Masoló ya Basakoli ya Bokonzi

Kosikolama na bopusi ya bademó

UTA kala mpenza, losambo ya bilimu mabe ezali na bopusi likoló na bomoi ya bamilió ya bato. Kasi likoki ya kosikolama na yango ezali! Ezali yango nde esalemaki na bafandi mingi ya engumba Efese ya kala. Engebene lisoló ya Biblia, “mingi na baoyo basali makambo na nkisi bayanganisi mikanda na bango mpe batumbi yango . . . Na motindo boye Liloba na Nkolo ekólaki mpe elendisami na nguya.”​—Misala 19:19, 20.

Lelo oyo mpe bokóli ezali kosalema na lisangá ya boklisto. Lokola na engumba Efese, kati na baoyo bazali kokóma bandimi ezali na baoyo bazalaki liboso kosalela losambo ya bilimu mabe. Lisoló oyo lilandi liuti na ekólo Zimbabwe ezali komonisa likambo yango.

Gogo (Nkɔkɔ-mwasi) Mthupha ayebanaki mingi mpo na bankisi na ye ya nguya ya bilimu mabe. Bato bazalaki kouta mosika lokola na ekólo Zambie, na Botswana, mpe na Afrika ya Súdi mpo na kozwa lisalisi na nkisi na ye ya bonkɔkɔ. Gogo Mthupha azalaki mpe kolakisa bato mosusu lolenge ya kokóma n’anga, to nganga-nkisi. Mpe bantango mosusu azalaki kolɔka!

Mokolo moko ya lomingo na ntɔ́ngɔ́, Batatoli ya Yehova oyo bazalaki kosakola ndako na ndako bayaki kotala Gogo Mthupha. Asepelaki mingi na lisoló na bango na ntina na elaka ya Biblia mpo na mokili ya sika ya boyengebene, mokili oyo ezangi bopusi mabe. Azwaki búku Okoki kozala na bomoi ya seko na mabele oyo ekobongwana paradis mpe andimaki boyekoli ya Biblia na ndakoa. Nsima ya koyekola bobele mbala misato, abandaki koyangana na makita.

Na nzela ya boyekoli na ye ya Biblia, Gogo Mthupha ayebaki ete nguya oyo azalaki kosalela ezalaki kouta na bikelamu oyo bizali bilimu mabe oyo batombokelaki bokonzi ya Nzambe. (2 Petelo 2:4; Yuda 6) Lisusu, ayekolaki ete bademó yango bazali na mposa makasi ya kopɛngola moto nyonso oyo bakoki kolónga na nzela ya Yehova mpe na losambo ya pɛto. Lokola azalaki kobikela na kobelela bikelamu yango oyo bizali bilimu mabe, asengelaki kosala nini?

Gogo Mthupha amonisaki mposa na ye ya kobwaka bankisi na ye mpe bisaleli na ye ya losambo ya bilimu mabe. Kati na yango ezalaki na biloko ya nsɔ́mɔ ya kolata na motó mpe “maseke ya ngɔmbɛ oyo mazalaki koloba,” oyo azalaki kosalela na mosala na ye ya n’anga mpo na kobikisa bato. Gogo Mthupha alingaki kobwaka biloko yango mpo ete akoka kosalela Yehova, Nzambe bobele moko ya solo mpe ya bomoi.

Nzokande, bandeko na ye mosusu baboyaki mpamba te azalaki kosunga bango na mosolo. Basɛngaki na ye ete apesa bango biloko yango, mpe nguya ya kokamwa oyo azalaki na yango mpo ete bálanda kozwa na yango litomba. Gogo Mthupha aboyaki.

Na lisalisi ya lisangá ya Batatoli ya Yehova ya mboka na bango, ayanganisaki bisaleli na ye ya losambo ya bilimu mabe kati na basaani misato ya minene mpe atumbaki yango nyonso. Wana mɔ́tɔ ezalaki kozikisa biloko na ye ya losambo ya bademó, Gogo Mthupha angangaki ete: “Talá! Liseke oyo, ekoki te komibikisa yango moko.”

Na nsima, na esengo nyonso, Gogo Mthupha amonisaki komipesa na ye na Yehova na kozwáká batisimo ya mai. Azali kobikela na nini sikawa? Na kotekáká ndunda. Ɛɛ, na nzela ya nguya ya Liloba ya Nzambe, moto akoki kosikolama na losambo ya bademó. Gogo Mthupha alobi ete: “Namiyoka naino na bonsomi lokola boye te.”

[Maloba na nse ya lokasa]