo oyo makoki kozongisama

Okoki kopesa Watch Tower Society mbongo, mpe na boyokani ya sipesiale ete soki okómi na bosɛnga, lipesi ekoki kozongisama. Mpo na mayebisi mosusu, komelá Treasurer’s Office na adresi oyo etyami likoló.

Makabo makanami

Longola makabo ya mosolo mbala moko mpe mosolo oyo mopesami na masɛngami, ezali mpe na myango mosusu ya kopesa makabo mpo na matomba ya mosala ya Bokonzi kati na mokili mobimba. Yango esangisi bongo:

Assurance: Watch Tower Society ekoki kofutamela assurance to kozwa litomba na mosolo ya pension. Soki ezali bongo, ebongi koyebisa ebongiseli yango na la Société.

Mosolo na bánki: Na mikili mosusu, kɔ́nti ya bánki, mosolo oyo mobombami mpe mosolo ya epaso oyo moto ye moko abombi yango ekoki kofungwama mpo na Watch Tower Society to kotyama na nkombo ya Watch Tower Society na kufa ya moto yango, na boyokani na masɛngisi ya bánki yango. Soki ezali bongo, ebongi koyebisa la Société mpo na bibongiseli yango.

Lotómo ya mosolo: Lotómo ya mosolo ekoki kopesamela Watch Tower Society, na lolenge ya makabo ya libela to na kobateláká makoki ya kozwa mosolo yango naino ozali na bomoi.

Mapango to ndako: Mapango, ndako to biloko mosusu oyo ekoki kotekama ekoki kopesama na Watch Tower Society, ezala na kopesáká yango libela, to na kobateláká lotómo ya mopesi ya kofanda kati na yango naino azali na bomoi. Yambo ya kopesa biloko yango nyonso na la Société, esengeli koyebisa ye liboso.

Mokanda ya kopesa libula: Biloko to ndako to mosolo ekoki kopesama na Watch Tower Society na lisalisi ya mokanda ya kozwa libula oyo mondimami na mibeko, to la Société akoki kopesama lotómo ya kozwa biloko oyo etikali. Biloko oyo bitikali mpo na mangomba bikokitisamaka mpako epai na ye oyo apesameli yango. Kopi moko ya mokanda ya kozwa libula to ya boyokani ya kozwa biloko esengeli kotindama na la Société.

Lokola liloba “makabo oyo makanami” ezali kolimbola yango, lolenge oyo ya makabo esɛngaka ete mopesi azwa bibongiseli. Mpo na kosalisa bato oyo balingi kopesa makabo na lolenge moko ebongisami, la Société asili kobongisa mwa búku oyo ezali na motó na likambo ete Planned Giving to Benefit Kingdom Service Worldwide (Makabo makanami mpo na mosala ya Bokonzi na mokili mobimba). Mwa búku yango ekomamaki mpo na koyanola na ebele na mituna oyo la Société azwaki na ntina na makabo, mpe mokanda ya kopesa libula. Yango ezali mpe kopesa bandimbola mosusu ya sikisiki likoló na bibongiseli mpo na makabo ya ndako, mosolo, mpe mpako, mpe ezali na mokano ya kosunga baoyo bazali na États-Unis mpe balingi kotombola matomba ya Bokonzi na mokili mobimba na koyeba kopona myango ya matomba koleka mpe oyo ezali kosalelama mpo na kosala na kotaleláká ezalela ya mabota na bango mpe oyo ya bango moko. Nsima wana batángaki mwa búku yango mpe bakutanaki na baoyo bazali kosala na Planned Giving Desk (biro ya kopesa makabo makanami), bato mingi basungaki la Société mpe basili komona litomba ya mwango yango. Mwa búku yango ekoki kopesama soki osɛngi yango, ezala na nkomá to na telefone.

Baoyo basepeli na bibongiseli oyo mpo na kopesa makabo bakoki kosolola na the Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York 12563-9204, telefone (914) 878-7000, to na biro ya la Société oyo ezali na mboka na bango.