Mayangani oyo ekosangisa bato oyo bakouta na mikili ndenge na ndenge na 2003
NA MOKOLO ya pɔsɔ, mwa 6 Ɔkɔtɔbɛ 2001, likita ya nsuka ya mbula ya basangani ya Watch Tower Bible and Tract Society of Pennsylvania esalemaki na engumba Jersey, na etúká ya New Jersey, na États-Unis. Nsima ya likita wana, basangani na bapaya na bango balandaki likita moko ya ntina mpenza. Na mokolo oyo elandaki, na makita mosusu oyo esalemaki na bingumba minei na Canada mpe na États-Unis, bandeko oyo bazali na Lisangani ya Mikóló-Bakambi ya Batatoli ya Yehova bapesaki liyebisi oyo nsima ya lisukulu ya nsuka:
“Na mikolo oyo ezali koya, ezali na ntina mingi mpenza ete basaleli nyonso ya Nzambe bátika te koyangana elongo. Ntoma Paulo alendisi biso ete tóyanganaka elongo mpe tólendisanaka; tósala bongo koleka lokola mokolo yango ekómi pene. (Baebele 10:24, 25) Yango wana, na ndenge Makomami ezali kosɛnga, na mbula oyo ezali koya [2002] tozali na elikya ete mayangani ya etúká ekosalema bisika ndenge na ndenge na mokili mobimba. Na nsima, soki yango ezali mokano ya Yehova, na mobu 2003 mayangani oyo ekosangisa bato oyo bakouta na mikili ndenge na ndenge ekosalema na mikili mosusu. Oyo ezali ntango ya kolala mpɔngi te kasi ya kosɛnzɛla ntango nyonso, kokanga ntina ya makambo oyo ezali kobima na mokili.”
Atako makambo oyo ezali komonisa ete likambo ya malonga ekozala te na mokili mpe matata ezali se kobakisama lokola ebongiseli ya makambo ya ntango oyo ezali kokende na nsuka na yango, mosala ya basaleli ya Nzambe esengeli kokende liboso. Nsango malamu ya Bokonzi mpe makebisi ya Biblia, esengeli kosakolama na bikólo nyonso, na mikili nyonso, na minɔkɔ nyonso mpe na bisika nyonso, mpo na koyebisa bato ete ‘bábanga Nzambe mpe bápesa ye lokumu mpo ete ntango na ye ya kosambisa eyei.’ (Emoniseli 14:6, 7, NW) Yango wana, bibongiseli ezali kozwama mpo na mayangani oyo ekosangisa bato oyo bakouta na mikili mingi mpo na mobu 2003 mpe ekosalema soki yango ezali mokano mpe mposa ya Tata na biso.
Programɛ ebongisami mpo ete mayangani ya ndenge yango ebanda na mwa ndambo ya bingumba na Amerika ya Nɔrdi mpe mwa moke na nsima, na Mpoto. Na nsima, kaka na 2003, bibongiseli ekozwama mpo na bandeko oyo bakouta bipai mosusu ete básala mobembo na mwa bingumba ya Azia; mpe na nsuka ya mbula, bituluku mosusu ekokende na Afrika, na Amerika ya Sudi, mpe na bisanga ya Pasifike. Bakosɛnga na bafiliale mosusu ete bátinda mwa bandeko na mayangani oyo bakoyebisa bango, kasi likoki ekozala te mpo na kobenga moto nyonso. Atako bongo, ekozala malamu ete mwa bandeko oyo bauti na mikili ndenge na ndenge bázala esika mokomoko.
Etikali moke, bandeko na masangá nyonso ya Batatoli ya Yehova báyeba makambo etali mayangani yango. Bafiliale ya mboka na bango ekoyebisa bandeko oyo bakouta mikili mosusu mwa makambo na ntina etali dati mpe bingumba nini bakokende na mayangani yango. Na bongo, esengeli te ete bókoma to bótuna mituna mpo na likambo yango sikoyo.
Baoyo bakoponama mpo na kokende na mayangani ekozala kaka Batatoli oyo bazwi batisimo, oyo bazali ndakisa malamu mpe oyo bakomonisa bolingo na bandeko na bisika oyo bakokende. Ekozala mpe libaku mpo na bandeko ya bamboka yango bátombela bapaya boyei malamu mpe báyamba bango malamu mpenza. (Baebele 13:1, 2) Yango ekosala ete ‘bálendisana.’ (Baloma 1:11, 12) Bafiliale oyo esɛngami ete bátinda bandeko na ekólo to bikólo mosusu, bakoyebisa makambo mosusu oyo etali bibongiseli yango.
Mpo na mobu 2003, mayangani ya etúká oyo ekoumela mikolo misato ekobongisama na mikili mingi lokola momeseno. Lokola bato bakoyangana esika moko, bakozwa libaku ya ‘koyoka, koyekola, mpe kolendisama.’ (Deteronome 31:12; 1 Bakolinti 14:31) Yango ekopesa basaleli nyonso ya Nzambe libaku malamu ya ‘komeka mpe kososola ete Yehova azali malamu.’ (Nzembo 34:8) Bamisionɛrɛ bakozala na mayangani nyonso oyo bato bakouta na mikili mingi, ezala mpe na mayangani mingi ya etúká, mpe bamosusu kati na bango bakozwa libaku ya koloba.
Na mbula oyo, tokolanda liyangani ya etúká “Basakoli ya Bokonzi ya molende,” oyo ezali kotinda biso na kopesa litatoli mingi koleka. Wana tozali kosala yango, mposa na biso ya komona makambo oyo Yehova abombeli biso na mbula oyo ezali koya ekokóma makasi. Yango ekosalisa biso ete ‘tókɛngɛlaka, tólala mpɔngi te, tómilɛngɛla’ na kotalela eleko ya ntina mingi oyo tozali.—Matai 24:42-44, NW.