Mayangani ya mikili mingi mpo na Batatoli ya Yehova

Lisangani ya Mikóló-Bakambi ya Batatoli ya Yehova ezali kozwa bibongiseli mpo na mayangani ya mikili mingi na boumeli ya mobu 1998. Liyebisi wana liyambamaki na esengo monene na likita ya nsuka ya mbula ya Watch Tower Bible and Tract Society of Pennsylvania, oyo lisalemaki na Ndako ya Mayangani na engumba Jersey City na mokolo ya pɔ́sɔ, mwa 5 Ɔkɔtɔ́bɛ 1996.

Nzela moko na mayangani ya etúká oyo masalemaka mbula na mbula, na bingumba mosusu ya Amerika ya Nɔ́rdi, mayangani ya mikili mingi makosalema na katikati ya mobu 1998. Tozali na elikya ete mayangani wana makosangisa bankóto mingi ya Batatoli oyo bakouta na bisika mingi ya mokili. Mpo na kopesa nzela ete bato ya bamboka mingi mpenza básangana na mayangani yango, mokomoko na bafiliale koleka 100 ya la Société Watch Tower ekotinda motángo mokatami ya bamonisi na mayangani oyo makoponama mpo na bango na Amerika ya Nɔ́rdi.

Na ntembe te, bato nyonso te oyo bazali na mposa ya kosala mobembo na Amerika ya Nɔ́rdi nde bakozwa likoki yango. Nzokande, likoki ekozala mpo na bankóto kati na bango ete bázala na liyangani ya mikili mingi oyo likosalema pene na mboka na bango. Bibongiseli bizali kozwama mpo ete mayangani ya mikili mingi makoka kosalema na mikili mibale to misato ya Mpótó mpe mosusu na Afrika, Asia, na Amérique Latine, na Pasifike ya Súdi, mpe na bisanga ya Caraïbes.

Na ntango ebongi, babiro ya bafiliale ya la Société ekoyebisa masangá ya bateritware na bango engumba to mpe bingumba epai kuna babyangami. Bakoyebisa badati ya mayangani mpe bibongiseli mpo na kopona bamonisi. Baoyo bazali kokana kopesa nkombo na bango mpo na koponama lokola bamonisi bakoki kobanda kobomba mosolo mpo na komilɛngɛla mpo na mabaku wana ya sipesiale.

Batatoli nyonso ya Yehova na mokili mobimba bakoki kozela na esengo makambo mabongisami na mayangani wana ya mikili mingi na mobu 1998. Mayangani ya etúká na mikili nyonso makozala na manáka lolenge moko.